1, 2. (a) Nkia nsendo bevingilanga selo ya Nzambi? (b) Adieyi dikutusadisanga mu kwamanana sia meso muna nsendo? (Tala fwaniswa va ntandu.)

AKRISTU Akuswa vuvu kiamfunu kikilu bena kiau, kia zingila kuna zulu. Paulu wa ntumwa wayikila e vuvu kiandi vo “nsendo yabokelelwa kwa Nzambi.” (Filipi 3:14) Kuna zulu, besinga yala kumosi yo Yesu Kristu muna Kintinu kiandi. Besala entwadi yo Yesu mu sadisa wantu bakituka alunga. (Lusengomono 20:6) Ekwe lau diampwena bena diau! E mameme mankaka vuvu kiaswaswana bena kiau. Bena ye vuvu kia zingila yakwele mvu muna Paradiso ova ntoto. E vuvu kiaki kiese kiayingi kikubatwasilanga.​—2 Petelo 3:13.

² Paulu wakala ye kani dia sadisa mpangi zandi zakuswa mu sikila ye kwikizi kimana batambula o nsendo. Wabavovesa vo: “Nusianga e sungididi muna mana ma zulu.” (Kolosai 3:2) Diavavanga vo basia e sungididi muna vuvu kia kwenda zingila kuna zulu. (Kolosai 1:4, 5) O yindula e nsambu kevananga  o Yave, disadisanga selo yawonso ya Nzambi mu kwamanana sia meso muna nsendo. I diau bafwete vanganga yau awonso, kiakala vo vuvu kia kwenda kuna zulu bena kiau yovo kia zingila ova ntoto.​—1 Korinto 9:24.

3. Mu nkia diambu Paulu kalukisila Akristu?

³ Paulu walukisa mpe Akristu mu kuma kia mambu malenda kubakakidila mu tambula o nsendo. Kasikil’owu, wasonekena esi Kolosai mu kuma kia Akristu aluvunu ana bavavanga yangidika Nzambi muna landa e Nsiku a Mose vana fulu kia kwikila muna Kristu. (Kolosai 2:16-18) Paulu wavovela mpe mambu mevangamanga o unu mana malenda kutukakidila mu tambula o nsendo. Wasasila una tulenda vengela e ngindu zambi ye dina tufwete vanga avo tubakanene diambu ye yitu yeto yovo ye mpangi zeto muna nkutakani. E tuludiku kavana o Paulu tulenda mpe kutusadisa o unu. Muna kuma kiaki, yambula twabadika tuludiku tuna muna nkanda kasonekena esi Kolosai.

4. Aweyi e zolela yambi ilenda kutukakidila mu tambula o nsendo?

⁴ Vava Paulu kasungamesa mpangi zandi mu kuma kia vuvu kiamfunu bakala kiau, wasoneka vo: “Nufwasa yîkwa yeno ina ova nza, mu diambu dia zumba, usafu, zinu diasaka dia vukana, e keto diambi ye loko.” (Kolosai 3:5) E zolela yambi ilenda wokela muna ntima yo fwasa e ngwizani eto yo Yave yo vidisa e vuvu kieto kia kusentu. Yindula nona kia mpangi mosi wayambula vo e zolela yambi yamfila mu tá e zumba. Vava kavutuka muna nkutakani, wavova vo e zolela yayi yambi yawokela kikilu muna ntima ye “kalenda diaka yo kakidila ko yavana kabwa muna sumu.”

