1. Obadika nsilu a Yave wazinga yakwele mvu nkia nluta dikututwasila?

 YAVE okutusianga nsilu wambote wa vua “moyo a mvu ya mvu.” (Roma 6:23) Vava tubadikanga muna nsilu wau, o zola kweto muna Yave kuwokelanga. Owau, yindula e diambu edi: O Se dieto dia zulu otoma kutuzolanga ye ke singa kutubembola ko.

2. O nsilu wa moyo a mvu ya mvu aweyi ukutusadisilanga?

² O nsilu a Nzambi wa moyo a mvu ya mvu ukutusadisanga muna zizidila e mpasi. Kana nkutu vava e mbeni zeto bekananga kutuvonda, ke tuyambulanga sadila Yave ko. Ekuma? Kadi tuzeye wo vo, avo tufwidi ye kwikizi muna Yave, oyandi okutufula yo kutuvana e vuvu kia lembi fwa diaka. (Yoa. 5:28, 29; 1 Kor. 15:55-58; Ayib. 2:15) Ekuma tulenda kadila ye ziku vo dilendakana mu zinga yakwele mvu? Badika e kuma ilende.

3. Ekuma tulenda kadila ye ziku vo Yave wafwana kutuvana moyo a mu ya mvu? (Nku. 102:12, 24, 27)

³ Tuzeye wo vo Yave wafwana kutuvana moyo a mu ya mvu, kadi yandi i Nto a moyo ye ozinganga yakwele mvu. (Nku. 36:9) Tala eyaka sono isonganga vo Yave okalanga ye ozinganga yakwele mvu. E sono kia Nkunga 90:2 kivovanga vo, Yave i “Nzambi yamu mvu ya mvu.” E kapu kia Nkunga 102 kiyikanga diambu diau dimosi. (Tanga Nkunga 102:12, 24, 27.) Kabakuke wa ngunza wasoneka mpe mu kuma kia Se dieto dia zulu vo: “E Yave, ke ngeye ko okalanga yamu mvu ya mvu e? E Nzambi ame, e Mvauki ame, ngeye kufwa ko.”—Kab. 1:12.

4. Avo diampasi kwa yeto mu bakula vo Yave ozinganga yakwele mvu, nga ediadi difwete kututokanesa? Sasila.

 ⁴ Nga diampasi dikalanga kwa ngeye mu bakula vo Yave ozinganga “yakwele mvu”? (Yes. 40:28) Kuna kwa wantu ayingi diampasi mpe dikalanga muna bakula e diambu diadi. Eleyu wavova mu kuma kia Nzambi vo: “E mvu miandi ke milendi tangakana ko.” (Yobi 36:26) Ezak’e ntangwa, vena ye mambu ke tutoma bakulanga ko, kansi ediadi ke disongele ko vo e mambu mama ke maludi ko. Kasikil’owu, ayingi mu yeto ke tuzeye ko una e kura isadilanga, nga ediadi disongele vo e kura ke yina ko? Ve kikilu. Diau dimosi mpe, dilenda kala vo ke tutoma bakulanga ko kana mu nkia mpila o Yave kekadilanga yamu mvu ya mvu ye kezingilanga yakwele mvu. Kansi, ediadi ke disongele ko vo o Nzambi ke zinganga ko yakwele mvu. Ozevo, e ludi kia diambu i kiaki, o Mvangi ozinganga yakwele mvu, kiakala vo tubakulanga dio yovo ve. (Roma 11:33-36) Yave ozinganga vitila kavanga e lekwa yawonso muna nsema, kumosi ye ntangwa ye ntetembwa. Yave okutusonganga e ziku vo yandi ‘wavanga o ntoto muna nkum’andi’ ye ozinganga vitila “kayalumuna e zulu.” (Yer. 51:15; Mav. 17:24) Nkia ziku kiankaka tuna kiau kilenda kutufila mu kwikila vo tulenda zinga yakwele mvu?

