Paulu wa ntumwa wasonekena Timoteo wa nkwandi nkuluntu vo: “Ikanikini vana ndose a Nzambi yo Kristu Yesu ye mbasi zina zasolwa vo, sadila nkanikinu miami lembi tala ndose yovo sia mpambula.”—1 Tim. 5:21.

Muna kutusadisa twazaya aki nani i mbasi zazi, entete tuvovela e mbasi ke zilendi kala mu buka kiaki ko. Dialudi, 144.000 ma Akristu akuswa ke balendi kala mu buka kia mbasi zazi ko. Kadi vava Paulu kasonekena Timoteo, o lufuluku lwa Akristu akuswa ke lwayantika ntete ko. Muna kolo kiakina, antumwa ye akuswa akaka ke bakituka ntete vangwa ya mianda ko. Muna kuma kiaki, ke yau ko i “mbasi zina zasolwa.”—1 Kor. 15:50-54; 1 Tes. 4:13-17; 1 Yoa. 3:2.

Kuna diak’e sambu, “mbasi zina zasolwa” ke yau ko i mbasi za kolama muna kolo kia Kizalu. E mbasi zazina, zayikama Satana yo kituka se nkuya ye mbeni za Yesu. (Tuku 6:2; Luka 8:30, 31; 2 Pet. 2:4) Kuna sentu, betubwa muna mbilu muna 1. 000 dia mvu, i bosi befwaswa kumosi yo Nkadi ampemba.—Yuda 6; Lus. 20:1-3, 10.

Muna kuma kiaki, e “mbasi zina zasolwa” zilenda kala mbasi za kwikizi kuna zulu ana besalanga kumosi yo “Nzambi yo Kristu Yesu.”

Vena ye mafunda ye mafunda ma mbasi za kwikizi. (Ayib. 12:22, 23) Nanga Yave ke vananga kiyekwa kiau kimosi ko kwa mbasi zawonso. (Lus. 14:17, 18) Sungamena wo vo, lumbu kimosi mbasi mosi kaka wavewa kiyekwa kia vonda 185. 000 makesa ma Asuri. (2 Nti. 19:35) Nanga mbasi zayingi bevewa kiyekwa kia ‘kutakesa muna Kintinu kiandi [Yesu] yawonso itesanga ankaka e sakuba, ye awana bevanganga o umpumbulu.’ (Mat. 13:39-41) Mbasi zankaka nanga belungalakeswa kumosi ye akuswa kuna zulu. (Mat. 24:31) Vo i mbasi zankaka, bekanikinuanga muna ‘kututanina muna nzila zeto zawonso.’—Nku. 91:11; Mat. 18:10; tezanesa ye Matai 4:11; Luka 22:43.

“Mbasi zina zasolwa” beyikwanga muna 1 Timoteo 5:21, nanga i mbasi zina za vewa kiyekwa kiamfunu kia lunga-lunga nkangu a Nzambi. Muna tini ivitidi, Paulu wavana luludiku mu kuma kia akuluntu ana bafwete zitiswanga kwa ampangi muna nkutakani. Vo i akuluntu, bafwete toma lungisanga mbebe au “lembi tala ndose yovo sia mpambula” yo venga fu kia fundisila mu nzaki yovo baka nzengo lembi toma yindula. E kuma kia mfunu kifwete fila akuluntu mu lemvokela luludiku lwa Paulu lwavumunuinua, i kia sia vo, yau besalanga “vana ndose a Nzambi yo Kristu Yesu ye mbasi zina zasolwa.” Ozevo, e mbasi zankaka bevewanga kiyekwa kia sadisa nkutakani, tanina nkangu a Nzambi, kubasadisa muna salu kia samuna e nsangu zambote yo zayisa e nsangu kwa Yave muna mambu mana bemonanga.—Mat. 18:10; Lus. 14:6