1-2. Sasila una e sono yankaka ikitukilanga se yamfunu kikilu vava mambu muna zingu kieto mesobanga.

 MUNA lumbu kiau kia lukazalu, o toko diansompi yo ndumb’ansompi batoma vienga bekalanga yo winikina ye sungididi kiawonso e longi dia Bibila divovelanga oma ma longo. E sono iyikwanga muna longi diau dia lukazalu, yitomene zayakana kwa yau. Kansi, tuka muna lumbu kiakina, e sono yayi ikitukanga se yamfunu kikilu kwa yau. Ekuma? Kadi besadila e sono yayi nze akazi.

² Diau dimosi mpe divangamanga vava akazi bena vo Akristu bekitukanga se mase. Mu mvu miayingi, nanga nkumbu miayingi bewanga malongi mevovelanga o wuta yo sansa o wana. Kansi owau, malongi mama se mamfunu kikilu kwa yau. Ekuma? Kadi beyantika mo sadila muna sansa wan’au. Ekwe mbebe ampwena bena yau! Kieleka, vava mambu mesobanga muna zingu kieto, e mpila mpe tubadikilanga e sono ina tutomene zaya ilenda soba. Ekiaki i kimosi muna kuma asambidi a Yave betangilanga e Bibila, nze una atinu a Isaele bakanikinuanga vo batanganga yo badika muna Sono “e lumbu yawonso” ya zingu kiau.—Nsi. 17:19.

3. Nkia mambu tulongoka mu longi diadi?

³ Mase, wau vo nu Akristu, lau diampwena kikilu nuna diau dia longa wana eno oma ma Yave. Dialudi vo mayingi diaka nuzolele vanga mu kuma kiau, ke kubalonga kaka mambu ma Nzambi eto ko. Nuzolele mpe sadisa wan’eno bazola kikilu Nzambi. Adieyi nulenda vanga muna sadisa wan’eno bazola  kikilu Yave? Mu longi diadi, tulongoka nkanikinu yá mia Bibila milenda sadisa mase. (2 Tim. 3:16) Tulongoka mpe e nluta bevuanga mase mankaka bena vo Akristu wau besadilanga malongi ma Bibila.

4. Nkia nkanikinu ulenda sadisa mase mu sadisa wan’au bayima o zola muna Yave? (Yakobo 1:5)

⁴ Nkanikinu wa 1: Vavanga luludiku lwa Yave. Lomba kwa Yave muna sambu kimana kavana e ngangu ovuidi o mfunu mu sadisa wan’aku bayima o zola muna Yave. (Tanga Yakobo 1:5.) Yandi i muntu osundidi e ngangu muna kutuvana malongi. Ekuma tuvovele wo? Yambula twabadika kuma yole. Kiantete, Yave i Se osundidi e ngangu muna mambu mawonso. (Nku. 36:9) Kiazole, malongi kevananga nluta kaka metwasanga.—Yes. 48:17.

5. (a) E nkubik’a Yave adieyi ivanganga muna sadisa mase? (b) Nze una omwene muna video, adieyi olongokele muna mpila ina mpangi Amorim yo nkaz’andi basansila wan’au?

⁵ Yave osadilanga e Bibila ye nkubik’andi muna kutuvana ulolo wa madia ma mwanda malenda sadisa mase mu sadisa wan’au bazola Yave. (Mat. 24:45) Kasikil’owu, olenda solola tuludiku twamfunu muna kunku,“Séries de artigos,” vana ntu a diambu, “Ajuda para a Família.” Malongi mama mavaikiswanga muna Sikama!, owau mena muna nzil’eto jw.org. Muna mpe ye video zayingi za mbokena ye nsongesela zilenda sadisa mase mu sadila tuludiku twa Yave ekolo besansanga o wan’au. *—Nga. 2:4-6.