5. Aweyi tulenda kuyitanina muna vonza?

⁵ Tufwete toma kuyikenganga musungula vava tubwilwanga diambu dilenda kutufila mu kulula nkanikinu mia Yave. Kasikil’owu, diangangu kwa wantu bena mu kimakangu mu sia nkendelo tuka kuna lubantiku muna mambu matadidi simbaziana, fibaziana yo kala va fulu kia yau kaka. (Ngana 22:3) Diambu diankaka dilenda kutusia mu vonza i vava tukwendanga mu nkangalu yovo vava tusalanga entwadi yo mwan’a yakala yovo nkento. (Ngana 2:10-12, 16) Adieyi olenda vanga mu kuyitanina? Uyisunzula vo u Mbangi a Yave. Toma kuyikeba yo lembi vilakana vo o sikamesa e nzola muna muntu una vo ke nkaz’aku ko dilenda twasa vonza. Tufwete mpe kuyikenga vava tukalanga twakendalala yovo mu kinsona. Muna kolo kiaki, tulenda vanga kikundi yo muntu mu kuyimwena vo zolwa tuzolwanga. E kinsona kilenda kutufila mu tambulwila kikundi kia konso muntu. E diadi diavonza kikilu. Avo lukendalalu ye kinsona omonanga, venga konso diambu dilenda kukakidila mu tambula o nsendo. Vava lusadisu kwa Yave ye kwa mpangi zaku Akristu.—Tanga Nkunga 34:18; Ngana 13:20.

6. Adieyi tufwete sungamenanga vava tusolanga e nsaka?

⁶ Muna venga zolela yambi, tufwete venganga e nsaka zinungunanga mavangu ma zumba. O unu, mu nza yayi nsaka zayingi zikutusungamesanga mana mavangamanga muna mbanza Sodomo ye Ngomora. (Yuda 7) Awana besayanesanga e nsaka befilanga  o wantu mu mona vo mavangu ma zumba mambote kwandi ye ke metwasanga vonza ko. Muna kuma kiaki, tufwete kuyikebanga. Ke tulendi yangalelanga nsaka zawonso ko za nza yayi. Diangangu twasolanga e nsaka zina ke zikutukakidila ko mu tambula o nsendo wa moyo a mvu ya mvu.​—Ngana 4:23.

7. Nkia diambu dilenda bwa muna nkutakani ya Kikristu?

⁷ Tuna ye kiese kia kala mu nkutakani ya Kikristu. Tulongokanga e Diambu dia Nzambi muna tukutakanu tweto yo sadisa muntu yo nkwandi kuna zola kwawonso. Ediadi dikutusadisanga mu kwamanana sia meso muna nsendo. Kansi ezak’e ntangwa, tulenda bakana diambu ye mpangi zeto. Avo ke tuvangidi ngolo ko muna singika e ntantani zazi, zilenda kutufila mu kubalundila makasi.​—Tanga 1 Petelo 3:8, 9.

8, 9. (a) Nkia fu ilenda kutusadisa mu vua nsendo? (b) Adieyi dilenda kutusadisa mu tatidila luvuvamu avo mpangi eto utufungisi makasi?

⁸ Ke tufwete yambula ko vo e fu kia lunda makasi kiatukakidila mu tambula nsendo. Paulu wayika dina Akristu bafwete vanga. Wavova vo: “Wau vo nwasolwa kwa Nzambi, nuavelela yo zolwa, nuvuata walakazi, nkenda, lusakalalu, lulembamu yo luzindalalu. Nuvezananga mambu yo loloka muntu yo nkw’andi kuna mvevo, kana nkutu vo muntu obakidi nkw’andi diambu. Wauna Yave kanulolokela kuna mvevo, oyeno mpe i wau nufwete vanga. Kansi, vana ntandu a mambu mama mawonso, nuvuata o zola, kadi i kangwa kiazikuka kia untwadi.”​—Kolosai 3:12-14.

⁹ O zola ye nkenda zilenda kutusadisa mu loloka akaka. Avo tukendalele mu kuma kia diambu dina mpangi kavovele yovo kavangidi, tulenda yindula e lumbu kina yeto mpe twavova yovo vanga diambu diakendeleka akaka kansi batuloloka. Twayangalala kikilu wau batusonga o zola ye nkenda. (Tanga Kimpovi 7:21, 22.) Tuvutulanga matondo wau vo Kristu oyikakesanga asambidi akieleka. (Kolosai 3:15) Yeto awonso Nzambi mosi tuzolanga, nsangu zimosi tusamunanga yo nuana ye mpasi zau zimosi. Avo tukedi akwa zola ye nkenda yo loloka muntu yo nkwandi, e nkutakani mu kintwadi ikala. Ediadi dilenda kutusadisa mu sia meso muna nsendo.

