1-2. Nkia diambu tumonanga muna lumbu kia luvubu? Adieyi tufwete badika?

 NGA wamona kala e buka kia wantu ana bevubwa? Nanga wawá e mpila batambulwila ye ziku kiawonso ekolo bavananga e mvutu za yuvu yole vitila bavubwa. Wamona mpe e kiese basonga e yitu ye akundi au mu kuma kiau. Vava awana bena vubwa bevaikanga muna maza, owanga makonzo mesikwanga yo mona e kiese bekalanga kiau vana mpolo. Konso lumingu, mafunda ye mafunda ma wantu beyekolanga e zingu kiau kwa Yave, bevubwanga yo kituka Mbangi za Yave.

² Adieyi tuvova mu kuma kiaku? Avo ongeye mpe oyindulanga o vubwa, zaya wo vo wantalu kikilu omu nza yayi ya tombe, kadi “ovavanga Yave.” (Nku. 14:1, 2) Kiakala vo u mbuta yovo nleke, e longi diadi dikubikilu mu kuma kiaku. Kansi, avo wavubwa kala, e longi diadi mpe dikumika e kani diaku dia kwamanana sadila Yave yakwele mvu. Muna kuma kiaki, yambula twabadika kuma tatu ilenda kutusadisa muna kwamanana sadila Yave.

3. Ekuma e selo ya Yave bezolelanga e ludi yo unsongi? (Nkunga 119:128, 163)

³ Yave wavovesa nkangu andi vo ‘bazola e ludi.’ (Zak. 8:19) Avo i Yesu, wavovesa alandi andi vo bavava “unsongi.” (Mat. 5:6) Ediadi disongele vo, tufwete kala kikilu ye tima dia vanga dina Nzambi kevovanga vo i diansongi ye diambote. Nga ozolanga e ludi ye unsongi? Tuna ye ziku vo elo. Kadi omenganga luvunu ye mawonso mena vo mambi. (Tanga Nkunga 119:128, 163.) Ndiona ovovanga luvunu, Satana ketangininanga una vo i nyandi a nza yayi. (Yoa. 8:44; 12:31) Dimosi muna  kani dia Satana i funzula e nkumbu avelel’a Yave wa Nzambi. Tuka muna mpatu a Edene, Satana osayanesanga luvunu mu kuma kia Nzambi eto. Ofilanga wantu mu yindula vo Nzambi nkwa loko, mvuni ye oswekanga oma mambote kwa wantu. (Tuku 3:1, 4, 5) Mana Satana ke vovanga mu kuma kia Yave, mefilanga o wantu mu badikila Nzambi vo muntu ambi. Vava wantu besolanga lembi ‘zola e ludi’ Satana olenda kubafila mu vanga mambu mawonso mambi.—Roma 1:25-31.

4. Aweyi Yave kesongelanga vo Nzambi aludi? (Tala mpe fwaniswa.)

⁴ Yave i “Nzambi aludi,” muna kuma kiaki, kuna mvevo wawonso olonganga e ludi kwa awonso bekunzolanga. (Nku. 31:5) Muna wo vanga, Nzambi okubasadisanga kimana balembi vunua diaka kwa Satana. Yave mpe olonganga e selo yandi kimana bakala akwa ziku ye akwa unsongi. Ediadi disadisanga awana bezolanga Yave muna kuyizola yo kala yo luvuvamu. (Nga. 13:5, 6) Nga omonanga vo Yave ovanganga wo ekolo olongokanga e Bibila? Olongokanga vo e mpila ina o Yave kevangilanga o mambu i yambote kwa ngeye ye kwa wantu awonso. (Nku. 77:13) Muna diadi, ozolele vanga dina Nzambi kevovanga vo dia unsongi. (Mat. 6:33) Ozolele tanina e ludi yo songa vo mana o Satana kevovanga mu kuma kia Yave wa Nzambi eto, maluvunu. Aweyi olenda wo vangila?

5. Aweyi olenda songela vo oyikamanga e ludi ye unsongi?

⁵ Olenda songa muna mpila zingu kiaku vo: “Omenganga luvunu lwa Satana yo yikama e ludi. Ozolele vo Yave kakala Nyadi aku ye ozolele vanga dina yandi kevovanga vo diansongi.” Aweyi olenda wo vangila? Muna sambanga kwa Yave, kukiyekola kwa yandi yo vubwa. Ozola edi dialudi y’edi diansongi, i kuma kiasikila kifwete kutufila muna vubwa.

