1, 2. (a) Ekuma o bak’e nzengo za vubwa ke dinina diambu dia nsaka ko? (b) Nkia ziku kafwete kala kiau o muntu vitila kavubwa? Ekuma?

NGA u nleke una yo luzolo lwa vubwa? Avo i wau, zaya dio vo diadi lau diampwena kikilu. Nze una twalongokele muna longi diaviokele, o bak’e nzengo za vubwa ke diambu dia nsaka ko. Luvubu lwaku lusonga kw’akaka vo wakiyekwele kwa Yave, i sia vo, wasia nsilu wa kunsadila yakwele mvu. Lusonga mpe vo edi disundidi o mfunu muna zingu kiaku i vanga luzolo lwa Nzambi. Wau vo nsilu wampwena wasia kwa Nzambi, ofwete vubwa kaka avo ozikukidi muna mwanda, wafwana mu bak’e nzengo ngeye kibeni yo zay’e nsas’a kukiyekola kwa Nzambi.

² Kansi, olenda mona vo kuna wafwana ko muna vubwa. Yovo uyimuene vo wafwana muna vubwa, kansi mase maku bavovese vo wavingila yavana olwaka mu ntela yafwana yo zaya mayingi ma zingu. Adieyi ofwete vanga? Vana  fulu kia kendalala, sadila ntangwa yayi muna zikuka yo kuyifwanisa muna luvubu. Olenda kuyisila makani mu mambu tatu: (1) lukwikilu yovo mambu okwikilanga, (2) mavangu maku ye (3) vutulanga matondo kwa Yave.

3, 4. (a) Adieyi aleke balenda longoka muna mbandu a Timoteo?

³ Nkia mvutu olenda vana mu yuvu eyi: Adieyi dikunkwikidisanga vo Nzambi una? Ekuma ngina ye ziku vo Bibila i nkanda watuka kwa Nzambi? Ekuma ilemvokelanga nsiku mia Nzambi vana fulu kia tanginina fu yambi ya nza yayi? E yuvu yayi ilenda kusadisa mu landa longi dia Paulu wa ntumwa, wavova vo: ‘Zaya owu wina luzolo lwa Nzambi, lwambote, lwatondakana ye lwalunga.’ (Roma 12:2) Ekuma ofwete wo vangila?

⁴ E mbandu a Timoteo ilenda kusadisa. Watoma zaya Nkand’a Nzambi kadi o ngudi andi yo nkak’andi banlonga o Nkand’a Nzambi. Kansi, Paulu wavovesa Timoteo vo: “Kala kaka muna mambu walongwa yo kwikidiswa.” (2 Timoteo 3:14, 15) Mu sono kiaki, o mvovo “kwikidiswa” una ye nsasa vo “toma zaya e ziku kia diambu.” Diadi disongele vo Timoteo wakala ye ziku vo e ludi mu Nkand’a Nzambi kina. Watambulwila kio, ke mu kuma kia sia ko vo ngudi andi yo nkak’andi bamvovesa vo kakwikila, kansi mu kuma kia sia vo wafimpanga mana kalongokanga yo kwikila mo.—Tanga Roma 12:1.

5, 6. Ekuma dinina o mfunu mu zaya sadila “umbakuzi” ekolo wakinu nleke?

⁵ Adieyi tuvova mu kuma kiaku? Nanga se mvu miayingi miviokele kala tuka wazayila e ludi. Avo i wau, kala ye kani dia zaya e ziku kia mana okwikilanga. Diadi dikusadisa mu kumika lukwikilu lwaku yo venga baka nzengo zambi mu kuma kia ntonta z’akundi. Dikusadisa mpe mu lembi landa ngindu za nza yovo za ngeye kibeni.

