1-2. Aki nani balenda sadisa o nlongoki a Bibila mu nungunuka yamuna luvubu?

MPANGI Amy ona ozingilanga kuna Fiji wavova vo: “Yatoma yangalelanga mana yalongokanga muna Bibila. Yazaya wo vo mana yalongokanga maludi. Kansi, yavanga kaka e nsobani muna zingu yo vubwa vava yayantika lungana kumosi ye ampangi muna tukutakanu.” E nona kia mpangi Amy diambu diamfunu kikutulonganga: O nlongoki a Bibila otoma nungunukanga yamuna luvubu vava ketambulanga lusadisu lwa mpangi zawonso muna nkutakani.

² Konso nteleki olenda vanga diambu mu sadisa alongoki banungunuka muna nkutakani. (Efe. 4:16) Mpangi Leilani una vo mviti a nzila ona ozingilanga kuna Vanuatu wavova vo: “Kingana kimosi kivovanga vo mwana kelongwanga kaka kwa muntu mosi ko. E kingana kiaki kilenda sadilwa mpe muna salu kia kitula o wantu se alongoki. Kadi nkumbu miayingi, mpangi zawonso muna nkutakani besadisanga o nlongoki kalwaka yamuna luvubu.” Ozevo, mase, yitu, akundi ye alongi a sikola, besadisanga o mwana kakola muna ngindu. Bevanganga wo muna kasakesa o mwana yo kunlonga mambu mayingi mamfunu. Diau dimosi mpe, ampangi muna nkutakani balenda vana malongi, kasakesa yo songa mbandu ambote kwa nlongoki a Bibila. Muna mpila yayi, bekunsadisanga mu nungunuka yamuna luvubu.—Nga. 15:22.

3. Adieyi olongokele muna mvovo mia mpangi Ana, Dorin yo Leilani?

³ Ekuma o nteleki ona ofilanga e longi dia Bibila kafwete tambulwilanga lusadisu bevananga ateleki akaka kwa nlongoki andi? Mpangi Ana una vo mviti a nzil’a espesiale kuna Moldávia wavova vo: “Diampasi kikilu kwa nlongi mu lungisa e nsatu zawonso za nlongoki a Bibila ekolo keyantikanga nungunuka muna mwanda.” Mpangi Dorin una vo mviti a nzil’a espesiale  mpe kuna Moldávia, wavova vo: “Nkumbu miayingi, ateleki akaka bevovanga diambu dina ditoma simbanga o ntim’a nlongoki, diambu dina vo mono kibeni kiadi dio vova ko.” Mpangi Leilani ona tuyikidi kala, wayika diambu diankaka dilenda sadisa o nlongoki. Wavova vo: “O zola ye ngemba besonganga ampangi kwa nlongoki zilenda kunsadisa mu bakula vo yeto tu nkangu a Yave.”—Yoa. 13:35.

4. Nkia mambu tuvovela mu longi diadi?

⁴ Nanga olenda kukiyuvula: ‘Aweyi ndenda sadisila nlongoki a Bibila mu nungunuka wau vo ke mono ko ilongokanga yandi?’ Mu longi diadi, tuvovela dina tulenda vanga avo mpangi mosi utulombele twenda kumosi mu fila e longi dia Bibila. Tuvovela mpe dina tulenda vanga avo nlongoki a Bibila oyantikidi kwiza mu tukutakanu. Tuzaya mpe dina akuluntu balenda vanga mu sadisa alongoki a Bibila mu nungunuka yamuna luvubu.

5. Adieyi ofwete vanga avo mpangi ulombele nuenda fila kumosi e longi dia Bibila?

⁵ Vava longi dia Bibila difilwanga, o nlongi yandi okalanga ye mbebe ya sadisa o nlongoki katoma bakula e Diambu dia Nzambi. Avo mpangi ulombele nuenda fila kumosi e longi, ofwete kala wakubama muna kunsadisa. (Kim. 4:9, 10) Ozevo, adieyi ofwete vanga mu sadisa o mpangi ekolo kefilanga e longi dia Bibila?

