1. Nkia nzengo zamfunu wantu awonso bafwete baka?

 O UNU, vena ye nzengo zamfunu zina wantu awonso bafwete baka: Yikama Yave wa Nzambi una vo i Ntinu a nza yawonso yovo yikama e mbeni andi, i sia vo, Satana wa Nkadi ampemba. Ke bafwete kala ko kulu mu nzila, kulu mu futa. E nzengo bebaka zisonga kana vo moyo a mvu ya mvu bevua yovo fwaswa befwaswa. (Mat. 25:31-33, 46) Muna kolo kia “mpasi zayingi,” o wantu besiwa e dimbu kisonga kana vo vuluka bevuluka yovo fwaswa befwaswa.—Lus. 7:14; 14:9-11; Yez. 9:4, 6.

2. (a) Adieyi e sono kia Ayibere 10:35-39, kikutukasakesanga mu vanga? (b) O nkand’a Lusengomono aweyi ulenda kutusadisila?

² Tanga Ayibere 10:35-39. Avo wasolele yikama luyalu lwa Yave, nzengo zambote wabakidi. Kieleka, owau ozolele sadisa mpe akaka babaka e nzengo zazi. Muna kuma kiaki, olenda sadila mana masonama muna nkand’a Lusengomono muna kubasadisa. Nkanda wau uvovelanga mana mebwila mbeni za Yave, kansi mpe utoma vovelanga e nsambu bevua awana beyikamanga luyalu lwa Nzambi ye kwikizi kiawonso. Diambote kikilu twalongoka mambu mama mamfunu. Kadi o vanga wo dikutusadisa mu kala ye kani dia kwamanana sadila Yave. Vana ntandu, tulenda sadila mana tulongoka mu sadisa akaka kimana babaka e nzengo zambote yo kwamanana sadila Yave ye kwikizi kiawonso.

3. Nkia mambu tulongoka mu longi diadi?

³ Mu longi diadi, tubaka e mvutu za yuvu eyi: Nkia nsambu bevua awana beyikamanga luyalu lwa Nzambi ye kwikizi kiawonso? Adieyi dibwila awana besolanga yikama e bulu kiansisi kiambwaki kiyikwanga muna nkand’a Lusengomono?

4. Nkia buka Yoane wa ntumwa kamona kiakala kumosi yo Yesu kuna zulu?

⁴ Muna mona-meso, Yoane wa ntumwa wamona buka yole ya wantu beyikamanga luyalu lwa Yave yo vua e nsambu za zinga yakwele mvu. E buka kiantete i kia 144.000 ma wantu. (Lus. 7:4) Wantu awaya va ntoto betuka yo kwenda kuna zulu mu yala kumosi yo Yesu muna Kintinu kiandi. Beyala o ntoto tuka kuna zulu. (Lus. 5:9, 10; 14:3, 4) Muna mona-meso, Yoane wamona 144.000 ma wantu batelamene kuna zulu kumosi yo Yesu, vana Mongo a Zione.—Lus. 14:1.

5. Ke kolo ko, adieyi divangama kwa akuswa ana bakinu ova ntoto mu lumbu yayi yambaninu?

⁵ Tuka muna tandu kiantete yamu mu lumbu yeto, vena ye wantu ayingi besolwanga mu kota muna buka kia 144.000 ma wantu. (Luka 12:32; Roma 8:17) Kansi, muna mona-meso Yoane wavoveswa vo muna 144.000 ma wantu, akete kaka bekala o moyo ova ntoto mu lumbu yambaninu. Vitila kiayantika mpasi zayingi, e “nsadiswa” zazi zisiwa e “dimbu” kiansuka kisonga vo dienga dia Yave bena diau. (Lus. 7:2, 3; 12:17) I bosi, muna kolo kia mpasi zayingi, akuswa ana bekala ova ntoto benatwa kuna zulu mu yikama akuswa akaka ana basonga e kwikizi yamuna lufwa. Okwakuna, bekituka se atinu yo yala kumosi yo Yesu muna Kintinu kia Nzambi.—Mat. 24:31; Lus. 5:9, 10.

6-7. (a) Nkia buka kiankaka Yoane kamona? Nkia mambu tuzeye mu kuma kia buka kiaki? (b) Ekuma akuswa ana bakinu ova ntoto kumosi ye “ndong’ayingi” bafwete lakukilanga o moyo muna ndungan’a Lusengomono kapu kia 7?