⁶ Avo olongokele sadila “umbakuzi” ekolo wakinu nleke, olenda vana e mvutu muna yuvu ina akundi aku balenda kuyuvula, nze: ‘Nkia ziku una kiau vo Nzambi una? Avo Nzambi okutuzolanga, ekuma keyambulwilanga mambu mambi? Ekuma dinina vo Nzambi kena yo lubantiku ko ngatu nsuka?’ Avo okedi wakubama, e yuvu yayi ke ikutwasila lukatikisu ko, kansi ikukasakesa mu longokanga Nkand’a Nzambi ye sungididi kiawonso.

7-9. Aweyi malongi mena mu Internete muna kunku “O Que a Bíblia Realmente Ensina?” malenda kusadisila mu kala ye ziku kia mana okwikilanga?

⁷ O kalanga ye longi dia ngeye kibeni dilenda kusadisa mu vana e mvutu, vengomona lukatikisu muna ntima yo kala ye ziku kia mana okwikilanga. (Mavangu 17:11) Tuvuidi nkanda miayingi milenda kusadisa mu vanga wo. Ayingi bevuanga lusadisu vava belongokanga finkanda  A Origem da Vida—Cinco Perguntas Que Merecem Resposta yo nkanda Existe um Criador Que Se Importa com Você? Vana ntandu, aleke ayingi beyangalelanga yo vua nluta muna malongi mevaikiswanga muna nzil’eto ya Internete jw.org. mena yo ntu a diambu: “O Que a Bíblia Realmente Ensina?” Olenda solola malongi mama vana fulu kiasonama ENSINOS BÍBLICOS. Konso longi diakubikwa mu kusadisa mu kala ye ziku kia mana Nkand’a Nzambi ulonganga.

⁸ Wau vo Nkand’a Nzambi olongokanga, nanga ozeye mvutu za yuvu yankaka ya malongi mama. Kansi, nga una ziku kia mvutu zaku? Malongi mama mekusadisa mu badika sono yayingi ya Nkand’a Nzambi yo kukasakesa mu soneka e kuma kia mana okwikilanga. Diadi dikusadisa mu zaya una lenda mo toma sasila kw’akaka. Avo Internete osadilanga, olenda sadila malongi mena yo ntu diambu “O Que a Bíblia Realmente Ensina?” muna longi dia ngeye kibeni mu kala ye ziku kia mana okwikilanga.

⁹ Ofwete kuyikwikidisa vo kiaki i ludi. Diadi dikusadisa mu kuyifwanisa muna vubwa. Mpangi mosi ankento wakinu dumbelele wavova vo: “Vitila yavubwa, yalongoka Nkand’a Nzambi yo kuyikwikidisa vo eyayi i nsambil’aludi. Konso lumbu kiviokanga, e ziku kiaki kitoma sikilanga.”

10. Ekuma o Nkristu wavubwa kafwete kadila ye mavangu mena ngwizani ye lukwikilu lwandi?

¹⁰ Nkand’a Nzambi uvovanga vo: “O lukwikilu lwakondwa mavangu, lwafwa.” (Yakobo 2:17) Avo lukwikilu lwasikila una lwau, ofwete lo songelanga muna mavangu. Nze una usonganga Nkand’a Nzambi,  okala ye “nkadilu yavauka ye mavangu ma vumi wa Nzambi.”—Tanga 2 Petelo 3:11.

11. Nki i “nkadilu yavauka”?

¹¹ Nki i “nkadilu yavauka”? Avo nkadilu aku yavauka, okala wavelela. Kasikil’owu, yindula ngonde sambanu ziviokele. Vava watontwa mu vanga edi diambi, nga wasadila umbakuzi mu swaswanesa edi diambote y’edi diambi vitila wabaka e nzengo? (Ayibere 5:14) Nga osungamenanga e lumbu walenda zizidila e ntonta? Vava okalanga kuna sikola, nga mbandu ambote osonganga kw’akaka? Nga osikilanga ye kwikizi muna Yave yovo akundi aku a sikola otangininanga kimana balembi kuseva? (1 Petelo 4:3, 4) Dialudi vo ke vena muntu ko una walunga. Ezak’e ntangwa, kana nkutu awana besadilanga Yave se mvu miayingi, balenda mona e nsoni za sila umbangi kw’akaka. Kansi, ndiona wakiyekola kwa Nzambi, kiese kekalanga kiau kia yikilwa vo Mbangi a Yave yo songa wo muna nkal’andi yavelela.

