1-2. (a) Nki kikutusadisanga mu zizidila e mpasi? Sasila. (b) Nkia mambu tubadika mu longi diadi?

“VAVA iyindulanga e mpasi yawanana zau, imonanga vo kele vo mu ngolo za mono kibeni kaka kiadi zo lenda zizidila ko.” Nga wavova kala diambu dia mpila yayi? Ndonga mu yeto twavova wo kala. Nanga wavova wo vava wayindula una wazizidila e mpasi za mayela yovo lufwa lwa nzolw’aku. Vava oyindulanga e mpasi wamona, obakulanga vo walenda zo zizidila, kadi o mwand’avelela a Yave wavana “ulolo wa nkuma.”—2 Kor. 4:7-9.

² Mwand’avelela mpe tuvuidi o mfunu mu zizidila umpukumuni wa nza yayi yambi. (1 Yoa. 5:19) Vana ntandu, tunuananga e vita ye “mianda miambi.” (Efe. 6:12) Mu longi diadi, tubadika mpila zole o mwand’avelela ukutusadisilanga. Tuzaya mpe mana tulenda vanga mu vua lusadisu lwa mwand’avelela una ufwene.

3. Yika imosi muna mpila o Yave kekutusadisilanga mu zizidila e mpasi.

³ O mwand’avelela a Yave ukutusadisanga muna kutuvana o nkuma mu lungisa e kiyekwa kieto kana nkutu vo mu mpasi twina. Paulu wa ntumwa wazaya wo vo wakwamanana sadila Yave kana mu mpasi kadi wabundanga e vuvu muna “nkum’a Kristu.” (2 Kor. 12:9) Muna nkangalu andi wanzole wa kimisionario, Paulu kasadilanga kaka ntangw’andi mu salu kia umbangi ko, kansi wasalanga mpe mu lungisa nsatu zandi. Kuna Korinto, wazingila muna nzo a Akila yo Peresekila, ana batunganga e nzo za ngoto. Wau vo Paulu wazaya e salu kiaki, wavaulanga e ntangwa mu sala yau kumosi. (Mav. 18:1-4) O mwand’avelela wavana Paulu o nkuma wasala mu lungisa e nsatu zandi yo sala e salu kia umbangi.

4. Mun’owu wa 2 Korinto 12:7b-9, nkia diambu o Paulu kanuananga diau?

 ⁴ Tanga 2 Korinto 12:7b-9. Mu tini yayi, Paulu wavova vo wanuananga yo ‘lusende muna nitu.’ Adieyi kazola vova? Avo lusende lukotele muna nitu, mpasi zayingi omona. Ozevo, Paulu wazola vova vo diambu diampasi kikilu kanuananga diau. Wayikila diambu diadi diampasi vo “mbasi a Satana” ona ‘wangwandanga.’ Dilenda kala vo ke Satana ko ye nkuya miandi batwasila Paulu e mpasi zina zakala nze lusende muna nitu. Kansi, vava e mianda miami miambi bamona o lusende lwa Paulu, nanga bazola lo niemenena mu wokesa e mpasi zandi. Adieyi o Paulu kavanga?

5. Aweyi Yave kavanina e mvutu muna sambu ya Paulu?

⁵ Entete, Paulu wazola vo Yave kakatula “lusende” lwalu. Wavova vo: “Nkumbu tatu yadodokela Mfumu [Yave] . . . kimana lwakatuka omu mono.” Kanele vo Paulu wasamba, o lusende ke lwakatuka ko. Nga ediadi disongele vo Yave kavana mvutu ko muna sambu ya Paulu? Ke wau ko, wavana e mvutu za sambu yandi. Dialudi vo Yave kakatula mpasi za Paulu ko, kansi wamvana o nkuma wa zizidila zo. Yave wavova vo: “Nkum’ame uzikukidi muna lutovoko.” (2 Kor. 12:8, 9) Muna lusadisu lwa Nzambi, Paulu walenda kwamanana ye kiese yo luvuvamu lwa ntima.—Fili. 4:4-7.

6. (a) Ezak’e ntangwa, o Yave aweyi kevaninanga e mvutu za sambu yeto? (b) E sono iyikilu mu tini kiaki, aweyi ikutukumikinanga?

