1. O yimbila nkia nluta dikututwasilanga?

NSONEKI mosi wa nkunga ona otomene zayakana wavova vo: “Vava tuwanga e mvovo, dikutufilanga mu yindula. Vava tuwanga miziki, dikututwasilanga kiese yovo ntantu. Kansi, vava yeto kibeni tuyimbilanga, e mvovo misimbanga e ntima mieto.” E nkunga mieto mivananga nkembo ye misonganga zola kweto muna Yave wa Se dieto kuna zulu. Mikutufinamesanga mpe yo yandi. Muna kuma kiaki, ke diampasi ko mu bakula vo e nkunga mfunu kikilu mina muna nsambil’aludi, kiakala vava tuyimbilanga va yeto kaka yovo vamosi ye mpangi zeto.

2, 3. (a) Aweyi akaka bemonanga mu kuma kia yimbila mu nding’angolo muna nkutakani? (b) Nkia yuvu tubakila e mvutu mu longi diadi?

² Vava oyimbilanga mu nding’angolo muna nkutakani, aweyi omonanga? Nga nsoni omonanga? Mu fulu yankaka, akala ayingi nsoni bemonanga vava beyimbilanga vana fulu kia ndonga. E fu kiaki kilenda sambukila e nkutakani yawonso, musungula vava akuluntu bemonanga e nsoni za yimbila yovo bevanganga salu yankaka muna ntangw’a yimbila.—Nkunga 30:12.

 ³ O yimbila mfunu kwina muna sambila Yave. Muna kuma kiaki, tufwete venga e fu kia kiya ekolo kiyimbilwanga e nkunga yovo vidisa e kunku kiaki kia lukutakanu. Diambote twakiyuvula: ‘Aweyi imonanga mu kuma kia yimbila muna tukutakanu? Ekuma imwenanga e nsoni za yimbila vana fulu kia ndonga? Adieyi dilenda kunsadisa mu yimbila ye kiese kiawonso?’

4, 5. Nkia nkubika zavangwa kuna Isaele yankulu vava bayimbilanga muna tempelo?

⁴ Tuka kuna nz’ankulu, selo ya Yave besadilanga e nkunga mu kunkembelela. Vava Aneyisaele bakala ye lukwikilu lwasikila muna Yave, e nkunga mfunu kikilu miakalanga muna nsambil’au. Kasikil’owu, vava Davidi kavanganga e nkubika ya tunga e tempelo, wakubika mpe 4.000 ma Anelevi kimana bakembelelanga Yave muna nkunga. Muna ayimbidi awaya, 288 ‘balongwa o yimbidila Yave, awonso batoma zaya yimbila.’​—1 Tusansu 23:5; 25:7.

⁵ E miziki ye nkunga mfunu mpe miakala vava e tempelo yasunzulwa. Nkand’a Nzambi ukutuzayisanga vo: ‘Asiki a mpungi ye ayimbidi bakala kumosi, ezu dimosi diwakana muna sanisina yo tonda Yave; vava batatula ndinga ye mpungi ye kimbalu ye sikwa basanisini Yave, . . . e nzo a Nzambi izele yo nkembo a Yave.’ Yindula una nkunga miami miakumikina lukwikilu lwa Aneyisaele.​—2 Tusansu 5:13, 14; 7:6.

6. Nkia nkubika kavanga o Nekemiya mu kuma kia miziki ye nkunga vava kayalanga Yerusaleme?

⁶ Nekemiya, ona wavitanga o ntu vava Aneyisaele batungululanga e yaka ya Yerusaleme, wakubika mpe Anelevi mu sika yo yimbila e nkunga. Umbangu wau wa yimbila wakudikila e kiese vava kiasunzulwa e yaka ya Yerusaleme. Nekemiya wasola “buka yole yampwena” ya ayimbidi. E buka yayi yazieta e yaka ya mbanza, e buka kimosi kiayenda kuna koko kwa lunene, kiankaka kiayenda kuna koko kwa lumonso yavana yabundana lukufi ye tempelo. E kolo bayimbilanga, e zú dia ndinga diawakana kwa wantu bakala kwandá. (Nekemiya 12:27, 28, 31, 38, 40, 43) Tulenda kala ye ziku vo Yave watoma yangalala vava kawá e selo yandi banyimbidilanga ye kiese kiawonso.

