1-3. Nkia diambu nanga diabwa vana vena Ewodia yo Suntuki? Aweyi tulenda vengela mambu ma mpila yayi? (Tala fwaniswa va ntandu.)

TUTOMA zitisanga o Nkand’a Nzambi kadi tuzeye wo vo kwa Nzambi watuka. Nkand’a Nzambi una ye malongi malenda kutusadisa mu venga mambu yo kutusingika avo mbi tuvangidi. Aweyi tubadikilanga malongi mama? Yindula e nona kia akento wole ana bakala vo akuswa muna tandu kiantete, Ewodia yo Suntuki. Nkand’a Nzambi uvovanga vo batantana, kansi, ke ukutuzayisanga kuma ko. Tuteza yindula kana nkia diambu diabwa.

² Nanga Ewodia wabokela mpangi zankaka mu kwenda dila kuna nzo andi. Kansi, kabokela Suntuki ko. I bosi, vava Suntuki kawá akaka bamokenanga yekiese kiawonso mu kuma kia madia mana badia, wafunga kikilu makasi. Nanga wayindula vo: Kikwikidi dio ko vo Ewodia kambokele ko kuna nzo andi. Yabenzenge vo tu akundi kikilu.’ Suntuki wayindula vo Ewodia kanzolanga ko, wavenganga vanga yandi kikundi.  Muna kuma kiaki, Suntuki wabokela mpe mpangi zau zimosi mu kwenda dila kuna nzo andi, kansi, kabokela Ewodia ko. E diambu diadi nanga diakendeleka mpangi zankaka muna nkutakani. Nkand’a Nzambi usonganga vo Paulu wabasingika yau nzole yo kubakasakesa kimana bavutulwisa luvuvamu. Nanga balemvokela e longi dia Paulu yo kwamanana sadila Yave ye kiese.—Filipi 4:2, 3.

³ Muna nkutakani zeto, ezak’e ntangwa yeto mpe tulenda bakana diambu ye mpangi zeto. Kansi, avo tulende luludiku luna muna Nkand’a Nzambi, tulenda singika e ntantani zazi yovo venga zo nkutu. Vava tulemvokelanga mana Nkand’a Nzambi uvovanga, tusonganga vo tuyangalelanga kikilu Nkanda watuka kwa Yave.—Nkunga 27:11.

4, 5. Nkia luludiku tuvewanga muna Diambu dia Nzambi mu kuma kia lunga-lunga e ngindu zeto?

⁴ Ke ntangwa zawonso ko dikalanga diasazu mu lunga-lunga e ngindu zeto. Tulenda kendalala yovo funga makasi avo muntu utuvezele yovo utuvangidi e mbi, nanga mu kuma kia fu yeto ya kisi nsi, nkand’a nitu yovo mpw’eto. Ediadi dilenda kutuvanga mpasi muna ntima, musungula avo muntu utuvangidi e mbi mpangi eto muna nkutakani. Nkia luludiku luna muna Diambu dia Nzambi lulenda kutusadisa?

⁵ Yave ozeye dina dilenda vangama avo wantu bayambwidi lunga-lunga ntima miau. Vava tukendalalanga yovo funga makasi, tulenda vova yovo vanga diambu dina tusinga kuyibanzila. Muna Nkand’a Nzambi, Yave okutulonganga vo twayikebanga mu kuma kia makasi. Okutuvovesanga vo: “Kusazuki o tutis’ekudi ko.” Yindula ulolo wa mambu tulenda venga avo tulemvokele luludiku lwalu yo lembi funganga makasi mu nzaki. (Tanga Kimpovi 7:9; Ngana 16:32.) Nkand’a Nzambi ukutuvovesanga mpe vo twalolokanga akaka. Yesu wavova vo avo ka tulolokele akaka ko, Yave mpe ke kutuloloka ko. (Matai 6:14, 15) Nga divavanga vo wakala ye luzindalalu ye tima dia loloka akaka?

6. Adieyi dilenda bwa avo tuyambwidi lunga-lunga ngindu zeto?

⁶ Avo tuyambwidi lunga-lunga e ngindu zeto, dilenda kutufila mu lunda makasi yo yantika nkutu menga muntu. Yovo tulenda vukumuna akaka muna nkutakani mu vanga diau dimosi. Kana nkutu vo tutezele sweka makasi yovo nsita, kuna kulanda akaka bebakula una tumonanga. Ediadi dilenda fila mpangi zeto mu kutuvavuka. (Ngana 26:24-26) Akuluntu balenda sadila Nkand’a Nzambi mu vava kutusadisa mu venga makasi ye nsita yo loloka akaka. (Fuka 19:17, 18; Roma 3:11-18) Avo bavangidi wo, nga tulemvokela luludiku lwa Nkanda watuka kwa Yave?