5. Nkia vuvu Adami yo Eva bakala kiau?

⁵ E ma yawonso ya moyo Yave kavanga ova ntoto, kavanga yo ye kani dia zinga yakwele mvu ko. Kansi avo i wantu, wabavanga ye kani dia zinga yakwele mvu. Yave wavovesa Adami vo: “Vo i bundu kia nti wazayila e mbote ye mbi, kudie kio ko, kadi e lumbu o dia kio fwa ofwa.” (Tuku 2:17) Kele vo Adami yo Eva balemvokela Yave ke badi fwa ko. Ekiaki i kuma kilenda kutufila mu kwikila vo kuna sentu Yave wadikubayambula vo badia “nti a moyo.” Ediadi diadi kubavana lusikidisu vo badi “zinga yakwele mvu.” b—Tuku 3:22.

6-7. (a) Nkia ziku kiankaka kisonganga vo o wantu ke bavangwa ko ye kani dia fwa? (b) Nkia diambu olakukilanga o moyo muna Paradiso? (Tala e fwaniswa.)

⁶ Asatuludi bevovanga vo tomfo tweto tulenda lunda lutangu lwa mambu luviokele mambu mawonso tulenda mona yo wá muna zingu kieto kiawonso o unu. Muna mvu wa 2010, zulunalu imosi yavova vo o tomfo tweto tulenda lunda mambu masongelo mu Televizau mu ola 3.000.000, i sia vo,  mambu ma vioka 300 za mvu. O lutangu lwalu nanga lwakete avo lutezaneso ye lutangu lwa mambu malenda lundwa muna tomfo tweto. Kansi, ediadi disonganga vo Yave wavanga tomfo tweto kimana twalunda lutangu lwa mambu lutila mambu mawonso tulenda mona yo wá muna 70 yovo 80 lwa mvu.—Nku. 90:10.

⁷ Yave mpe watuvanga yo luzolo lwa kwamanana zinga. E Bibila kivovanga mu kuma kia wantu vo Nzambi “osidi nkutu e ngindu za zinga yakwele mvu muna ntima miau.” (Kim. 3:11) Ekiaki i kuma kiankaka kisonganga vo lufwa i mbeni. (1 Kor. 15:26) Avo kimbevo kiangolo tubakamene, nga tudimbula e vuvu yo lembi vanga diambu? Ve. Kansi, nkumbu miayingi tuvavanga dotolo muna wuka kimbevo kieto. Kieleka, tuvanganga mawonso tulenda muna venga lufwa. Avo muntu tutoma zolanga ofwidi, kiakala nleke yovo mbuta, mpasi zayingi dikututwasilanga. (Yoa. 11:32, 33) Tulenda kwamanana kala ye kani dia longoka yakwele mvu yo kala ye luzolo lwa zinga yakwele mvu kadi ediadi i kani o Yave katuvangila. Kieleka, okitula dio se diasazu kimana twazinga yakwele mvu. Kansi, vena ye kuma yayingi ikutukwikidisanga vo tulenda zinga yakwele mvu. Yambula twabadika mana Yave kavanga kuna nz’ankulu ye mana kevanganga owau mesonganga vo e kani diandi diantete ke diasoba ko.

8. E sono kia Yesaya 55:11, adieyi kikutulonganga mu kuma kia kani dia Yave?

⁸ Kana una vo Adami yo Eva basumuka yo sambukisa lufwa kwa wan’au, Yave kasoba  kani diandi ko. (Tanga Yesaya 55:11.) Yave wakinu ye kani diakutuvana e lau diazinga yakwele mvu. Tuna ye ziku kiaki kadi vava tuyindulanga mana kevovanga ye mana kevanganga muna lungisa e kani diandi.

