1. Landila e sono kia Matai 24:9, ekuma ke tufwete sivikilanga ko vava e nza ikutumenganga?

YAVE watusema ye fu kia zola akaka yo zolwa mpe kwa akaka. Muna kuma kiaki, vava o wantu bekutumenganga, tukendalalanga kikilu yo mona nkutu o wonga. Kasikil’owu, mpangi Georgina wavova vo: “Vava yakala ye mvu 14, o ngudi ame wambenganga wau vo i Mbangi a Yave. Yakendalala kikilu yo mona kinsona kadi yayantika yindula vo ki muntu ambote ko.” * Mpangi Danylo wasoneka vo: “Vava masoladi bangwandanga, kumveza yo kumvumisa vo vonda bekumvonda wau vo i Mbangi a Yave, yakendalala kikilu yo mona vo kina mfunu ko.” Dialudi vo, tutoma kendalalanga vava o wantu bekutumenganga. Kansi, ediadi ke dilendi kutusivikisa ko. Kadi Yesu wasakula vo mengwa tumengwa.—Tanga Matai 24:9.

2-3. Ekuma alandi a Yesu bemengenuanga?

² E nza imenganga alandi a Yesu. Ekuma? Kadi nze Yesu “ke twa nza ko.” (Yoa. 15:17-19) Muna kuma kiaki, kana una vo tuzitisanga ayadi a nza yayi, tuvenganga kuyisia muna mambu ma mbumba, sambila e dimbu kia nsi yovo yimbila nkung’a nsi. Yave kaka tusambilanga. Tukwikilanga vo Yave kaka una yo nswa wa yala e nza yayi. Kansi, o Satana ye “mbongo” andi ke betondanga e ngindu zazi ko. (Tuku 3:1-5, 15) Tusamunanga vo Kintinu kia Nzambi kaka kifokola e mpasi za wantu ye ke kolo ko kifwasa awonso betelamenanga e kintinu kiaki. (Dan. 2:44; Lus. 19:19-21) Kuna kwa alembami e nsangu zazi zambote, kansi kwa yimpumbulu nsangu zambi.—Nku. 37:10, 11.

 ³ E kuma kiankaka tumengenuanga kwa wantu, i kia sia vo, nsiku mia Nzambi tulemvokelanga. Dina Nzambi kevovanga mu kuma kia edi diambote ye edi diambi, diaswaswana kikilu ye dina wantu a nza bebadikilanga vo diambote ye diambi. Kasikil’owu, wantu ayingi beyindulanga vo ke diambi kwandi ko mu kuyivana muna mavangu ma zumba mana mafila Nzambi mu fwasa e mbanz’a Sodoma ye Ngomora. (Yuda 7) Wau vo tulemvokelanga e nkanikinu mia Nzambi mu kuma kia mavangu mama ma zumba, wantu ayingi bekutuvezanga yo kutuyikila vo tu mazowa.—1 Pet. 4:3, 4.

4. Nkia fu tufwete songanga vava wantu bekutumenganga?

⁴ Nkia fu ilenda kutusadisa mu zizidila vava wantu bekutumenganga yo kutuveza? Lukwikilu. Tufwete kwikila kikilu vo Yave okutusadisa. Nze ngubu, o lukwikilu lweto lulenda kutusadisa mu ‘zima maswanga mawonso matiya ma ndiona wambi.’ (Efe. 6:16) Kansi, fu kiankaka mpe tuvuidi o mfunu ke lukwikilu kaka ko. E fu kiaki i zola. Ekuma? E kuma kadi o zola “ke kufunganga makasi mu nzaki ko.” O zola kuzizidilanga mambu mawonso mampasi. (1 Kor. 13:4-7, 13) Owau, yambula twazaya una o zola kweto muna Yave, muna mpangi zeto ye muna mbeni zeto kulenda kutusadisila mu zizidila lumengo.

5. Aweyi o zola kwa Yesu muna Se diandi kwansadisila?

⁵ Muna fuku vitila e mbeni zandi bamvonda, Yesu wavovesa alandi andi akwikizi vo: “Izolanga o Se, [kadi] wauna o Se kankanikina i wau ivanga.” (Yoa. 14:31) Wau vo Yesu wazolanga Yave, ediadi diansadisa mu zizidila mpasi. O zola kweto mpe muna Yave kulenda kutufila mu vanga diau dimosi.