⁶ Vava kamona e buka kia akuswa ana bekwenda kuna zulu, Yoane wamona mpe e buka kia “ndong’ayingi.” Nswaswani ye buka kia 144.000 ma wantu, Bibila ke kivovanga ko kana wantu kwa bena muna buka kia ndong’ayingi. (Lus. 7:9, 10) Nkia diambu tuzeye mu kuma kia buka kiaki? Muna Lusengomono 7:14, Yoane wavoveswa vo: “Awaya i yau batukidi muna mpasi zayingi, basukwidi e mvuatu miau yo pembesela mio muna menga ma Mwan’a meme.” Vava bevuluka muna mpasi zayingi, e “ndong’ayingi” izingila ova ntoto yo vua nsambu zayingi.—Nku. 37:9-11, 27-29; Nga. 2:21, 22; Lus. 7:16, 17.

⁷ Kiakala vo vuvu kia kwenda zingila kuna zulu una kiau yovo zinga yakwele mvu ova ntoto, nga okwikilanga vo omona e ndungan’a mambu mama meyikwanga muna Lusengomono kapu kia 7? Eyayina ntangw’a kiese kikilu ikala kwa buka yole yayi ya asambidi a Yave! Kiese kiayingi tukala kiau wau twasola yikama luyalu lwa Yave. Nkia mambu mankaka o nkand’a Lusengomono ukutuzayisanga mu kuma kia mpasi zayingi?—Mat. 24:21.

8. Aweyi mpasi zayingi ziyantikila? Adieyi wantu ayingi bevanga?

⁸ Nze una twalongokele muna longi diaviokele, ke kolo ko ayadi a nza yayi befwasa Babele Anene, i sia vo, kintwadi kia nsambila zawonso zaluvunu. (Lus. 17:16, 17) Lufwasu lwalu lukala se lubantiku lwa mpasi zayingi. Nga lufwasu lwalu lufila wantu ayingi mu yantika sambila Yave? Ve. Vana fulu kia vanga wo, Lusengomono kapu kia 6 kisonganga vo muna kolo kiakina kiampasi, awana ke besambilanga Yave ko bevava lutaninu kwa ayadi ye nkubika za yintika ya nza yayi, eyi itezaneswanga ye miongo. Wau vo wantu awaya ke beyikama Kintinu kia Nzambi ko, Yave okubabadikila se mbeni zandi.—Luka 11:23; Lus. 6:15-17.

9. Ekuma nkangu a Yave bekadila baswaswana muna kolo kia mpasi zayingi? Adieyi dikubabwila?

 ⁹ Kieleka, selo ya Yave baswaswana bekala muna kolo kia mpasi zayingi. Yau kaka bekwamanana sambila Yave wa Nzambi ova ntoto ye ke beyikama “bulu kiansisi” ko. (Lus. 13:14-17) Wau vo besikila ye kwikizi muna Yave, e mbeni za Yave zikubafungila kikilu makasi. Muna kuma kiaki, e kintwadi kia zula kinuanisa nkangu a Nzambi ova ntoto. Bibila kiyikilanga e vangu diadi vo vita ya Ngonge a Mangonge.—Yez. 38:14-16.

10. Landila e sono kia Lusengomono 19:19-21, adieyi Yave kevanga vava nkangu andi unuaniswa?

¹⁰ Adieyi Yave kevanga vava nkangu andi unuaniswa? Okutuzayisanga vo: “E nsita zame zayingi zikwama.” (Yez. 38:18, 21-23) Lusengomono kapu kia 19 kikutuzayisanga dina divangama. Yave otwika Mwan’andi mu tanina nkangu andi yo fwasa mbeni zandi. E vu kia makesa kuna zulu, i sia vo, mbasi zakwikizi kumosi ye 144.000 ma akuswa beyikama Yesu muna vita yayi yo fwasa Ngonge a Mangonge. (Lus. 17:14; 19:11-15) E vita yayi aweyi ifokokela? O wantu ye nkubika zawonso zitelamenanga Yave, zifwaswa emvimba.—Tanga Lusengomono 19:19-21.

