Masumu meto malenda lolokwa kaka muna kimenga kia lukûlu kina Yesu kafuta muna menga mandi. (Efe. 1:7) Kana una vo i wau, Bibila kivovanga vo: “Nzambi . . . muna ntim’andi a vunda waloloka masumu mateka vangama,” i sia vo, vitila Yesu kavana lukûlu. (Roma 3:25) Aweyi Yave kalolokela masumu mavangama vitila lukûlu lwa futwa ye vana vau kakwamanana kala Nzambi a unsongi?

Kuna kwa Yave o lukûlu lwa futwa tuka muna kolo kina kabaka e nzengo za vana e “mbongo” eyi yadi vuluza wantu akwa kwikizi ova nza. (Tuku 3:15; 22:18) Nzambi wakala ye ziku vo muna ntangw’andi, o Mwan’andi mosi ovana lukûlu. (Ngal. 4:4; Ayib. 10:7-10) Ekolo Yesu kakala ova ntoto, Yave wamvana wisa kia loloka masumu vitila lukûlu lwa futwa. Yesu waloloka masumu ma awana bakala ye lukwikilu kadi wazaya wo vo e kimenga kevana kifuka masumu mau.—Mat. 9:2-6.