6. Avo mpangi ulombele nuenda fila kumosi e longi dia Bibila, aweyi olenda sadila e sono kia Ngana 20:18?

⁶ Toma kubika e longi. Entete, yuvula o nlongi kazayisa mambu makete mu kuma kia nlongoki andi. (Tanga Ngana 20:18.) Olenda yuvula kwa mpangi ubokelese vo: “Nga olenda kunzayisa lusansu lwa nlongoki aku? Nkia nkanda ye kapu nulongoka? Nkia diambu diasina ozolele vo nlongoki kabakula mu longi diadi? Nga vena ye diambu ndenda vova yovo kifwete vova ko ekolo ofila e longi? Aweyi ndenda kasakesela o nlongoki kimana kanungunuka?” Dialudi vo o nlongi ke kuzayisa mambu ma mbumba ko mu kuma kia nlongoki andi, kansi mana kekuzayisa malenda kusadisa mu kunkasakesa. Mpangi Joy una vo misionaria, mambu mama kezayisanga kwa awana bekwendanga yandi e ntwadi muna fila longi dia Bibila. Wavova vo: “O mambu mama mesadisanga o mpangi mvaikidi yandi mu vava sadisa o nlongoki yo zaya mana kevova ekolo ifila e longi.”

7. Ekuma ofwete kubikila e longi avo mpangi ulombele nuenda fila kumosi e longi dia Bibila?

⁷ Avo mpangi ulombele vo nuenda fila kumosi e longi dia Bibila, diambote mu toma kubika e kapu kilongokwa. (Eze. 7:10) Mpangi Dorin ona tuyikidi kala, wavova vo: “Iyangalalanga vava mpangi ovaikidi yame ketoma kubikanga e longi. Ediadi dikunsadisanga mu vana e nkomena zambote.” Vana ntandu, o nlongoki obakulanga vo yeno awole nuatoma kubika  e longi. Eyayi ikala se mbandu ambote kwa yandi. Kana nkutu vo ke dilendakana ko mu kubika e longi diawonso, diambote mu vaula e fintangwa muna vava zaya e mambu masina mevovelwa muna longi.

8. Adieyi olenda vanga kimana wavova mambu masikididi muna sambu?

⁸ E sambu mfunu kina vava tufilanga e longi dia Bibila. Muna kuma kiaki, diambote watoma yindula mana ovova avo nlongi ulombele vo wasamba. Muna mpila yayi, ovova mambu masikididi muna sambu. (Nku. 141:2) Mpangi Hanae ona ozingilanga kuna Japão, yamu wau osungamenanga e sambu ya mpangi mosi ankento ona wavaikanga kumosi yo nlongi andi a Bibila. Wavova vo: “Yabakula vo o mpangi ndioyo ngwizani ambote kikilu kakala yau yo Yave. Muna kuma kiaki, yazola kala nze yandi. Yatoma yangalalanga vava kayikanga e nkumbu ame muna sambu.”

9. Mun’owu wa sono kia Yakobo 1:19, adieyi olenda vanga muna kala nsadisi ambote?

⁹ Sadisa o nlongi ekolo kefilanga e longi dia Bibila. Mpangi Omamuyovbi una vo mviti a nzil’a espesiale kuna Nigéria, wavova vo: “O nsadisi ambote i ndiona otoma winikinanga ekolo e longi difilwanga. Ovananga e nkomena zambote, kansi ke vovanga kwayingi ko. Kadi obakulanga vo o nlongi yandi ovitang’o ntu.” Ozevo, aweyi olenda zayila e ntangwa ya vova ye dina ofwete vova? (Nga. 25:11) Toma winikinanga ekolo nlongi ye nlongoki bevovanga. (Tanga Yakobo 1:19.) Muna mpila yayi, ozaya e ntangwa yambote ya vova. Kansi, ofwete teka yindula vitila wavova. Kasikil’owu, kufwete vovanga kwayingi ko, kufwete vunzanesanga nlongi ko ekolo kesasilanga e diambu ngatu vovela diambu ke dina ngwizani ko ye longi. Kansi, olenda vova mambu makete, yika e nona yovo sadila kiuvu muna toma kiesesa e diambu divovelwanga. Ezak’e ntangwa, olenda mona vo kuna ye dina ovova ko muna longi. Kansi, avo osanisini o nlongoki yo kunsonga o zola, ovanga mayingi muna kunsadisa kanungunuka muna mwanda.