7, 8. (a) Aweyi Yave kefidilanga nkangu andi? (b) Nkia tuludiku tulenda solola muna Nkand’a Nzambi? Ekuma tufwete lemvokelanga tuludiku twatu?

⁷ O unu, Yave ofilanga awana bena muna nkubik’andi ova ntoto yo kubalonga. Mu nkia mpila? Wasola Kristu mu kala se “ntu a nkutakani.” Kristu wasola “ntaudi akwikizi yo lulungalalu” mu longa yo fila  nkangu a Nzambi. (Efeso 5:23; Matai 24:45-47) Nze buka kia selo yambuta muna tandu kiantete, o ntaudi akwikizi ozitisanga kikilu Nkand’a Nzambi kadi i Diambu dia Nzambi. (Tanga 1 Tesalonika 2:13.) Nkia tuludiku tulenda solola muna Nkand’a Nzambi?

⁸ Nkand’a Nzambi ukutuvovesanga vo twakalanga muna tukutakanu ntangwa zawonso. (Ayibere 10:24, 25) Ukutukasakesanga vo yeto awonso twakwikila malongi mamosi ma Nkand’a Nzambi. (1 Korinto 1:10) Ukutuvovesanga mpe vo ‘twavavanga ntete Kintinu.’ (Matai 6:33) Nkand’a Nzambi ukutukanikinanga vo twasilanga umbangi mu nzo ye nzo, mu fulu ya ndonga ye konso fulu tulenda wana wantu. (Matai 28:19, 20; Mavangu 5:42; 17:17; 20:20) Uvovesanga akuluntu vo bavelelesanga e nkutakani. (1 Korinto 5:1-5, 13; 1 Timoteo 5:19-21) Ukutuvovesanga mpe vo tufwete velelesanga nitu zeto yo venga ngindu ye fu ina ke iyangidikanga Yave ko.—2 Korinto 7:1.

9. Nani kasola o Yesu mu kutusadisa mu bakula Diambu dia Nzambi?

⁹ Akaka balenda yindula vo ke bavuidi mfunu a muntu ankaka ko kabasasila Nkand’a Nzambi. Kansi tuka muna mvu wa 1919, Yesu osadilanga “ntaudi akwikizi yo lulungalalu” mu sadisa nkangu a Nzambi mu bakula mana Nkand’a Nzambi ulonganga yo lemvokela mo. Avo tulemvokele malongi ma Nkand’a Nzambi, e nkutakani ikwamanana kala yavelela, mu luvuvamu ye kintwadi. Ukiyuvula: ‘Nga isonga e kwikizi muna Yesu yo lemvokela luludiku lwa ntaudi akwikizi?’

10. Aweyi nkand’a Yezekele uyikilanga e nkubik’a Yave kuna zulu?

¹⁰ Muna Nkand’a Nzambi, tulongokanga mpe vo selo ya Yave kuna zulu ntwadi besalanga. Kasikil’owu, muna mona-meso kiasongwa Yezekele, wamona Yave wamanta vana ntandu a kalu diadiatilanga mu nzaki zawonso yo viluka konso fulu kina Yave kazolele. (Yezekele 1:4-28) E kalu disunzulanga e nkubik’a Nzambi kuna zulu, eyi ilandanga luludiku lwandi vana vau. E nkubika yayi ifilanga e nkubik’andi ova ntoto. Yindula ulolo wa nsobani zivangilu kala mu nkubik’a Nzambi mu mvu kumi miviokele. Sungamena vo Yave ovanganga e nsobani zazi. Ke kolo ko, Kristu ye mbasi befwasa e nza yayi yambi. Ke vekala diaka muntu ko ona oveza Yave ye nkumbu andi yovo vovela luyalu lwandi e mbi.

11, 12. Nkia salu kisalanga nkubik’a Yave mu lumbu yayi yambaninu?

