O ungunza wankaka uyikwanga muna babu kiaki, uvovelanga mambu mavangama mu kolo kiau kimosi. Mambu mama mawonso i ziku kisonganga vo mu “lumbu yambaninu” tuzingilanga.​—Dan. 12:4.

• Sono: Lus. 11:7; 12:13, 17; 13:1-8, 12

  Ungunza: “E bulu kiansisi” se mu mvu miayingi kiyalanga o wantu ova ntoto. Mu lumbu yayi yambaninu, o ntu andi uluekelo. I bosi, o ntu wau usasukidi, e “nza yawonso” ilandanga e bulu kiansisi. Satana osadilanga e bulu kiaki muna “nuanisa nsadisw’a mbongo.”

  Ndungana: Vava Kizalu kiavioka, ayadi a nza bayantika telamena Yave. Vioka tandu yayingi, muna kolo kia Vita Yantete ya Nz’amvimba, o Luyalu Lwangolo lwa Grã-Bretanha lwavidisa e wisa kiandi. Kansi, Grã-Bretanha yakumama vava yayikamwa kwa Estados Unidos. Musungula mu lumbu yayi yambaninu, Satana osadilanga ayadi awonso a nza mu bangika o nkangu a Nzambi.

• Sono: Dan. 11:25-45

  Ungunza: Mu lumbu yayi yambaninu, o ntinu a node yo ntinu a sude nuana benuananga.

  Ndungana: Alemanha wanuanisa Luyalu lwa Nz’amvimba lwa Anglo-Americana. Muna mvu wa 1945, e União Soviética ye akwandi bakituka se ntinu a node. Muna mvu wa 1991, e União Soviética yabwa, kuna kwalanda Rússia ye akwandi bakituka se ntinu a node.

• Sono: Yes. 61:1; Mal. 3:1; Luka 4:18

  Ungunza: Yave otwikidi o ‘ntumw’andi’ muna ‘kubika e nzila’ vitila e Kintinu kia Masia kiasikidiswa. O “ntumwa” ndioyo, oyantikidi ‘samuna e nsangu zambote kw’asukami.’

  Ndungana: Tuka muna mvu mia 1870, mpangi Charles Taze Russell ye akwandi, basala yo vema kwawonso muna sasila e ludi kia Bibila. Muna mvu wa 1881, babakula vo e selo ya Nzambi bafwete samuna e nsangu zambote. Bavaikisa malongi nze “Precisa-se de mil pregadores” ye “Ungidos para pregar.”

• Sono: Mat. 13:24-30, 36-43

  Ungunza: Muntu okunini masa muna mpatu andi. I bosi, o mbeni okunini e mbongo ambi muna mpatu yayina. E mbongo ambi ikudidi yo fuka e masa. Muna nsungi a nkutika, e mbongo ambi ivambwilu ye masa.

  Ndungana: Tuka muna mvu wa 1870, e nswaswani vana vena e nsambil’aludi ye nsambil’aluvunu yayantika moneka. Omu lumbu yambaninu, Akristu akieleka bakutakeso muna nkutakani yo vambulwa muna mabundu maluvunu.

• Sono: Dan. 2:31-33, 41-43

  Ungunza: E malu ma sengwa ye tûma ma teke eki kiavangilwa mu sengwa yaswaswana.

  Ndungana: E tûma tusunzulanga o nkangu uyalwanga kwa Luyalu lwa Nz’amvimba lwa Anglo-Americana una utelamenanga luyalu lwalu. Mu kuma kia nkangu wau, luyalu lwalu ke lulendanga sadila wisa kiandi una ufwene ko.

• Sono: Mat. 13:30; 24:14, 45; 28:19, 20

  Ungunza: “Masa” masilu muna “lundilu.” “Ntaudi akwikizi yo lulungalalu” otumbikilu kimana kalunga-lunga “selo ya nzo.” E salu kia samuna ‘e nsangu zambote za Kintinu’ kisayane mu “nza yawonso.”

  Ndungana: Muna mvu wa 1919, ntaudi akwikizi watumbikwa vana vena nkangu a Nzambi. Tuka muna mvu wau ye mina mialanda, Alongoki a Bibila bawokesa e salu kia samuna nsangu zambote. O unu, e Mbangi za Yave besamunanga e nsangu zambote mu vioka 200 za nsi yo nieteka e nkanda misasilanga e Bibila mu vioka 1.000 dia ndinga.