10. Aweyi o lusansu lwaku lulenda sadisila nlongoki a Bibila?

¹⁰ Unzayisa lusansu lwaku. Kasikil’owu, avo dikala dia lusadisu kwa nlongoki, olenda kunzayisa muna lukufi una wazayila e ludi, una wasundila diambu dimosi diampasi ye una Yave kekusadisilanga muna zingu kiaku. (Nku. 78:4, 7) Dilenda kala vo mana ovova i mau kikilu malenda kasakesa o nlongoki. Malenda kumika o lukwikilu lwandi yo kunkasakesa mu nungunuka yamuna luvubu. Malenda mpe kunsadisa mu zizidila e mpasi kenuananga zau. (1 Pet. 5:9) Mpangi Gabriel ozingilanga kuna Brasil ona osalanga se mviti a nzila, osungamenanga dina diansadisa vava kalongokanga e Bibila. Wavova vo: “Vava yawanga e mambu mampasi banuananga mau ampangi, yalongoka vo Yave  ozeye e mambu mawonso mampasi tunuananga mau. Avo mpangi zazi basunda e mambu mampasi, omono mpe ndenda kwame sunda.”

11-12. Ekuma tufwete toma tambulwilanga o nlongoki a Bibila oyantikidi kwiza mu tukutakanu?

¹¹ O nlongoki a Bibila muna nungunuka yamuna luvubu kafwete kwendanga muna tukutakanu. Ediadi dikunsadisa. (Ayib. 10:24, 25) Nanga o nlongi yandi okumbokela keza mu lukutakanu mu nkumbu antete. Vava kekwiza, yeto awonso tufwete kunkasakesa kimana kakwamanana kwiza mu Seka dia Kintinu. Ozevo, aweyi tulenda wo vangila?

¹² Toma tambula o nlongoki a Bibila. (Roma 15:7) Avo o nlongoki a Bibila otomene tambulwa muna tukutakanu, ediadi dikunsadisa mu kwamanana kwiza mu Seka dia Kintinu. Lembi kumfusulwisa e nsoni, kayisa o nlongoki a Bibila yo kunsunzula kwa mpangi zankaka. Mokena yandi kadi dilenda kala vo o nlongi andi kalweke ntete ko yovo kiyekwa kena kiau muna Seka dia Kintinu. Toma sia e sungididi muna mana kevovanga yo kunsonga o zola. Avo otomene tambula nlongoki, aweyi kemona? Tala e nona kia mpangi Dmitrii ona wavubilu ke kolo ko, owau osalanga se selo kia salu. Vava kesungamenanga e nkumbu antete kayenda mu lukutakanu, wavova vo: “Ekolo yavingilanga kuna mbazi a Seka dia Kintinu yo tokana, mpangi mosi wa nkwa ngemba wayiza vana yakala. Wandata muna kati, i bosi mpangi zankaka bayiza kunkayisa. Yasivika kikilu. Yayindula vo: Diambote kele vo twakalanga yo lukutakanu lumbu yawonso muna lumingu. Kiasidi mona diambu dia mpila yayi ko muna zingu kiame.”

