Nga wayangalele tanga malongi mavaikiswa mu mvu wau muna Eyingidilu? Avo i wau, olenda vana e mvutu za yuvu ilende:

Nuvanguluka muna soba e nyindu mieno, e mvovo miami aweyi misongele? (Roma 12:2)

Mayingi divavanga ke zadisa kaka e zingu kiaku ye mambu mambote ko. Divavanga vo twavava zaya e mpila wantu tuna muna kati yo vanga e nsobani kimana e zingu kieto kiakala ngwizani ye nkanikinu mia Nzambi.—w23.01, luk. 8-9.

Aweyi tulenda kadila ye tezo vava tulandanga mana mevangamanga omu nza?

Tuvavanga zaya mambu mevangamanga mu nza una melungisilanga ungunza. Vana fulu kia banzikila mambu muna moko yeto yo fwasa ungudi weto, diambote twasadilanga mana mevaikiswanga mu nkubik’a Yave. (1 Kor. 1:10)—w23.02, luk. 16.

O luvubu lwa Yesu aweyi lwaswaswanena ye luvubu lwa alandi andi?

Wau vo mu zula kia kiyekola kwa Nzambi kawutukila, ke diakala mfunu ko kwa Yesu muna kukiyekola kwa Yave nze una tuvanganga o unu. Yesu muntu alunga kakala, kakala ye sumu ko. Ke diavavanga ko vo kaviluka ntima.—w23.03, luk. 5.

Aweyi tulenda sadisila akaka kimana bavananga e mvutu muna tukutakanu?

Muna vana e lau kwa akaka kimana yau mpe bavana e mvutu, tufwete vananga mvutu zankufi. Tufwete venga vovela mambu mawonso mena muna tini. Muna mpila yayi, vekala ye mambu mana akaka balenda vovela muna mvutu zau.—w23.04, luk. 23.

E “Nzil’a Vauka” tutanganga muna Yesaya 35:8 nki isunzulanga?

Entete, i nzila ina Ayuda bavutukila kuna Yerusaleme vava batuka kuna Babele. Adieyi tuvova mu kuma kia “Nzil’a Vauka” mu lumbu yeto? Tandu yayingi vitila mvu wa 1919, vakala ye salu yasalwanga mu kubika e nzil’a vauka, nze sekola nkanda yo nieteka Bibila ye salu yankaka. O unu nkangu a Nzambi mu “Nzil’a Vauka” bekangalelanga eyi ikubafilanga muna paradiso ya kimwanda, eyi itwasanga e nsambu za Kintinu.—w23.05, luk. 15-19.

Akento wole ana bevananga malongi muna Ngana kapu kia 9 aki nani besunzulanga?

O nkand’a Ngana uvovelanga “nkento a zowa” ona ovananga mboka ifilanga kuna “ziami” ye “ngangu zakieleka” ziyikilwanga vo nkento ona ovananga mboka ifilanga “muna nzil’a umbakuzi” ye nzil’a moyo. (Nga. 9:1, 6, 13, 18)—w23.06, luk. 22-24.

O Nzambi aweyi kasongela lulembamu yo ntim’anleka mu mpila ina kakadila yo Loti?

Yave wavovesa Loti kavaika muna Sodoma yo tinina kuna zunga kia miongo. Loti wadodokela vo katinina kuna Soare, Nzambi watambulwila e ndomba ya Loti.—w23.07, luk. 21.

O nkento adieyi kalenda vanga avo nkaz’andi Pornografia yovo mavangu mansoni ketalanga?

Ke diambote ko muna kuyitumbanga. Kafwete sia e sungididi muna ngwizani andi yo Nzambi yo badikanga tusansu twa akento beyikwanga muna Bibila ana bakala ye ntokani, kansi Nzambi wabafiaulwisa. Olenda sadisa mpe nkaz’andi kayambula e fu kiaki kiambi.—w23.08, luk. 14-17.

Vava tufidiswanga e mpaka mu kuma kia mana tukwikilanga, aweyi ngangu zilenda kutusadisila mu kala yo lulembamu?

Tulenda badikila e kiuvu muntu kayuvuidi yovo mpaka zina katufidisi se lau dia zaya dina keyindulanga yovo dina dikuntokanesanga. Avo tuvangidi ediadi, twakubama tukala muna kumvanina e mvutu kuna lulembamu.—w23.09, luk. 17.

Adieyi tulenda longoka muna Maria mu kuma kia vua o nkuma?

Vava kazaya wo vo o mwana kewuta i Masia, muna vua o nkuma, Maria wavava lusadisu lwa akaka. O Ngambiele yo Elisabete basadila Diambu dia Nzambi muna kasakesa Maria. Yeto mpe tulenda vua nkuma muna lusadisu lwa akweto asambidi.—w23.10, luk. 15.

O Yave aweyi kalenda vanina e mvutu za sambu yeto?

Yave osianga nsilu vo owá e sambu yeto ye ovavanga zaya kana vo ngwizani ina ye kani diandi. (Yer. 29:12) Yave olenda kutuvana e mvutu zaswaswana muna diambu diau dimosi, kansi okutuyikamanga ntangwa zawonso.—w23.11, luk. 21-22.

Muna Roma 5:2 Paulu wavovela “e vuvu.” Ozevo, ekuma kavovela kio diaka muna nzila ya 4?

Vava muntu kewanga nsangu zambote, ovuanga vuvu kiazingila muna paradiso ova ntoto. Kansi, avo owanane ye mpasi yo zizidila zo, ovuanga edienga dia Nzambi. Muna diadi, e vuvu kiandi kikumamanga lutila kuna lubantiku.—w23.12, luk. 12-13.