• Sono: Dan. 12:11; Lus. 13:11, 14, 15

  Ungunza: Bulu kiansisi kia mpoka zole kivovese o wantu ova nza vo bavanga “e teke kia bulu kiansisi.” I bosi, e bulu kiansisi kivene “fulumwinu kwa teke.”

  Ndungana: Luyalu lwa Nz’amvimba lwa Anglo-Americana lwavita o ntu muna sikidisa e Kintwadi kia Zula. E nsi zankaka zayikama e nkubika yayi. Tuka muna mvu wa 1926 yamuna mvu wa 1933, ntinu a node wayikama mpe Kintwadi kia Zula. Wantu bakwikilanga vo Kintwadi kia Zula kitwasa luvuvamu ova nza, kansi Kintinu kia Nzambi kaka kilenda wo vanga. I diau mpe wantu bekwikilanga mu kuma kia Nações Unidas (ONU).

• Sono: Dan. 8:23, 24

  Ungunza: Ntinu una vo nkwa ndose a nsita, otwese “lufwasu lwampwena.”

  Ndungana: Luyalu lwa Nz’amvimba lwa Anglo-Americana lwavonda wantu ayingi yo twasa lufwasu lwampwena. Kasikil’owu, muna Vita Yanzole ya Nz’amvimba, Estados Unidos yatuba bomba atômica zole kwa zula kiakala vo mbeni a Luyalu lwa Nz’amvimba lwa Anglo-Americana. E nuaninua yayi yatwasa lufwasu luna ke lusidi vangama ko muna lusansu lwa wantu.

• Sono: Dan. 11:31; Lus. 17:3, 7-11

  Ungunza: E “bulu kiansisi kiambwaki” ye mpoka zandi kumi kitombokele muna mbilu, yandi mpe i ntinu wanana. Muna nkand’a Daniele o ntinu ndioyo oyikilwanga vo “lekwa kiangemi eki kitwasanga lufwasu.”

  Ndungana: Muna kolo kia Vita Yanzole ya Nz’amvimba, Kintwadi kia Zula kiafokoka. Vava vita yafokoka, ONU yasikidiswa. Nze Kintwadi kia Zula, ONU otambulanga nkembo ufwanukini kwa Kintinu kia Nzambi, i sia vo, twasa o luvuvamu ova nza. E ONU isinga nuanisa mabundu.

• Sono: 1 Tes. 5:3; Lus. 17:16

  Ungunza: E zula ivovele vo “luvuvamu ye ngemba.” “E mpoka kumi” ye “bulu kiansisi” banuanisi “o nkembi” yo kumfwasa. I bosi, e zula ifwasilu.

  Ndungana: E zula nanga ivova vo balendele twasa luvuvamu ye ngemba ova nza. I bosi, e zula iyikamanga e ONU befwasa mabundu maluvunu. Ekiaki i sinsu kia lubantiku lwa mpasi zayingi. E mpasi zazi zayingi zifokoka vava Yesu kefwasa e nza ya Satana muna vita ya Armangedo.

• Sono: Yez. 38:11, 14-17; Mat. 24:31

  Ungunza: Ngonge okotele muna nsi a nkangu a Nzambi. I bosi, ambasi balungalakese “awana basolwa.”

  Ndungana: O ntinu a node kumosi ye ayadi akaka a nza banuanisi nkangu a Nzambi. Ke vevioka kolo ko, akuswa awonso ana bekala ova ntoto bekutakeswa kuna zulu.

• Sono: Yez. 38:18-23; Dan. 2:34, 35, 44, 45; Lus. 6:2; 16:14, 16; 17:14; 19:20

  Ungunza: “Ndiona ofongele” vana “mvalu wampembe” ofokwele “nsund’andi” muna fwasa Ngonge ye vu kiandi kia makesa. “E bulu kiansisi” kitubilu “vana yanga dia tiya.” E tadi difwasidi e teke kiampwena.

  Ndungana: Yesu wa Ntinu a Kintinu kia Nzambi wizidi vuluza o nkangu a Nzambi. Yesu kumosi ye 144.000 ye vu kiandi kia ambasi befwasa e zula yawonso benuanisanga o nkangu a Nzambi. O lufwasu lwalu lufokola emvimba e nza ya Satana.