¹¹ Tala e salu kisalanga e nkubik’a Yave mu lumbu yayi yambaninu. Salu kia tunga. Ulolo wa mpangi z’akala ye z’akento besalanga kwayingi mu tunga e vula diampa dia Mbangi za Yave kuna Warwick, Nova York, Estados Unidos. Mazunda ye mazunda ma mpangi mu nza yawonso bekuyivananga  kuna mvevo mu tunga Maseka ma Kintinu ye mavula. E mpangi zazi befilwanga kwa Buka Kitalanga Mambu ma Salu kia Ntungilu mu Nza Yawonso. Tuvutulanga kikilu matondo kwa ulolo wa mpangi ana bekuyivananga muna salu kiaki kia tunga. Mbangi za Yave muna konso nsi bevananga tukau tuna balenda mu vana moko muna salu kia tunga e nzo zazi. Yave osambulanga nkangu andi mu kuma kia lulembamu ye kwikizi besonganga.—Luka 21:1-4.

¹² Salu kia Longa. Yave ozolanga longa nkangu andi. (Yesaya 2:2, 3) Yindula ulolo wa sikola tuna zau. Vena ye Sikola ya Salu kia Kimviti a Nzila, Sikola ya Ateleki a Kintinu, Sikola ya Ngiladi, Sikola ya Awana Bekotanga mu Salu kia Betele, Sikola ya Akengi a Zunga ye Akazi Au, Sikola ya Akuluntu a Nkutakani, Sikola ya Salu kia Kintinu ye Sikola ya Afidi a Mavula ye Akazi Au. Muna nzil’eto ya Internete jw.org, tulenda mo wana Nkand’a Nzambi ye nkanda miankaka mu ndinga zayingi. Muna jw.org, muna mpe ye kunku ina ye malongi mu kuma kia wana ye esi nzo  kumosi ye kunku ina ye mambu mampa. Nga osadilanga e nzil’eto jw.org muna salu kia umbangi ye muna nsambila ya esi nzo?

13. Nkia mbebe bena yau selo ya Yave?

¹³ Lau diampwena kikilu tuna diau dia kala muna nkubik’a Yave yo zaya mana kevavanga kwa yeto. Kansi, wau vo tuzeye mana meyangidikanga Nzambi, tuna ye mbebe ya kunlemvokela yo vanga oma mambote. Kana una vo wantu ayingi bezolanga vanga oma mambi, tufwete ‘menganga o bi’ nze una Yave kemengenanga wo. (Nkunga 97:10) Ke tufwete tanginina ko awana beyindulanga vo ‘e mbote i mbi, e mbi i mbote.’ (Yesaya 5:20) Wau vo Yave tuzolele yangidika, tuna ye kani dia kala wavelela muna mambu mawonso. (1 Korinto 6:9-11) Mana Yave kekutuvovesanga muna Nkand’a Nzambi i mu kuma kia wete dieto. Tuzolele kunlemvokela kadi zola tukunzolanga. Kiaki i kuma tulemvokelanga luludiku lwandi, kiakala kuna nzo, muna nkutakani, kuna salu, kuna sikola yovo konso fulu twina. (Ngana 15:3) Vena diaka ye mambu mankaka mevavanga vo twasonga kwikizi muna Nzambi.

14. Aweyi mase balenda songela kwikizi muna Yave?

¹⁴ Aweyi tulongelanga wan’eto? Muna Nkand’a Nzambi, Yave wavana mase luludiku mu mpila bafwete longela wan’au. Akristu bafwete kuyikebanga mu lembi vukumunwa kwa ngindu za nza yayi. (Efeso 2:2) Kasikil’owu, mu fulu yankaka, se olenda vova vo: ‘Akento yau bena ye mbebe ya longa wana.’ Kansi, Nkand’a Nzambi utoma kiesesanga vo mase yau bena ye mbebe ya longa wan’au mambu ma Yave. (Efeso 6:4) Mase ye ngudi bezolanga Yave bazolele vo wan’au bakala ye ngwizani ambote yo Yave nze ina Samuele kakala yau tuka muna kileke kiandi.—1 Samuele 3:19.

15. Aweyi tulenda songela kwikizi muna Yave vava tubakanga nzengo mu mambu mampwena?

¹⁵ Aweyi tufwete bakilanga e nzengo? Vitila twabaka nzengo mu mambu mampwena ma zingu, tufwete vavanga zaya e ngindu za Yave kimana twasikila ye kwikizi muna yandi. Nkand’a Nzambi ye nkubik’andi ilenda kutusadisa. Kasikil’owu, mase mankaka o unu ana bezingilanga mu nsi za kinzenza, bebakanga e nzengo za fila mwan’au una vo nsedia kuna nsi au kimana kenda sanswa kwa yitu yau. Muna mpila yayi, yau nzole bekwamanananga sala yo vava e nzimbu. Dialudi vo e zazi i nzengo za muntu yandi kibeni. Kansi, akazi bafwete kiyuvula: ‘Aweyi Yave kebadikila e nzengo zeto?’ (Tanga Roma 14:12.) Diambote mu teka yindula dina Nkand’a Nzambi uvovanga vitila twabaka nzengo zamfunu mu kuma kia esi nzo zeto ye salu. Lusadisu lwa Se dieto tuvuidi o mfunu, kadi ke tulendi fila ntambi zeto ko.—Yeremiya 10:23.