9. Nkia nsilu Nzambi kasia? (Daniele 12:2, 13)

⁹ Yave wasia nsilu vo ofutumuna mafwa yo kubavana e lau dia zinga yakwele mvu. (Mav. 24:15; Tito 1:1, 2) O Yobi wa nkwa kwikizi wazaya wo vo o Yave olakukilanga o moyo wafula awana bafwa. (Yobi 14:14, 15) Daniele wa ngunza wazaya wo mpe vo wantu befulwa yo vewa e lau dia zinga yakwele mvu. (Nku. 37:29; tanga Daniele 12:2, 13.) Ayuda mpe muna lumbu ya Yesu bazaya wo mpe vo Yave ovana o “moyo a mvu ya mvu” kwa selo yandi yakwikizi. (Luka 10:25; 18:18) Yesu mpe nkumbu miayingi wavovelanga o nsilu wau, yandi kibeni mpe wafulwa kwa Se diandi.—Mat. 19:29; 22:31, 32; Luka 18:30; Yoa. 11:25.

10. O lufuluku lwavangama kuna nz’ankulu kia ziku lusonganga? (Tala e fwaniswa.)

¹⁰ Yave i Mvani a Moyo ye una ye nkuma wafula wantu bafwa. Wavana o nkuma wau kwa Eliya mu fula mwana a nkento wa mwisi Sarefate. (1 Nti. 17:21-23) Kuna kwalanda, muna lusadisu lwa Nzambi, Elesa wa ngunza wafutumuna mwana a nkento a Nsuneme. (2 Nti. 4:18-20, 34-37) O tusansu twatu ye twa wantu ankaka ana bafulwa, tusonganga e ziku vo Yave una ye nkuma wafula awana bafwa. Ekolo Yesu kakala ova ntoto, wasonga e ziku vo Se diandi wamvana e wisa kia fula mafwa. (Yoa. 11:23-25, 43, 44) Owau Yesu una kuna zulu ye wavewa e “wisa kiawonso kia zulu ye nza.” Muna kuma kiaki, wafwana mu lungisa o nsilu uvovanga vo, “awonso bena muna ziami” befulwa yo vewa e lau dia zinga yakwele mvu.—Mat. 28:18; Yoa. 5:25-29.

11. Aweyi lukûlu lusadisilanga mu vua moyo a mvu ya mvu?

¹¹ Ekuma Yave kayambulwila vo mwan’andi kafwa lufwa lwa mpasi? Yesu wayika ekuma vava kavova vo: “Kadi muna nzola katoma zola o wantu, o Nzambi i kavanina o Mwan’andi mosi kaka, kimana konso ona osonga lukwikilu muna yandi ke fwaswa ko, moyo a mvu ya mvu kevua.” (Yoa. 3:16) Muna vana Mwan’andi se kimenga muna fuka masumu meto, Nzambi wakitula dio se diasazu kimana twavua moyo a mvu ya mvu. (Mat. 20:28) Paulu wa ntumwa mpe wayika o mfunu wa kani diadi dia Nzambi vava kasoneka vo: “Kadi wauna o lufwa lwayizila muna muntu mosi, o lufuluku lwa mafwa muna muntu mosi mpe lukwizila. Wauna wantu awonso befwilanga muna Adami, awonso muna Kristu mpe i bevuila moyo.”—1 Kor. 15:21, 22.

12. Aweyi Yave kelungisilanga e kani diandi?

¹² Yesu walonga alandi andi vo basambanga kimana e Kintinu kia Nzambi kiza ye o luzolo lwa Nzambi lwavangama ova ntoto. (Mat. 6:9, 10) Dimosi muna kani dia Nzambi i dia sia vo o wantu bazinga yakwele mvu ova ntoto. Muna lungisa e kani diadi, Yave watumbika Mwan’andi se Ntinu muna Kintinu kia Masia. Nzambi okutikanga mpe 144.000 ma wantu ova ntoto, ana beyala kumosi yo Yesu muna lungisa e kani diandi.—Lus. 5:9, 10.