6. Mun’owu wa Roma 5:3-5, aweyi e selo ya Yave bemonanga vava bebangikwanga?

⁶ Tuka kolo, o zola muna Nzambi kusadisanga e selo ya Yave mu zizidila lubangamu. Kasikil’owu, e mbazi a nkanu ya Ayuda yakanikina antumwa vo bayambula samuna e nsangu zambote. Kansi, o zola kwau muna Nzambi kwabafila mu “lemvokela Nzambi nze mfumu ke mu wantu ko.” (Mav. 5:29; 1 Yoa. 5:3) O unu, i diau mpe divangamanga kwa mpangi zeto. O zola kwau muna Nzambi kukubasadisanga mu sikila ye kwikizi ekolo bebangikwanga kwa ayadi akwa nsoki ye akwa nkuma. Muna kuma kiaki, vava tubangikwanga ke tukendalalanga ko, kansi tuyangalalanga —Mav. 5:41; tanga Roma 5:3-5.

7. Adieyi tufwete vanga vava tubangikwanga kwa yitu yeto?

⁷ E diambu diankaka dilenda kala diampasi mu zizidila i vava yitu yeto bekutubangikanga. Vava tuyantikanga longoka e ludi, akaka balenda yindula vo vunua tuna vunua. Akaka nkutu balenda yindula vo tulaukidi. (Tezanesa ye Maku 3:21.) Balenda mpe kutubangika muna mvovo ye muna mavangu mau. O lubangamu lwalu ke lufwete kutusivikisa ko. Kadi Yesu wavova vo: “E mbeni za muntu i esi nzo a yandi kibeni.” (Mat. 10:36) Kansi, kana nkutu mu nkia mpila e yitu yeto bekutubadikilanga, oyeto ke tufwete kubamenga ko. Ekolo o zola kweto muna Yave kuwokelanga, o zola kweto mpe muna wantu kufwete wokela. (Mat. 22:37-39) Kansi, ke tufwete yambula lemvokela e nsiku ye nkanikinu mia Bibila ko muna yangidika o wantu.

8-9. Nki kiasadisa mpangi mosi ankento mu zizidila lubangamu?

⁸ Mpangi Georgina ona tuyikidi kala, walenda zizidila o lubangamu lwa ngudi andi. Wavova vo: “Mono yo ngudi ame twayantika longoka e Bibila ye Mbangi za Yave. Kansi,  vioka ngonde sambanu vava yayantika kwenda mu tukutakanu, o ngudi ame wayantika kumbangika. Yabakula vo avengomoki kamokenanga yau yo sadila malongi mau maluvunu vava kamokenanga yame. O ngudi ame wamfinganga, watuntanga e nsuki zame, wandiemanga vana laka yo veta e nkanda miame. I bosi, vava yalungisa mvu 15, yavubwa. Muna kumfila mu yambula sadila Yave, o ngudi ame wandata kuna nzo zina zilunga-lunganga aleke ana benuanga e fomo zangolo yo vanga e mambu mansoki. Diampasi kikilu mu zizidila lubangamu musungula avo muntu okubangikanga i yandi wafwana kuzola yo kulunga-lunga.”

⁹ Nki kiasadisa mpangi Georgina mu zizidila? Wavova vo: “E lumbu kina o ngudi ame kayantika kumbangika, i lumbu mpe yafokola tanga e Bibila kiawonso. Muna kuma kiaki, yakala kikilu ye ziku vo yasolola e ludi yo toma finama Yave. Nkumbu miayingi, yasambanga kwa yandi ye wawanga e sambu yame. Ekolo yazingilanga muna nzo yayina ilunga-lunganga aleke, mpangi mosi ankento wambokelanga kuna nzo andi kimana twalongoka e Bibila kumosi. Muna kolo kiokio, vava yayendanga kuna Seka dia Kintinu ampangi bankasakesanga. Bankitula se yitu kiau. Yamona muna zingu kiame vo Yave osundidi e mbeni zeto o nkuma kana nkutu nkia mpila wantu bena.”

10. Nkia vuvu tulenda kala kiau muna Yave wa Nzambi eto?

¹⁰ Paulu wa ntumwa wasoneka vo ke vena diambu ko dilenda “kutuvambula muna zola kwa Nzambi kuna muna Kristu Yesu wa Mfumu eto.” (Roma 8:38, 39) Kana nkutu nkia mpasi tumweswanga owau, Yave okala kaka kuna sambu dieto muna kutufiaulwisa yo kutukumika. Nze una usongele e nona kia mpangi Georgina, Yave okutusadisanga mpe muna sadila e mpangi zeto muna nkutakani.

