1. Adieyi Yave kalenda vanga muna lungisa e kani diandi?

YAVE olenda kituka konso una kazolele muna lungisa e kani diandi. Kasikil’owu, Yave wakituka kala Nlongi, Mfiaulwisi ye Nteleki. Eyayi i nona isonganga e mpila zayingi Yave kalenda kitukila. (Yes. 48:17; 2 Kor. 7:6; Ngal. 3:8) Kansi, osadilanga mpe wantu muna lungisa e makani mandi. (Mat. 24:14; 28:19, 20; 2 Kor. 1:3, 4) Yave olenda mpe vana kwa konso muntu mu yeto ngangu yo nkuma tuvuidi o mfunu muna kutukitula una kazolele muna lungisa luzolo lwandi. Mawonso mama mesonganga e nsas’a nkumbu a Yave, nze una uyikanga akwa ngangu ayingi.

2. (a) Ezak’e ntangwa ekuma tukatikisilanga kana vo Yave okutusadilanga? (b) Adieyi tuvovela mu longi diadi?

² Yeto awonso tuzolele vo twatoma sadilwa kwa Yave, kansi akaka balenda katikisa kana vo Yave okubasadilanga. Ekuma? Kadi bekuyimwenanga vo ke bafwana ko mu kuma kia kimbuta, mambu benuananga mau yovo mu kuma kia ngangu zau. Kuna diak’e sambu, akaka beyangalelanga mana bevanganga yo yindula vo ke dina kwandi mfunu ko mu nungunuka diaka. Mu longi diadi, tuvovela una Yave kalenda fwanisina konso muntu mu yeto muna lungisa e kani diandi. I bosi, tubadika tusansu twa Nkand’a Nzambi tusonganga una Yave kafwanisina akala ye akento muna kubavana e tima yo nkuma wa kunsadila.  Kuna mfoko, tuvovela una tulenda yambulwila vo Yave katusadila.

3. Landila Filipi 2:13, aweyi Yave kekutuvaninanga luzolo lwa sala?

³ Tanga Filipi 2:13. * Yave olenda kutuvana luzolo lwa sala. Aweyi kevangilanga wo? Muna bonga e nona, dilenda kala vo tubakwidi e nsatu za nkutakani eto. Yovo akuluntu batangidi nkanda utukidi kuna vula uzayisanga vo vena ye zunga ivuidi lusadisu o mfunu. Ediadi dilenda kutufila mu kukiyuvula vo ‘Aweyi ndenda sadisila mu lungisa e nsatu zazi?’ Dilenda kala vo kiyekwa kiampasi tutambwidi yo kukiyuvula kana vo tulenda kio lungisa. Yovo kuna mfoko a ntangilu a Nkand’a Nzambi tulenda kukiyuvula: ‘Aweyi ndenda sadila e sono kiaki muna sadisa akaka?’ Yave kalendi kutukomekena ko mu vanga konso diambu. Kansi, avo omwene vo tuna ye luzolo lwa sadisa, Yave olenda kutuvana e tima dia vanga diambu.

4. Aweyi Yave kekutuvaninanga o nkuma wa vanga diambu?

⁴ Yave olenda mpe kutuvana o nkuma wa vanga e diambu. (Yes. 40:29) Olenda wokesa e ngangu zeto za kingutukila muna kutuvana mwand’avelela. (Luv. 35:30-35) Muna lusadisu lwa nkubik’andi, Yave olenda kutulonga una tulenda lungisila e salu yankaka. Avo kuzeye ko una olenda toma lungisila e kiyekwa kiaku, lomba lusadisu. Olenda mpe lomba o “ulolo wa nkuma” kwa Se dieto kuna zulu. (2 Kor. 4:7; Luka 11:13) O Nkand’a Nzambi una ye nona yayingi isonganga una Yave kasadisila akala ye akento muna kubavana o luzolo yo nkuma wa kunsadila. Ekolo tubadikanga tusansu twatu, yindula una Yave kalenda kusadila mu mpila yau imosi.

5. Adieyi tulenda longoka muna mpila ye ntangwa ina Yave kasadila Mose mu kûla o nkangu andi?

⁵ Yave wasadisa Mose mu kituka se nkûdi a Aneyisaele. Kansi nkia ntangwa kansadila? Nga Yave wasadila Mose vava kamana ‘longwa muna ngangu zawonso za esi Engipito’? (Mav. 7:22-25) Ve, Yave wasadila kaka Mose vava kansadisa mu kituka nlembami ye nsakaladi. (Mav. 7:30, 34-36) Yave wavana kwa Mose o unkabu wa mokena yo muntu wasunda e wisa muna Engipito. (Luv. 9:13-19) Adieyi tulenda longoka muna mpila ye ntangwa Yave kasadila o Mose? Yave osadilanga awana bevavanga tanginina e fu yandi ye awana bekumbundanga e vuvu.—Fili. 4:13.