⁶ Nga wasamba kala kwa Yave kakatula muna mpasi nze una Paulu kavanga? Dilenda kala vo wasamba kwayingi, kansi e mpasi zaku zakwamanana kaka yovo zawokela. Nga ediadi diatokanesa yo yindula vo Yave kekuyangalelanga diaka ko? Avo dialwakila kala, sungamena e nona kia Paulu. Wauna Yave kavanina e mvutu za sambu yandi, kala ye vuvu vo ovana mpe mvutu za sambu yaku. Ezak’e ntangwa dilenda kala vo Yave ke katula e mpasi zaku ko. Kansi muna lusadisu lwa mwand’avelela, okuvana o nkuma ovuidi o mfunu mu zizidila zo. (Nku. 61:3, 4) Olenda ‘bwiswa,’ kansi o Yave ke kuyambula ko.—2 Kor. 4:8, 9; Fili. 4:13.

7-8. (a) Mu nkia mpila o mwand’avelela ulenda tezanesenua ye tembwa? (b) Aweyi Petelo kayikila una o mwand’avelela usadilanga?

⁷ Nkia mpila yankaka o mwand’avelela ukutusadisilanga? Wauna e tembwa kisadisilanga e nzaza mu kwamanana kangala muna mbu wazala ye mavuku yo lwaka kuna simu, o mwand’avelela ukutusadisanga mu kwamanana sadila Yave kana nkutu muna ntangw’a mpasi yavana tulwaka kuna nz’ampa ina Nzambi kasila o nsilu.

⁸ Petelo wa ntumwa watoma zaya oma ma nata e nzaza, kadi mbaki a mbizi za maza kakala. Muna kuma kiaki, vava kayika una o mwand’avelela usadilanga, wasadila mvovo una e ngwizani ye salu kia nata e nzaza. Wasoneka vo: “Kadi o ungunza ke wasakulwilwa mu luzolo lwa muntu ko, kansi o wantu bavova mana matuka kwa Nzambi wauna bafidilwa kwa mwand’avelela.” O mvovo wa Kingerekia wasekolwa vo “bafidilwa” una ye nsasa vo “natwa.”—2 Pet. 1:21.

9. O Petelo nkia ngindu kakala zau vava kasadila o mvovo ‘bafilwa’ kwa mwand’avelela?

⁹ O Petelo nkia ngindu kakala zau vava kasadila o mvovo ‘bafilwa’ kwa mwand’avelela? O Luka wasoneka o nkand’a Mavangu, wasadila mpe o mvovo wafwanana yo wau vava kayika vo e nzaza ‘yakukumunua’ kwa tembwa. (Mav. 27:15) Nkwa ngangu mosi ofimpanga oma ma Bibila wavova vo vava Petelo kasoneka vo asoneki a Bibila ‘bafilwa’ kwa mwand’avelela, wasadila mvovo milenda fila wantu mu yindula anati a nzaza. Petelo wazola vova vo wauna e  nzaza inatinuanga kwa tembwa mu lungisa o nkangalu andi, i una mpe o mwand’avelela wafidilanga asoneki a Bibila mu lungisa e salu kiau. Nkwa ngangu ndioyo wavova mpe vo: “Asoneki a Bibila bakala nze nzaza ina ye nlele miandi miatoma yalumunua. Bakubama bakala mu sala e salu kina o mwand’avelela wabafila mu sala.” Yave wavanga dina diavavuanga vo kavanga, wabavana “e tembwa,” i sia vo, mwand’avelela. Asoneki a Bibila mpe basala e salu kina bavewa. Balanda o luludiku lwa mwanda wau.

10-11. Nkia mambu mole tufwete vanga muna vua lusadisu lwa mwand’avelela? Yika e nona.

¹⁰ Dialudi vo o unu Nzambi ke vumunuinanga diaka wantu ko mu soneka Bibila. Kansi, Yave wakinu sadila o mwand’andi avelela muna fila o nkangu andi. Yave wakinu vanga dina divavuanga vo kavanga. Aweyi tulenda vuila nluta muna mwand’avelela wa Nzambi? Tufwete kala ye ziku vo tukwamanana sala e salu kina twavewa. Mu nkia mpila?

