KINA Kiatatu kia 18 kia Yanuali 2023, vavewa luzayisu muna jw.org lwayika vo mpangi Gage Fleegle yo Jeffrey Winder bakulamene muna Buka kia Selo Yambuta. Yau awole se mvu miayingi besadilanga Yave ye kwikizi kiawonso.

Mpangi Fleegle wasansukila kuna Pennsylvania, Estados Unidos kwa mase bevuminanga Nzambi. Vava kakala nleke, esi nzo andi bayaluka yo kwenda zingila ku vata dimosi kuna kwavuanga ateleki ayingi o mfunu. Ke vavioka kolo kiayingi ko, wavubwa kina kia 20 kia Novemba, 1988.

Mase ma mpangi Fleegle nkumbu miayingi bankasakesanga mu kota mu salu kia ntangwa ke ntangwa. Nkumbu miayingi batambulanga akengi a zunga, esi Betele muna nzo au. Mpangi Fleegle wamonanga vo e mpangi zazi akwa kiese bakala. Ke vavioka kolo ko kuna nim’a luvubu lwandi, wakota mu salu kia kimviti a nzila a ngonde ke ngonde kina kia 1 kia Setemba, 1989. Vioka mvu miole mpangi Fleegle walungisa e kani dina kasikidisa vava kakala ye mvu 12, dia sadila kuna Betele. Muna ngonde a Okutoba ya mvu wa 1991, wayantika sadila kuna Betele.

Kuna Betele, mpangi Fleegle wasadila masini ma nietekena nkanda mu mvu nana, i bosi wasadila kuna Departamento de Serviço. Muna kolo kiakina, wakala muna nkutakani ya nding’a Russo mu mvu miakete. Muna mvu wa 2006, wakazala yo Nadia ona wanyikama mu salu kia Betele. Yau awole, basadila mu nkutakani ya nding’a kimputu ye vioka mvu kumi muna nding’a Espanhola. Mpangi Fleegle wasadila muna Departamento de Serviço mu mvu miayingi. I bosi, wasadila muna Comissão de Ensino, kuna kwalanda, wasadila muna Comissão de Serviço. Muna ngonde ya Malusu ya  mvu wa 2022, wayantika sala se nsadisi a Buka kia Salu kia Selo Yambuta.

Mpangi Winder wasansukila kuna zunga kia Murrieta, California, Estados Unidos. Walongoka e ludi kwa mase mandi yo vubwa kina kia 29 kia Malusu, 1986. Muna ngonde yalanda, wayantika sala se mviti a nzil’a nsadisi. Wau vo watoma yangalela e salu kiaki, wabaka nzengo za kwamanana mu salu kiaki. Vava kasala se mviti a nzil’a nsadisi mu ngonde zayingi, wayantika salu kia kimviti a nzil’a ngonde ke ngonde kina kia 1 kia Okutoba, 1986.

Vava kakala nleke, mpangi Winder wakingula mpangi zandi zole za mbuta ana basadilanga kuna Betele. Nkingula yayina, yansadisa mu kala ye ntima dia sadila kuna Betele vava kekituka se mbuta. Muna ngonde ya Mayu ya mvu wa 1990, wabokelwa kuna Betele ya Wallkill.

Kuna Betele, mpangi Winder wasadila mu departamento zayingi nze Departamento ya Luveleleso, fazenda ye Departamento italanga mambu ma esi Betele. Muna mvu wa 1997, wakazala yo Angela. Tuka muna mvu wauna, besalanga entwadi kuna Betele. Muna mvu wa 2014, bafilwa kuna Betele ya Warwick. Kwakuna, mpangi Winder wavewa kiyekwa kia lunga-lunga e ntungilu a vula diadina. Muna mvu wa 2016, bafilwa kuna Centro Educacional kuna Patterson, kwakuna mpangi Winder osadilanga kuna Departamento ya Audio ye Video. Muna ngonde ya Malusu ya mvu wa 2022, mpangi Winder wakituka se nsadisi a Buka kia Asadi kia Selo Yambuta.

Tusambanga kwa Yave kimana kasambula ‘tukau twatu twa wantu’ ekolo bekwamanananga kukivana muna salu kia Kintinu.—Efe. 4:8.