13. Adieyi e mbandu aku ambote ilenda vanga kwa nlongoki a Bibila?

¹³ Songanga mbandu ambote. E mbandu aku ambote ilenda sadisa o nlongoki mu kwikila vo yeto tu Akristu akieleka. (Mat. 5:16) Mpangi Vitalii ona osalanga se mviti a nzila kuna Moldávia, wavova vo: “Yatoma sianga e sungididi muna mpil’a zingu kia ampangi muna nkutakani, fu, ngindu ye mavangu mau. Ediadi diankwikidisa kikilu vo Mbangi za Yave, Nzambi aludi besambilanga.”

14. Aweyi e mbandu aku ambote ilenda sadisila nlongoki kakwamanana nungunuka?

¹⁴ Muna kuyifwanisa muna luvubu, o nlongoki a Bibila kafwete sadila mana kelongokanga. Kansi, ezak’e ntangwa ke dikalanga diasazu ko. Vava nlongoki kemonanga una osadilanga e nkanikinu mia Bibila ye nluta ovuanga, ediadi dilenda kumfila mu tanginina e mbandu aku ambote. (1 Kor. 11:1) Tala e nona kia mpangi Hanae ona tuyikidi kala. Wavova vo: “Ampangi muna nkutakani basadilanga mana yalongokanga. Yalongoka una mfwete kasakesela, loloka yo zola akaka. Ntangwa  zawonso ampangi mambu mambote kaka bavovanga mu kuma kia akaka. Muna kuma kiaki, yazola kubatanginina.”

15. Mun’owu wa sono kia Ngana 27:17, ekuma tufwete vangilanga e kikundi ye alongoki a Bibila?

¹⁵ Vanga e kikundi yo nlongoki. Ekolo nlongoki kekwizanga muna tukutakanu, kwamanana songa muna mavangu vo zola kikilu okunzolanga. (Fili. 2:4) Ozevo, ekuma olembi vaulwila e ntangwa muna mokena yandi? Lembi kuyisia muna zingu kiandi, olenda kunsanisina muna nsobani kavangidi kala. Olenda mpe kunyuvula mu kuma kia longi diandi dia Bibila, yitu yandi ye salu kiandi. E moko yayi ilenda kunusadisa mu kituka akundi. E kikundi kiaki kilenda sadisa nlongoki mu nungunuka yamuna luvubu. (Tanga Ngana 27:17.) Owau, mpangi Hanae osalanga se mviti a nzil’a ngonde ke ngonde. Vava kesungamenanga e kolo kina kayantika kwenda mu tukutakanu, wavova vo: “Vava yayantika vanga kikundi ye ampangi muna nkutakani, e tima diame dia kwenda mu tukutakanu diawokela. Muna kuma kiaki, yayendanga muna tukutakanu kana nkutu vava yakalanga yayoya. Yatoma yangalalanga kala vamosi ye akundi ame ampa, ediadi diansadisa mu yambula e kikundi ye awana ke basadilanga Yave ko. Yazola siamisa e kikundi kiame yo Yave ye ampangi muna nkutakani. Muna kuma kiaki, yabaka e nzengo za vubwa.”

16. Adieyi diaka olenda vanga muna sadisa o nlongoki kayangalela e fulu kiandi muna nkutakani?

¹⁶ Ekolo o nlongoki kekwamanana nungunuka yo vanga e nsobani, unsadisa kabakula vo una ye fulu kiandi muna nkutakani. Imosi muna mpila olenda wo vangila, i songanga e fu kia zola nzenza. (Ayib. 13:2) Vava kesungamenanga e kolo kina kalongokanga e Bibila, mpangi Denis ona osadilanga kuna Moldávia, wavova vo: “Nkumbu miayingi omono yo nkaz’ame twabokeleswanga muna nsaka bakubikanga ampangi. Ekolo twasakananga, batuvovesanga una Yave kabasadisilanga muna zingu kiau. Ediadi diatukasakesa kikilu. Twakala ye ziku vo Yave tuzolele sadila ye avo tuvangidi wo zingu kiambote tukala kiau.” Avo nlongoki a Bibila okitukidi se nteleki, olenda kumbokela nuavaika kumosi muna salu kia umbangi. Nteleki mosi kuna Brasil una ye nkumbu Diego, wavova vo: “Vava yakituka nteleki, mpangi zayingi bambokelanga twavaika kumosi muna salu kia umbangi. Eyayi i mpila yambote ya toma kubazayila. Mambu mayingi bandonga, ediadi diasiamisa e kikundi kiame yo Yave yo Yesu.”