13. Nkia diambu Yave kevanganga owau? Adieyi ofwete vanga?

¹³ Owau, Yave oyikakesanga e “ndong’ayingi” yo kubalonga kimana bayikama e Kintinu kiandi. (Lus. 7:9, 10; Yak. 2:8) Kana una vo tuzingilanga mu nza yavambana mu kuma kia vita yo wonga,  awana bena muna buka kia ndong’ayingi, bevanganga mawonso muna venga e fu yawonso itwasanga e mpambani. Besonganga muna mavangu mau vo bakitula e nsosolo miau se nsengo, i sia vo, ke benuananga diaka vita ko. (Mika 4:3) Vana fulu kia yikama e vita eyi ivondanga ulolo wa wantu, bekukivananga muna sadisa wantu basolola o moyo una vo “moyo kikilu” muna kubalonga oma ma Nzambi aludi ye makani mandi. (1 Tim. 6:19) Wau vo beyikamanga Kintinu kia Nzambi, e yitu yau balenda kubasia e kitantu yovo balenda kondwa e nzimbu, kansi Yave okubasianga o nsilu vo okubasadisa yo kubavana yawonso bavuidi o mfunu. (Mat. 6:25, 30-33; Luka 18:29, 30) O mambu mama mawonso mekutukwikidisanga vo e Kintinu kia Nzambi kina ye kikwamanana vanga mawonso muna lungisa e kani dia Yave.

14-15. O nsilu wa Yave wafokola lufwa yakwele mvu aweyi ulunganena?

¹⁴ Owau Yesu se Ntinu a Kintinu kia Nzambi kuna zulu ovanga mawoso muna lungisa e nsilu miawonso mia Yave. (2 Kor. 1:20) Tuka muna mvu wa 1914, o Yesu oyalanga vakati kwa mbeni zandi. (Nku. 110:1, 2) Yesu ye awana keyala yau ke kolo ko belungisa e nsunda au muna fwasa wantu awonso ambi ova ntoto.—Lus. 6:2.

 ¹⁵ Muna kolo kia Luyalu lwa Yesu lwa Funda dia Mvu, o mafwa mawonso mefuluka. Awana besonga nlemvo bekitulwa se wantu alunga. I bosi, kuna mfoko a lutonto lwansuka awana Yave kebadikila vo “ansongi bevua nza, bezingila vo yakwele mvu.” (Nku. 37:10, 11, 29) Diakiese mu zaya vo “e mbeni a nsuka ofukiswa e mvimba i lufwa.”—1 Kor. 15:26.

16. Nkia diambu disundi o mfunu difwete kutufila mu sadila Yave?

¹⁶ Nze una tulongokele, e vuvu kieto kina muna Diambu dia Nzambi kia zinga yakwele mvu kiaziku. E vuvu kiaki kilenda kutusadisa mu kwamanana sikila ye kwikizi omu lumbu yayi yansuka. Kansi muna yangidika Yave, ke tufwete kala kaka ye luzolo lwa zinga yakwele mvu ko. E kuma kiantete kifwete kutufilanga mu sikila ye kwikizi muna Yave yo Yesu i zola kweto muna yau. (2 Kor. 5:14, 15) Ediadi dikutufilanga muna kubatanginina yo samuna oma ma vuvu kieto kwa akaka yo vema kwawonso. (Roma 10:13-15) Ekolo tuvenganga e fu kia loko yo yima e fu kia mvevo, tukitukanga e mpila wantu ana Yave kazolele vo bakala se akundi andi yakwele mvu.—Ayib. 13:16.

17. Nkia mbebe tuna yau? (Matai 7:13, 14)

¹⁷ Nga tukala vana vena awana bevua o moyo a mvu ya mvu? Yave ovananga e lau diadi kwa wantu awonso. Eyayi i ntangwa tufwete sola diatila muna nzil’a moyo. (Tanga Matai 7:13, 14.) Aweyi ukala e zingu vava tuzinga yakwele mvu? Tubaka e mvutu za kiuvu kiaki muna longi dilanda.