1. Ekuma dikadilanga diampasi kw’akaka muna vaula e ntangwa ya longoka?

NGOLO divavanga mu lumbu yayi yambaninu muna vua nzimbu. Ayingi muna mpangi zeto besalanga kwayingi muna dikila esi nzo zau. Akaka ola zayingi bekangalanga muna kwenda yo vutuka kuna salu. Akaka salu yangolo besalanga muna vua eki kia dia yovo vuata. Kuna mfoko a lumbu, e mpangi zazi bayoya kikilu bekalanga. Diampasi dikalanga kwa yau mu vaula e ntangwa ya longoka.

2. Nkia ntangwa omonanga vo yambote muna longoka?

² Kansi, e ziku kia diambu i kiaki: Tufwete vaulanga e ntangwa ya toma longoka Diambu dia Nzambi ye nkanda mieto. O vanga wo mfunu kikilu dina muna kala ye ngwizani ambote yo Yave yo vua moyo a mvu ya mvu. (1 Tim. 4:15) Akaka besikamanga mu mene-mene muna longoka ekolo e nzo ye ngindu zina zavuvama. Akaka bevaulanga e ntangwa kuna masika muna longoka yo badika.

3-4. Nkia nsobani zavangamene muna diambu ditadidi lutangu lwa nkanda mivaikiswanga? Ekuma?

³ Nanga okwikidi vo diamfunu kikilu mu vaula e ntangwa ya longoka. Kansi, nkia mambu tufwete longoka? Olenda vova vo: ‘Nkanda miayingi tuna miau mu tanga. Diampasi mu tanga miawonso.’ Akaka belenda tanga e nkanda mieto miawonso yo tala e video zivaikiswanga kwa nkubik’a Yave. Kansi, diampasi kikilu dikalanga kwa mpangi zeto zayingi mu vaula e ntangwa ya vanga wo. E Buka kia Selo Yambuta batomene zaya e mpasi benuananga zau ampangi. Ekiaki i kuma kiabakilu e nzengo za kulula o lutangu lwa nkanda mivaikiswanga.

⁴ Muna bong’e nona, o nkanda Anuário das Testemunhas de Jeová ke uvaikiswanga diaka ko, kadi tusansu twayingi twa lukasakeso  tuvaikiswanga muna nzil’eto jw.org^® ye muna programa ya JW Broadcasting^® ya konso ngonde. Owau, Eyingidilu dia nkangu ye Despertai! nkumbu ntatu kaka ivaikiswanga muna mvu. E nsobani zazi ke zavangilu ko mu kutuvana e ntangwa ya vanga mambu mankaka. E kani dia nsobani zazi i kutusadisa mu sia e sungididi muna ‘mambu masundidi o mfunu.’ (Fili. 1:10) Yambula twabadika mana tufwete sianga vana fulu kiantete ye una tulenda vuila e nluta muna longi dia yeto kibeni dia Nkand’a Nzambi.

5-6. Nkia mambu tufwete toma longokanga?

⁵ Nkia mambu tufwete sianga va fulu kiantete? Tufwete vaulanga e ntangwa muna longoka e Diambu dia Nzambi lumbu yawonso. Owau, o lutangu lwa kapu ya tanga muna ntangilu a Nkand’a Nzambi ya konso lumingu lwakulwilu muna kutuvana e ntangwa ya badika mana tutanganga yo toma vavulula. E kani dieto ke dia tanga kaka ko e kapu ina muna programa ya konso lumingu, kansi dia yambula vo Diambu dia Nzambi diakota muna ntima mieto yo siamisa zola kweto muna Yave.—Nku. 19:14.

⁶ Nkia mambu diaka tufwete toma longokanga? Tufwete kubikanga e longi dia Eyingidilu ye Longi dia Nkand’a Nzambi dia Nkutakani kumosi ye malongi ma lukutakanu lwa kati kwa lumingu. Tufwete tanganga mpe malongi mawonso mevaikiswanga muna Eyingidilu ye Despertai!

7. Nga tufwete kendalala avo ke tulendanga tanga ko yovo tala mawonso mevaikiswanga muna nzil’eto ya Internete yovo muna JW Broadcasting? Yika e nona.

⁷ Olenda kukiyuvula vo: ‘Adieyi tuvova mu kuma kia mambu mevaikiswanga muna nzil’eto jw.org ye muna JW Broadcasting? E mambu ma longoka masakidi!’ Badika e nona eki: ‘Yindula vo ku nzo itekelwanga madia wele yo wana madia mayingi mambote. Nga madia mawonso oyeleka? Ke dilendakana ko. Nanga osola kaka mana olenda dia. Diau dimosi mpe ye mambu mevaikiswanga muna nzil’eto ya Internete. Avo diampasi dikalanga kwa ngeye mu tanga nkanda miawonso yovo video zawonso, kufwete kendalala ko. Tanga kaka e nkanda mina olenda tanga yovo tala kaka video zina olenda tala.’ Owau, yambula twabadika e mpila yambote ya longokela ye una tulenda vuila e nluta muna longi dia yeto kibeni.

