LONGI DIA 10
O Zola yo Luyangalalu Muna Yave Kufilanga Muntu Muna Vubwa
“Adieyi dinsimbidi muna vubwa?”—MAV. 8:36.
NKUNGA WA 37 Sadila Yave ye Nsi a Ntima Yawonso
MANA TULONGOKA *
1-2. Landila e sono kia Mavangu 8:27-31, 35-38, nki kiafila nzimba wa Ntiopia muna vubwa?
NGA ozolele vubwa kimana wakituka nlongoki a Kristu? O zola yo luyangalalu muna Yave lwafila wantu ayingi mu baka e nzengo zazi. Tala e nona kia nzimba mosi ona wasadilanga kuna lûmbu lwa ntinu ankento a Etiopia.
2 O nzimba ndioyo wa Ntiopia wavubwa vana vau vava kabakula e Sono. (Tanga Mavangu 8:27-31, 35-38.) Nki kiamfila muna vubwa? Tulenda vova ye ziku kiawonso vo Diambu dia Nzambi kayangalelanga. Kiaki i kuma katangilanga o nkand’a Yesaya muna kalu diandi. I bosi, vava Filipo kamokena yandi, o nzimba wasonga luyangalalu lwandi muna dina Yesu kavanga mu kuma kiandi. Kansi, ekuma nzimba ndioyo kayendela kuna Yerusaleme? E kuma kadi wakikadila ye zola muna Yave. Aweyi tuzayidi wo? Kadi kuna Yerusaleme katuka mu sambila Yave. Nanga nzimba ndioyo wabembola dibundu diandi dia kingutukila yo yantika sambila Nzambi aludi kumosi yo nkangu andi wakiyekola. O zola muna Yave kwafila e nzimba ndioyo mu vanga diambu diamfunu, i sia vo, vubwa yo kituka se nlongoki a Kristu.—Mat. 28:19.
3. Nki kilenda kakidila muntu muna vubwa? (Tala e babu “ Aweyi una o Ntim’aku?”)
3 O zola muna Yave kulenda kufila muna vubwa. Kansi, o zola mpe kulenda kukakidila muna vubwa. Mu nkia mpila? Tala e nona ilende. Nanga wonga una wau, kadi avo ovubilu e yitu ye akundi aku ana otoma zolanga bena vo ke Mbangi za Yave ko, menga bekumenga. (Mat. 10:37) Nanga fu ina Nzambi kemenganga ozolanga ye diampasi kwa ngeye mu yambula e fu yayi. (Nku. 97:10) Yovo, dilenda kala vo nkinzi mina ngwizani ye nsambil’aluvunu okembelelanga tuka muna kileke kiaku. Nanga oyangalelanga mambu mambote mevangamanga muna nkinzi miami. Muna kuma kiaki, diampasi kwa ngeye mu yambula kwenda muna nkinzi miami ke miyangidikanga Yave ko. (1 Kor. 10:20, 21) Owau, e kiuvu ofwete kukiyuvula i kiaki: “Nki yovo nani itoma zolanga?”
O MUNTU ONA OFWETE TOMA ZOLA
4. Akieyi i kuma kiantete kilenda kufila muna vubwa?
4 Vena ye mambu mayingi ozolanga yo vutulwila matondo. Muna bonga e nona, vitila wayantika longoka ye Mbangi za Yave, nanga watoma zitisanga e Bibila yo zola Yesu. Owau olongokanga ye Mbangi za Yave, nanga oyangalelanga viokesa e ntangwa kumosi yo yau. Kansi, o zola e mambu mama ke mau kaka ko malenda kufila mu kukiyekola kwa Yave yo vubwa. E kuma kiantete kilenda kufila mu vubwa i zola kwaku muna Yave wa Nzambi. Avo otomene zola Yave lutila mambu mama mawonso, ke vena diambu ko ngatu muntu olenda kukakidila muna kunsadila. O zola muna Yave kukufila muna vubwa. Kukusadisa mpe mu sikila ye kwikizi kunim’a luvubu lwaku.
