Nga ozolele toma vua nluta muna longi dia ngeye kibeni? O mambu malende, malenda kusadisa mu toma sia e sungididi e kolo olongokanga.

• Vava fulu kiambote. Avo dilendakana, vava e fulu kiavelela kina yo ntemo wafwana kimana watoma mona yo tanga. Olenda vuanda va kunda kina yo mesa yovo va fulu kiambote kuna mbazi a nzo.

• Vava fulu kia vuvama. Yesu wasola mokena yo Se diandi muna sambu “muna mene-mene” ye vana “fulu kia yandi kaka.” (Maku 1:35) Avo diampasi dikalanga kwa ngeye mu solola fulu kia vuvama, olenda mokena ye esi nzo aku yo nkaz’aku muna kubazayisa e nkubik’aku ya longokela yo kubalomba vo bazitisa e ola olongokanga.

• Toma sia e sungididi. Venga mambu malenda kuvunzanesa. Avo osadilanga telefone yovo tablete muna longoka, sia yo muna silêncio yovo bosa vana modo de avião kimana yalembi kuvunzanesa. Ekolo olongokanga, avo oyindwidi diambu yovo salu kimosi ozolele vanga, soneka kio kimana walembi vilakana ye kwamanana longoka. Avo e ngindu zaku mu wuyana zina, vunda vioti, kangala yovo ziola e nitu.