8. Nkia mpila yambote olenda kubikila e longi dia Eyingidilu? Nkia nluta dilenda kutwasila?

⁸ Muna longoka divavanga vo twatanganga ye sungididi kiawonso. Ke mpasi tanga kaka ko yo sia e sinsu muna mvutu. Kasikil’owu, avo longi dia Eyingidilu ozolele kubika, teka tanga e kunku kisonganga mana tulongoka kina kuna lubantiku lwa longi. Toma fimpa o ntu a diambu wa longi ye ntu miakete mia mambu kumosi ye yuvu ya lufimpu. I bosi, tanga e tini ya longi ye sungididi kiawonso. Toma fimpa e mvovo miantete mia konso tini. Nkumbu miayingi, e mvovo miami miau misonganga e diambu diasina dina muna tini. Ekolo otanganga e longi, vava zaya una konso tini kinina e ngwizani yo ntu a diambu wa longi. Sianga e sinsu muna konso mvovo wabala yovo konso diambu kutomene bakula ko kimana wa toma dio vavulula.

9. (a) Vava tulongokanga e longi dia Eyingidilu, ekuma ye aweyi tufwete silanga e sungididi muna sono ya Nkand’a Nzambi? (b) Mun’owu wa sono kia Yosua 1:8, adieyi diaka tufwete vanga vana ntandu a tanga e sono ya Nkand’a Nzambi?

⁹ Vava tulongokanga Eyingidilu, dikutusadisanga mu toma bakula Nkand’a Nzambi.  Muna kuma kiaki, sianga e sungididi muna sono ya Nkand’a Nzambi, musungula ina itangwa vava tulongoka dio entwadi muna nkutakani. Sianga e sinsu muna mvovo miasina mina muna sono yo vava zaya e ngwizani ina ye diambu diasina divovelo muna tini. Vana ntandu, vaulanga e ntangwa ya badika e sono ya Nkand’a Nzambi yo yindula una olenda yo sadila muna zingu kiaku.—Tanga Yosua 1:8.

10. Mun’owu wa sono kia Ayibere 5:14, ekuma mase bafwete longelanga wan’au e mpila yambote ya longokela yo vavulwila?

¹⁰ Mase bezolanga vo e Nsambila ya Esi Nzo ya konso lumingu yakala se kolo kiakiese kwa wan’au. Dialudi vo mase bafwete teka sikidisa mana bevovela muna fuku wa nsambila ya esi nzo. Kansi, ediadi ke disongele ko vo bafwete kubikanga malongi konso lumingu. Ezak’e ntangwa, esi nzo balenda tala e programa ya JW Broadcasting ya konso ngonde. Balenda mpe vanga e nsaka nze tunga e nzaz’a Noa. Diambote mpe mase balonganga o wana e mpila yambote ya longokela. Bafwete longwa una balenda kubikila malongi ma tukutakanu ye una balenda vavulwila e mvutu za yuvu beyuvulwanga kuna sikola. (Tanga Ayibere 5:14.) Avo bakulukilu longoka Nkand’a Nzambi kuna nzo, ediadi dikubasadisa mu sia e sungididi muna mambu mevovuanga muna tukutakanu twakete ye twampwena, wau vo ke kunku yawonso ko ikalanga ye video. Mase bafwete tadilanga e ntela ye umbakuzi wa wana muna sikidisa e ntangwa ifwete zingila e nsambila ya esi nzo.

11. Ekuma dinina diamfunu twalonganga alongoki eto a Nkand’a Nzambi e mpila yambote ya vangila e longi dia yau kibeni?

¹¹ Tufwete longanga mpe alongoki eto a Nkand’a Nzambi e mpila yambote ya longokela. Kuna lubantiku, tuyangalalanga vava alongoki eto besianga e sinsu muna mvutu za yuvu ina muna nkanda belongokanga yovo muna malongi ma tukutakanu. Kansi, tufwete longanga alongoki eto a Nkand’a Nzambi una balenda vavulwila ye una balenda vangila e longi dia yau kibeni. Muna mpila yayi, avo diambu dibabwididi, ke vana vau ko bekwenda vava lusadisu kwa mpangi zankaka kadi bazeye una balenda vavulwila muna nkanda mieto mu zaya luludiku balenda sadila muna diambu dibabwididi.