17. Aweyi akuluntu balenda sadisila alongoki a Bibila?

¹⁷ Vaulanga e ntangwa muna toma zaya alongoki a Bibila. Akuluntu, vava nusonganga o  zola yo lunga-lunga alongoki, nukubasadisanga mu nungunuka yamuna luvubu. Nga olenda vaula e ntangwa ya mokena ye alongoki a Bibila muna konso lukutakanu? Muna songa vo mfunu okubavuanga, sungamenanga e nkumbu zau musungula vava beyantikanga vana e nkomena muna tukutakanu. Vaulanga e ntangwa ya vaika kumosi yo nteleki ona olongokanga yandi e Bibila. Muna mpila yayi, otoma sadisa o nlongoki lutila nkutu una oyindulanga. Mpangi ankento Jackie una vo mviti a nzila kuna Nigéria, wavova vo: “Alongoki ayingi betoma sivikanga vava bebakulanga vo mpangi ovaikidi yame, nkuluntu. Nlongoki mosi a Bibila wampovesa vo: ‘O nlongi a dibundu diame kalendi wo vanga ko. Akwa nzimbu kaka kekingulanga, ovanganga wo kaka avo bamfutidi e nzimbu.’” Owau, o nlongoki ndioyo okwendanga muna tukutakanu.

18. Aweyi akuluntu balenda lungisila e mbebe au nze una wasonama muna Mavangu 20:28?

¹⁸ Longa yo kasakesa ateleki. Akuluntu, mbebe ampwena nuna yau ya sadisa ampangi kimana bakala ateleki ye alongi ambote. (Tanga Mavangu 20:28.) Avo nteleki nsoni kemonanga muna fila e longi vana ntadisi aku, unsadisa mu fila e longi. Mpangi Jackie ona tuyikidi kala wavova vo: “Nkumbu miayingi, akuluntu bekungiuvulanga mu kuma kia alongoki ame a Bibila. Vava iwanananga ye nkakalakani muna fila e longi dia Bibila, bekunsonganga e ndekwa zambote ndenda sadila.” Akuluntu, mayingi nulenda vanga muna kasakesa yo sadisa ateleki kimana balembi yoya. (1 Tes. 5:11) Mpangi Jackie wakudikila vo: “Itoma yangalalanga vava akuluntu bekunkasakesanga yo kumpovesa vo betoma yangalelanga e salu kiame. E mvovo miami mivuvikanga o ntim’ame nze muntu onuini maza manzizi muna lumbu kia mbangazi angolo. E mvovo miau mia lukasakeso miwokesanga e vuvu ye kiese kiame muna salu kia longa o wantu.”—Nga. 25:25.

19. Nkia kiese tulenda kala kiau?

¹⁹ Kana nkutu vo kulongokanga Bibila yo muntu ko, olenda sadisa nlongoki a mpangi ankaka kimana kanungunuka yamuna luvubu. Avo mpangi ulombele nuenda fila kumosi e longi dia Bibila, toma kubama kimana wavana nkomena zambote yo lembi vova kwayingi. Vanga kikundi ye alongoki vava beyantikanga kwiza mu Seka dia Kintinu yo kubasonga mbandu ambote. Avo u nkuluntu, kasakesanga alongoki muna vaulanga e ntangwa ya mokena yau. Kasakesanga mpe ateleki muna kubalonganga yo kubasanisina. Muna mpila yayi, okala ye kiese kia sadisa muntu mu zola yo sadila Yave wa Se dieto.