6. Adieyi se dimosi kavova mu kuma kia luludiku yandi yo nkaz’andi betambulanga muna nkubik’a Yave?

⁶ Mase mayingi betoma vutulanga matondo muna lusadisu betambulanga kwa Yave muna nzil’a nkubik’andi. Se dimosi una ye nkumbu Joe wavova vo: “O sansa wana tatu muna ludi ke diambu diakete ko. Ntangwa zawonso, mono yo nkaz’ame tulombanga lusadisu lwa Yave muna sambu. Nkumbu miayingi tumonanga vo e longi dimosi yovo video mu ntangw’ambote kikilu ivaikisu muna kutusadisa mu singika e diambu tunuananga diau muna sansa wan’eto. Ovava luludiku lwa Yave i mpila zingu kieto.” O mpangi Joe yo  nkaz’andi bemonanga vo malongi mama mesadisanga wan’au mu toma finama Yave.

7. Ekuma dinina diamfunu kwa mase mu vanganga mawonso muna songa mbandu ambote? (Roma 2:21)

⁷ Nkanikinu wa 2: Kala se mbandu ambote kwa wan’aku. O wana bemonanga mawonso mase mau bevanganga ye nkumbu miayingi bevavanga kubatanginina. Dialudi vo ke vena se ko yovo ngudi walunga. (Roma 3:23) Kana una vo i wau, mase mangangu bevanganga mawonso balenda muna kala se mbandu ambote kuna kwa wan’au. (Tanga Roma 2:21.) Se dimosi wavova mu kuma kia wana vo: “O wana bena nze vusu, betangininanga mawonso bemonanga.” Wakudikila vo: “Vava wan’eto bemonanga vo mana tukubalonganga ke mau ko tusadilanga, vovesa bekutuvovesa dio.” Muna kuma kiaki, avo tuzolele vo wana eto bazola Yave, bafwete mona vo yeto mase Yave kikilu tutoma zolanga.

8-9. Adieyi olongokele muna dina mpangi Andrew yo Emma bavova?

⁸ Vena ye mpila zayingi mase balenda longela wan’au bazola Yave. Tala dina mpangi Andrew una ye kimbuta kia mvu 17 kavova: “Ntangwa zawonso, mase meto bekutusungamesanga o mfunu wa samba. Konso fuku, se diame osambanga yame kumosi kana nkutu vo nsambidi kala. Nkumbu miayingi bekutuvovesanga vo: ‘Nulenda samba kwa Yave konso ntangwa nuzolele.’ Ediadi diatoma simba kikilu o ntim’ame. Owau, diasazu dikalanga mu samba kwa Yave yo kumbadikila nze Se dianzodi.” Mase, nusungamenanga vo o zola kweno muna Yave, kulenda fila wana eno mu toma zola Yave.

⁹ Badika mpe e nona kia mpangi ankento Emma. Vava se diandi kababembola, wasisa ngudi andi ye mfuka zayingi. Mpangi Emma wavova vo: “Nkumbu miayingi, vava o mama kakalanga ye nzimbu zafwana ko, wavovelanga una Yave kelunga-lungilanga yo sadisila e selo yandi. E mpila mama kanatinanga e zingu kiandi, kiasonganga vo wakwikilanga kikilu muna diambu diadi. O mama wasadilanga kikilu mana kalonganga.” Nkia diambu tulongokele? Mase, e mbandu eno ambote ilenda longa wan’eno kana nkutu vava nunuananga ye mambu mampasi.—Ngal. 6:9.

10. Nkia ntangwa mase kuna Isaele yankulu bamokenanga yo wan’au oma ma Yave? (Nsiku 6:6, 7)

¹⁰ Nkanikinu wa 3: Mokenanga yo wan’aku ntangwa zawonso. Yave wakanikina mase kuna Isaele yankulu vo bafwete mokenanga yo wan’au mu kuma kiandi. (Tanga Nsiku 6:6, 7.) Muna lumbu, mase mama ntangwa yayingi bakalanga yau mu mokena yo wan’au yo kubasadisa batoma zola Yave. Kasikil’owu, o toko una vo Nyisaele waviokesanga ntangwa yayingi yo se diandi mu kuna yo kutika e mbongo. Avo i mwan’andumba waviokesanga mpe e ntangwa yayingi yo ngudi andi muna kunsadisa mu tunga e mvuatu yo sala e salu yankaka ya nzo. Ekolo mase yo wana basalanga kumosi, basadilanga e ntangwa yayi mu mokena mambu mayingi mamfunu yo wan’au. Kasikil’owu, bamokenenanga e mambu mambote Yave kavanganga ye una kabasadisilanga.