12. Nki i “mavangu ma vumi wa Nzambi”? Aweyi ofwete mo badikilanga?

¹² Nki i “mavangu ma vumi wa Nzambi”? Mavangu mama i salu osalanga muna nkutakani, nze kwenda mu tukutakanu ye samuna nsangu zambote. Kansi, vena mpe ye salu ina akaka ke bemonanga ko nze, sambu yaku kwa Yave ye longi dia ngeye kibeni. E salu yayi ke ikalanga mpasi ko kuna kwa ndiona wayekola zingu kiandi kwa Yave. Omonanga nze una Davidi wa ntinu kamona, ona wavova vo: “Ovanga luzolo luaku, e Nzambi ame, kwau nyangalele; o nsiku aku wina muna nsi ame a ntima.”—Nkunga 40:8.

13, 14. Nki kilenda kusadisa mu kala ye “mavangu ma vumi wa Nzambi”? Nkia nluta bevuanga aleke ayingi muna sadila babu kiaki?

¹³ Muna kusadisa walungisa makani maku, tala e babu kina muna lukaya lwa 308-309 muna nkanda Os Jovens Perguntam—Respostas Práticas, Volume 2. Muna babu kiaki, olenda soneka e mvutu za yuvu nze yayi: “Nga olombanga mambu masikididi muna sambu yaku?” “Adieyi sambu yaku isonganga mu kuma kia zola kwaku muna Yave?” “Nkia mambu olongokanga muna longi dia ngeye kibeni?” “Nga okwendanga muna salu kia umbangi kana nkutu vo mase maku ke bele ko?” Muna babu kiaki, vena mpe ye fulu olenda soneka makani ozolele lungisa mu kuma kia sambu yaku, longi dia ngeye kibeni ye salu kia umbangi.

¹⁴ Aleke ayingi ana bazolele vubwa bemonanga vo e babu kiaki salanganu kiamfunu kikilu. Nleke mosi una ye nkumbu Tilda, wavova vo: “Yasadilanga e babu kiaki mu lungisa makani mame. Yayantika lungisa kani dimosi dimosi yo vubwa muna mvu walanda.” Nleke ankaka una ye  nkumbu Patrick, diau dimosi mpe kavanga. Wavova vo: “Yazaya makani yakala mau, kansi o soneka mo diansadisa mu sia e ngolo za lungisa mo.”

15. Ekuma e nzengo za kukiyekola kwa Nzambi zifwete kadila za muntu yandi kibeni?

¹⁵ Kimosi muna yuvu ina muna babu i kiaki: “Nga okwamanana sadila Yave kana nkutu vo mase ye akundi aku bayambwidi kunsadila?” Vava oyekola zingu kiaku kwa Yave yo vubwa, ofwete kala ye ngwizani ya ngeye kibeni yo yandi. Muna kuma kiaki, kufwete sadila Yave ko mu kuma kia mase maku ko ngatu muntu ankaka. E nkadilu aku yavauka ye mavangu ma vumina Nzambi mesonga vo okwikilanga vo mu ludi kikilu wina ye ozolele landa nkanikinu mia Nzambi. Muna mpila yayi, osonga vo wafwana muna vubwa.

16, 17. (a) Adieyi difilanga muntu mu kituka Nkristu? (b) Yika e nona kisonganga o mfunu wa vutula matondo mu kuma kia lukûlu?