¹¹ Yindula e non’eki. Avo ozolele vo e tembwa kiansadisa, o nati a nzaza kafwete vanga mambu mole. Diantete, kafwete nata e nzaza vana vena e tembwa. Kadi avo nati a nzaza okele kaka vana fulu kiningamenanga e nzaza kina kwandá ye tembwa, ke lenda kwenda ku fulu kiankaka ko. Diazole, o nati a nzaza kafwete toma singika yo yalumuna e nlele mia nzaza. Kana una vo tembwa kina ko, e nzaza inikuka kaka avo e nlele mivevomweno kwa tembwa. Diau dimosi mpe, tulenda zizidila kaka muna lusadisu lwa mwand’avelela. Muna vua lusadisu lwa mwand’avelela, mambu mole tufwete vanga. Diantete, tufwete vanga mambu mana o mwand’avelela a Nzambi ufilanga e selo yandi mu vanga. Diazole, tufwete toma “yalumunanga e nlele mieto,” i sia vo, kuyivana muna mambu mama una ufwene. (Nku. 119:32) Avo tuvangidi mambu mama, o mwand’avelela ukutuvana o nkuma mu kwamanana sadila Yave yavana tulwaka kuna nz’ampa ya Nzambi.

12. Nkia mambu tuvovela owau?

 ¹² Yamu wau tuvovele kala mpila zole o mwand’avelela ukutusadisilanga. Mwand’avelela ukutuvananga nkuma ye ukutusadisanga mu sikila ye kwikizi muna ntangw’a mpasi. Mwand’avelela ukufilanga mu kwamanana sadila Yave. Ukutusadisanga mpe mu sikila muna nzila ifilanga kuna moyo a mvu ya mvu. Owau tuvovela mambu yá tufwete vanga muna vua lusadisu lwa mwand’avelela una ufwene.

13. Mun’owu wa 2 Timoteo 3:16, 17, adieyi Bibila kilenda vanga kwa yeto? Adieyi tufwete vanganga?

¹³ Diantete, longokanga e Diambu dia Nzambi. (Tanga 2 Timoteo 3:16, 17.) Nzambi wasadila o mwand’andi muna sia e ngindu zandi muna ngindu za asoneki a Bibila. Vava tutanganga e Bibila yo badika mana tutanganga, o tuludiku twa Nzambi tukotanga muna ngindu ye ntima mieto. E ngindu zazi zavumunuinua zikutufila mu vanga e nsobani muna zingu kieto muna yangidika Yave. (Ayib. 4:12) Kansi, muna vua lusadisu lwa mwand’avelela una ufwene, tufwete vaulanga ntangwa muna longokanga Diambu dia Nzambi yo toma badika mana tutanganga. Muna mpila yayi, e Diambu dia Nzambi difila mawonso tuvova yo vanga.

14. (a) Ekuma tulenda vovela vo mwand’a Yave ukalanga muna tukutakanu? (b) Adieyi dilenda kutusadisa mu vua lusadisu lwa mwand’avelela una ufwene?

¹⁴ Diazole, sambila Nzambi muna tukutakanu. (Nku. 22:22) O mwand’a Yave ukalanga muna tukutakanu. (Lus. 2:29) Ekuma tuvovele wo? Kadi vava tukutakananga ye mpangi zeto muna sambila Nzambi, tulombanga mwand’avelela muna sambu, tuyimbilanga nkunga mia Kintinu mibongelo muna Bibila yo wá malongi ma Bibila mesunzulwanga kwa mpangi zeto z’akala ana basolwa muna lusadisu lwa mwand’avelela. O mwand’avelela mpe usadisanga mpangi z’akento mu kubika yo sunzula e yiyekwa yau. Kansi, muna vua lusadisu lwa mwand’avelela una ufwene, tufwete kalanga twakubama muna vana e mvutu muna tukutakanu. Muna mpila yayi, tukala twakubama mu vua e nluta mia mwand’avelela nze una e “nlele mia nzaza mikadilanga miayalumuka” mu tambula e tembwa.

