1-2. Nkia nsambu o muntu kalenda vua avo ukiyekwele kwa Yave yo vubwa?

 DIAKIESE dikalanga mu vubwa yo kota muna kanda dia Yave. Awana bena kala ye lau diadi, bekwikilanga muna mvovo mia Davidi ona wavova vo: “[E Yave,] kiese kwa muntu ona osolele yo kuntwasa oku wina kakala muna yanzala yaku.”—Nku. 65:4.

² Nkia mpila wantu Yave kekotesanga muna yanzala kiandi? Nze una tulongokele muna longi diviokele, Yave otuntanga awana besonganga vo bazolele kala ye ngwizani ambote yo yandi. (Yak. 4:8) Avo ukiyekwele kwa Yave yo vubwa, ofinama Yave mu mpila isundidi o mfunu. Olenda kala ye ziku vo kuna kulanda, o Yave ‘okuyitidila e nsambu yavana kukondwa lekwa ko.’—Mal. 3:10; Yer. 17:7, 8.

3. Akristu ana bakiyekola yo vubwa, nkia mbebe yampwena bekalanga yau? (Kimpovi 5:4, 5)

³ Dialudi vo o luvubu i lubantiku kaka lwa zingu kiaku muna salu kia Yave. Vava ovubwa, ozola vanga mawonso muna zingila e ngwizani yo nsilu aku wa kukiyekola kana nkutu owanane ye mambu mampasi yovo ntonta. (Tanga Kimpovi 5:4, 5.) Wau vo u nlongoki a Yesu, olanda mbandu andi yo lemvokela nkanikinu miandi. (Mat. 28:19, 20; 1 Pet. 2:21) E longi diadi dikusadisa muna wo vanga.

 “KWAMANANA LANDA” YESU KANA NKUTU MUNA MPASI YE NTONTA

4. Mu nkia mpila alongoki a Yesu benatinanga e ‘nti ampasi’? (Luka 9:23)

⁴ Vava muntu kevubwanga, ke disonganga ko vo e zingu kiandi ke kikala diaka ye mpasi ko. Dialudi vo, Yesu watoma dio kiesesa vo alongoki andi ‘nti ampasi benata lumbu ke lumbu.’ (Tanga Luka 9:23.) Nga Yesu edi kazola vova vo alandi andi bemona mpasi ntangwa zawonso? Ve. Yesu wasonga vo vana ntandu a nsambu betambula, bewanana mpe ye mambu ma mpasi. Mankaka muna mambu bewanana mau, mampasi kikilu mekala.—2 Tim. 3:12.

5. Nkia nsambu Yesu kasila o nsilu kwa awana beyambulanga maka mambu muna yikama salu kia Nzambi?

⁵ Nanga wabangikwa kala kwa yitu yaku yovo wayambula mavua muna sia e salu kia Kintinu va fulu kiantete muna zingu kiaku. (Mat. 6:33) Avo i wau, kala ye ziku vo Yave omonanga e kwikizi kiaku. (Ayib. 6:10) Kalukatikisu ko vo, omonanga e ziku kia mvovo emi mia Yesu: “Ke vena muntu ko wasisa nzo yovo mpangi yovo nsanga yovo ngudi yovo se yovo wana yovo mpatu muna kuma kiame ye mu kuma kia nsangu zambote kalembi tambula nkama-nkama mu kolo kiaki—nzo, mpangi, nsanga, ngudi, wana, ye mpatu, kumosi ye lubangamu—muna tandu kikwiza, moyo a mvu ya mvu.” (Maku 10:29, 30) E nsambu zazi zisundidi mawonso wayambula muna kuyivana muna salu kia Nzambi.—Nku. 37:4.

