NGA diampasi dikalanga kwa ngeye mu longokanga e Bibila konso lumingu? Nga ezak’e ntangwa kukalanga ye kiese ko muna longoka e Bibila? Ezak’e ntangwa yeto awonso i wau tumonanga. Kansi, yindula maka mambu tuvanganga e lumbu yawonso nze, yowela. Ntangwa ye ngolo divavanga muna yowela, kansi ditoma kutukumikanga. Tulenda tezanesa mpe e longi dia Bibila ye “nsukul’a maza ma Diambu dia Nzambi.” (Efe. 5:26) Tala maka mambu malenda kusadisa:

• Sikidisa e ntangwa. Wau vo u Nkristu, e longi dia Bibila dia ngeye kibeni i dimosi muna “mambu masundidi o mfunu” kufwete veza ko. (Fili. 1:10) Muna lembi vilakana e ntangwa ina osikidisi, ekuma olembi yo sonekena vana fulu kitoma monekanga nze vana ntandu a gileira? Dilenda kala mpe dialusadisu mu tula alarme muna telefone aku kimana yasusumunanga.

• Sola e ntangwa ye ndekwa za longokela. Nkia mpila oyangalelanga longokela? Kasikil’owu, nga otoma sianga e sungididi kele vo olongokele mu ola yamvimba? Yovo oyangalelanga longoka mu kolo kiankufi, kansi nkumbu miayingi? Ngeye kibeni otomene zaya e mpila zingu kiaku. Ozevo, sungamenanga e diambu diadi vava ovanganga e nkubika za longi dia ngeye kibeni. Avo omwene vo kulenda longoka ko muna ntangwa ina wasikidisa, nga olenda longoka kana nkutu mu miniti kumi? Vana fulu kia viokesa e ntangwa lembi longoka, diambote mu longoka mu miniti kumi. Nanga kuna mfoko a miniti kumi olenda mona vo diambote mu kwamanana longoka mu kolo kianda.—Fili. 2:13.

• Teka sola diambu dina olongoka. Avo ovuende yo yantika yindula dina olongoka, ‘kutoma sadila e ntangw’aku ko una ufwene.’ (Efe. 5:16) Ekuma olembi sonekena malongi yovo ntu mia mambu mana okala longoka? Kasikil’owu, ekolo olongokanga kele vo osolwele diambu kutomene bakula ko, soneka dio. Kuna mfoko a konso longi, olenda kudikila ntu mia mambu muna programa aku.

• Vanga nsobani kele vo divuilu o mfunu. Kukadinge yo lukatikisu ko mu vanga e nsobani mu programa aku yalongokela. Kasikil’owu, olenda soba ola yovo ntu a diambu wankaka. E ntangwa ina wasikidisa, kolo kizingila e longi ye mana olongoka, ke mau ko masundidi o mfunu. Kansi, e diambu disundidi o mfunu i longokanga ntangwa ke ntangwa.

Avo tuna ye fu kia longokanga konso lumingu, nluta miayingi tuvua. Kikundi kieto yo Yave kikumama, tukala ye ngangu za baka nzengo zambote ye tuvua nkuma.—Yos. 1:8