Mpangi zeto zayingi zamakala ye zamakento, betoma yangalelanga malongi mevaikiswanga yo siwa muna lukaya lwantete muna jw.org, kadi metoma kubasadisanga muna salu kiau kia umbangi. Masazu muna twika mo kwa wantu, kadi nkumbu miayingi mesasilanga una e mambu mevangamanga ova nza mena lungisila ungunza wa Bibila. Nze una mpangi mosi kasoneka, e malongi mesiwanga muna lukaya lwantete muna jw.org, “i mau kikilu tuvuidi o mfunu mu salu kieto kia umbangi, musungula e mpila yampa tusilanga umbangi owau.”

Kansi ntangwa ke ntangwa, malongi mama mekatulwanga yo vingisa malongi mankaka mampa. Ozevo, aweyi olenda sololwela malongi ke mena diaka ko muna lukaya lwantete muna jw.org?

• Vana lukaya lwantete muna jw.org, ziula vana vasonama, “Mambu Mankaka.” O ntu a diambu wau, ukunata vana fulu kiasonama vo, “Mambu Mampa Muna Lukaya Lwantete” ye osolola mo malongi mavaikisu ke kolo ko vana lukaya lwantete muna jw.org.

• Muna jw.org yovo muna JW Library^®, ziula vana vasonama, “Lundilu,” i bosi ziula, “Malongi Mevayikiswanga mu Kunku,” vana fulu kiaki, osolola vo ntu mia mambu mayingi. E ntu mia mambu miami, miasiwa kala muna lukaya lwantete lwa nzil’eto muna internete, jw.org.