11. Aweyi o zola kuna Yesu kayika muna Yoane 15:12, 13 kwasadisila alongoki andi? Yika e nona.

¹¹ Muna fuku vitila lufwa lwandi, Yesu wasungamesa alongoki andi vo bafwete zolaziananga. (Tanga Yoane 15:12, 13.) Wazaya wo vo o songa zola kana nkutu vava dikalanga diampasi, disadisa alongoki andi mu kala yo ungudi yo zizidila lumengo lwa nza yayi. Badika dina diavangama muna nkutakani ya Tesalonika. Vava e nkutakani yayi yavangama, ampangi bayantika o bangikwa. Kansi, e mpangi zazi bazayakana mu kuma kia zola ye  kwikizi kiau. (1 Tes. 1:3, 6, 7) Paulu wabakasakesa mu kwamanana songa o zola yo ‘sakisa wo vanga.’ (1 Tes. 4:9, 10) O zola kwaku kwabasadisa mu fiaulwisa awana bakendalala yo sadisa awana batovoka. (1 Tes. 5:14) E mpangi zazi balemvokela luludiku lwa Paulu kadi muna nkand’andi wanzole kabasonekena, Paulu wabavovesa vo: “O zola muna muntu yo nkwandi kuwokelanga.” (2 Tes. 1:3-5) O zola kwau kwabasadisa mu zizidila mpasi yo lubangamu.

12. Muna kolo kia vita, aweyi ampangi basongela o zola kwa muntu yo nkwandi?

¹² Owau, yambula twabadika e nona kia mpangi Danylo yo nkaz’andi ana tuyikidi kala. Vava e mbanz’au yakala muna vita, mpangi Danylo yo nkaz’andi bakwamanana kwenda mu tukutakanu, samuna e nsangu zambote yo kayila mpangi zau e madia. Lumbu kimosi, masoladi bayenda ye nkele miau kuna nzo a mpangi Danylo. Mpangi Danylo wavova vo: “Bankomekena vo yayambula sadila Yave. Wau vo kiatonda ko, bayantika kungwanda yo vava kundonga vana ntu. Vitila benda, bamvumisa vo nkaz’ame bekwiza leka mu kingolo. Kansi, vana vau ampangi batusadisa mu baka e kumbi dia ntoto yo kwenda kuna mbanza yankaka. Kisinga vilakana ko o zola batusonga ampangi. Vava twalwaka kuna mbanza twayenda, ampangi batuvana madia yo kutusadisa mu solola nzo ye salu. Muna kuma kiaki, oyeto mpe twakubama twakala muna tambula mpangi zankaka ana batina e vita.” E nona kiaki kisonganga vo o zola tusongwanga kwa mpangi zeto kulenda kutusadisa mu zizidila lumengo.

13. Aweyi mwand’avelela ulenda kutusadisila mu zizidila kana nkutu vava wantu bekutumenganga?

¹³ Yesu wavovesa alandi andi vo bafwete zolanga e mbeni zau. (Mat. 5:44, 45) Nga diasazu mu vanga wo? Ve. Kansi, muna lusadisu lwa mwand’avelela a Nzambi dilendakana. Kadi e fu ya mbongo a mwand’avelela a Nzambi i zola, luzindalalu, walakazi, lulembamu ye volo. (Ngal. 5:22, 23) E fu yayi ikutusadisanga mu zizidila lumengo. Kasikil’owu, wantu ayingi bayambula kutubangika wau bamona o yakala, nkento, mwana yovo mfinangani au wasonga e fu yayi. Ayingi muna yau, owau bakituka se mpangi zeto. Muna kuma kiaki, avo diampasi dina kwa ngeye mu zola awana bekumenganga wau vo u Mbangi a Yave, lomba mwand’avelela muna  sambu. (Luka 11:13) Tuna ye ziku vo o lemvokela Nzambi i diambu diamfunu tufwete vanganga ntangwa zawonso.—Nga. 3:5-7.

14-15. Aweyi e sono kia Roma 12:17-21, kiasadisila mpangi Yasmeen mu songa o zola kwa nkaz’andi kana una vo wambangikanga?

¹⁴ Owau, yambula twabadika e nona kia mpangi ankento Yasmeen, ona tuyikidi kala. Vava kakituka Mbangi a Yave, o nkaz’andi wayindula vo o mpangi Yasmeen vunua kavunuanga yo vava kunsima kayambula sadila Nzambi. Wamfinganga yo vovesa e yitu yau, mfumu a dibundu yo ngang’a nkisi vo banloka yo kumvunina o mambu vo kanda kevambulanga. Lumbu kimosi, o nkaz’andi nkutu wayenda finga ampangi ekolo bakala muna lukutakanu. Nkumbu miayingi, mpangi Yasmeen wadilanga mu kuma kia lubangamu lwalu.

