1. Nkia ngindu zilenda lwakila akaka muna selo ya kwikizi ya Yave?

 DIALUFIAULWISU mu zaya vo Yave oyangalelanga nkangu andi se buka. Bibila kivovanga vo: “Yave oyangalelanga nkangu andi.” (Nku. 149:4) Kansi, ezak’e ntangwa, akaka beyoyanga yo lwaka mu tezo kia kukiyuvula vo: ‘Nga Yave okungiangalelanga?’ Kuna nz’ankulu, selo yayingi ya kwikizi ya Yave vava bayoya bakala mpe ye lukatikisu kana vo Yave wabayangalelanga.—1 Sam. 1:6-10; Yobi 29:2, 4; Nku. 51:11.

2. Aki nani Yave keyangalelanga?

² Bibila kitoma kiesesanga vo wantu alembi lunga balenda kwau vua edienga dia Yave yovo olenda kubayangalela. Mu nkia mpila? Entete, tufwete songa lukwikilu muna Yesu Kristu yo vubwa. (Yoa. 3:16) Muna vanga e diambu diadi tusonga vo tuvilukidi o ntima muna masumu meto yo sia nsilu kwa Nzambi vo tuvanga luzolo lwandi. (Mav. 2:38; 3:19) Yave otoma yangalalanga vava tubakanga e nzengo zazi, kadi zisonganga vo tuzolele kala ye ngwizani ambote yo yandi. Avo tukwamanene vanga ngolo muna zingila ngwizani yo kukiyekola kweto, Yave okutuyangalela yo kutubadikila se akundi andi.—Nku. 25:14.

3. Nkia yuvu tatu tufimpa?

³ Ezak’e ntangwa, ekuma akaka balenda yindulwila vo Yave ke kubayangalelanga ko? Aweyi Yave kesongelanga vo oyangalelanga selo yandi? O Nkristu aweyi kalenda kumikina e vuvu kiandi vo Nzambi okuyangalelanga?

EKUMA AKAKA BALENDA YINDULWILA VO YAVE KE KUBAYANGALELANGA KO?

4-5. Kana nkutu tukuyimwenanga vo ke tuna mfunu ko, nkia ziku tulenda kala kiau?

⁴ Tuka muna kileke akaka muna yeto tunuananga ye ngindu za sia vo ke tuna mfunu ko. (Nku. 88:15) Mpangi mosi ayakala  una ye nkumbu Adrián wavova vo: “Ntangwa zawonso ikuyimwenanga vo kina mfunu ko. Nsungamene diambu yatoma lombanga muna sambu muna kileke kiame. Yasambanga kwa Yave kasadisa esi nzo ame bakota muna Paradiso kanele vo mono kibeni yakimwenanga vo kiafwana mo kota ko.” Mpangi Tony una vo kasansukila mu nzo a Mbangi za Yave ko, wavova vo: “O papa yo mama ke basidi kumpovesa ko vo zola banzolanga ngatu kunsanisina. Muna kuma kiaki, ntangwa zawonso yayindulanga vo mawonso yavanganga ke makala kwandi mfunu ko.”

⁵ Avo ezak’e ntangwa tukuyimwenanga vo ke tuna mfunu ko, tufwete sungamena vo Yave watutunta muna mpil’andi kimana twansadila. (Yoa. 6:44) E fu yambote kamona omu yeto, nanga yeto kibeni ke tulendi yo mona ko, kadi yandi otomene kutuzaya. (1 Sam. 16:7; 2 Tus. 6:30) Muna kuma kiaki, tulenda kumbunda e vuvu vava kevovanga vo mfunu kikilu twina vana ndose andi.—1 Yoa. 3:19, 20.

6. O Paulu Aweyi kamonanga mu kuma kia masumu kavola vitila kakituka Nkristu?

⁶ Nanga akaka omu yeto tukwamanananga kuyitumba mu kuma kia mambu twavanga vitila twazaya e ludi. (1 Pet. 4:3) Akaka ana besadilanga Yave ye kwikizi kiawonso, nanga bakinu nuana yo lutovoko lwalu. Adieyi tuvova mu kuma kiaku? Nga oyindulanga vo Yave kalendi kuloloka ko e? Avo i wau, dialukasakeso mu zaya vo selo yankaka ya Yave ya kwikizi, banuana mpe ye ngindu zazi. Kasikil’owu, Paulu wa ntumwa wakimwenanga vo fwafwala kia muntu vava kayindulanga usumuki wandi. (Roma 7:24) Dialudi vo, Paulu waviluka o ntima yo vubwa. Kana una vo i wau, wavova vo yandi “wandwelo vana vena antumwa.” Yandi i nsumuki ‘osundidi.’—1 Kor. 15:9; 1 Tim. 1:15.