5. Nkia yuvu tubadika mu longi diadi?
5 Yesu wavova vo tufwete zola Yave muna ntim’eto, moyo, nyindu ye ngolo zeto zawonso. (Maku 12:30) Aweyi olenda toma zolela Yave yo kunzitisa? O yindula una Yave kekutuzolelanga kukutufila mpe muna kunzola. (1 Yoa. 4:19) Nkia mambu mankaka ofwete vanga malenda kufila mu wokesa o zola kwaku muna Yave? *
6. Mun’owu wa sono kia Roma 1:20, nki kilenda kusadisa mu toma zaya Yave?
6 Toma zaya Yave muna badikanga lekwa kasema. (Tanga Roma 1:20; Lus. 4:11) Badikanga una e nti ye bulu ina Yave kavanga isongelanga e ziku vo Yave nkwa ngangu kikilu. Yindulanga e mpil’a sivi yavangilwa e nitu aku. (Nku. 139:14) Badikanga mpe o nkuma una Yave kasia muna ntangwa. Tuzeye wo vo e ntangwa i imosi muna mazunda ye mazunda ma ntetembwa. * (Yes. 40:26) Avo okedi ye fu kia badika e lekwa ina Yave kasema, ediadi dikusadisa mu toma kunzitisa. Kansi, sungamena dio vo ozaya vo Yave nkwa nkuma ye nkwa ngangu, ke diau kaka ko divavuanga muna kala ye ngwizani ambote yo yandi. Ozevo, muna wokesa o zola kwaku muna Yave, ofwete longoka mayingi mu kuma kiandi.
7. Muna toma zola Yave, nkia ziku ofwete kala kiau?
7 Ofwete kala ye ziku vo Yave zola kikilu kekuzolanga. Nga diampasi dikalanga kwa ngeye mu kwikila vo o Mvangi a zulu ye ntoto otomene kuzaya ye mfunu kekuvuanga? Avo i wau oyindulanga, sungamena dio vo Yave “kavavukidi konso muntu ko muna yeto.” (Mav. 17:26-28) Davidi wavovesa Solomo vo: “Yave ofimpanga ntima miawonso . . . Avo umvavidi, oyambula vo wansolola.” (1 Tus. 28:9) Wau vo Yave ‘watunta kwa yandi,’ kiaki i kuma olongokelanga e Bibila owau. (Yer. 31:3) Avo osongele luyangalalu lwaku muna mawonso Yave kevanganga muna wete diaku, o zola kwaku muna yandi kuwokela.
8. Aweyi olenda vutulwila matondo muna zola kekusonganga o Yave?
8 E mpila yankaka olenda vutulwila matondo muna zola kekusonganga o Yave, i mokenanga yandi muna sambu. O zola kwaku muna Yave kuwokela ekolo okunzayisanga mawonso mekutokanesanga yo kumvutula matondo muna mawonso kevanganga muna wete diaku. E kikundi kiaku yo Yave kikumama vava omona una Yave kevaninanga e mvutu za sambu yaku. (Nku. 116:1) Ediadi dikukwikidisa vo Yave otoma kubakulanga. Kansi, muna kwamanana kumika e kikundi kiaku yo Yave, ofwete toma bakula e mpila ina kebadikilanga o mambu yo zaya dina kazolele mu kuma kiaku. Muna zaya e mambu mama mawonso, ofwete longoka e Bibila.
O longoka e Bibila i mpila yambote tulenda kumikina e kikundi kieto yo Nzambi yo zaya mana kazolele vo twavanga (Tala e tini kia 9) *
9. Aweyi olenda songela luyangalalu lwaku muna Diambu dia Nzambi?
9 Songanga luyangalalu muna Diambu dia Nzambi. Muna Bibila kaka mwasonama e ludi mu kuma kia Yave ye kani diandi mu kuma kiaku. Muna songa luyangalalu lwaku muna Diambu dia Nzambi, tanganga dio e lumbu yawonso, kubikanga mana olongoka yo nlongi aku yo sadila mana olongokanga. (Nku. 119:97, 99; Yoa. 17:17) Nga programa ya ntangilu a Bibila una yau? Nga otanganga e Bibila lumbu yawonso?