7. Aweyi Yesu kasongela vo o yimbila mfunu kikilu kwina muna nkutakani ya Akristu?

⁷ Muna lumbu ya Yesu, o yimbila mfunu mpe kwakala muna nsambil’aludi. Yindula dina diavangama muna fuku usundidi o mfunu muna lusansu lwa wantu. Vava Yesu kadia Nlekelo a Mfumu ye alongoki andi, bayimbila nkunga muna kembelela Yave.​—Tanga Matai 26:30.

8. Nkia mbandu ambote batusisila Akristu a tandu kiantete ya yimbidila Nzambi?

⁸ Akristu a tandu kiantete mbandu ambote basonga ya yimbidila Nzambi. Nswaswani ye Aneyisaele ana basambilanga Yave muna tempelo, Akristu awaya mu nzo za mpangi bakutakenanga. Kana una vo e nzo zazi ke zakala zatoma vienga ko nze tempelo, ampangi bayimbilanga ye kiese kiawonso. Paulu wa ntumwa wavovesa mpangi zandi z’Akristu vo: “Nulonganga yo kasakesa muntu yo nkw’andi muna nkunga, muna sanisina Nzambi, muna nkunga mia kimwanda yo matondo, nuyimbidila Yave muna ntima mieno.” (Kolosai 3:16) E nkunga  mina muna nkand’eto a nkunga mifwete yimbilwanga ye kiese kiawonso. E nkunga miami dimosi muna “madia” kekutuvananga o “ntaudi akwikizi yo lulungalalu” muna ntangwa ifwene.​—Matai 24:45.

9. (a) Ekuma akaka bekadilanga ye lukatikisu lwa yimbila ye kiese muna tukutakanu tweto? (b) Aweyi tufwete yimbidilanga Yave? Aki nani bafwete vitang’o ntu muna yimbila? (Tala e fwaniswa kuna lubantiku lwa longi.)

⁹ Nkia mambu malenda kukakidila mu yimbila? Dilenda kala vo ke nuakulukilwa yimbila ko kuna nzo yovo muna zunga kieno. Nanga owanga wantu ana bazeye toma yimbila muna radio yovo muna televizau. Avo uyitezanese yo yau, olenda mona vo kuzeye yimbila ko. Ediadi dilenda kukendeleka. Kansi, zaya dio vo yeto awonso mbebe tuna yau ya yimbila yo kembelela Yave. Muna kuma kiaki, zangulanga fioti o nkand’aku a nkunga, zangula o ntu, i bosi yimbila ye kiese kiawonso. (Ezera 3:11; tanga Nkunga 147:1.) O unu, Maseka mayingi ma Kintinu mena ye tela zisonganga e mvovo mia nkunga tuyimbila. Ediadi dilenda kutusadisa mu toma yimbila mu nding’angolo. Diakiese kikilu mu zaya vo akuluntu beyantika yimbila muna Sikola ya Salu kia Kintinu. Ediadi disonga kwa akuluntu vo bafwete vitang’o ntu vava tuyimbilanga muna tukutakanu.

10. Adieyi tufwete sungamenanga avo nsoni tumonga za tumbula e ndinga ekolo tuyimbilanga?

¹⁰ Ayingi wonga bemonanga muna tumbula e ndinga kadi beyindulanga vo kaza bekazanga yovo ke bena ye ndinga yambote ko. Kansi, yindula e diambu edi: “Yeto awonso nkumbu miayingi tutanga sakuba” muna mvovo, kana una vo i wau ke tuyambulanga vova ko. (Yakobo 3:2) Ozevo, ekuma tufwete yambulwila vo e zu dieto  ndinga dialembi lunga diatukakidila mu yimbidila Yave?