7. Adieyi tufwete sungamenanga mu kuma kia masumu meto mavioka?

⁷ Se dieto kuna zulu osianga nsilu vo okutuloloka avo tuvilukidi o ntima. (Nku. 86:5) Avo ntantu kikilu tumonanga mu kuma kia masumu mana twavola, tulenda kala ye ziku muna nsilu wau wa Yave, i sia vo, watuloloka kikilu.—Kol. 2:13.

8-9. Aweyi tulenda sundila e ngindu za sia vo mana tuvanganga ke mafwana ko muna yangidika Yave?

⁸ Yeto awonso tulenda kweto sadila Yave una ufwene. Kansi, akaka beyindulanga vo mana bevanganga ke mafwana ko muna vua edienga dia Yave. Mpangi mosi ankento una ye nkumbu Amanda wavova vo: “Yayindulanga vo muna vana eki kisundidi o wete kwa Yave, mfwete salanga kwayingi. Muna kuma kiaki, nkumbu miayingi yavavanga sala e salu yasunda e tezo. Vava ‘kialendanga sala e salu yayi ko,’ yamonanga vo Yave yakendelekanga nze una mono kibeni yakendalalanga.”

⁹ Aweyi tulenda sundila e ngindu za sia vo mana tuvanganga ke mafwana ko muna yangidika Yave? Sungamena wo vo Yave ke nkwa ntim’ambadi ko. Kalendi kutulomba ko mana katulendi vanga ko. Oyangalelanga mana tuvanganga muna salu kiandi, musungula ekolo tuvanganga e ngolo mu vanga mana tulenda. Diambote mpe mu yindulanga e mbandu ya awana basadila Yave ye nsi a ntima yawonso kuna nz’ankulu. Yindula mbandu a Paulu. Wasalanga ye fululu kiawonso mu mvu miayingi, wavanganga nkangalu mianda ye nkutakani zayingi kaziula. Vava kalendanga vanga diaka mayingi ko muna salu kia umbangi mu kuma kia zingu kiandi kiasoba, nga wavidisa edienga dia Nzambi? Ve. Paulu wakwamanana vanga mana kalendanga ye watambula e nsambu za Yave. (Mav. 28:30, 31) Diau dimosi mpe, mana tuvanganga muna salu kia Yave ezak’e ntangwa malenda soba. Kansi, edi  disundidi o mfunu kwa yandi i kani dikutufilanga muna kunsadila. Yambula twafimpa ezak’e mpila zina Yave kesongelanga vo okutuyangalelanga.

AWEYI YAVE KESONGELANGA VO OKUTUYANGALELANGA?

10. Aweyi tulenda “wila” e nding’a luyangalalu lwa Yave? (Yoane 16:27)

¹⁰ Watuvana e Bibila. Yave ovavanga mpila za songela kwa awana kezolanga vo okubayangalelanga. Muna Bibila nkumbu miole kavovesa Yesu vo Mwan’andi anzolwa, Mwan’andi ona keyangalelanga. (Mat. 3:17; 17:5) Aweyi omona kele vo Yave uvovese vo okuyangalelanga? Yave ke kutuvovesanga ko tuka kuna zulu, kansi okutuvoveselanga muna Diambu diandi. Tulenda “wá” nding’a luyangalalu lwa Yave vava tutanganga e mpila Yesu kavovesela alongoki andi vo okubazolanga. (Tanga Yoane 16:27.) Yesu watanginina kiwuntu kia Se diandi mu mpila yalunga. Muna kuma kiaki, vava tutanganga mvovo mia Yesu mina kasongela edienga kw’alandi andi akwa kwikizi kana una vo wantu alembi lunga bakala, tulenda bakula vo Yave diau dimosi mpe kevovanga kwa yeto.—Yoa. 15:9, 15.

11. Vava tukalanga mu mpasi, nga disonganga vo Yave ke kutuyangalelanga diaka ko? (Yakobo 1:12)

¹¹ Muna mavangu mandi. Yave ovuidi luzolo lwa kutusadisa. Tumonanga e ziku kia diambu diadi mu mpila ina kelungisilanga e nsatu zeto za kinitu. Nze una kavanga kwa Yobi, ezak’e ntangwa Yave oyambulanga vo twamona mpasi. (Yobi 1:8-11) Vava tukalanga mu mpasi ke disonganga ko vo Nzambi ke kutuyangalelanga diaka ko. Kansi, e mpasi zikutuvananga e lau mu songa vo tutoma zolanga Yave ye kumbunda e vuvu. (Tanga Yakobo 1:12.) Muna ntangw’ampasi, tumona vo Yave okutuzolanga yo kutusadisa mu zizidila.

