1. Adieyi dimonekanga muna salu kia Nzambi tuka kuna lubantiku lwa nsema?

YAVE yo Yesu ntwadi besalanga tuka kuna lubantiku lwa nsema. Yave wavanga Yesu vitila kasema lekwa yawonso. I bosi, Yesu wasala yo Nzambi yo kala “vana ndambu” andi nze “mbuta mbangu.” (Ngana 8:30) Selo ya Yave mpe besalanga e ntwadi muna salu bavewa kwa Nzambi. Kasikil’owu, Noa watunga e nzaza kumosi y’esi nzo andi. Kuna kwalanda, Aneyisaele basalanga kumosi mu tunga e saba, bangula yo nata kio konso kuna bayendanga. Muna tempelo, bayimbilanga kumosi yo sika masikilu muna kembelela Yave muna nkunga miambote-mbote. Nkangu a Yave balendanga vanga mawonso mama kadi ntwadi basalanga.—Etuku 6:14-16, 22; Ntalu 4:4-32; 1 Tusansu 25:1-8.

2. (a) Nkia fu kiatoma monekanga muna nkutakani ya Akristu mu tandu kiantete? (b) Nkia yuvu tubadika?

² Akristu muna tandu kiantete mpe ntwadi basalanga. Paulu wa ntumwa wasonga vo Akristu mu kintwadi bakala  kana una vo baswaswana muna ngangu ye malau ma salu. Yau awonso, Yesu Kristu wa Mfumu au balandanga. Paulu wabatezanesa ye nitu ina ye yikwa yayingi, kansi yawonso ntwadi isalanga. (Tanga 1 Korinto 12:4-6, 12.) Adieyi tuvova mu kuma kieto o unu? Aweyi tulenda sadila kumosi muna salu kia umbangi, muna nkutakani ye muna zingu kia esi nzo?

3. Nkia mona-meso kasongwa Yoane wa ntumwa?

³ Muna tandu kiantete, Yoane wa ntumwa wamona mona-meso kia mbasi nsambwadi zasikanga e mpungi. Vava mbasi ina yatanu yasika e mpungi, Yoane wamona “ntetembwa isotokele ova nza tuka kuna zulu.” E ntetembwa yayi yasadila nsabi mu ziula e kielo kia wulu dia mbilu. Entete, mwisi wavaika muna wulu, i bosi muvaikidi makonko muna mwisi. Vana fulu kia vanga e nti ye ma yankunzu e mbi, e mankoko mafwasa ana ‘ke bakala ye dimbu kia Nzambi ko vana ndose zau.’ (Lusengomono 9:1-4) Yoane wazaya e vonza kilenda twasa makonko, nze dina diavangama kuna Engipito muna lumbu ya Mose. (Luvaiku 10:12-15) Makonko kamona Yoane, Akristu akuswa mesunzulanga, ana besamunanga nsangu za lufundisu lwa nsambil’a luvunu. Mazunda ye mazunda m’awana bena ye vuvu kia zingila ova ntoto bekubayikamanga. E buka yole yayi isalanga e ntwadi muna salu kia umbangi. E salu kiaki kisadisanga wantu ayingi mu vaika muna nsambil’a luvunu yo lembi bundunwa diaka kwa Satana.

4. Nkia salu besalanga nkangu a Nzambi? Adieyi dilenda kubasadisa mu sala e salu kiaki una ufwene?

⁴ E salu twavewa i samuna e ‘nsangu zambote’ kwa wantu a nza yawonso vitila e mbaninu iza. Salu kiayingi kikilu tuna kiau. (Matai 24:14; 28:19, 20) Divavanga vo twabokela awonso bena ye “vuina” mu kwiza nua “maza ma moyo,” i sia vo, longa e ludi kia Nkand’a Nzambi kw’awonso bazolele kio zaya. (Lusengomono 22:17) Kansi, muna lenda sala e salu kiaki, tufwete kala ‘twayikakiana’ yo salanga e ntwadi muna nkutakani.—Efeso 4:16.