6. Ekuma divavila vo wakwamanana nuana ye “zolela ya nitu” kuna nim’a luvubu lwaku?

⁶ Kuna nim’a luvubu lwaku divava vo wakwamanana nuana ye “zolela ya nitu.” (1 Yoa. 2:16) Ediadi divangama kadi wakinu nsumuki. Ezak’e ntangwa, e ngindu zaku zilenda kala nze za Paulu wa ntumwa ona wasoneka vo: “Ngiangalele kikilu o nsiku a Nzambi muna kiwuntu kiame kiakati, kansi mbwene nsiku wankaka muna nitu ame, unuanisanga nsiku una muna nyindu ame yo kumfila muna ubundu wa nsiku a sumu una omu nitu ame.” (Roma 7:22, 23) Olenda kendalala mu kuma kia usumuki waku. Kansi, oyindula o nsilu wasia kwa Yave vava wakiyekola kwa yandi, dikukumika mu kwamanana nuana ye usumuki waku. Muna vova e ludi avo owanane ye ntonta, o nsilu aku wa kukiyekola ukusadisa. Mu kia mpila?

7. O kukiyekola kwa Yave, aweyi dilenda kusadisila mu tatidila e kwikizi kiaku kwa yandi?

⁷ Kuna nim’a kukiyekola kwa Yave, divava vo wakivanina nkalu. Ediadi disongele vo wabembola e zolela ya ngeye kibeni ye ngindu zilenda kendeleka Yave. (Mat. 16:24) Muna diadi vava owanana ye ntonta, kuviokesa ntangwa yayingi ko mu yindula dina ofwete vanga. Kadi, oteka kuyizayila dina ovanga, i sia vo, sikila ye kwikizi muna Yave. Okala ye kani dia yangidika Yave. Muna mpila yayi okala nze Yobi. Kana nkutu vo wawanana ye mambu mayingi mampasi, Yobi wavova ye ziku kiawonso vo: “Kiyambula kwikizi kiame ko.”—Yobi 27:5.

8. Oyindula e sambu wavanga kwa Yave vava wakiyekola, aweyi dikusadisila mu zizidila e ntonta?

⁸ Oyindula e sambu wavanga kwa Yave vava wakiyekola, dikusadisa mu kala ye nkuma wa zizidila e ntonta. Kasikil’owu, nga oyantika lengokela o moyo kwa muntu una vo ke nkaz’aku ko? Ve kikilu. Kadi wasia nsilu kwa Yave vo kuvanga diambu dia mpila yayi ko. Avo ovengele e ngindu zambi, ke dikala mfunu ko mu nuana ye ngindu zazi kuna sentu. Muna mpila yayi ‘ovavuka e yendelo dia yimpumbulu.’—Nga. 4:14, 15.

9. Oyindula e sambu wavanga kwa Yave vava wakiyekola, aweyi dilenda kusadisila mpe mu sia mambu ma mwanda va fulu kiantete?

 ⁹ Adieyi ovanga avo osolwele e salu kilenda kuyiya e ntangwa ya kwenda mu tukutakanu? Kalukatikisu ko vo, ozaya dina ovanga. Vitila wasolola e salu kiaki, wateka kuyibakila nzengo vo kusinga tambulwila ko e salu kilenda kuyiyanga e ntangwa ya kwenda muna tukutakanu. Osungamenanga e kani dia Yesu dia yangidika e Se diandi, dikusadisa mu bembola vana vau konso diambu dina ozeye vo dilenda kendeleka Nzambi ona wakiyekola.—Mat. 4:10; Yoa. 8:29.

10. Aweyi Yave kekusadisila kuna nim’a luvubu lwaku mu “kwamanana landa” Yesu?

¹⁰ Kieleka, e mpasi ye ntonta zikuvana e lau diasonga vo una ye kani dia “kwamanana landa” Yesu. Avo ovangidi wo, olenda kala ye ziku vo Yave okusadisa. Bibila kivovanga vo: “Nzambi nkwa kwikizi, ke yambula ko vo nuatontwa e ntonta ina ke nulendi zizidila ko, kansi kumosi ye ntonta, oteta mpe nzila kimana nualenda yo zizidila.”—1 Kor. 10:13.

ADIEYI OLENDA VANGA MUNA KWAMANANA LANDA YESU?