12. Adieyi tulenda longoka muna nona kia mpangi Dmitrii?

¹² Tala nona kia mpangi Dmitrii kuna Asia. Wakatulwa muna salu ye vioka ngonde zayingi kasolola salu kiankaka ko. Muna kuma kiaki, muna songa vo wabunda e vuvu muna Yave, wabaka nzengo za wokesa e salu kiandi kia umbangi. Muna ngonde zayingi kavavanga e salu, wabakama kimbevo kiangolo ye kalendanga diaka katuka vana mfulu ko. Wayantika yindula vo kakala diaka yakala diambote ko kuna kwa nkaz’andi ye ke se diambote ko kuna kwa wan’andi. Kansi, lumbu kimosi  mwan’andi wa nkento wasoneka e mvovo mia Yesaya 30:15 muna papela. “Avo nukala nuavuvama yo bunda e vuvu, nuvua o nkuma.” Wayenda vana ndambu a mfulu yo songa mio kwa se diandi. I bosi, wavova vo: “E papa, avo omwene vo e mpasi zisakidi, sungamena e mvovo mia sono kiaki.” Mpangi Dmitrii wabakula vo muna lusadisu lwa Yave, esi nzo andi balenda vua madia, mvuatu ye nzo. Wavova vo: “E diambu mfwete vanga i kala wavuvama yo kwamanana bunda e vuvu kwa Nzambi ame.” Avo mpasi za mpila yayi onuananga zau, kala ye vuvu vo Yave mfunu kikilu kekuvuanga ye osinga kusadisa mu zizidila.

13. Aki nani o Yave kesadilanga muna songa vo okutuyangalelanga ye mu nkia mpila?

¹³ Watuvana ampangi. Yave mpangi zeto za mwanda kesadilanga muna kutusonga edienga. Kasikil’owu, olenda sadila mpangi zeto muna kutukasakesa muna ntangwa ina tuvuidi lukasakeso mfunu. Mpangi mosi ankento kuna Asia wamona e ziku kia diambu diadi muna kolo kina kakala yo lukendalalu lwasaka. Wakatulwa mu salu yo bakama kimbevo kiangolo. I bosi, o nkaz’andi wavola e sumu diampwena ye wakatulwa e kiyekwa kia kinkuluntu. Mpangi ankento wavova vo: “Kiabakula ko ekuma mawonso mama mavangamena. Yayindulanga vo nanga diambu diambi mpangidi ye kina diaka ye dienga dia Yave ko.” Mpangi ankento wadodokela Yave kimana kansadisa mu bakula vo wakinu kunyangalela. Aweyi kavangila wo? Wavova vo: “Akuluntu a nkutakani bamokena yame ye bansonga vo Yave wakinu kunzola.” I bosi, wayantika lomba lusadisu lwa Yave. Wavova diaka vo: “Muna lumbu kiakina yatambula nkanda watuka kwa buka kimosi kia ampangi muna nkutakani. Ekolo yatanganga e mvovo miau mialukasakeso, yabakula vo Yave wawá e sambu kiame.” Nkumbu miayingi, o Yave mvovo mia  mpangi zeto kesadilanga muna kutusonga vo okutuyangalelanga.—Nku. 10:17.

14. Nkia mpila yankaka Yave kesongelanga vo okutuyangalelanga?

¹⁴ O Yave muna songa vo okutuyangalelanga, mpangi zeto mpe kesadilanga muna kutuvana malongi muna ntangwa ina tuvuidi mo mfunu. Kasikil’owu, muna tandu kiantete, Yave wasadila Paulu wa ntumwa muna sonekena nkanda 14 kwa akwandi minkwikizi. Muna nkanda miami muna ye malongi mayingi mankuma ye mambote. Ekuma Yave kavumunuina Paulu mu soneka malongi mama? Yave se diambote, olonganga wan’andi ‘ana kezolanga.’ (Nga. 3:11, 12) Muna diadi, avo mpangi mosi utuvene longi ditukidi muna Bibila, ke tuyindula ko vo ke tuna diaka ye dienga dia Nzambi ko. Kansi, i sinsu kisonganga vo Yave wakinu kutuzola. (Ayib. 12:6) Nkia mambu mankaka mesonganga vo tuna ye dienga dia Yave?