12. Nkia kani tulenda kuyisila vava tulongokanga?

¹² Avo kuzolanga longoka ko, nanga olenda yindula vo diampasi kwa ngeye mu yangalela longoka. Kansi, olenda kwaku. Yantikila malembe-malembe. Kuna kulanda, olenda  kudikila e ntangwa ovaulanga muna longoka. Ofwete kalanga ye kani vava olongokanga. Kansi, e kani diantete tufwete kala diau i dia siamisa kikundi kieto yo Yave. Dimosi muna makani olenda kuyisila i solola e mvutu za kiuvu bayuvula yovo vavulula mu zaya una tulenda sundila diambu tunuananga diau.

13. (a) Adieyi o nleke kalenda vanga muna tanina e ludi kuna sikola? (b) Aweyi olenda sadila e longi dina muna Kolosai 4:6?

¹³ Nga u nleke wakinu tanga sikola? Dilenda kala vo akwaku kuna sikola bekwikilanga muna longi dia lunungunuku. Ozolele kubasonga dina Nkand’a Nzambi uvovanga, kansi kuzeye ko una oyantikila. E diadi difwete kufila mu vaula e ntangwa ya longi dia ngeye kibeni. Olenda kuyisila makani mole: (1) Toma kuyikwikidisa vo Nzambi wasema e lekwa yawonso. (2) Longoka una olenda tomesena ndekwa zaku za tanina e ludi kia Nkand’a Nzambi. (Roma 1:20; 1 Pet. 3:15) Ukiyuvula: ‘Adieyi difilanga akwame a sikola mu kwikila muna longi dia lunungunuku?’ I bosi, toma vavulula e diambu diadi muna nkanda mieto. O tanina mana tukwikilanga ke diambu diampasi kwandi ko. Ayingi bekwikilanga muna longi dia lunungunuku mu kuma kia sia kaka vo muntu ona betoma zitisanga wavova vo e longi diadi dialudi. Avo ovavulwidi yo solola diambu dimosi yovo mambu mole, olenda mo sadila muna vana e mvutu kwa ndiona una kikilu ye luzolo lwa zaya e ziku kia diambu.—Tanga Kolosai 4:6.

14-16. (a) Adieyi dilenda kusadisa mu longoka mayingi mu kuma kia nkanda mosi una muna Nkand’a Nzambi? (b) Sadila e sono iyikilu muna sasila una olenda toma bakulwila nkand’a Amose. (Tala mpe e babu “ Uyisia Muna Lusansu lwa Nkand’a Nzambi Otanganga.”)

¹⁴ Yindula vo muna lukutakanu lulanda, tulongoka umosi muna nkanda miyikilwanga vo ngunza zakete. Nanga kuzeye mayingi ko mu kuma kia nkanda wau. E diambu diantete ofwete vanga i wokesa e tima diaku dia longoka oma masonama mu nkanda wau. Aweyi olenda wo vangila?

¹⁵ Diantete, ukiyuvula: ‘Adieyi nzeye mu kuma kia nsoneki a nkanda wau? Nani kakala? Akweyi kazingilanga? Nkia salu kasalanga?’ O zaya lusansu lwa nsoneki dilenda kusadisa mu bakula e kuma kasadila e mvovo yovo kingana kingandi. Ekolo otanganga Nkand’a Nzambi, vava e mvovo misonganga e kiwuntu kia nsoneki.

¹⁶ Diambu diankaka dilenda kusadisa i vava zaya e ntangwa yasonekwa o nkanda wau. Olenda zaya e mvu wasonekwa nkanda wau muna Babu kia Nkanda mia Nkand’a Nzambi kina muna Nsekola ya Nz’ampa muna Kimputu. Vana ntandu, olenda tanga e longi dia 3 muna finkanda Lusadisu mu Longoka Diambu dia Nzambi disonganga e tandu kina konso ntinu yovo ngunza kazinga. Avo ungunza una muna nkanda otanganga, vava zaya una wakala e zingu kia wantu muna kolo kina kiasonama nkanda wau. Aki nani bazinga tandu kimosi yo ngunza ndioyo? Nkia ngindu yovo fu yambi ina o ngunza kavavanga singika? Muna baka e mvutu za yuvu yayi, diambote wavavulula mu nkanda miankaka mia Nkand’a Nzambi. Kasikil’owu, muna toma bakula dina diavangamanga muna tandu kia Amose wa ngunza, diambote watanga sono ya nkanda wa 2 Ntinu ye 2 Tusansu iyikwanga muna referências cruzadas zina muna sono kia Amose 1:1, muna Nsekola ya Nz’ampa mu Kimputu. Vana ntandu, olenda tanga nkand’a Osea ona wazinga tandu kimosi yo Amose. Mawonso mama malenda kusadisa mu zaya e tandu kina Amose kazinga.—2 Nti. 14:25-28; 2 Tus. 26:1-15; Os. 1:1-11; Am. 1:1.