5, 6. Aweyi kintwadi kieto kimonekenanga vava tusamunanga nsangu zambote?

⁵ Muna samuna e nsangu zambote kwa ulolo wa wantu, divavanga vo twakala twatoma kubama. Tuludiku tutambulanga muna nkutakani zeto tukutusadisanga mu vanga wo. Kuna mfoko a lukutakanu lwa salu kia umbangi, tukwendanga mokena yo wantu mu kubasamunwina e nsangu zambote za Kintinu. Tukubavananga mpe nkanda misasilanga Nkand’a Nzambi. Kieleka, mazunda ye mazunda ma nkanda tukayidi kala mu nza yawonso. Ezak’e ntangwa tukasakeswanga mu yikama e salu kia sila umbangi mu buka. Vava tuvanganga wo, tusalanga e ntwadi  ye mazunda ye mazunda ma mpangi zeto mu nza yawonso ana besamunanga nsangu zau zimosi. Tusalanga mpe ye mbasi, ana besadisanga nkangu a Nzambi mu samuna e nsangu zambote.—Lusengomono 14:6.

⁶ Ekwe kiese tumonanga vava tutanganga muna Anuário e nluta mitwasanga e salu kieto kia umbangi mu nz’amvimba! Yindula mpe kintwadi tukalanga kiau vava tubokelesanga wantu mu nz’amvimba mu kwiza mu tukutakanu tweto twa mvivu. Muna tukutakanu twatu, malongi mamosi tuwanga. E fuka ye nsongesela zikutukasakesanga mu sadila Yave una ufwene. Tuyikakiananga mpe ye mpangi zeto mu nz’amvimba vava tulungananga konso mvu muna Luyindulu lwa lufwa lwa Yesu. (1 Korinto 11:23-26) Tulungananga mu lumbu kikwenda betela ye lumbu kia 14 kia ngonde a Nisani, kuna ndimuk’a ntangwa mu vutula matondo mu kuma kia dina Yave kavanga mu kuma kieto yo lemvokela nkanikinu a Yesu. Tumingu twayingi vitila Luyindulu, tusalanga e ntwadi mu bokela wantu ayingi beza lungana yeto muna lukutakanu lwalu lwamfunu.

7. Nkia salu tulenda lungisa vava tusalanga entwadi?

⁷ E konko dimosi ke dilendi twasa vonza kiampwena ko. Muna ngolo za yeto kibeni, ke tulenda sila umbangi kwa wantu awonso ko. Kansi, wau vo ntwadi tusalanga, tulendanga mokena oma ma Yave ye mazunda ye mazunda ma wantu yo sadisa akaka muna yau mu kembelela Nzambi.

8, 9. (a) Nkia nona kayika o Paulu mu longa Akristu o mfunu wa sala entwadi? (b) Aweyi tulenda sadila entwadi muna nkutakani?

⁸ Paulu wasasila kw’esi Efeso una nkutakani isadilanga. Wabavovesa vo awonso muna nkutakani bafwete “nungunuka muna mambu mawonso.” (Tanga Efeso 4:15, 16.) Paulu wasadila e nona kia nitu muna sasila vo konso Nkristu olenda vana moko muna siamisa kintwadi muna nkutakani yo landa Yesu wa Mfumu a nkutakani. Wavova vo e yikwa yawonso ya nitu ‘kumosi isalanga.’ Muna kuma kiaki, twakala aleke yovo ambuta, twakala yo vimpi wambote yovo ve, adieyi konso muntu mu yeto kafwete vanga?

⁹ Yesu wasola akuluntu kimana bavitang’o ntu muna nkutakani. Ozolele vo twabazitisanga yo lemvokela luludiku bekutuvananga. (Ayibere 13:7, 17) Ezak’e ntangwa diampasi dikalanga mu vanga wo. Kansi, tulenda lomba lusadisu kwa Yave. O mwand’andi avelela ulenda kutusadisa mu lemvokela konso luludiku tuvewanga kw’akuluntu. Yindula mpe una tulenda sadisila nkutakani eto vava tusonganga lulembamu yo sala e ntwadi ye akuluntu. Avo tuvangidi wo, kintwadi kiwokela muna nkutakani. O zola kweto mpe muna muntu yo nkwandi kuwokela.