6. Landila Nkunga 45:4, nkia kuma ifwete kutufila muna zola Yesu Kristu?

⁶ Ekuma ozolelanga Yesu Kristu? Muna Nkunga 45:4, muna ye kuma yayingi ikutufilanga muna zola Yesu Kristu. (Tanga.) Yesu wazolanga ludi, unsongi yo lulembamu. Avo ngeye mpe ozolanga e ludi ye unsongi, ediadi disonga vo ozolanga Yesu Kristu. Yindula una Yesu katanina e ludi ye unsongi kuna unkabu  wawonso. (Yoa. 18:37) Ozevo, aweyi Yesu kazolelanga lulembamu?

7. Aweyi omonanga wau vo Yesu osonganga lulembamu?

⁷ Yesu wasonganga lulembamu muna mbandu andi. Kasikil’owu, wavana nkembo wawonso kwa Se diandi ke mu yandi kibeni ko. (Maku 10:17, 18; Yoa. 5:19) Aweyi omonanga wau vo Yesu wasonga lulembamu? Kieleka, ediadi dikufilanga mu zola o Mwan’a Nzambi yo kunlanda. Ekuma o Yesu kasongela lulembamu? Kadi ozolanga yo tanginina Se diandi una vo nlembami. (Nku. 18:35; Ayib. 1:3) Nga ediadi ke dikufilanga ko mu finama Yesu ona otangininanga e fu ya Yave mu mpila yalunga?

8. Ekuma tuzolelanga Yesu se Ntinu eto?

⁸ Tuzolanga Yesu se Ntinu eto kadi yandi i Nyadi ofwanukini. Yave yandi kibeni, walonga Mwan’andi yo kutumbika se Nyadi. (Yes. 50:4, 5) Yindula o zola Yesu kasonga mu kuma kieto. (Yoa. 13:1) Wau vo Yesu i Ntinu eto, tufwete kunzola. Yandi kibeni wavova vo, awana bekunzolanga ye keyikilanga vo akundi andi, besonganga o zola kwau muna lemvokelanga e nkanikinu miandi. (Yoa. 14:15; 15:14, 15) Ekwe lau diampwena tuna diau, muna kala nkundi a Mwan’a Yave!

9. Aweyi luvubu lwa Akristu lwafwananena ye lwa Yesu Kristu?

⁹ Umosi muna nkanikinu o Yesu kavana, i wa sia vo, alandi andi bafwete vubwa. (Mat. 28:19, 20) Yandi kibeni, wasikidisa e mbandu. Kansi, luvubu lwa Yesu lwaswaswana ye lwa alandi andi. (Tala e babu, “ Aweyi o Luvubu lwa Yesu Lwaswaswanena ye Luvubu lwa Alandi Andi?”) Kansi, vena mpe ye diambu diafwanana muna luvubu lwa Yesu ye lwa alandi andi. Vava Yesu kavubwa, wakisunzula yandi kibeni muna vanga luzolo lwa Se diandi. (Ayib. 10:7) Diau dimosi mpe, vava alandi a Kristu bevubwanga, besonganga vana meso ma ndonga vo bakiyekwele muna vanga luzolo lwa Yave wa Nzambi. Tuka muna kolo kiakina, besadilanga e zingu kiau muna vanga luzolo lwandi, kansi ke lwa yau kibeni ko. Muna mpila yayi, belandanga e mbandu a Mfumu au.

10. Nkia kuma una yau muna zola Yesu? O zola kwaku adieyi kufwete kufila mu vanga?

¹⁰ Yindula mana ozeye kala mu kuma kia Yesu. Okwikilanga vo Yesu i Mwan’a mosi kaka a Nzambi ye Ntinu ona Yave kasola muna kutuyala. Ozeye wo vo Yesu otangininanga lulembamu lwa Se diandi mu mpila yalunga. Walongoka vo Yesu wadikila awana bakala ye nzala, wafiaulwisa ana bakendalala yo wuka e mbevo. (Mat. 14:14-21) Omonanga una Yesu kefidilanga e nkutakani o unu. (Mat. 23:10) Ozeye wo mpe vo ovanga mayingi kuna ntwala se Ntinu a Kintinu kia Nzambi. Aweyi olenda songela vo ozolanga Yesu? Muna landanga e mbandu andi. (Yoa. 14:21) Dimosi muna mambu olenda vanga muna landa e mbandu andi, i yekola e zingu kiaku kwa Yave yo vubwa.