11. Ayeyi i mpila isundidi o mfunu olenda kwamanana landila Yesu? (Tala mpe mafoto.)

¹¹ Yesu nkwa vema kakala ye wakwamanana lomba lusadisu lwa Yave muna sambu. (Luka 6:12) Ozevo, imosi muna mpila olenda kwamanana landila Yesu kuna nim’a luvubu i vanga mambu malenda kumika ngwizani aku yo Yave. Bibila kivovanga vo: “Kana nkutu yamu nkia tezo tunungunukini kala, yambula twakwamanana kangala una ufwene muna nzila yayi.” (Fili. 3:16) Nkumbu miayingi, okala wá e nsangu za ampangi ana bevanganga e ngolo mu wokesa e salu kiau kia mwanda. Nanga bakota e Sikola ya Ateleki a Kintinu yovo bayenda sadila kuna zunga ivuilu ateleki ayingi  o mfunu. Avo ozolele kuyisila e kani diadi, vanga wo. Nkangu a Yave una ye kani dia wokesa uselo wau. (Mav. 16:9) Kansi, adieyi tuvova avo o wau kulenda wo vanga ko? Kuyindula ko vo ana bewokesanga uselo wau, basundidi. Ediambu disundidi o mfunu muna nkul’a Kikristu i kwamanana zindalala. (Mat. 10:22) Kuvilakani ko vo avo ovangidi mana olenda muna sadila Yave, oyangidika o ntim’andi. Eyayi i mpila isundidi o mfunu olenda kwamanana landila Yesu kuna nim’a luvubu lwaku.—Nku. 26:1.

12-13. Adieyi olenda vanga avo vema kwaku kuyantikidi kuluka? (1 Korinto 9:16, 17) (Tala mpe babu “ Kwamanana Muna Nkula.”)

¹² Adieyi ovanga avo omwene vo e sambu yaku ke itukanga diaka mu nsi a ntima ko yovo vema kwaku muna salu kia umbangi kukulukidi? Adieyi ovanga avo kuyangalelanga diaka tanga Bibila ko? Avo yantikidi mona mpila yayi kuna nim’a luvubu lwaku, kuyindula ko vo kuna diaka yo mwand’avelela a Yave ko. Wau vo u muntu alembi lunga, e ngindu zaku zilenda soba. Avo vema kwaku kuyantikidi kuluka, yindula e mbandu a Paulu wa ntumwa. Kanele vo wavanganga e ngolo mu tanginina Yesu, Paulu ezak’e ntangwa wazayanga wo vo lutovoko kakalanga lwau. (Tanga 1 Korinto 9:16, 17.) Wavova vo: “Kana nkutu kisadidi kio mu luzolo lwame ko, yakinu kaka ye uselo una yayekekwa.” Muna mvovo miankaka, Paulu wakala ye kani dia lungisa uselo wandi kanele vo ezak’e ntangwa wakalanga yo lutovoko.

¹³ Ozevo, kuyambula baka nzengo ko zina ozolele mu kuma kia usumuki waku. Kala ye kani dia vanga mambu mansongi kanele vo kuna ye tima dia vanga wo ko. Avo okwamanene vanga mambu mansongi, kuna kulanda e ngindu zaku zilenda soba. Muna kuma  kiaki, e longi dia ngeye kibeni, sambu, tukutakanu ye salu kia umbangi kilenda kusadisa mu kwamanana landa Yesu kuna nim’a luvubu. Mpangi zaku betambula lukasakeso avo babakwidi vo ozindalalanga muna salu kia Yave.—1 Tes. 5:11.

‘KWAMANANA KUYIFIMPA . . . VAVANGA ZAYA’

14. Adieyi ofwete fimpanga ntangwa ke ntangwa? Ekuma? (2 Korinto 13:5)

¹⁴ Kuna nim’a luvubu, diambote dikala muna kuyifimpanga ntangwa zawonso. (Tanga 2 Korinto 13:5.) Ntangwa ke ntangwa diambote muna fimpanga e zingu ye fu yaku mu zaya kana vo osambanga lumbu yawonso, tanga yo longoka e Bibila, kwenda muna tukutakanu yo sala e salu kia umbangi. Vanga ngolo muna yangalelanga yo vua e nluta muna mambu mama mawonso. Kasikil’owu ukiyuvula: ‘Nga ndenda sasila malongi ma Bibila kwa akaka? Nga vena ye mpila ndenda kitulwila e salu kiame kia umbangi se kiakiese? Nga sambu yame yasikididi? Nga isonganga vo ibundanga vuvu kwa Yave? Nga ikwendanga muna tukutakanu ntangwa zawonso? Adieyi ndenda vanga muna toma sianga e sungididi muna tukutakanu yo vana e mvutu?’