10, 11. (a) O mwena wantu kimpala ekuma dinina diavonza? (b) Adieyi tulenda vanga kimana kimpala kialembi kutukakidila mu tambula o nsendo?

¹⁰ E kimpala kilenda kutukakidila mu tambula o nsendo. Nona yayingi ya Nkand’a Nzambi isonganga vo mwena wantu kimpala diavonza kikilu. Kasikil’owu, Kaini wamwena Abele kimpala yo kumvonda. Kora, Datani yo Abirami bamwena Mose kimpala yo kunsia kitantu. Saulu wa ntinu wamwena Davidi kimpala ye wavava kumvonda. Dina Nkand’a Nzambi uvovanga dialudi kikilu: “Kuna kwina kimpala, ye nswangani, kwina ntiakalakani, yo mavangu mawonso mambi.”​—Yakobo 3:16.

¹¹ Avo tusidi e ngolo za kala yo zola ye nkenda, diampasi dikala mu mwena wantu kimpala. Diambu dia Nzambi divovanga vo: “O zola kuna yo luzindalalu yo walakazi. O zola ke kwina ye kimpala ko.” (1 Korinto 13:4) Muna venga kimpala, tufwete sianga ngolo za badikila mambu nze una Yave kebadikilanga mo. Tufwete  badikilanga mpangi zeto nze yikwa ya nitu mosi, i sia vo, nkutakani. Nkand’a Nzambi uvovanga vo: “Avo kîkwa kimosi kikembeso, yîkwa yawonso ikembela kumosi.” (1 Korinto 12:16-18, 26) Avo mpangi eto mu kiese kena, yeto mpe tufwete mona kiese, ke kimpala ko. Yindula mbandu ambote yasonga Yonatane wa mwan’a Saulu wa ntinu. Yonatane kamona kimpala ko vava Davidi kasolwa se ntinu ke mu yandi ko. Wakasakesa yo yikama Davidi. (1 Samuele 23:16-18) Nga tulenda tanginina e nkenda yo zola kwa Yonatane?

12. Nkia longi dia Nkand’a Nzambi dilenda sadisa esi nzo mu tambula o nsendo?

¹² Avo konso muntu muna nzo olemvokele nkanikinu mia Nkand’a Nzambi, e nzo mu luvuvamu ye kiese ikala. Awonso balenda tambula o nsendo. Paulu wavana longi diangangu kwa esi nzo, oku vo: “Akento, nusakalela akazi eno, wauna ufwene muna Mfumu. Akala, nuzolanga akazi eno, ke nubafungila makasi ma ndudi ko. Wana, nulemvokelanga mase ye ngudi zeno muna mawonso, kadi dia luyangalalu kwa Mfumu. Amase, ke nufungisa wan’eno makasi ko, kimana balembi kendalala.” (Kolosai 3:18-21) Nga omwene una longi diadi dilenda sadisila esi nzo aku?

13. Aweyi mpangi ankento kalenda sadisila nkaz’andi mu bak’e nzengo za sadila Yave?

¹³ Nanga u mpangi ankento una ye yakala ona ke sadilanga Yave ko. Adieyi olenda vanga avo omwene vo kekadilanga yaku mu mpila yambote ko? Avo umfungidi makasi yo tantana yandi, nga kusakisa mambu ko? Kana nkutu vo ngeye una ye ndungidi, nga  okunsadisa kimana kabak’e nzengo za sadila Yave? Nanga diampasi dikala. Kansi, avo ozitisi wisa kiandi, olenda siamisa luvuvamu muna nzo eno yo twasa nkembo kwa Yave. E mbandu aku yambote ilenda fila nkaz’aku mu sadila Yave. Muna mpila yayi, yeno awole nulenda tambula o nsendo.​—Tanga 1 Petelo 3:1, 2.