10. Aweyi selo ya salu besiamisinanga kintwadi muna nkutakani? (Tala fwaniswa kuna lubantiko lwa longi.)

 ¹⁰ E selo ya salu mpe balenda vana moko mu siamisa kintwadi muna nkutakani. Salu yayingi besalanga muna sadisa akuluntu. Tuvutulanga matondo muna mawonso bevanganga. Kasikil’owu, e selo ya salu besianga sungididi kia zaya kana vo tuna ye nkanda miafwana tusadila muna salu kia umbangi. Yau bena ye kiyekwa kia tambula e nzenza zikwizanga muna tukutakanu tweto. Besalanga mpe kwayingi mu kubika yo velelesa Seka dia Kintinu. Vava tusalanga kumosi ye mpangi zazi, tusiamisanga kintwadi kieto yo sadila Yave una ufwene.—Tezanesa ye Mavangu 6:3-6.

11. Adieyi aleke balenda vanga mu siamisa kintwadi muna nkutakani?

¹¹ Akuluntu ankaka se mvu miayingi besalanga e salu ya nkutakani. Kansi nanga ke belendanga diaka vanga mayingi ko mu kuma kia kinunu. Aleke balenda kubasadisa. Avo batomene longwa, balenda vewa salu yayingi muna nkutakani. Vava selo ya salu besalanga kwayingi, kuna sentu balenda kuyifwanisa mu sala se akuluntu. (1 Timoteo 3:1, 10) Akaka muna akuluntu bena vo aleke, bakinu nungunuka. Owau, besalanga se akengi a zunga yo sadisa mpangi za nkutakani zayingi. Tuyangalalanga kikilu vava aleke bekuyivananga kuna mvevo mu sadila ampangi muna nkutakani.—Tanga Nkunga 110:3; Kimpovi 12:1.

12, 13. Adieyi dilenda sadisa esi nzo mu salanga entwadi?

¹² Aweyi tulenda sadisila esi nzo eto mu salanga e ntwadi? O vanga e nsambila ya esi nzo konso lumingu dilenda kutusadisa. Vava mase yo wana bevaulanga e ntangwa mu longoka kumosi oma ma Yave, o zola kwau muna muntu yo nkwandi kuwokelanga. Muna ntangw’a nsambila ya esi nzo, balenda vanga nsongesela za mana bevova muna salu kia umbangi. Ediadi disadisa awonso mu kala batoma kubama. Vava bewanga una konso muntu kesilanga umbangi yo mona zola kwau muna Yave ye ngolo bevanganga za kunyangidika, e kikundi kiau kiwokelanga.

¹³ Aweyi yakala yo nkento balenda siamisina kintwadi muna longo lwau? (Matai 19:6) Avo yau awole bakedi yo zola muna Yave yo kunsadila kumosi, bekala ye kiese ye kintwadi muna longo lwau. Bafwete mpe songanga o zola kwa muntu yo nkwandi nze una wavanga Abarayama yo Sara, Isaki yo Rebeka ye Elekana yo Kana. (Etuku 26:8; 1 Samuele 1:5, 8; 1 Petelo 3:5, 6) Avo yakala yo nkento bavangidi wo, e nzol’au ye kikundi kiau yo Yave kiwokela.—Tanga Kimpovi 4:12.