11. Kuna kwa ngeye, akieyi i kuma kisundidi kifwete kufila muna vubwa?

¹¹ Akieyi i kuma kisundidi kifwete kufila muna vubwa? Yesu wasonga e kuma muna yika nkanikinu wa Nzambi owu usundidi. Wavova vo: “Zola Yave wa Nzambi aku muna nsi a ntim’aku wawonso, muna moyo aku wawonso, muna nyindu aku wawonso ye muna ngolo zaku zawonso.” (Maku 12:30) Nga ngeye mpe mpila yayi ozolelanga Nzambi?

12. Ekuma ozolelanga Yave? (Tala mpe e foto ye fwaniswa.)

¹² Ovuidi kuma yayingi ifwete kufila muna  zola Yave. Kasikil’owu, walongoka vo yandi i “nto a moyo” ye Mvani a “konso lukau lwambote ye konso lukau lwalunga.” (Nku. 36:9; Yak. 1:17) E lekwa yawonso yambote tuna yau, Nzambi eto anzodi watuvana yo kuna mvevo wawonso.

13. Ekuma lukûlu lwinina se lukau lusundidi o mfunu?

¹³ O lukûlu i lukau lusundidi o mfunu luna Yave katuvana. Ekuma tuvovele wo? Yindula e ngwizani ina vana vena Yave yo Mwan’a andi. Yesu wavova vo: ‘O Se okunzolanga,’ omono mpe “izolanga o Se.” (Yoa. 10:17; 14:31) Yave yo Yesu, mafunda ye mafunda ma mvu bazinga entwadi. Kiaki i kuma benena ye ngwizani ambote. (Nga. 8:22, 23, 30) Owau, yindula e ntantu kamona o Nzambi muna yambula vo mwan’andi kamona e mpasi yo fwa. Wau vo Yave ozolanga wantu awonso kumosi yo ngeye, wayambula vo Mwan’andi kafwa, kimana twakala ye lau diazinga yakwele mvu. (Yoa. 3:16; Ngal. 2:20) Kiaki i kuma kisundidi o mfunu tuzolelanga Nzambi.

14. Nkia nzengo zisundidi o mfunu olenda baka muna zingu kiaku?

¹⁴ O zola kwaku muna Yave, kuwokelanga kaka ekolo olongokanga mayingi mu kuma kiandi. Kalukatikisu ko vo ozolele finama Nzambi owau ye yakwele mvu. Aweyi olenda wo vangila? Nzambi okutuwondelelanga vo twamwesa o ntim’andi e kiese.  (Nga. 23:15, 16) Kieleka, olenda mwesa ntim’a Yave e kiese ke mu mvovo kaka ko kansi mpe muna mavangu maku. E mpila yambote isundidi o mfunu olenda wo vangila, i zingila mu mpila isonganga vo ozolanga kieleka Yave. (1 Yoa. 5:3) Ezazi, i nzengo zisundidi o mfunu olenda baka muna zingu kiaku.

15. Aweyi olenda songela vo ozolanga kieleka Yave?

¹⁵ Aweyi olenda songela vo ozolanga kieleka Yave? Entete, ofwete vanga sambu kiamfunu muna sia nsilu vo Nzambi mosi kaka aludi ozolele sadila. (Nku. 40:8) I bosi, vava ovanga e sambu kiaki vana fulu kia ngeye kaka, ovubwa muna songa kwa wantu awonso vo ukiyekwele kwa Yave. Nze una tumwene kala mu longi diadi, ovubwa i diambu disundidi o mfunu olenda vanga. Kadi tuka muna lumbu kiokio, obaka e nzengo za sadila e zingu kiaku ke mu kuma kia wete dia ngeye kibeni ko, kansi muna vanga luzolo lwa Yave. (Roma 14:8; 1 Pet. 4:1, 2) Kieleka, e nzengo zazi zilenda moneka vo zampwena kikilu. Ediadi dialudi. Kansi, ovubwa kuziulanga e nzila muna toma sadila e zingu kiaku una ufwene. Mu nkia mpila?