15-16. Adieyi olongokele muna nona kia mpangi Robert muna diambu dia zizidila ntonta?

¹⁵ Diambote mpe mu kuyifimpanga muna zaya lutovoko lwaku. Mpangi mosi una ye nkumbu a Robert wayika nona kia diambu diadi. Wavova vo: “Vava yakala ye kimbuta kia mvu 20, yabaka e salu kia ndambu a lumbu. Lumbu kimosi kuna mfoko a salu, nkento mosi yasalanga yandi entwadi wampovesa vo twenda kuna nzo andi. Wavova vo yeto awole kaka tukala ko ye ‘ntangwa yakiese tukala yau.’ Kuna lubantiku kiamvana mvutu zasikididi ko, kansi kuna kwalanda, yamvovesa ye sikididi kiawonso vo kizolele ko yo kunsasila e kuma.” Mpangi Robert walenda zizidila e ntonta, ediadi dialusanisinu kikilu. Vava keyindulanga e diambu diadi, omonanga vo vena ye diambu diaka kafwana vanga. Wavova vo: “Kiatina e mboka yayina ko vana vau ngatu vovela ye sikididi nze una Yosefe kavanga kwa nkento a Potifa. (Tuku 39:7-9) Yamona vo diampasi kikilu diakala kwa mono mu tina e mboka yayina. Ediadi diansadisa mu mona vo mfwete kumika diaka e ngwizani ame yo Yave.”

¹⁶ Nze una mpangi Robert kavanga, ngeye mpe olenda vua nluta miayingi muna kuyifimpanga ntangwa ke ntangwa. Kana nkutu vo olendele zizidila e ntonta, ukiyuvula: ‘Nga ntangwa yayingi mpangidi muna tina e ntonta  zazi?’ Avo bakwidi vo vena ye diambu ofwete singika, kuyitumbi ko. Kala ye kiese wau ozeye lutovoko lwalu. Lomba lusadisu lwa Yave muna sambu yo vanga mawonso muna kumika e kani diaku dia zingila e ngwizani ye nkanikinu mia nkal’ambote mia Yave.—Nku. 139:23, 24.

17. E nkumbu a Yave aweyi yakotela muna diambu diabwila mpangi Robert?

¹⁷ Vena diaka ye diambu tulenda longoka muna nona kia mpangi Robert. Wavova diaka vo: “Vava yatina e mboka ya nkento ona yasalanga yandi entwadi, wampovesa vo: ‘Oviokele muna ntonta.’ Yanyuvula e kuma. Wampovesa vo nkundi andi mosi wateka kala se Mbangi a Yave wamvovesa vo aleke awonso a Mbangi za Yave zingu kia disu kunsi a lukaya benatanga. Kadi vava bewanananga ye lau dia vanga diambu diambi, bevanganga dio vana vau. Muna diadi wavovesa kwa nkundi andi vo mono ketonta. I bosi, yabakula vo diakiese kikilu wau yatwasa o zitu muna nkumbu a Yave.”

18. Nkia kani olenda kuyisila kuna nim’a luvubu lwaku? (Tala mpe e babu, “ Malongi Otoma Yangalela.”)

¹⁸ Avo ukiyekwele kwa Yave yo vubwa, osonga vo ozolele velelesa e nkumbu andi kiakala nkia diambu dibwa. Muna kuma kiaki, kala ye ziku vo Yave ozeye mpasi onuananga zau ye ntonta ozizidilanga. Osambula e ngolo ovanganga muna sikila ye kwikizi. Bunda e vuvu vo muna mwand’andi avelela okuvana o nkuma ovuidi o mfunu muna kumika e kwikizi kiaku. (Luka 11:11-13) Kala ye ziku vo muna lusadisu lwa Yave, okwamanana landa Yesu kuna nim’a luvubu lwaku.