NGA wabwilwa kala e diambu yo mona vo ke vena muntu ko olenda kusadisa? Wau vo mu ‘lumbu yambaninu yazala ye mpasi ye vonza’ tuzingilanga, tulenda bwilwa mambu mana mekutuyoyesa yo kutufila mu mona vo ke tuna yo nsadisi ko. (2 Tim. 3:1) Kansi, vava tubwilwanga mambu mampasi vena yo wantu balenda kutusadisa. E Bibila kisonganga o mfunu wa kala ye akundi akieleka “mu kuma kia ntangw’ampasi.”—Nga. 17:17.

Paulu wa ntumwa watambula lusadisu kwa akundi andi ana kakangalanga yau muna salu kia kimisionario. (Kol. 4:7-11) Vava Paulu kakala muna pelezo kuna Roma, akundi andi bansadisa muna mambu mana kalendanga vanga ko yandi kibeni. Muna bonga e nona, Epaferodito watwasilanga Paulu e lekwa ina ampangi kuna Filipi bantwikilanga. (Fili. 4:18) Tikiko wanatanga e nkanda mia Paulu muna nkutakani zayingi. (Kol. 4:7) Muna lusadisu lwa akundi andi, Paulu walendanga lungisa e kiyekwa kiandi kana una vo mu pelezo kakala. Aweyi olenda kadila se nkundi akieleka kuna kwa akaka o unu?

O unu, vena ye ampangi besonganga o mfunu wakala se akundi akieleka kuna kwa akaka. Badika mbandu mosi ya mpangi ankento una se nkundi akieleka kwa mpangi Elisabet ona osalanga se mviti a nzil’a ngonde ke ngonde kuna Espanha. Vava ngudi ampangi a Elisabet kasoloka ye kimbevo kia câncer eki ke kiafwana diaka wukwa ko, mpangi ndioyo watwikila mpangi Elisabet sono yayingi ya lukasakeso muna mensagem. Mpangi Elisabet wavova vo: “Vava yamonanga e mensagem miandi, yakalanga ye kiese kiayingi mu zaya vo vena yo muntu okumvuanga o mfunu. Ediadi diankasakesanga mu vanga mana mavavuanga.”—Nga. 18:24.

Tulenda kasakesa akundi eto bena vo Akristu muna kubayikamanga muna salu ya nkutakani. Muna bonga e nona, nga olenda natanga mpangi anunu muna lukutakanu yovo muna salu kia umbangi? Avo ovangidi wo, okala ye lau dia kasakesa muntu yo nkwandi. (Roma 1:12) Kansi, vena ye Akristu akaka ke belendanga vaika muna nzo zau ko. Aweyi tulenda kadila se akundi akieleka kwa mpangi zazi?

Akaka muna mpangi zeto za Akristu benuananga ye mpasi za mayela yovo mambu mankaka mekubakakidilanga mu lungana mantalani muna tukutakanu. Badika e nona kia mpangi David ona wasoloka ye kimbevo kia câncer. Watambulanga mawuku ma quimioterapia se vioka ngonde sambanu. Muna kolo kiakina, mpangi David yo nkaz’andi Lidia muna videoconferência balandilanga tukutakanu.

Nkia lusadisu batambula kwa akundi au a nkutakani? Kuna mfoko a konso lukutakanu, mpangi  zankaka muna Seka dia Kintinu bavanganga e ngolo za mokena yo mpangi David yo Lidia muna videoconferência. Kuna diak’e sambu, vava mpangi David yo Lidia bavananga e nkomena, batambulanga mensagem miayingi mia lukasakeso kwa akwau Akristu. Ediadi nkia nluta diabatwasila? Mpangi David yo Lidia ke bamonanga kinsona kiayingi ko.

Nga tulenda salanga entwadi ye mpangi zazi muna salu kia umbangi? Avo tuvangidi e nsobani muna maka mambu, tulenda songa kwa mpangi zazi bena ye nkakalakani vo ke tukubavilakananga ko. (Nga. 3:27) Nga olenda vaula e ntangwa muna soneka nkanda kumosi ye mpangi zazi yovo sila umbangi muna telefone? Ampangi ana ke belendanga vaika mu nzo ko nanga balenda landila lukutakanu lwa mpaika mu salu kia umbangi muna videoconferência. Mpangi David yo Lidia betoma yangalelanga e nkubika yayi. Mpangi David wavova vo: “Okala kumosi ye mpangi za buka kieto kia mpaika mu salu kia umbangi yo wá e nkomena zankufi ye sambu, ditoma kutukasakesanga.” Ozevo, avo dilendakana nga olenda vanga e nkubika za natanga nlongoki aku ntangwa ke ntangwa kuna nzo ampangi zazi kimana nualongokelanga e Bibila kuna?

Vava tusalanga kumosi ye mpangi zazi yo mona e fu yau yambote dikutufilanga muna toma kubazola. Muna bonga e nona, vava osalanga entwadi ye ateleki awaya muna salu kia umbangi yo mona e ndekwa zau za kotesela e Diambu dia Nzambi muna ntima mia wantu, dikufila mu toma kubafinama. Osalanga entwadi ye mpangi zazi muna salu ya kimwanda dikufila mu kala ye akundi ayingi.—2 Kor. 6:13.

Paulu wavua lukasakeso vava Tito wa nkundi andi kayenda kuntala. (2 Kor. 7:5-7) Diambote mu kasakesanga e mpangi zeto muna mvovo. Kansi, lusansu lwalu lwa Tito lutusungamese vo tulenda fiaulwisa mpe awana bevavanga lusadisu muna kalanga yau entwadi yo vanga mawonso tulenda muna kubasadisa.—1 Yoa. 3:18.

Mpangi zeto kuna Rússia besonganga e mbandu ambote ya salaziana. Badika e nona kia mpangi Sergey yo nkaz’andi Tatyana. Vava mapolisia babangula e nzo au, banatwa muna lumbu lwa mapolisia muna kwenda fimpwa. Mpangi Tatyana wavevolwa yo vutuka kuna nzo. Mpangi Sergey wavova vo: “Vava Tatyana kalwaka kuna nzo, ke vavioka kolo ko mpangi mosi wa nkwa unkabu wayenda kunkingula. I bosi, mpangi zayingi balwaka diaka ye bansadisa muna kubika e nzo eto.”

Mpangi Sergey wavova diaka vo: “Ntangwa zawonso yatoma zolanga e sono kia Ngana 17:17 eki kivovanga vo: ‘Nkundi akieleka ozolanga e ntangwa zawonso i mpangi wawutuka mu kuma kia ntangw’ampasi.’ E mvovo mia sono kiaki mialungana kikilu muna kolo kiakina kia lubangamu yavuanga lusadisu lwa akundi ame o mfunu. Yave okumpananga akundi ana bekalanga yame ntangwa zawonso.” a

Wau vo e mpasi mu wokela kaka zina, lusadisu lwa akundi eto tuvuidi o mfunu. Muna kolo kia mpasi zayingi, lusadisu lwa akundi eto kikilu tuvua o mfunu. Muna diadi, tuvanganga mawonso tulenda kimana twakala se akundi akieleka kuna kwa mpangi zeto tuka owau.—1 Pet. 4:7, 8.