16. Nze una usonganga Nkunga 41:12, aweyi Yave kesambulwila awana beyekolanga e zingu kiau muna kunsadila?

¹⁶ Yave i Muntu osundidi kaya mu nza yawonso. Kiakala nkia lekwa okumvana, Yave mayingi kekuvutulwila. (Maku 10:29, 30) Okuvana zingu kiambote ye kiakiese kana nkutu mu nza yayi yambi. Olwalu i lubantiku kaka. O nsendo kekuvana vava ovubwa, ke ufokoka ko. Olenda kwaku sadila Se diaku dia nzolwa yakwele mvu. O zola kwaku muna Se diaku dia zulu, kukwamanana wokela ye ozinga yakwele mvu nze yandi.—Tanga Nkunga 41:12.

17. Nkia lekwa olenda vana kwa Yave kina kena kiau ko?

¹⁷ Avo obakidi e nzengo za kukiyekola kwa Nzambi yo vubwa, okala ye lau dia vana lekwa kisundidi o mfunu kwa Se diaku dia zulu. E kiese omonanga kumosi ye lekwa yawonso yambote una yau muna zingu kiaku, Yave okuvananga yo. Ozevo muna vutulanga matondo muna mawonso mama, olena vana kwa Mfumu  a zulu yo ntoto e lekwa kina kena kiau ko, i sia vo, kwikizi kiaku yo luzolo lwa kukivana emvimba muna salu kiandi. (Yobi 1:8; 41:11; Nga. 27:11) Aweyi olenda sadila e zingu kiaku mu mpila yambote? Kalukatikisu ko vo, o zola kwaku muna Yave i kuma kisundidi o mfunu kifwete kufila muna vubwa.

18. Nkia yuvu ofwete kukiyuvula?

¹⁸ Ozevo, nkia mvutu olenda vana muna kiuvu eki: Nga ozolele vubwa? Ngeye kibeni kaka ofwete vana e mvutu za kiuvu kiaki. Kansi, diambote mpe wakiyuvula: ‘Adieyi ivingilanga muna vubwa?’ (Mav. 8:36) Sungamena e kuma tatu tufimpidi mu longi diadi. Entete, ozolanga ludi ye unsongi. Ukiyuvula: ‘Nga nzolele mona e lumbu kina wantu awonso bevova e ludi yo vanga unsongi?’ Diazole, ozolanga Yesu Kristu. Okiyuvula: ‘Nga nzolele vo Mwan’a Nzambi kakala se Ntinu ame yo vanga mawonso muna landa e mbandu andi?’ Diatatu, edi disundidi o mfunu, ozolanga Yave. Ukiyuvula: ‘Nga nzolele mwesa ntim’a Yave e kiese muna kunsadila?’ Avo mvutu zaku muna yuvu yayi elo, ozevo, ekuma olembi vubilwa? Adieyi ovingilanga muna vubwa?—Mav. 16:33.

19. Ekuma kufwete kadila ye lukatikisu ko muna vubwa? Yika e nona. (Yoane 4:34)

¹⁹ Avo lukatikisu una lwau muna vubwa, fimpa e nona kina Yesu kasadila. (Tanga Yoane 4:34.) Yesu watezanesa ovanga luzolo lwa Se diandi yo madia. Ekuma? Tutoma yangalelanga madia. Yesu wazaya wo vo mawonso Yave kekutulomba twavanga, i muna wete dieto. Yave kazolele ko vo twavanga diambu dilenda kututwasila e vonza. Nga Yave ozolele vo wavubwa? Ingeta! (Mav. 2:38) Ozevo, avo olemvokele o nkanikinu wau wa vubwa, olenda kala ye ziku vo nluta miayingi dikutwasila. Wau se yindul’edi: Avo kukatikisanga ko muna dia madia mambote, ekuma ofwete kadila yo lukatikisu muna vubwa?

20. Nkia diambu tufimpa muna longi dilanda?

²⁰ Adieyi ovingilanga muna vubwa? Ayingi bevananga e mvutu vo: “Kiakubamene ntete ko.” Kieleka, e nzengo za yekola e zingu kiaku kwa Yave yo vubwa, i nzengo zisundidi o mfunu olenda baka muna zingu. Muna kuma kiaki, ofwete toma yindula vitila wabaka e nzengo zazi, ntangwa ye ngolo divavanga muna kukifwanisa. Kansi, avo ozolele kieleka vubwa, adieyi ofwete vanga owau muna kala wakubama? Tubaka e mvutu za kiuvu kiaki muna longi dilanda.