NKIA lumbu kisundidi e kiese muna zingu kiaku? Nga i lumbu kina wasompa yovo kina mwan’aku antete kawutuka? Nga i lumbu kina wavubwa? Nanga kiaki i lumbu kisundidi o mfunu ye kiese muna zingu kiaku. Muna lumbu kiakina, mpangi zaku batoma yangalala wau wasonga vo Nzambi ozolanga muna ntima, kiwuntu, ngindu ye ngolo zaku zawonso.—Maku 12:30.

Ka lukatikisu ko vo kiese kiayingi okalanga kiau kia sadila Yave tuka muna lumbu kia luvubu lwaku. Kansi, ateleki ayingi bevidisanga kiese kiau kia sadila Yave. Ekuma? Nkia kuma tuna yau mu kwamanana sadila Yave ye kiese kiawonso?

E nsangu za Kintinu kiese kiayingi zikututwasilanga. Ekuma? E kuma kadi o Yave wasia nsilu vo ke kolo ko e Kintinu kifwasa e nza yayi yambi yo twasa nz’ampa ya Nzambi. Muna Sefaniya 1:14 tutanganga vo: “E lumbu kianene kia Yave kifinamene, kifinamene yo zabuzioka.” Kansi, avo tuyantikidi yindula vo mu zingila kina, tulenda vidisa kiese kieto. Diadi dilenda kutuyoyesa muna salu kia Nzambi.—Ngana 13:12.

Vava tukalanga vamosi ye mpangi zeto, tukasakeswanga mu kwamanana sadila Yave ye kiese kiawonso. E fu yambote besonganga nkangu a Yave nanga yatutunta muna nsambil’aludi yo kutufila mu yantika sadila Nzambi ye kiese. (1 Petelo 2:12) Kansi, adieyi dilenda bwa avo mosi muna mpangi zeto okulwidi nkanikinu mia Nzambi yo vewa e tumbu? Ediadi dilenda kendeleka akaka muna nkutakani yo kubafila mu vidisa kiese kiau.

Luzolo lwa vuama mpe lulenda kutufila mu vidisa kiese kieto. Mu nkia mpila? E nza ya Satana ivavanga kutuvukumuna mu sumba lekwa ina ke tuvuidi kikilu mfunu ko. Muna kuma kiaki, diambote twasungamenanga dina Yesu kavova: “Ke vena muntu ko olenda sadila mfumu zole; kadi omenga mosi yo zola wankaka, yovo otatidila mosi yo bembola wankaka. Ke nulendi sadila Nzambi ye Umvuama ko.” (Matai 6:24) Ke tulendi sadila Yave ye kiese ko ekolo tuvavanga kala ye lekwa yawonso tulenda vua mu nza yayi.

O sadila Yave ke dikalanga zitu ko kuna kw’awana bekunzolanga. (1 Yoane 5:3) Sungamena dina Yesu kavova: “Nwiza kwa mono, yeno awonso nufuntukanga yo bimuka yo mazitu, ikunuvundisa. Nuvuata vangu kiame yo longwa kwa mono, kadi i nlembami yo ntim’anleka, nusolola vundu kia mioyo mieno. Kadi vangu kiame kiambote, e natu diame diavevoka.” (Matai 11:28-30) O kala Nkristu akieleka luvuvamu ye kiese dikututwasilanga. Kieleka, kuma yayingi tuna yau mu kwamanana sadila Yave ye kiese. Yambula twabadika kuma tatu.—Kabakuke 3:18.

 Mvangi eto tusadilanga i Nzambi a kiese. (Mavangu 17:28; 1 Timoteo 1:11) Tuzeye wo vo kwa Mvangi eto tuvuilu. Muna kuma kiaki, tukwamanana kunsadila ye kiese, kana nkutu se mvu miayingi miviokele kala tuka twavubilwa.

Badika mbandu a mpangi Héctor, ona wasadila Yave muna salu kia nkengi a zunga mu 40 ma mvu. Kana nkutu “muna ununu,” wakinu sadila Yave ye kiese kiawonso. (Nkunga 92:12-14) Muna kuma kia kimbevo kia nkaz’andi, ke lendanga diaka sala kwayingi ko muna salu kia Nzambi. Kana una vo i wau, mpangi Héctor kavidisa kiese kiandi ko. Wavova vo: “Kana una vo diankenda mu mona vo kimbevo kia nkaz’ame mu wokela kaka kina ye diampasi mu kunlunga-lunga, kiyambulanga ko vo diadi diakulula kiese kiame kia sadila Nzambi aludi. O zaya vo Yave i Mvangi ame ye kani kakala diau vava kavanga muntu, kuma kiampwena kifwete kumfila mu kunzola yo kunsadila ye nsi a ntima wawonso. Isianga ngolo za kuyivana muna salu kia umbangi yo lembi vilakana e vuvu kia Kintinu. Ediadi dikunsadisanga mu lembi vidisa kiese kiame.”