11. Nkia diambu disundidi o mfunu diyikwanga muna nkand’a Lusengomono?

¹¹ Yindula e kiese bekala kiau e selo yakwikizi ya Yave ova ntoto wau bevuluka muna lufwasu lwa mbeni za Nzambi. Kieleka, eyayina ntangw’a kiese kikilu ikala! O lufwasu lwa Babele Anene kazu kiangolo ye kiakiese lutwasa kuna zulu. Kansi, vena ye diambu diankaka dikubatwasila kiese kiayingi. (Lus. 19:1-3) I nkinzi wa “longo lwa Mwan’a meme.” O nkinzi wau i diambu disundidi o mfunu diyikwanga muna nkand’a Lusengomono.—Lus. 19:6-9.

12. Landila e sono kia Lusengomono 21:1, 2, nkia ntangwa luvangama o longo lwa Mwan’a meme?

¹² Nkia ntangwa luvangama o longo lwa Mwan’a meme? Vitila e vita ya Armangedo, akuswa awonso, i sia vo, 144.000 bekukikadila kuna zulu kimana banuana e vita yayi. Kansi, eyayi ke yau ko i ntangwa luvangama o longo lwa Mwan’a meme. (Tanga Lusengomono 21:1, 2.) O longo lwa Mwan’a meme luvangama vava kifokoka e vita ya Armangedo ye vava mbeni zawonso za Nzambi zifwaswa.—Nku. 45:3, 4, 13-17.

13. Nkia diambu divangama muna longo lwa Mwan’a meme?

¹³ Nkia diambu divangama muna longo lwa Mwan’a meme? Wauna o longo luyikakesanga yakala yo nkento, o longo lwa Mwan’a meme mpe luyikakesa o Ntinu, i sia vo, Yesu Kristu yo “ndumb’ansompi,” i sia vo, 144.000 ma akuswa. E diambu diadi diamfunu i lubantiku lwa luyalu lwampa luna luyala o ntoto mu kolo kia 1.000 dia mvu.—Lus. 20:6.

14-15. Lusengomono kapu kia 21 ye nki kitezanesanga akuswa 144.000? (Tala e fwaniswa kia fukwa.)

¹⁴ Kuna mfoko a nkinzi a longo, Lusengomono kapu kia 21 kitezanesanga akuswa 144.000 ye mbanza ambote-mbote iyikilwanga vo “Yerusaleme Yampa.” (Lus. 21:2, 9) E mbanza yayi ina ye “nkubilwa 12 za matadi, i mûna mwasonama e nkumbu 12 za ntumwa za Mwan’a meme.” Ekuma e diambu diadi diatuntila e sungididi kia Yoane? Kadi wamona e nkumbu andi yasonama muna dimosi muna matadi mama. Ekwe lau diampwena kakala diau!—Lus. 21:10-14; Efe. 2:20.

¹⁵ E mbanza yayi yaswaswana ye mbanza  zankaka. E nzila yampwena ya mbanza yayi yavangilwa mu wolo walembi sangwa lekwa, e mielo 12 miavangilwa muna pelola, e nkubilwa ye yaka yatoma viengeselwa muna matadi mantalu, o “lambuka, yo vonga yo lá kwafwanana.” (Lus. 21:15-21) Kansi, Yoane wabakula vo vena ye lekwa kiakondwa. Tala dina Yoane kekutuvovesanga: “Kimwene mo tempelo ko, kadi Yave wa Nzambi wa Mpungu-ngolo i tempelo andi yo Mwan’a meme mpe. E mbanza ke ivuidi ntangwa mfunu ko ngatu ngonde katemesa yo, kadi o nkembo a Nzambi utemenanga yo, o mwinda andi i Mwan’a meme.” (Lus. 21:22, 23) Awana bena muna Yerusaleme Yampa vamosi bekala yo Yave. (Ayib. 7:27; Lus. 22:3, 4) Ozevo, Yave yo Yesu yau i tempelo muna mbanza yayi.

