Kana una vo i wau, Yave okutulombanga vo twamvingila kuna luzindalalu yavana kevanga diambu muna ntangwa kasikidisa. Ameyi kevavanga kwa yeto? Adieyi dilenda kutusadisa mu kala ye kiese ekolo tuvingilanga?

EKUMA YAVE KAZOLELE VO TWAVINGILA?

Bibila kivovanga vo: “Yave ovingilanga ye luzindalalu lwawonso mu kunusonga e dienga, oyandi otelama kanufwila e nkenda. Kadi o Yave i Nzambi a unsongi. Akwa kiese awonso ana bekumvingilanga ye tima diawonso.” (Yes. 30:18) Yesaya wayika mvovo miami kwa Ayuda akwa ntima miabala. (Yes. 30:1) Kansi, kuna kwa awana batatidila kwikizi kiau, e mvovo miami mia bavana e vuvu. E mvovo miami mpe mivananga e vuvu kwa selo ya Yave ana besikilanga ye kwikizi o unu.

Muna kuma kiaki, yeto mpe tufwete vingilanga kuna luzindalalu kadi Yave mpe ovingilanga. Wasikidisa e ntangwa ina ketwasa lufwasu lwa nza yayi ye ovingilanga yavana lumbu kiaki kifwana. (Mat. 24:36) E ntangwa yayina isonga vo mfundu mia Nkadi ampemba mu kuma kia selo ya Yave mialuvunu. Yave ofwasa emvimba Satana ye awonso bekunyikamanga, kansi oyeto ‘okutufwila e nkenda.’

Ekolo tuvingilanga, Yave ke katulanga mpasi zeto ko, kansi okutuvovesanga vo tulenda kala ye kiese ekolo tuvingilanga. Nze una Yesaya kavova, tulenda kala ye kiese ekolo tuvingilanga lekwa kiambote. (Yes. 30:18) Aweyi tulenda kadila ye kiese? Mambu yá malenda kutusadisa.

AWEYI TULENA KADILA YE KIESE EKOLO TUVINGILANGA?

Kala ye ngindu zasikila. Davidi wa Ntinu, umpumbulu wayingi kamona muna zingu kiandi kiawonso. (Nku. 37:35) Kansi, wavova vo: “Kala pi-i vana vena Yave umvingila kuna luzindalalu. Kutokani ko mu kuma kia ndiona osikidi muna makani mandi mambi.” (Nku. 37:7) Yandi kibeni Davidi walemvokela luludiku lwalu yo sia sungididi kiandi muna vuvu kia luvuluku. Wasianga mpe sungididi muna nsambu zawonso katambulanga kwa Yave. (Nku. 40:5)  Avo tusidi ngindu zeto muna mambu mambote ma zingu kieto yo lembi sia ngindu mu mambu mambi mevangamanga, ediadi dikutusadisa mu kwamanana vingila muna Yave.

Sadila konso lau muna sanisina Yave. O nkunga wa 71 nanga Davidi wasoneka wo. Wavova kwa Yave vo: “Ikwamanana kuvingila; iwokesa lusanisinu lwaku.” (Nku. 71:14) Aweyi kasanisina Yave? Wavovesa mambu ma Yave kwa akaka yo kunyimbidila nkunga. (Nku. 71:16, 23) Nze Davidi, yeto mpe tulenda kala ye kiese ekolo tuvingilanga muna Yave. Tusanisinanga Yave muna salu kieto kia umbangi, muna moko yeto ya lumbu ke lumbu ye muna nkunga mieto mia nsambila. Vava okala ye lau dia yimbila e nkunga, toma sia sungididi muna mvovo ye mpila ina milenda kutwasila e kiese.

Tambula lukasakeso kwa mpangi zaku. Vava Davidi kanuananga ye mambu mampasi, wavovesa Yave vo: “Vana ndose a minkwikizi miaku, isia vuvu muna nkumbu aku.” (Nku. 52:9) Ke tutambulanga kaka lukasakeso lwa mpangi ko muna tukutakanu yovo muna salu kia umbangi, kansi mpe vava tusakananga yau entwadi.—Roma 1:11, 12.

Kumika e vuvu kiaku. Muna Nkunga 62:5 tutanganga vo: “Kwa Nzambi kaka ivingilang’e pi-i. Kadi e vuvu kiame muna yandi kitukanga.” E vuvu kiasikila mfunu kikilu kina musungula vava tuyindulanga vo e mbaninu a nza yayi muzingila ina. Tufwete kakala ye ziku vo e nsilu mia Yave lungana kaka milungana, kiakala nkia kolo divava vo twavingila. Tulenda kumika vuvu kieto muna longokanga Diambu dia Nzambi, yindula una ungunza wa Bibila ulunganenanga ye ngwizani ina muna mambu basoneka asoneki a Bibila. (Nku. 1:2, 3) Tufwete mpe kwamanana lomba “mwand’avelela” kimana watusadisa mu tatidila ngwizani eto yo Yave ekolo tuvingilanga vo nsilu andi wa moyo a mvu ya mvu walungana.—Yuda 20, 21.

Nze Davidi wa Ntinu, tuna ye vuvu vo Yave osianga sungididi kwa awana bevingilanga muna yandi ye okubasonganga walakazi wandi. (Nku. 33:18, 22) Kwamanana vingila Yave kuna luzindalalu muna sianga e sungididi muna mambu mambote ma zingu kiaku, muna kunsanisina, tambulwila lukasakeso lwa mpangi zaku ye kumika e vuvu kiaku.