10. Nkia diambu dikitulanga e Bibila se nkanda usundidi nkanda miawonso?
10 Dimosi muna mambu mekitulanga e Bibila se nkanda usundidi nkanda miawonso i tusansu twa wantu bamona Yesu. E Bibila i nkanda mosi kaka utoma sasilanga mana Yesu kavanga mu kuma kiaku. O longoka mana Yesu kavova yo vanga, dikufila mu vanga yandi kikundi.
11. Nki kilenda kusadisa mu wokesa o zola kwaku muna Yave?
11 Zolanga Yesu kimana wawokesa o zola kwaku muna Yave. Ekuma? Kadi Yesu watanginina e fu ya Se diandi una ufwene. (Yoa. 14:9) Muna kuma kiaki, avo olongokele mayingi mu kuma kia Yesu, dikusadisa mu songa luyangalalu lwaku muna Yave yo toma kunzaya. Yindula una Yesu kasongelanga e nkenda kw’awana bavezwanga, i sia vo, asukami, mbevo ye minkondwa-nsadisi. Yindula mpe tuludiku twamfunu kekuvananga ye nluta ovuanga muna zingu kiaku wau okunlemvokelanga.—Mat. 5:1-11; 7:24-27.
12. Avo olongokele mayingi mu kuma kia Yesu, nkia diambu ovanga?
12 O zola kwaku muna Yesu kuwokela avo oyindwidi dina kavanga kimana masumu meto malolokwa. (Mat. 20:28) Avo obakwidi vo Yesu wakivana kuna mvevo muna fwa mu kuma kiaku, ediadi dikufila mu viluka o ntima yo lomba luloloko kwa Yave. (Mav. 3:19, 20; 1 Yoa. 1:9) Avo zola kwaku muna Yesu yo Yave kuwokele, ediadi dikufila mu kala vamosi ye awana mpe bekubazolanga.
13. O Yave nki kekuvana?
13 Zolanga awana Yave kezolanga. E yitu ye akundi aku bena vo ke Mbangi za Yave ko, ke bebakula ko e kuma ozolele kukiyekolwela kwa Yave. Balenda nkutu kusia e kitantu. Kansi, Yave okusadisa muna kuvana mpangi z’amakala ye z’amakento muna nkutakani bekala se yitu yaku. Avo okwamanene vanga e kikundi ye mpangi zazi, omona o zola kwau yo tambula lusadisu ovuidi o mfunu. (Maku 10:29, 30; Ayib. 10:24, 25) Kuna kulanda, e yitu yaku balenda mpe sadila Yave yo zingila e ngwizani ye nkanikinu miandi.—1 Pet. 2:12.
14. Nze una usonganga 1 Yoane 5:3, adieyi olongokele mu kuma kia nkanikinu mia Yave?
14 Zitisanga yo lemvokela nkanikinu mia Yave. Nanga vitila wazaya Yave, ngeye kibeni wabakanga e nzengo muna edi diambote ye edi diambi. Kansi owau, omonanga vo o lemvokela e nkanikinu mia Yave nluta kaka ditwasanga. (Nku. 1:1-3; tanga 1 Yoane 5:3.) Yindula mpe o luludiku lwa Bibila luna luvovelanga akala, akento, mase yo wana. (Efe. 5:22–6:4) Nga e zingu kia esi nzo aku se kiakiese wau vo luludiku lwalu osadilanga? O lemvokela luludiku lwa Yave mu kuma kia sola akundi ambote, nga ditomese e fu yaku? Owau, nga u nkwa kiese? (Nga. 13:20; 1 Kor. 15:33) Nanga olenda vutula “elo” muna yuvu yayi.
15. Adieyi olenda vanga avo lusadisu ovuidi o mfunu muna sadila e nkanikinu mia Nzambi?
15 Ezak’e ntangwa, olenda mona vo diampasi mu zaya una olenda sadila e nkanikinu mia Bibila mina olongokanga. Ekiaki i kuma Yave kesadilanga e nkubik’andi muna kuvana e nkanda misasilanga e Bibila, milenda kusadisa muna baka e nzengo mu kuma kia edi diambote ye edi diambi. (Ayib. 5:13, 14) Avo otangidi yo longoka e nkanda miami, nluta obaka. Ozaya mpe una olenda sadila nkanikinu mia Nzambi. Ediadi dikusadisa mu toma fimana e nkubik’a Yave.