6. Adieyi tulenda longoka muna mpila ina Yave kasadila Bazilai mu sadisa Davidi wa Ntinu?

⁶ Vava vavioka mvu miayingi, Yave wasadila Bazilai mu lungisa e nsatu za Davidi wa Ntinu. Davidi yo nkangu andi ‘bamona nzala, vuina ye bayoya’ ekolo batinanga Abesalome wa mwan’a Davidi. Bazilai, ona wakala se nunu muna kolo kiakina, kumosi ye akaka basia e mioyo miau mu vonza kimana balungisa e nsatu za Davidi yo nkangu andi. Bazilai kayindula ko vo wau vo se mbuta kwandi kalendi diaka toma sadilwa ko kwa Yave. Kansi, kuna mvevo wawonso, wasadila ina kakala yau muna sadisa e selo ya Nzambi bakala mu mpasi. (2 Sam. 17:27-29) Adieyi tulenda longoka? Kiakala vo tu ambuta yovo aleke, Yave olenda kutusadila mu lungisa e nsatu za mpangi zeto bezingilanga mu nsi eto yovo mu nsi zankaka, ana bavidisa e lekwa yamfunu. (Nga. 3:27, 28; 19:17) Kana nkutu vo ke tulendele kubasadisa ko, tulenda vana tukau  tweto muna yikama e salu kia nz’amvimba, kimana twasadilwa mu sadisa ampangi vava divuwanga o mfunu.—2 Kor. 8:14, 15; 9:11.

7. Aweyi Yave kasadila Simone? Ediadi aweyi dilenda kutukasakesela?

⁷ Yave wasia e nsilu kwa Simone wa nunu wa nkwa kwikizi, ona wazingilanga kuna Yerusaleme vo vitila kafwa omona Masia. O nsilu wau wakumika kikilu Simone. Tuka muna kolo kiakina, wavingilanga mu mvu miayingi e ngiz’a Masia. O lukwikilu ye luzindalalu lwandi lwasendwa. Lumbu kimosi, “o mwanda unète” muna tempelo, mûna kamwena Yesu wa nsedia. Yave wasadila Simone muna vovela o ungunza mu kuma kia mwana ndioyo wadi kituka Kristu. (Luka 2:25-35) Kana una vo Simone kazinga diaka kolo kiayingi ko mu mona una Yesu kadi lungisila e salu kia samuna e nsangu zambote, wavutula matondo kwa Yave muna mpila kansadila. Otambula nsambu zayingi kuna ntwala. Muna nz’ampa, o nkwa kwikizi ndioyo omona una o luyalu lwa Yesu lutwasila e nsambu kwa wantu awonso ova ntoto. (Tuku 22:18) Yeto mpe tulenda vutula matondo mu konso lau dina Yave kekutuvananga muna salu kiandi.

8. Aweyi Yave kalenda kutusadila nze una kasadila Banaba?

⁸ Muna tandu kiantete, muntu mosi wa nkwa ntim’amvevo wakala ye nkumbu a Yosefe wayivana kimana kasadilwa kwa Yave. (Mav. 4:36, 37) Nanga mu kuma kia sia vo Yosefe watoma fiaulwisanga akaka i dianu kayikilwa vo Banaba, nkumbu ina ye nsasa vo “Mwan’a Lufiaulwisu.” Muna bong’e nona, vava Saulu kakituka Nkristu, mpangi zayingi bakala ye wonga wa kumfinama wau vo wabangikanga e nkutakani. Kansi, Banaba wafiaulwisa Saulu yo kunsadisa. Muna kuma kiaki, Saulu wavutula matondo muna ngemba kansongwa. (Mav. 9:21, 26-28) Kuna kwalanda, akuluntu a Yerusaleme bazola kasakesa ampangi ana bazingilanga kuna Antiokia ya Suria. Nani bafila? Banaba. Nzengo zambote babaka. Tulenda vova vo Banaba ‘wakasakesa awonso basikila muna Mfumu yo ntim’amosi.’ (Mav. 11:22-24) Diau dimosi mpe o unu, Yave olenda kutusadisa mu fiaulwisa mpangi zeto. Kasikil’owu, olenda kutusadila mu fiaulwisa awana bafwilwa azolw’au. Yave olenda kutukasakesa mu kingula yovo bokela mpangi muna telefone una wayela yovo wakendalala muna kumvovesa mvovo miangemba. Nga una ye tima dia yambula vo Yave kasadila nze una kasadila Banaba?—1 Tes. 5:14.