¹⁵ Muna Seka dia Kintinu, ampangi bafiaulwisanga yo kumika mpangi Yasmeen. Akuluntu bankasakesa vo kasadila e mvovo miasonama muna Roma 12:17-21. (Tanga.) Mpangi Yasmeen wavova vo: “Ke diakala diasazu ko mu vanga wo. Kansi, yalomba lusadisu kwa Yave yo vanga mawonso mu lemvokela mana Bibila kivovanga. Muna kuma kiaki, vava o nkaz’ame kasisanga e mvindu kuna kuku kuna lukanu, yavelelesanga kio. Vava kamfinganga, yamvutulwilanga kuna ngemba zawonso. Vava kayelanga, yatoma kunlunga-lunganga.”

16-17. Adieyi olongokele muna nona kia mpangi Yasmeen?

¹⁶ Mpangi Yasmeen wasambulwa wau kakwamanana songa o zola kwa nkaz’andi. Wavova vo: “O nkaz’ame wayantika kumbunda e vuvu kadi wazaya wo vo ludi kaka ikumvovesanga. Wayantika kungwinikina kuna luzitu lwawonso ekolo twamokenanga mu kuma kia Nzambi yo tambulwila kitula e nzo eto se fulu kia luvuvamu. Owau, yandi okunkasakesanga mu kwenda muna tukutakanu. O unu, mono yo nkaz’ame, ngwizani ambote tuna yau. E nzo eto fulu kia luvuvamu. Ngina ye vuvu vo o nkaz’ame otambulwila e ludi yo kungikama muna salu kia Yave.”

¹⁷ E nona kia mpangi Yasmeen kisonganga vo o zola “kuzizidila mawonso, . . . kusila mawonso e vuvu, kuzindalela mawonso.” (1 Kor. 13:4, 7) Kieleka, o zola kusundidi lumengo o nkuma. Kufilanga o wantu mu yambula kutumenga. Vava tukwamanananga songa o zola, ntim’a Yave tuyangidikanga. Kansi, kana nkutu vo e mbeni zeto bakwamanene kutumenga, tulenda kwamanana yangalala. Mu nkia mpila?

18. Ekuma tufwete yangalelanga vava tumengwanga?

¹⁸ Yesu wavova vo: “Nukala ye kiese konso ntangwa o wantu bekunumenga.” (Luka 6:22) Ke tusolanga bangikwa ko. Ke tuzolanga ko vo twavondwa mu kuma kia lukwikilu lweto. Ozevo, ekuma tufwete yangalelanga vava tumengwanga? Tala e kuma tatu. Kiantete, vava tuzizidilanga lumengo, tuvuanga e dienga dia Nzambi. (1 Pet. 4:13, 14) Kiazole, o lukwikilu lweto luzikukanga yo kumama. (1 Pet. 1:7) Kiatatu, tutambula o nsendo usundidi e nsendo miawonso, i sia vo, moyo a mvu ya mvu.—Roma 2:6, 7.

19. Vava antumwa bawandwa, ekuma bayangalela?

¹⁹ Ke vavioka kolo ko vava Yesu kafuluka, antumwa bamona e kiese kina kayika. Vava bawandwa yo kanikinua vo bayambula samuna e nsangu zambote, bayangalala. Ekuma? E kuma kadi “babadikilwa vo bafwanua vezwa mu kuma kia nkumbu a Yesu.” (Mav. 5:40-42) O zola kwau muna mfumu au kwasunda o wonga bakala kwau muna mbeni zau. Basonga o zola kwaku muna lembi “yambula” samuna e nsangu zambote. O unu, ayingi muna mpangi zeto bekwamanananga sikila ye kwikizi kana una vo benuananga ye mambu mampasi. Bazeye wo vo o Yave kesinga vilakana ko e salu kiau yo zola besonganga muna nkumbu andi.—Ayib. 6:10.

20. Nkia diambu tulongoka muna longi dilanda?

²⁰ O wantu bekwamanana kutumenga ekolo e nza yayi ikwendanga ku mfoko. (Yoa. 15:19) Kansi, ke dina mfunu ko mu mona o wonga. Kadi nze una tumona muna longi dilanda, Yave ‘okumika yo tanina’ e selo yandi yakwikizi. (2 Tes. 3:3) Muna kuma kiaki, yambula twakwamanana zola Yave, mpangi zeto yo zola nkutu e mbeni zeto. Avo tulemvokele luludiku lwalu, tukwamanana muna ungudi, lukwikilu lweto lukumama, tutwasa nkembo kwa Yave yo songa vo o zola kusundidi lumengo o nkuma.