16. Aweyi Yave kakubikila o nkangu andi?
16 Songanga o zola yo yikama e nkubik’a Yave. Yave wakubika o nkangu andi muna nkutakani. Yesu wa Mwan’andi i ntu a nkutakani zawonso. (Efe. 1:22; 5:23) Yesu wasola e fibuka fia mpangi zakuswa muna vitanga o ntu yo kubika e salu kina kazolele vo kiasalwa omu lumbu yeto. Yesu wayikila e fibuka fiafi vo “ntaudi akwikizi yo lulungalalu.” Ampangi awaya betoma lungisanga e kiyekwa kiau kia kuvana madia ma mwanda yo tanina e kimwanda kiaku. (Mat. 24:45-47) Imosi muna mpila o ntaudi akwikizi kekulunga-lungilanga i tumbika akuluntu muna kuvungula. (Yes. 32:1, 2; Ayib. 13:17; 1 Pet. 5:2, 3) Akuluntu bekukivananga emvimba muna kufiaulwisa yo kusadisa mu toma finama Yave. Kansi, dimosi muna mambu masundidi o mfunu balenda vanga muna wete diaku i kusadisa walonga akaka oma ma Yave.—Efe. 4:11-13.
17. Landila e sono kia Roma 10:10, 13, 14, ekuma tufwete longelanga akaka oma ma Yave?
17 Sadisa akaka bazola Yave. Yesu wakanikina alongoki andi vo balonga akaka oma ma Yave. (Mat. 28:19, 20) Tulenda lemvokela o nkanikinu wau kadi tuzeye wo vo i diau tufwete vanga. Kansi, ekolo o zola kwaku muna Yave kuwokelanga, omona nze una bamona Paulu yo Yoane wa ntumwa vava bavova vo: “Ke tulendi yambula vova mana twamona yo wá ko.” (Mav. 4:20) Dimosi muna mambu mekututwasilanga kiese i sadisa muntu kazola Yave. Yindula e kiese kamona o Filipo wa nteleki vava kasadisa o nzimba wa Ntiopia mu zaya e ludi kia Diambu dia Nzambi yo vubwa. Avo otanginini Filipo yo lemvokela o nkanikinu wa Yesu wa samuna e nsangu zambote, osonga vo ozolele kala Mbangi a Yave. (Tanga Roma 10:10, 13, 14.) Avo olweke mu tezo kiaki, olenda vanga e kiuvu kina o nzimba wa Ntiopia kavanga: “Adieyi dinsimbidi muna vubwa?”—Mav. 8:36.
18. Nkia yuvu tubakila e mvutu muna longi dilanda?
18 O vubwa i nzengo zisundidi o mfunu olenda baka muna zingu kiaku. Kadi, ezazi nzengo zamfunu kikilu, ofwete toma fimpa mana mevavuanga muna baka zo. Adieyi ofwete zaya mu kuma kia luvubu? Adieyi ofwete vanga vitila ye vava ovubwa? E longi dilanda divana e mvutu za yuvu yayi.
NKUNGA WA 2 Yave i Nkumbu Aku
^ tini. 5 Akaka muna awana bezolanga Yave lukatikisu bekalanga lwau kana vo bakubama bena muna vubwa. Avo i wau omonanga, e longi diadi dikusadisa mu badika maka mambu mamfunu malenda kufila muna vubwa.
^ tini. 5 Wau vo konso muntu waswaswana, ke dina mfunu ko kwa akaka mu sadila mambu mayikilu mu longi diadi muna mandandani.
^ tini. 6 Muna zaya diaka mayingi mu kuma kia lekwa ina Yave kasema, tala e finkanda A Vida—Teve um Criador? ye finkanda A Origem da Vida—Cinco Perguntas Que Merecem Resposta.
^ tini. 61 FWANISWA: Mpangi ankento ovananga e finkanda-nkanda kwa mwan’a ndumba otekanga e lekwa.