11, 12. Aweyi tulenda tomesena e mpil’eto ya yimbidila?

¹¹ Dilenda kala vo nsoni tumonanga za yimbila kadi ke tuzeye yimbila ko. Kansi, vena ye mambu makete tulenda vanga muna tomesa e mpila tuyimbidilanga. *​—Tala e mvovo vana yand’a lukaya.

¹² Muna yimbila mu nding’angolo, ofwete longoka fulumuna mu mpila yambote. Nze una e kura ikwikilanga o mwinda, e fulumwinu kivananga nkuma muna nding’aku vava ovovanga yovo yimbila. Ofwete yimbilanga mu nding’angolo nze una ovovelanga yovo lutila nkutu. (Tala luludiku luna muna nkanda Beneficie-se da Escola do ministério teocrático, vana lukaya lwa 181 yakuna 184, vana ntu a diambu wakete “Controle correto da respiração.”) Ezak’e ntangwa, o Nkand’a Nzambi uvovesanga asambidi a Yave vo ‘bayengolokela kuna kiese’ vava bekunkembelelanga muna nkunga.​—Nkunga 33:1-3.

13. Yika dina dilenda kutusadisa mu yimbidila ye kiese kiawonso.

¹³ Muna nsambil’eno ya esi nzo yovo muna longi dia ngeye kibeni, olenda teza vanga mambu malende: Sola nkunga una otoma yangalelanga muna nkand’eto wa nkunga. Tanga e mvovo mia nlonga umosi wa nkunga mu nding’angolo, yatoma kiá. I bosi, muna zú diau dimosi yika e mvovo miawonso muna fulumwinu kimosi. I bosi, yimbila e tini kiawonso muna zú diau dimosi. (Yesaya 24:14) E zú dia nding’aku ditoma wakana, ediadi diambote kikilu. Kumoninge nsoni ko za yimbila mu nding’angolo.

14. (a) O toma ziula o nua aweyi dilenda kutusadisila mu yimbila mu mpila yambote? (Tala e babu kina yo ntu a diambu “ Aweyi Olenda Tomesena e Mpil’aku ya Yimbidila.”) (b) Nkia mambu malenda kusadisa mu tomesa e zú diaku dia ndinga?

¹⁴ Muna toma yimbila, ofwete bundikilanga mupepe muna nua. Vava oyimbilanga, ofwete ziula o nua lutila una uziukilanga vava ovovanga. Adieyi olenda vanga avo e zú diaku dia ndinga diakete? Olenda solola mambu malenda kusadisa muna babu “Como Superar Problemas Específicos” muna nkanda Beneficie-se da Escola do ministério teocrático, lukaya lwa 184.

15. (a) Nkia luzayisu lwavewa muna lukutakanu lwavangama muna mvu wa 2016? (b) Ekuma o nkand’a nkunga wafimpulwilu?

¹⁵ Muna mvu wa 2016, awonso bakala mu lukutakanu luvangamanga konso mvu, batoma yangalala vava o Mpangi Stephen Lett, mosi muna Buka kia Selo Yambuta, kavana luzayisu lwa nkanda wampa wa nkunga una yo ntu a diambu “Tuyimbidila Yave ye Kiese.” O mpangi Lett wasasila vo kimosi muna kuma kitufididi mu vaikisa nkanda wampa wa nkunga i kia sia vo e Tradução do Novo Mundo das Escrituras Sagradas yafimpulwilu. E nkunga miasobelo mu katula e mvovo mina ke misadilwanga diaka ko muna Tradução do Novo Mundo. Vana ntandu, nkunga miampa miakudikilu mivovelang’e salu kieto kia umbangi yo lukûlu. Katula e diadi, wau vo o yimbila diambu diamfunu muna nsambil’eto, e Buka kia Selo Yambuta bamona o mfunu wa vaikisa nkand’a nkunga wambote-mbote. E fukwa kia nkand’a nkunga betela kina ye fukwa kia Tradução do Novo Mundo.