14. Avo nkaz’aku ke sadilanga Yave ko, adieyi olenda vanga mu siamisa zola muna longo lweno?

 ¹⁴ O Nkand’a Nzambi utoma kiesesanga vo ke tulendi sompana yo muntu ona ke sadilanga Yave ko. (2 Korinto 6:14) Kansi, vena ye mpangi bena ye akazi bena vo ke Mbangi za Yave ko. Akaka basompa vitila balongoka e ludi, yamu wau akazi au ke bakitukidi Mbangi za Yave ko. Akaka basompana ye selo kia Yave, kansi kuna kwalanda nkaz’andi wabembola e nkutakani. Muna mambu mama mawonso, Akristu besianga e ngolo za siamisa longo lwau muna lemvokelanga nkanikinu mia Nkand’a Nzambi. Kansi, ezak’e ntangwa diampasi dikalanga. Muna bonga e nona, Maria yo nkaz’andi Davidi basadilanga Yave entwadi. Kuna kwalanda, Davidi wayambula kwenda muna tukutakanu. Kansi, mpangi Maria wakwamanana vanga mawonso mu kala nkento ambote yo songa e fu ya Kikristu. Walonganga mpe wan’au sambanu oma ma Yave yo kwamanana kwenda muna tukutakanu twakete ye twampwena. Kuna kwalanda, vava wana bakituka ambuta yo vaika muna nzo, mpangi Maria wakwamanana sadila Yave kana una vo diampasi kikilu diakala kwa yandi. I bosi, Davidi wayantika tanga e nkanda mina mpangi Maria kansisilanga. Kuna kwalanda, wayantika diaka kwenda mu tukutakanu. Ntekelo andi wa mvu sambanu wanlundilanga e fulu. Avo Davidi kele ko mu lukutakanu, ntekelo andi wavovanga vo: “E nkaka, o unu kimuene ko muna lukutakanu.” Una vavioka mvu 25, mpangi Davidi wavutuka kwa Yave. Owau yandi yo nkaz’andi bena ye kiese kia sadila Yave kumosi.

15. Aweyi akazi bena vo anunu balenda sadisila akazi bena vo aleke?

¹⁵ O unu, Satana ovanganga mawonso mu fwasa e zingu kia esi nzo. Ekiaki i kuma o yakala yo nkento ana besambilanga  Yave bafwete sadilanga e ntwadi. Kana nkutu mvu miayingi miviokele kala tuka nwakazalela, yindulanga dina olenda vova yovo vanga mu siamisa longo lwaku. Avo nu akazi anunu, nulenda songa mbandu ambote kw’akazi bena vo aleke. Nulenda bokelanga akazi aleke muna nsambil’eno ya esi nzo. Bemona vo kana nkutu se mvu miayingi miviokele kala tuka bakazalela, bafwete kwamanana songaziana o zola yo sala e ntwadi.—Tito 2:3-7.

16, 17. Nkia diambu dia kiese bevingilanga selo ya Nzambi?

¹⁶ Vava Aneyisaele bayendanga muna nkinzi kuna Yerusaleme, ntwadi basalanga. Bakubikanga yawonso bavuanga o mfunu muna nkangalu. Bakangalanga kumosi yo sadisa muntu yo nkwandi. Vava balwakanga kuna tempelo, yau awonso bakembelanga yo sambila Yave kumosi. (Luka 2:41-44) O unu, ekolo tufinamanga kota muna nz’ampa, diamfunu twakala twayikakiana yo vanga mawonso tulenda mu salanga kumosi. Nga olenda yindula una olenda siamisina kintwadi kieto?

¹⁷ O wantu ova nza betantananga yo nuana mu kuma kia mambu mayingi. Tuvutulanga matondo wau vo Yave okutusadisanga mu kala ye luvuvamu yo bakula e ludi kia Nkand’a Nzambi. Nkangu andi mu nza yawonso bekunsambilanga mu mpila ikunyangidikanga. Musungula mu lumbu yayi yambaninu, kintwadi kia nkangu a Yave mu wokela kaka kina ke mu tandu yavioka ko. Nze una Yesaya yo Mika basakula, ‘tutombokanga kuna mongo a Yave’ kumosi. (Yesaya 2:2-4; tanga Mika 4:2-4.) Ekwe kiese tukala kiau vava wantu awonso ova nza ‘beyikakiana’ yo sambila Yave entwadi!