11. Nkia lau bena diau mase mu mokena yo wan’au?

¹¹ O unu, e zingu kia wantu kiasoba. Mu nsi zayingi, diampasi kikilu dikalanga kwa mase mu viokesa e ntangwa kumosi yo wan’au. Ekolo mase bena kuna salu, o wana kuna sikola. Muna kuma kiaki, mase bafwete sianga e ngolo mu solola e ntangwa balenda mokena yo wan’au. (Efe. 5:15, 16; Fili. 1:10) E Nsambila ya Esi Nzo ivananga e lau kwa mase mu kala vamosi yo wana. Mpangi Alexander una vo  nleke wavova vo: “Ntangwa zawonso, papa ovanganga e nkubik’a Nsambila ya Esi Nzo ye ke yambulanga ko vo konso diambu diavunzanesa e ntangwa yayi tukalanga vamosi. Kuna mfoko, tumokenenanga mambu mankaka.”

12. Nkia diambu mase bafwete sungamenanga vava bekalanga muna Nsambila ya Esi Nzo?

¹² Avo u se yovo ngudi, adieyi ofwete vanga kimana wan’aku bayangalelanga e Nsambila ya Esi Nzo? Ekuma olembi sadila o nkanda wampa, Zinga ye Kiese Yakwele Mvu! muna longoka yo wan’aku? O nkanda wau, ukuvana e lau diambote mu toma mokenanga yo wan’aku. Edi ozolele vo wan’aku bavovesanga una bemonanga muna ntima ye mawonso beyindulanga. Muna kuma kiaki, kusadilanga ntangwa ya Nsambila ya Esi Nzo ko muna kubabamina yovo kubatumba. Kufunginge makasi ko avo wan’aku bavovele diambu ke dina ngwizani ko ye nkanikinu mia Bibila. Vana fulu kia funga makasi, ubasanisina wau bavovele una bemonanga muna ntima yo kubakasakesa vo bavovanga konso diambu beyindulanga. Kadi, avo ozeye una wan’aku bemonanga, diasazu dikala muna kubasadisa.

13. Nkia malau mankaka bena mau mase mu sadisa wan’au bakala ye ngwizani ambote yo Yave?

¹³ Mase, lumbu yawonso nuvavanga e lau diasadisa wan’eno kimana bakala ye ngwizani ambote yo Yave. Muna longa wan’aku oma ma Nzambi eto, kuvingila kaka ko e ntangwa nuasikidisa muna longoka yau e Bibila. Tala dina mpangi Lisa una vo ngudi kavova: “Twasadilanga lekwa yawonso ituzungidi muna longa wan’eto oma ma Yave. Kasikil’owu, vava mbwa eto kavanganga e diambu diasevesanga o wan’eto, twabavovesanga vo ediadi disongele vo Yave i Nzambi akiese ye wavanga e bulu nze yayi kimana oyeto mpe twakala ye kiese yo yangalela e lekwa kavanga.”

14. Ekuma dinina diamfunu kwa mase basadisanga wan’au basola akundi ambote? (Ngana 13:20)

¹⁴ Nkanikinu wa 4: Sadisanga wan’aku basola akundi ambote. E Bibila kitoma kiesesanga vo akundi tusolanga balenda kutufila mu kala wantu ambote yovo wantu ambi. (Tanga  Ngana 13:20.) Mase, nga nuzeye e fu ya akundi a wan’eno? Nga nukubabokelesanga kuna nzo eno yo viokesa yau e ntangwa? Adieyi nulenda vanga kimana nuasadisa wan’eno bavanga yikundi ye awana bezolanga Yave? (1 Kor. 15:33) Nulenda sadisa wan’eno bavanga yikundi yambote muna bokelesanga kuna nzo eno ampangi bena ye ngwizani ambote yo Yave mu vanga mambu mayingi kumosi.—Nku. 119:63.