16, 17. Nkia nsobani zankaka zavangamene muna nkanda wampa wa nkunga?

¹⁶ Muna kutusadisa mu solola e nkunga mu nzaki, mu nkanda wau wa nkunga, e nkunga mikubikilu mun’owu wa ntu mia mambu. Kasikil’owu, e nkunga 12 miantete mivovele Yave, e nkunga 8 milende mivovele Yesu ye lukûlu. E ntu miawonso mia mambu mina kuna lubantiku lwa nkand’a  nkunga. E diadi dia lusadisu kikilu, musungula avo mpangi ozolele sola nkunga uyimbilwa vitila longi dia nkangu.

¹⁷ Muna sadisa awonso bayimbila ye kiese kiawonso, e mvovo mia nkunga miankaka miasobelo muna toma lebola e nkunga. E mvovo mina ke mitoma sadilwanga diaka ko, nze o mvovo “nlandu a lutantu,” miasobelo. Vana ntandu, o nkunga una yo ntu a diambu vo “Luzindalalu,” wasobelo vo “Songa Luzindalalu.” E mvovo mia nkunga wau mpe miasingikilu. Diamonekanga vo diambote mu soba o ntu a diambu “Lunga-lunga Ntim’aku,” owu wakala nze yeto tutumanga muntu, owau wasobelo vo “Tulunga-lunga Ntima Mieto.” Ekuma? Kadi vava o muntu kayimbilanga nkunga wau, diakala nze yandi wavovesanga kwa wantu ankaka dina bafwete vanga. Ediadi diampasi diakala kwa wantu ampa, aleke ye kwa mpangi z’akento ana bayizanga muna tukutakanu tweto twakete ye twampwena. Muna kuma kiaki, o ntu a diambu ye mvovo mia nkunga wau miasobelo.

18. Ekuma tufwete longokela e nkunga mina muna nkanda wampa wa nkunga? (Tala e mvovo vana yand’a lukaya.)

¹⁸ Nkunga miayingi mina muna nkanda nkunga “Tuyimbidila Yave ye Kiese” mina nze sambu. E nkunga miami milenda kusadisa mu zayisa kwa Yave una omonanga. E nkunga miankaka mikutukasakesa mu songa “zola yo mavangu mambote.” (Ayibere 10:24) Tuzolele zaya e zú, mpila ya yimbidila ye mvovo mia nkunga mieto. Imosi muna mpila tulenda wo vangila i wanga e nkunga miabandulwa mina mpangi zeto z’akala ye z’akento bayimbila. E nkunga miami tulenda mio solola muna jw.org. Vava oyimbilanga e nkunga miami kuna nzo, olenda mio longoka yimbila ye kiese kiawonso. *​—Tala e mvovo vana yand’a lukaya.

19. Adieyi wantu awonso muna nkutakani balenda vanga mu sambila Yave?

¹⁹ Sungamena vo o yimbila diambu diamfunu kikilu muna nsambil’eto. I mpila tusongelanga vo Yave tuzolanga yo kumvutula matondo muna mawonso kevanganga muna wete dieto. (Tanga Yesaya 12:5.) Vava oyimbilanga ye kiese kiawonso, okasakesanga akaka mu vanga diau dimosi. Awonso muna nkutakani, kiakala aleke yovo ambuta ye wantu ampa muna ludi, balenda kembelela Yave. Muna kuma kiaki, yimbilanga ye kiese kiawonso. Lemvokela luludiku lwa ntozi a nkunga ona wavova vo: “Nuyimbidila Yave.” Elo, yambula twayimbilanga ye kiese kiawonso.​—Nkunga 96:1.