17-18. Sadila e nona iyikilu mu tini yayi yovo nona kiankaka ozeye muna songa o mfunu wa sianga e sungididi mu mambu makete vava otanganga Nkand’a Nzambi.

¹⁷ Vava otanganga Nkand’a Nzambi, diambote mu kala ye findambu fia luntungi-ntungi. Kasikil’owu, yindula vo kapu kia 12 kia nkand’a Zakariya otanganga kivovelanga lufwa lwa Masia. (Zak. 12:10) Vava olwaka muna tini kia 12, otangidi vo “e vumu kia nzo a Natani” kidila mu kuma kia lufwa lwa Masia. Vana fulu kia vioka mu nzaki e mvovo miami, vunda fiakete yo kukiyuvula: ‘Nkia ngwizani ina vana vena nzo a Natani yo Masia? Aweyi ndenda zayila e mvutu?’ Ofwete vavulula. Muna tini kiaki vena ye referência cruzada ikufila muna sono kia 2 Samuele 5:13, 14 kisonganga vo Natani mosi muna wan’a Davidi wa ntinu. E referência cruzada yankaka ifilanga muna sono kia Luka 3:23, 31 kisonganga vo Natani nkulu a Maria wa ngudi a Yesu kakala. (Tala muna Eyingidilu dia nkangu No. 3 2016, lukaya lwa 9, tini kia 1-3) Diambu diamfunu kikilu, ke wau ko? Ozeye dina diasakulwa vo Yesu mu luvila lwa Davidi kewutukila. (Mat. 22:42) Kansi, Davidi tezo kia wana 20 kakala yau. Owau tutomene bakula e kuma ungunza wa Zakariya wayikila vo e nzo a Natani idila mu kuma kia lufwa lwa Yesu.

¹⁸ Yindula nona kiankaka. Muna kapu kiantete kia nkand’a Luka, tutanganga vo mbasi Ngambiele wayenda kingula Maria yo kunzayisa mu kuma kia mwana kewuta vo: “Nene kekala, mwan’a Mpungu keyikilwa, o Yave wa Nzambi okumvan’e kunda kia Davidi wa se diandi, okala se Ntinu muna nzo a Yakobo yakwele mvu, e Kintinu kiandi ke kisuka ko.” (Luka 1:32, 33) Nanga mu tini kiantete kia mvovo mia Ngambiele tutoma sianga e sungididi kivovanga vo Yesu oyikilwa vo “Mwan’a  Mpungu.” Kansi, Ngambiele wasakula mpe vo Yesu “okala se Ntinu.” Ediadi dilenda kutufila mu yindula una Maria kabakulwila e mvovo miami. Nga wayindula vo Ngambiele edi kazola vova vo Yave okituka se Ntinu a Isaele vana fulu kia Erodi yovo mosi muna awana bavinga vana fulu kiandi? Avo Yesu okitukidi se ntinu, Maria wadi kituka se ngudi a ntinu, e kanda diandi diadi kwenda zingila kuna lumbu lwa ntinu. Kansi, ke vena fulu ko muna Nkand’a Nzambi kisonganga vo Maria i diau kayindula. Nkand’a Nzambi ke uvovanga ko vo Maria fulu kiatunda kalomba muna Kintinu, nze una wavanga alongoki wole a Yesu. (Mat. 20:20-23) Ediadi dikutukwikidisanga vo Maria nlembami kikilu kakala.

19-20. Mun’owu wa sono kia Yakobo 1:22-25; 4:8, adieyi i kani diantete tufwete kalanga diau vava tulongokanga?

¹⁹ Yambula twasungamenanga vo e kani diantete tufwete kala diau vava tutanganga Nkand’a Nzambi ye nkanda mieto i siamisa kikundi kieto yo Yave. Vana ntandu, tuzolele toma zaya e mpil’a wantu twina ye mana tufwete singika muna yangidika Nzambi. (Tanga Yakobo 1:22-25; 4:8.) Muna kuma kiaki, vitila twayantika longoka, tufwete samba kwa Yave kimana katuvana o mwand’avelela. Tufwete kundodokela kimana katusadisa twatoma bakula mana tutanganga yo zaya mana tufwete singika.

²⁰ Yambula yeto awonso twakala nze selo kia Nzambi ona kayika o ntozi a nkunga, oku vo: ‘Muna nsiku a Yave kaka mwin’eyangi diandi; muna nsiku andi i kevungutilang’o fuku yo mwini. . . . Mawonso kevanga mesikila.’—Nku. 1:2, 3.