Yave wakubika kimenga kia lukûlu yo ziula nzila kimana twakala ye zingu kia kiese. Muna Nkand’a Nzambi tutanganga vo: “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.” (Yoane 3:16) Elo, avo tukwikidi muna kimenga kia lukûlu kakubika o Nzambi muna zola kwawonso, masumu meto malenda lolokwa yo kala ye vuvu kia vua moyo a mvu ya mvu. Ekwe kuma kiasikila tuna kiau mu kala ye kiese! Luyangalalu lweto muna lukûlu lufwete kutufila mu sadila Yave ye kiese kiawonso.

Mpangi Jesús wazingilanga kuna México wavova vo: “I mbundu a salu kiame yakala. Ezak’e ntangwa yasalanga lumbu tanu lembi vutuka ku nzo kana una vo ke diau ko diasikidiswa. Yavanganga wo kimana yafutwa nzimbu zayingi. Kuna kwalanda, yalongoka ludi mu kuma kia Yave ye una kavanina Mwan’andi anzolwa muna vuluza wantu. Luzolo lwa kunsadila lwawokela. Muna kuma kiaki, yayekola zingu kiame kwa Yave. Una yasala mvu 28 muna kompani, yabaka e nzengo za yambula sadila muna kompani yo kota muna salu kia ntangwa ke ntangwa. Tuka wauna, mpangi Jesús wayantika sadila Nzambi ye kiese kiawonso.”

Kiese kiayingi tukalanga kiau wau twavelelesa zingu kieto. Nga osungamenanga una wakala zingu kiaku vitila wazaya Yave? Paulu wa ntumwa wasungamesa Akristu kuna Roma vo ‘ntaudi za sumu bakala,’ kansi bakituka se  “ntaudi za unsongi.” Bakala ye vuvu kia vua moyo a mvu ya mvu wau vo bavelelesa zingu kiau. (Roma 6:17-22) Yeto mpe nkanikinu mia Yave tulemvokelanga. Muna kuma kiaki, twavevoka muna mpasi zitwasanga mavangu ma zumba yovo ma nsoki. Diadi kiese kiayingi dikututwasilanga.

Badika nona kia Jaime ona kakwikilanga mu Nzambi ko. Wakwikilanga vo wantu mu nkewa batuka. Bamba-ngolo mpe kakala. Kuna kwalanda, Jaime wayantika kwenda mu tukutakanu twa Mbangi za Yave yo sivika o zola bansonganga. Muna yambula e mpil’a zingu kakala kiau, Jaime wasamba kwa Yave kansadisa kimana kakwikila muna Yandi. Jaime wavova vo: “Malembe-malembe, yayantika bakula vo vena yo Nzambi anzodi ye nkwa nkenda. O lemvokela nkanikinu miansongi mia Yave dikuntaninanga kikilu. Kele vo kiasoba mpil’a zingu kiame ko, nga yafwanga nze una wafwila ayingi muna akundi ame. E mvu mina isadilanga Yave i mvu misundidi e kiese muna zingu kiame.”

Adieyi tufwete vanga ekolo tuvingilanga e mbaninu a nza yayi yambi? Tufwete sungamena vo luzolo lwa Nzambi tuvanganga. Tuna ye vuvu kia vua moyo a mvu ya mvu. “Dianu vo, ke tuyambula vanga edi diambote ko, kadi tukutika muna ntangw’andi, avo tulembi yoya.” (Ngalatia 6:8, 9) Muna lusadisu lwa Yave, yambula twakwamanana zizidila yo sia ngolo za yima e fu ivavuanga mu vuluka muna “mpasi zayingi” yo sadila Yave ye kiese kiawonso.—Lusengomono 7:9, 13, 14; Yakobo 1:2-4.

Tuna ye vuvu vo Yave osinga senda luzindalalu lweto, kadi ozeye salu tukunsadilanga yo zola tusonganga muna yandi ye nkumbu andi. Avo tukwamenene kunsadila ye kiese, tukala nze Davidi wa ntozi a nkunga ona wavova vo: “Nsidi Yave ova ngina ntangwa zawonso: Wau vo oku koko kwame kwalunene i kena, kinikunwa ko. Muna diadi o ntim’ame umwenene kiese, zitu wame ukembele, elo kadi, e nitu ame ivôva.”—Nkunga 16:8, 9.