9. Adieyi tulongokele muna mpila ina Yave kasadisila mpangi Vasily mu kituka se mvungudi ambote?

⁹ Yave wasadisa mpangi mosi una ye nkumbu a Vasily muna kituka se mvungudi ambote. Vava mpangi Vasily katumbikwa se nkuluntu, kimbuta kia mvu 26 kakala kiau. Wonga kamonanga wa sia vo kakala wafwana ko muna sadisa e nkutakani, musungula awana banuananga ye mambu mampasi. Kansi, walongwa kwa akuluntu akaka azikuka ye muna Sikola ya Salu kia Kintinu. Mpangi Vasily wavanga ngolo zayingi muna nungunuka. Kasikil’owu, wasoneka maka mambu kazola lungisa. Ekolo kavanganga konso diambu diakala muna mana kasoneka, malembe-malembe walenda sunda o wonga kakala wau. Owau wavova vo: “Mana mambwesanga o wonga owau makituka se makiese. Vava Yave kekunsadisanga mu solola e sono kiamfunu mu fiaulwisa e mpangi muna nkutakani, kiese kiayingi dikuntwasilanga.” Kuna kwa mpangi z’amakala, avo otanginini mpangi Vasily yo yambula vo Yave kasadila, olenda kuvana e ngangu muna lungisa e kiyekwa muna nkutakani.

10. Adieyi Abingaile kavanga? Adieyi olongokele muna mbandu ya Abingaile?

¹⁰ Vava Davidi ye akwandi batinanga mu kuma kia lubangamu lwa Saulu wa Ntinu, lusadisu kikilu bavuanga o mfunu. Muna kuma kiaki, awana bakala yo Davidi balomba fimadia kwa Nabale wa mvuama mosi a mwisi Isaele. Oyau bamona vo balenda kwau lomba lusadisu lwandi wau vo batanina e kambi dia Nabale muna makanga. Kansi, Nabale ona wakala vo nkwa loko kazola kubavana konso lekwa ko. Davidi wafunga makasi yo baka e nzengo za vonda Nabale kumosi ye wan’amakala awonso bakala muna nzo andi. (1 Sam. 25:3-13, 22) Kansi Abingaile wa nkaz’a Nabale nkwa ngangu ye nkento ambote-mbote kakala. Kuna unkabu wawonso, wayenda wanana yo Davidi, wabwa vana malu mandi yo kundodokela kalembi bwa muna nkanu a menga yo landa kunda muna moko mandi. Kuna ndekwa zawonso, wanlomba vo kayambula mambu mawonso vana moko ma Yave. E mvovo miangemba ye mavangu mambote ma Abingaile masimba kikilu o ntim’a Davidi. Muna kuma kiaki, wabakula vo Yave watuma o nkento ndioyo. (1 Sam. 25:23-28, 32-34) Abingaile wayima e fu ina yansadisa mu toma sadilwa kwa Yave. Diau dimosi mpe, mpangi z’akento ana besadilanga ndekwa yo umbakuzi, balenda sadilwa kwa Yave muna kumika esi nzo zau ye akaka muna nkutakani.—Nga. 24:3; Tito 2:3-5.

11. Adieyi o wan’amakento a Salumi bavanga? O unu, aki nani betangininanga e mbandu au?

¹¹ Vioka mvu miayingi, wan’amakento a Salumi bakala vana vena awana basadilwa kwa Yave mu tungulula e yaka ya Yerusaleme. (Nek. 2:20; 3:12) Kana una vo se diau nguvulu kakala, wan’amakento a Salumi bakala ye luzolo lwa sala e salu kiaki kiampasi ye kia vonza. (Nek. 4:15-18) Baswaswana bakala ye esi Tekoa akwa tunda ana ‘ke bazola kuyikulula ko’ mu sala e salu. (Nek. 3:5) Yindula e kiese bamona o wan’amakento a Salumi vava e salu kiafokoka mu kolo kia 52 ma lumbu. (Nek. 6:15) Omu lumbu yeto, mpangi z’akento bekalanga ye kiese kia yikama e salu kiavauka, i sia vo, tunga yo lunga-lunga e fulu ya sambidila Yave. E ngangu, kiese ye kwikizi kia mpangi zazi mfunu kina muna toma sala e salu kiaki.