MPILA YANKAKA TULENDA ZAYILA VO YAVE OKUTUYANGALELANGA

15. Aki nani Yave kevananga mwand’andi avelela? Ekuma ediadi dilenda kutuvanina e vuvu?

¹⁵ Yave ovananga mwand’andi avelela kwa awana keyangalelanga. (Mat. 12:18) Tulenda kukiyuvula: ‘Nga isonganga yaka fu ya mbongo a mwand’a Nzambi muna zingu kiame?’ Nga omonanga vo tuka wazayila Yave owau otoma songanga fu kia luzindalalu mu mpila ina okadilanga ye akaka? Dialudi, ekolo otoma songanga fu ya mbongo a mwand’a Nzambi, otoma bakula mpe vo Yave okuyangalelanga.—Tala mpe e babu, “ Mbongo a Mwanda i . . .”

16. Aki nani Yave kesadilanga muna samuna e nsangu zambote? Aweyi omonanga mu kuma kia lau diadi? (1 Tesalonika 2:4)

¹⁶ Yave ovananga e kiyekwa kia samuna e nsangu zambote kwa awana keyangalelanga. (Tanga 1 Tesalonika 2:4.) Tala una mpangi ankento una ye nkumbu Jocelyn kevuilanga e nluta muna samuna e nsangu zambote kwa akaka. Lumbu kimosi mpangi Jocelyn wasikama yo lukendalalu. Wavova vo: “Yamona vo kina mfunu ko ye yayoya kikilu yakala. Kansi, salu kia kimviti a nzila yasalanga. Kiakina i lumbu kiame kia vaika muna salu kia umbangi. Muna kuma kiaki, yasamba kwa Yave. I bosi, yavaika muna salu kia umbangi.” Muna mene wauna mpangi Jocelyn wasila Mary umbangi. Wasonga e ngemba yo tambulwila longoka e Bibila. Vioka ngonde zakete, Mary wavova vo  vava mpangi Jocelyn kadodela e kielo kia nzo andi muna lumbu kiakina, samba kasambanga kwa Nzambi muna lomba lusadisu. Adieyi mpangi Jocelyn kalongoka muna nona kiaki? Wavova vo: “Yamona nze Yave wampovesa vo ‘ikuyangalelanga.’” Dialudi vo, ke wantu awonso ko bekutuwa muna salu kia umbangi. Kansi, tulenda kala ye ziku vo Yave oyangalalanga vava tuvanganga e ngolo mu samuna e nsangu zambote kwa akaka.

17. Adieyi tulenda longoka muna mvovo mia mpangi Vicky mu kuma kia lukûlu? (Nkunga 5:12)

¹⁷ Yave wavana lukûlu lwantalu muna wete dia awana keyangalelanga. (1 Tim. 2:5, 6) Kansi, kana nkutu vo tuna yo lukwikilu muna lukûlu ye twavubwa kala, adieyi tuvova avo twakinu ye lukatikisu kana vo Yave okutuyangalelanga? Tusungamena wo vo, ke diambote ko vo ntangwa zawonso twabundanga e vuvu muna ngindu za yeto kibeni. Kansi, diambote twabunda e vuvu kwa Yave. Vana meso mandi awana bena ye lukwikilu muna lukûlu, okubabadikilanga se wantu ansongi ye osianga nsilu vo okubasambula. (Tanga Nkunga 5:12; Roma 3:26) Obadika muna lukûlu diasadisa mpangi Vicky. Lumbu kimosi vava katoma yindula oma ma lukûlu, wavova vo: “Tuka kolo Yave luzindalalu lwayingi kekunsonganga. . . . Kansi, dina nze mono ivovanga vo: ‘Kifwanukini zola kwaku ko. E kimenga kia Mwan’aku ke kiafwana ko muna fuka masumu mame.’” Muna badikanga muna kimenga kia lukûlu, mpangi Vicky wayantika mona vo Yave okunzolanga. Yeto mpe avo tubadikidi muna kimenga kia lukûlu, tulenda mona vo Yave okutuzolanga ye okutuyangalelanga.

18. Nkia ziku tulenda kala kiau avo tukwamanene zola Se dieto dia zulu?

¹⁸ Kana una vo tuvangidi e ngolo mu sadila e mambu tulongokele mu longi diadi, ezak’e ntangwa tulenda kendalala yo yindula kana vo Yave okutuyangalelanga. Avo diadi dibwididi, sungamena wo vo Yave oyangalelanga “awana bekunzolanga.” (Yak. 1:12) Muna kuma kiaki, kwamanana kumika e ngwizani aku yo Yave yo vava bakula e ziku isonganga vo yandi okuyangalelanga. Ntangwa zawonso sungamenanga vo Yave “kavavukidi konso muntu ko omu yeto.”—Mav. 17:27.