15. Adieyi mase balenda vanga muna sadisa wan’au bavanga yikundi yambote?

¹⁵ Tala e nona kia mpangi Tony una vo se. Wavova dina yandi yo nkaz’andi bavanga muna sadisa wan’au bakala ye akundi ambote: “Mu mvu miayingi, mono yo nkaz’ame twabokelesanga mpangi za nsi ye ntela zaswaswana beza ku nzo eto. Twadianga yau vamosi yo vanga Nsambila ya Esi Nzo kumosi. Eyayi i mpila yambote yazayila awana bezolanga yo sadila Yave ye kiese kiawonso. Twakalanga ye lau dia bokelesa akengi a zunga, misionario ye mpangi zankaka kuna nzo eto. Wan’eto mambu mayingi balongoka mu kuma kia vema, zola yo ntim’a mvevo basonganga mpangi zazi muna salu kia Yave. Ediadi diasadisa wan’eto mu toma finama Yave.” Muna kuma kiaki, mase, nukala ye kani dia sadisa wan’eno bavanga yikundi yambote.

16. Mase, adieyi nulenda vanga avo mwan’eno ovovele vo kazolele sadila Yave ko?

¹⁶ Mase, adieyi nulenda vanga avo nuvangidi mawonso muna sadisa wan’eno, kansi mosi muna yau ovovele vo kazolele sadila Yave ko? Ke nuyindula ko vo ke nutomene lungisa mbebe eno ko nze mase. Kadi Yave wavana kwa yeto awonso kumosi yo mwana eno o nswa wa kuyisolela, kana vo tusadila Yave yovo ve. Avo mwan’eno obakidi nzengo za yambula sadila Yave, ke nudimbula vuvu ko yo yindula vo kevutuka diaka ko. Nusungamena e nona kia mwan’ankolami. (Luka 15:11-19, 22-24) O mwana ndioyo mambu mayingi mambi kavanga, kuna kwalanda waviluka o ntima yo vutuka. Kansi, akaka balenda vova vo: “Ekiaki nona kwandi kaka. Nga diambu  diadi dilenda vangama kikilu muna zingu kia muntu?” Ingeta, dilenda vangama. I diau diavangama kwa nleke mosi una ye nkumbu Elie.

17. Aweyi e nona kia mpangi ayakala Elie kikasakesele?

¹⁷ Mu kuma kia mase mandi, mpangi Elie wavova vo: “Bavanga mawonso balenda muna kunsadisa yazola Yave ye Diambu diandi. Kansi, vava yakala nleke yayantika kolamena mase mame.” Mpangi Elie wayantika nata e zingu kia disu ku nsi a lukaya yo bembola e ngolo zawonso mase mandi bavanganga muna kunsadisa mu kala ye ngwizani ambote yo Yave. Wasisa e nzo a mase mandi yo kuyivana muna mavangu mambi. Kana una vo i wau, ezak’e ntangwa wamokenenanga oma ma Bibila ye akundi andi. Mpangi Elie wavova vo: “Konso ntangwa yamokenenanga oma ma Yave ye akundi ame, yayindulanga mpe una wakala e ngwizani ame yo Yave. Malembe-malembe, e mbongo a ludi ina mase mame bakuna mu ntim’ame, yayantika mena.” Kuna kwalanda, mpangi Elie wavutuka sambila Yave. * Yindula e kiese bakala kiau mase ma mpangi Elie, wau balonga mwan’au kazola Yave tuka kileke kiandi!—2 Tim. 3:14, 15.

18. Adieyi tuvova mu kuma kia mase besianga e ngolo za sadisa wan’au bazola Yave?

¹⁸ Mase, lau diampwena kikilu nuna diau, i sia vo, sansa awana bekala asambidi a Yave mu lumbu ikwiza. (Nku. 78:4-6) Eyayi mbebe ampwena kikilu, muna kuma kiaki, tunusanisini wau nusianga e ngolo za sadisa wana eno bazola Yave. Avo nukwamanene vanga mawonso nulenda muna sadisa wan’eno bazola Yave yo kunlemvokela, nukala ye ziku vo Yave wa Se dieto dia zulu otoma yangalala.—Efe. 6:4.