¹⁶ Lumbu kimosi, muntu mosi watoma zaya Nsiku a Mose wayuvula Yesu vo: “Nkia nkanikinu i wanene muna Nsiku?” Yesu wavutula vo: “Zola Yave wa Nzambi aku muna nsi a ntim’aku yawonso, muna  kiwuntu kiaku kiawonso ye muna nyindu aku wawonso.” (Matai 22:35-37) Yesu wasasila vo zola muna Yave i kufwete fila o muntu mu vubwa yo kituka Nkristu. I mosi muna mpila olenda siamisina o zola kwaku muna Yave, i badikanga o lukûlu luna vo i lukau lusundidi o mfunu kavana o Nzambi kwa wantu. (Tanga 2 Korinto 5:14, 15; 1 Yoane 4:9, 19.) Avo ovangidi wo, okala ye tima dia vutulanga matondo kwa Nzambi mu kuma kia lukau lwalu.

¹⁷ Luyangalalu lwaku muna lukûlu lulenda sasilwa mu mpila eyi: Yindula vo oyantikidi nua nkaki muna nkoko. I bosi, muntu mosi wizidi kuvuluza. Nga ovutuka kuna nzo lembi vova diambu yo vilakana dina muntu ndioyo kavangidi? Ve. E lumbu yawonso ovutula matondo kwa muntu ndioyo ovulwizi moyo aku. Diau dimosi mpe, tufwete tuvulanga matondo kwa Yave yo Yesu mu kuma kia lukûlu. E zingu kieto kwa yau kivuilu. Batuvuluza muna sumu ye lufwa. Wau vo zola bekutuzolanga, tuna ye vuvu kia zingila yakwele mvu muna Paradiso ova ntoto.

18, 19. (a) Ekuma kufwete kadila yo wonga ko wa yekola zingu kiaku kwa Yave? (b) O sadila Yave aweyi dilenda tomesena e zingu kiaku?

¹⁸ Nga ovutulanga matondo muna dina Yave kavanga mu kuma kiaku? Avo i wau, o yekola zingu kiaku kwa Nzambi yo vubwa i diambu diambote mu vanga. O kukiyekola i nsilu osia kwa Nzambi vo ozolele kunsadila yakwele mvu. Nga ofwete kala yo wonga wa sia nsilu wau? Ve. Yave wete diaku kazolele. Osinga senda awonso bevanganga luzolo lwandi. (Ayibere 11:6) Avo oyekwele zingu kiaku kwa Nzambi yo vubwa, kubanzi ko vo mu sokolo uyisidi, e zingu kiaku toma kitoma. Mpangi mosi una ye kimbuta kia mvu 24, ona wavubwa vitila kalungisa mvu 12, wavova vo: “Zayi wayingi yadi kala wau kele vo yavingila yavana yadi lwaka muna kimbuta, kansi o bak’e nzengo za kukiyekola kwa Yave zantanina muna lembi vukumukina mambu ma nza yayi.”

¹⁹ Yave wete diaku kazolele. Kansi, o Satana nkwa loko, ke kuvuanga mfunu ko. Avo unlende, kena ye má kiambote ko kalenda kuvana. Aweyi kekuvanina lekwa kina kena kiau ko? Kena ye nsangu zambote ko, kena mpe ye vuvu ko. Eki kaka kalenda kuvana i lufwasu, kadi i diau dinkumvingilanga.—Lusengomono 20:10.

20. Adieyi nleke kalenda vanga muna kukiyekola kwa Yave yo vubwa? (Tala mpe babu “Malongi Malenda Kusadisa mu Nungunuka Muna Mwanda.”)

²⁰ O kukiyekola kwa Yave i nzengo zambote olenda baka muna zingu kiaku. Nga wakubama mu bak’e nzengo zazi? Avo i wau, kukadi ye wonga ko wa sia nsilu wau. Kansi, avo omwene vo kuna wakubama ko, sadila mana tulongokele mu longi diadi kimana wakwamanana nungunuka. Paulu wakasakesa ampangi kuna Filipi vo bakwamanana nungunuka. (Filipi 3:16) Avo olemvokele luludiku lwalu, ke kolo ko obaka nzengo za yekola zingu kiaku kwa Yave yo vubwa.