16. Nkia nsambu bevua o wantu muna kolo kia Luyalu lwa Funda dia Mvu?

¹⁶ Kieleka, akuswa kiese kiayingi bekalanga kiau vava beyindulanga e mbanza yayi. Kansi, awana bena ye vuvu kia zingila ova ntoto, bafwete mpe yindulanga e mbanza yayi. Ekuma? Kadi muna kolo kia Luyalu lwa Funda dia Mvu, e Yerusaleme Yampa nsambu zayingi itwasa ova ntoto. Yoane wamona vo nsambu zazi zakukulanga nze “nkoko a maza ma moyo.” Kuna konso simu dia nkoko wau, kuna ye “nti mia moyo” mivaikisanga makaya “ma wukila e zula.” (Lus. 22:1, 2) Wantu awonso bezingila mo bekala ye lau dia vua nsambu zazi zawonso. Malembe-malembe, awonso ana belemvokela Yave bekituka se wantu alunga. Ke vekala diaka mayela ko yovo mpasi ngatu dilu.—Lus. 21:3-5.

17. Landila Lusengomono 20:11-13, aki nani bevua nsambu zitwasa Luyalu lwa Funda dia Mvu?

¹⁷ Aki nani bevua nsambu zazi? Wantu antete bevua e nsambu zazi i ndong’ayingi ina ivuluka muna vita ya Armangedo kumosi ye wan’akete ana bewutukila muna nz’ampa. Kansi, Lusengomono kapu kia 20 kisianga mpe o nsilu vo mafwa fuluka mefuluka. (Tanga Lusengomono 20:11-13.) “Ansongi,” i sia vo, selo yakwikizi ana bafwa bevutuka diaka zinga ova ntoto kumosi ye “awana bena vo ke ansongi ko,” i sia vo, awana ke bakala ye lau ko dia longoka oma ma Yave. (Mav. 24:15; Yoa. 5:28, 29) Nga ediadi disongele vo wantu awonso fuluka befuluka yo zingila ova ntoto muna kolo kia Luyalu lwa Funda dia Mvu? Ve. Awana bakala ye lau dia sadila  Yave, kansi kuna lukanu ke bavanga wo ko, ke befuluka ko. Bavewa e lau, kansi basonga vo ke bafwana ko mu zingila muna Paradiso ova ntoto.—Mat. 25:46; 2 Tes. 1:9; Lus. 17:8; 20:15.

18. Aweyi wantu bekala kuna mfoko a 1.000 dia mvu?

¹⁸ Kuna mfoko a 1.000 dia mvu, awonso bezinga ova ntoto, wantu alunga bekala. Ke vekala diaka ye muntu ko omona e mpasi mu kuma kia sumu dia Adami. (Roma 5:12) E mfwilu mia sumu dia Adami, mifokolwa emvimba. Ediadi disongele vo, kuna mfoko a 1.000 dia mvu awonso bekala o moyo ova ntoto, wantu alunga bekala.—Lus. 20:5.

19. Nkia lau wantu awonso alunga bekala diau muna lutonto lwansuka?

¹⁹ Tuzeye wo vo Yesu wasikila ye kwikizi muna Nzambi kana nkutu vava Satana kantonta. Nga wantu awonso alunga, besikila ye kwikizi vava Satana kevewa e lau dia kubatonta? Konso muntu mu yeto okala ye lau dia vana e mvutu za kiuvu kiaki vava Satana kevaikiswa muna mbilu kuna mfoko a 1.000 dia mvu. (Lus. 20:7) Awana besikila ye kwikizi muna lutonto lwalu lwansuka bevua moyo a mvu ya mvu yo vevoka emvimba. (Roma 8:21) Awana bekolamena Yave, befwaswa yakwele mvu kumosi ye Nkadi ampemba ye nkuya miandi.—Lus. 20:8-10.

20. Aweyi omwene wau olongokele ungunza wasonama muna nkand’a Lusengomono?

²⁰ Aweyi omwene wau tulongokele maka mambu meyikwanga muna nkand’a Lusengomono? Nga kuyangalele ko wau vo una muna ndungan’a ungunza wau wasivi? Nga ediadi ke difwete kufila ko mu bokela akaka kimana bayikama mpe e nsambil’avelela a Nzambi eto? (Lus. 22:17) Kieleka, malongi mama mayangidikidi ntima mieto muna yindula e vuvu tuna kiau muna mambu mevangama kuna sentu. Nze Yoane wa ntumwa, yeto mpe tuvovanga ye kiese kiawonso vo: “Amen! Wiza, e Mfumu Yesu.”—Lus. 22:20.