12. Aweyi Yave kalenda kutusadila nze una kasadila Tabita?

¹² O nkento ankaka watoma sadilwa kwa Yave i Tabita. Nkand’a Nzambi uvovavanga vo “mavangu mayingi mambote kakala mau, lusadisu lwayingi mpe kavananga” musungula kwa akento bafwilwa akala. (Mav. 9:36) Mu kuma kia fu kiandi kia kayila akaka ye ngemba kasonganga, ayingi bakendalala vava kafwa. Kansi, bayangalala kikilu vava Petelo wa ntumwa kamfula. (Mav. 9:39-41) Adieyi tulongokele mu kuma kia Tabita? Kiakala aleke yovo ambuta, akala yovo akento, yeto awonso tulenda vanga diambu mu sadisa e mpangi zeto.—Ayib. 13:16.

13. Aweyi mpangi Ruth wakala vo nkwa nsoni kasadilwa kwa Yave? Adieyi kavova?

¹³ Mpangi Ruth wakala vo nkwa nsoni, wazola kota mu salu kia kimisionario. Vava kakala nleke, wayendanga mu salu kia nzo ye nzo mu kaya yinkanda-nkanda kwa wantu mu nzaki. Wavova vo: “Yatoma yangalelanga e salu kiaki.” Kana una vo i wau, diampasi kikilu diakalanga kwa yandi mu mokena yo wantu e mambu ma Kintinu kia Nzambi. Kanele vo nkwa nsoni kakala, mpangi Ruth wayantika sala se mviti a nzila a ngonde ke ngonde vava kalungisa mvu 18. Muna mvu wa 1946, wakota  e Sikola ya Ngiladi. Kuna kwalanda, wasadila kuna Havaí ye kuna Japão. Yave wansadila mu samuna e nsangu zambote muna nsi zazi. Vava kaviokesa tezo kia mvu 80 muna salu kiaki, mpangi Ruth wavova vo: “Yave okunkumikanga ntangwa zawonso. Okunsadisanga mu sunda e nsoni zame. Ikwikilanga vo Yave olenda sadila konso muntu okumbundanga e vuvu.”

14. Landila Kolosai 1:29, adieyi tufwete vanga avo tuzolele sadilwa kwa Yave?

¹⁴ Tuka kolo, Yave osadilanga selo yandi yakwikizi mu mpila zayingi zaswaswana. Aweyi Yave kalenda kukitulwila una kazolele? Divavanga vo wakivana kuna mvevo yo kala ye luzolo lwa sala. (Tanga Kolosai 1:29.) Avo ovangidi mawonso muna kuyifwanisa, Yave olenda kukitula nteleki avema, nlongi ambote, mfiaulwisi, nkwa ngangu, nkundi ambote yovo konso una kazolele mu lungisa luzolo lwandi.

15. Landila luludiku luna muna 1 Timoteo 4:12, 15, adieyi aleke balenda lomba kwa Yave kabasadisa mu vanga?

¹⁵ Adieyi tuvova mu kuma kia aleke ana befinamanga mu ntel’a kimbuta? Mpangi zayingi zamakala ana bena ye kikesa bavuilu o mfunu mu sala se selo ya salu. Mu nkutakani zayingi, e lutangu lwa akuluntu lulutidi lutangu lwa selo ya salu. Avo u nleke, nga olenda yima o luzolo lwa tambula yiyekwa yankaka muna nkutakani? Ezak’e ntangwa, mpangi zankaka bevovanga vo: “Kuna kwa mono okala se nteleki diafwana kwandi.” Avo i wau omonanga, lomba lusadisu lwa Yave mu kala ye luzolo lwa kituka selo kia salu yo lomba vo kavana o nkuma mu vanga mawonso olenda muna kunsadila. (Kim. 12:1) Lusadisu lwaku tuvuidi o mfunu!—Tanga 1 Timoteo 4:12, 15.

16. Adieyi tufwete lomba kwa Yave? Ekuma?

¹⁶ Yave olenda kusadisa mu kituka konso una kazolele mu lungisa o luzolo lwandi. Muna kuma kiaki, unlomba kasadisa mu kala ye luzolo lwa sala salu kiandi. I bosi, unlomba kavana o nkuma ovuidi o mfunu. Kiakala vo u nleke yovo mbuta, sadila e ntangwa, ngolo ye lekwa yankaka una yau mu kembelela Yave owau. (Kim. 9:10) Kuyambula ko vo o wonga ye ngindu za sia vo kuna wafwana ko zafila mu lembi tambulwila e malau ma vanga mawonso olenda muna salu kia Yave. Ekwe lau diampwena tuna diau mu vanga konso dina tulenda muna kembelela Se dieto dianzodi!