Akristu akaka besadilanga internete, telefone, tablete ye komputadore muna mokena ye yitu ye mpangi zankaka. Kansi, o Nkristu wazikuka kafwete sungamenanga luludiku olu: “O muntu una vo nlungaladi omwene e vonza, oswekamene, kansi e minkondwa ngangu balutakene yo baka mfwilu.”—Nga. 27:12.

Tuzeye wo vo Yave ozolele kututanina. Muna kuma kiaki, ke tumokenanga ye wantu ko ana besianga e mpambula, ana bavaikiswa muna nkutakani yovo ana bebendomonanga malongi ma Bibila. (Roma 16:17; 1 Kor. 5:11; 2 Yoa. 10, 11) Kuna diak’e sambu, akaka muna awana bekwizanga muna tukutakanu tweto, nanga ke belemvokelanga nsiku mia Yave ko. (2 Tim. 2:20, 21) Tufwete sungamenanga e diambu diadi vava tuvanganga yikundi. Kansi, dilenda kala diampasi mu toma sola akundi ambote avo muna aplicativo za mensagem kaka tumokenenanga yau.

Diamfunu kikilu twayikeba mu diambu diadi, musungula avo ndonga bena muna buka tutwikaziananga e mensagem. Mpangi zankaka bayikotesa muna buka ya mpila yayi yo baka mfwilu. Muna buka ya mpila yayi, ina ye nkama yovo funda dia wantu, diampasi muna zaya wantu awonso yo zaya e kimwanda kia konso muntu. Adieyi obenze, mpangi okuyisianga muna buka ya mpila yayi, nga mu kuyitanina kena? Nkunga 26:4 kivovanga vo: “Kikalanga ntwadi ye akwa luvunu ko, ivenganga kala vamosi ye awana beswekanga kiwuntu kiau.” E sono kiaki kisonganga vo diangangu mu twika e mensagem kwa wantu kaka tutomene zaya.

Kana nkutu vo muna buka kiaki wantu akete kaka bena mo, o Nkristu kafwete kukiyuvula: Nkia mambu o wantu bena muna buka kiaki bemokenenanga? Ola kwa iviokesanga muna mokena yau? E moko yayi ilenda vovela mambu ma mpila mu mpila. Kansi, ke dina mfunu ko muna kuyisia muna moko yawonso. Paulu walukisa Timoteo mu kuma kia wantu bekala “akumbi ye ayakami a mambu mangani.” (1 Tim. 5:13) O unu, e mambu mama malenda vangama ekolo tusadilanga internete, telefone, tablete ye komputadore.

Ke vena Nkristu ko una vo wazikuka okumba nkwandi yovo sengomona e mbumba mu kuma kia mpangi ankaka ngatu tamba matu muna moko ya mpila yayi. (Nku. 15:3; Nga. 20:19) O Nkristu wazikuka ke vutukilanga mpe tusansu ko tuna tusakisanga e mambu yovo tamba matu muna tusansu tuna vo ke twaludi ko. (Efe. 4:25) Muna nzil’eto ya jw.org ye muna programa ya TV ya Mbangi za Yave ya konso ngonde tuvuidi malongi mayingi ma Bibila kumosi ye tusansu twafwanua bundw’e vuvu.

Vena ye mpangi zankaka besadilanga aplicativo za twikila e mensagem muna sadisa ampangi bevavanga e salu, teka yo sumba e lekwa. E mambu mama ma kinkita, ke matadidi nsambil’eto ko. O Nkristu ona ozolele songa vo ‘wakondwa zola muna nzimbu’ ke vavanga vua nluta ko muna sadila e mpangi zandi.—Ayib. 13:5.

Nga diambote mu sadila aplicativo za twikila e mensagem mu lomba e nzimbu mu kuma kia ampangi bena mu mpasi yovo awana babwidilu e sumbula? Dialudi vo tuzolanga mpangi zeto ye tuzolele kubasadisa vava bekalanga muna mpasi. (Yak. 2:15, 16) Kansi, o twika e mensagem za mpila yayi dilenda vuzanesa e nkubika bevanganga ampangi kuna vula ye dina akuluntu bevanganga muna nkutakani. (1 Tim. 5:3, 4, 9, 10, 16) Kuna diak’e sambu, ke tuzolele fila mpangi zeto ko bayindula vo yeto tusolelo muna sadisa mpangi zazi.

Kieleka, tuzolele vanga mawonso muna vana nkembo kwa Yave. (1 Kor. 10:31) Muna kuma kiaki, vitila wabak’e nzengo za sadila aplicativo za twikila mensagem yovo programa yankaka, toma yindula e vonza kilenda kubwila yo kuyikeba.