15. Aweyi o mwand’avelela ukutusadisilanga muna salu kia samuna e nsangu zambote?

¹⁵ Diatatu, vaikanga mu salu kia umbangi. Vava tusadilanga e Bibila muna salu kia umbangi, tuyambulanga vo mwand’avelela watusadisa muna salu kieto kia samuna e nsangu zambote. (Roma 15:18, 19) Kansi, muna vua lusadisu lwa mwand’avelela a Nzambi una ufwene, tufwete vaikanga kwayingi muna salu kia umbangi yo sadilanga e Bibila avo dilendakana. E mpila yankaka ilenda kutusadisa muna vua nluta miayingi muna salu kia umbangi, i sadilanga e nsunzula zaleboka zina zivaikiswanga muna Nkand’a Malongi, Zingu ye Salu Kieto kia Kikristu.

16. Nkia mpila yankaka tulenda tambulwila o mwand’avelela?

¹⁶ Diayá, sambanga kwa Yave. (Mat. 7:7-11; Luka 11:13) E mpila yankaka tulenda tambulwila o mwand’avelela i lombanga wo kwa Yave muna sambu. Ke vena diambu ko dilenda kakidila e sambu yeto mu lwaka kwa Yave. Ke vena mpe lekwa ko kilenda kakidila o mwand’avelela walwaka kwa yeto kana nkutu yaka ya pelezo yovo Satana. (Yak. 1:17) Avo tuzolele tambula o lusadisu lwa mwand’avelela una ufwene, aweyi tufwete vangila e sambu? Muna baka e mvutu, yambula twalongoka mu kuma kia sambu muna kingana kina tulenda solola kaka muna Nsangu Zambote kasoneka o Luka. *

17. Adieyi tulenda longoka muna kingana kia Yesu kina muna Luka 11:5-9, 13?

¹⁷ Tanga Luka 11:5-9, 13. E kingana kia Yesu kisonganga una tufwete lombelanga mwand’avelela muna sambu. Muna kingana kiaki, o muntu watambula kina kavuanga o mfunu ‘mu kuma kia siandama kwandi.’ Kana una vo mu dingi-dingi, kakala ye wonga ko muna lomba lusadisu kwa nkundi andi. (Tala e babu kia longokela, Luka 11:8 muna Nto za Malongi ma Lukutakanu Zingu ye Salu Kieto kia Kikristu za ngonde a Yuli 2018.) E kingana kiaki, adieyi kitulongele mu kuma kia sambu? Yesu wavova vo: “Nukwamanana lomba, ozevo nuvewa; nukwamanana vava, ozevo nusolola; nukwamanana dodela, ozevo nuziulwilwa.” Ozevo, adieyi tulongokele? Avo tuzolele tambula o lusadisu lwa mwand’avelela, tufwete kwamanananga wo lomba muna sambu.

18. Mun’owu wa kingana kia Yesu, ekuma tufwete kadila ye ziku vo Yave okutuvana mwand’andi avelela?

¹⁸ E kingana kia Yesu mpe kikutusadisanga mu mona e kuma Yave kekutuvanina o mwand’avelela. O muntu oyikwanga mu kingana kiaki ntambudi ambote a nzenza kazola kala. Kakala ye madia ko muna vana kwa nzenza wanlwakila muna dingi-dingi, kana una vo i wau, wakala ye luzolo lwa vana. Yesu wavova vo o muntu oyikwanga muna kingana kiaki watambula kina kavuanga o mfunu mu kuma kia siandama kwandi. Adieyi Yesu kazola longa? Avo muntu walembi lunga una ye luzolo lwa sadisa o nkundi andi osiandamanga, tuna ye ziku vo Yave wa Se dieto una vo nkwa ngemba, wakubama kekalanga muna sadisa awonso bekwamanananga kunlomba o mwand’avelela. Muna kuma kiaki, tulenda samba ye ziku kiawonso vo Yave otambulwila e sambu yeto vava tulombanga o mwand’avelela.—Nku. 10:17; 66:19.

19. Ekuma tulenda kadila ye ziku vo nunga tununga?

¹⁹ Satana ke yambula kutubangika ko. Kansi, tulenda kala ye ziku vo nunga tununga. Ekuma? Kadi o mwand’avelela ukutusadisanga mu mpila zole. Yantete, okutuvananga o nkuma tuvuidi o mfunu muna sunda e ntonta. Yazole, mwand’avelela i nkuma ukutusadisanga mu kwamanana sadila Yave yavana tukota mu nz’ampa. Yambula twakwamanana kala ye tima dia vua o lusadisu lwa mwand’avelela una ufwene.