14. Adieyi Yakala una vo Nkristu kafwete vanga avo nkaz’andi ke kunzitisanga ko?

¹⁴ Nanga u mpangi a yakala una yo nkento ke sadilanga Yave ko. Adieyi olenda vanga avo omwene vo ke kuzitisanga ko? Avo oyantikidi kumbamina mu songa vo ngeye i ntu muna nzo, nga ediadi dikumfila mu kuzitisa? Ke dilendakana ko. Nzambi ozolele vo wakala yakala dianzodi ona otangininanga Yesu. (Efeso 5:23) Yesu wa ntu a nkutakani, nkwa luzindalalu yo zola. (Luka 9:46-48) Avo otanginini Yesu, kuna kulanda o nkaz’aku mpe olenda bak’e nzengo za sadila Yave.

15. Aweyi yakala una vo Nkristu kesongelanga kwa nkaz’andi vo zola kekunzolanga?

¹⁵ Yave ovovesanga akala vo: “Nuzolanga akazi eno, ke nubafungila makasi ma ndudi ko.” (Kolosai 3:19) O yakala dianzodi ovananga zitu kwa nkaz’andi. Aweyi kalenda wo vangila? Muna wanga e ngindu zandi yo vanga mawonso kimana nkento kazaya vo mana kevovanga mfunu mena. (1 Petelo 3:7) Kana nkutu vo yakala kevanga mawonso ko kelombwanga kwa nkaz’andi, o wá e ngindu za nkento dilenda kunsadisa mu baka nzengo zambote. (Ngana 15:22) O yakala dianzodi ke komekenanga nkaz’andi ko kimana kanzitisa. Vava yakala kesonganga o zola kwa nkento yo wana, kiese bekala kiau kia sadila Yave. Ediadi dikubasadisa mu vua moyo a mvu ya mvu.

16, 17. Avo u nleke, adieyi dilenda kusadisa mu lembi fungila mase maku makasi?

¹⁶ Nanga u nleke omonanga vo mase maku ke bekubakulanga ko yovo nsiku miayingi bekusianga. Ediadi dilenda kufungisa makasi yo kala ye lukatikisu lwa sadila Yave. Kansi, avo oyambwidi sadila Yave, kuna kulanda obakula vo ke vena wantu ankaka ko ova nza betoma kuzolanga lutila mase ye akundi aku muna nkutakani.

¹⁷ Yindula diambu edi: Avo mase maku ke bekuvananga malongi ko, aweyi ozayila vo zola kikilu bekuzolanga? (Ayibere 12:8) Mase maku ke wantu alunga ko. Muna kuma kiaki, e mpila bekulongelanga ilenda kukendeleka. Kansi ke diau ko ofwete sianga e sungididi. Vavanga bakula e kuma bevangilanga yovo vova diambu kingandi. Vuvikanga o ntima yo lembi kubavana mvutu zambi. Diambu dia Nzambi divovanga vo: “O nkwa zayi olunga-lunganga mvovo miandi, o nkwa umbakuzi, wavuvama.” (Ngana 17:27) Kala ye kani dia kituka nkwa ngangu ona otambulwilanga malongi yo longoka diambu muna malongi mama lembi sia e sungididi muna mpila mevaninuanga. (Ngana 1:8) Kuvilakani ko vo o kala ye mase bezolanga Yave lau diampwena kikilu. Bazolele kusadisa kimana wavua moyo a mvu ya mvu.

18. Ekuma ofwete kwamanena sia meso muna nsendo?

¹⁸ Kiakala vo vuvu kia zingila kuna zulu tuna kiau yovo muna paradiso ova ntoto, yeto awonso zingu kiakiese tuvingilanga. E vuvu kieto kiakieleka, kitukanga muna nsilu a Mvangi a nsema wawonso ona wavova vo: “E nza izala yo zayi wa Yave.” (Yesaya 11:9) Ke kolo ko, awonso bezingilanga ova nza belongwa kwa Nzambi. Owau i nsendo tufwete sila e ngolo kimana twatambula wo. Muna kuma kiaki, sungamenanga o nsilu kasia o Yave. Kuyambula konso diambu ko diakakidila mu tambula nsendo.