16. Nkia nzengo kanwananga zau ngudi mosi vava mwan’andi kawutuka? Nki kiansadisa mu baka nzengo zambote?

 ¹⁶ Vava akazi mosi bayenda zingila ku nsi yankaka, bawuta mwan’a yakala. I bosi, babaka e nzengo za kumfila kuna nsi au kimana kenda sanswa kwa nkaka zandi. Kansi muna kolo kiakina, o nkento wayantika longoka Nkand’a Nzambi ye Mbangi za Yave. Walongoka vo yandi una ye mbebe ya longa mwan’andi mambu ma Yave. (Nkunga 127:3; Ngana 22:6) O nkento ndioyo wasamba kwa Yave nze una Nkand’a Nzambi ukutuvovesanga yo dodokela Yave kimana kansadisa mu vanga edi diambote. (Nkunga 62:7, 8) Wazayisa mpe diambu diadi kwa mpangi ankento ona walongokanga yandi Nkand’a Nzambi ye kwa mpangi zankaka muna nkutakani. Kana una vo yitu ye akundi andi bakwamanana kumvovesa vo kafila mwana kwa nkaka zandi, wabaka e nzengo za lembi wo vanga. O yakala wamona una mpangi basadisilanga nkaz’andi ye mwan’au. Wasivika kikilu yo yantika longoka Nkand’a Nzambi yo kwenda muna tukutakanu kumosi ye esi nzo andi. Yindula e kiese kamona o ngudi ndioyu vava kabakula vo Yave wavana e mvutu za sambu kiandi.

17. Vava tulongokanga Nkand’a Nzambi yo muntu, nkia luludiku tufwete landa?

¹⁷ Aweyi tulemvokelanga tuludiku? Avo tu akwa kwikizi muna Nzambi, tulemvokela tuludiku tutambulanga muna nkubik’andi. Kasikil’owu, badika dina tufwete vanga avo tuyantikidi longoka yo muntu o nkanda O Nkand’a Nzambi Adieyi Kieleka Kelonganga? Twavoveswa vo twavaulanga miniti miakete muna konso longi kimana twasadisa nlongoki mu toma zaya e nkubik’a Yave. Tulenda sadila video Nkia Mambu Mevangamanga Muna Seka dia Kintinu? ye finkanda Aki Nani Bevanganga Luzolo lwa Yave o Unu? Avo tumanisi longoka o nkanda Adieyi Kelonganga Nkand’a Nzambi, tulenda sadisa nlongoki mu toma ‘sikila muna lukwikilu’ muna longoka yandi o nkanda “Nusikila Muna Zola kwa Nzambi” kana nkutu vo ovubilu. (Kolosai 2:7) Nga olemvokelanga luludiku lwalu lwa nkubik’a Yave?

18, 19. Nkia kuma tuna yau mu vana matondo kwa Yave?

¹⁸ Kieleka, tuvuidi kuma yayingi ya tonda Yave. Kimosi muna kuma yayi i kia sia vo, “muna yandi i twinina o moyo, diata yo zinga.” (Mavangu 17:27, 28) Watuvana mpe Nkand’andi, isia vo, Bibila. Nze Akristu kuna Tesalonika, tuyangalelanga lukau lwalu kadi i nsangu zatuka kwa yandi.—1 Tesalonika 2:13.

¹⁹ Nkand’a Nzambi ukutusadisanga mu finama Yave, yandi mpe okutufinamanga. (Yakobo 4:8) Tuvutulanga mpe matondo wau vo Se dieto okutubokelanga kimana twakota muna nkubik’andi. Tumonanga nze una kamona ntozi a nkunga ona wasoneka vo: “Nuvana matondo kwa Yave; kadi wambote: Kadi o walakazi wandi wakwele mvu.” (Nkunga 136:1) Muna tini yawonso ya nkunga wau, o ntozi a nkunga wavutukila o mvovo “walakazi wandi wakwele mvu.” Avo tusikila ye kwikizi muna Yave yo landa luludiku kekutuvananga muna nkubik’andi, okutuvana moyo a mvu ya mvu yo kutusonga e kwikizi yakwele mvu.