NKWA ngangu ofimpanga oma ma nsungi, omwene vo tembwa kiangolo kifinamanga mu mbanza izingilanga wantu ayingi. Wau vo otokanenanga e wete dia wantu, o nkwa ngangu ndioyo ovangidi mawonso mu lukisa o wantu mu kuma kia tembwa ekolo bakinu ye ntangwa.

Nze nkwa umbangu ndioyo, o unu Yave mpe olukisanga o wantu mu kuma kia “tembwa kiangolo” kifinamanga, kina kisundidi konso tembwa kina akwa umbangu balenda vovela. Aweyi Yave kevaninanga o lulukisu lwalu? Ekuma tulenda kadila ye ziku vo Yave ovananga ntangwa yafwana kwa wantu muna baka e nzengo? Vitila twabaka e mvutu za yuvu yayi, yambula twavovela ntete twankaka muna tulukisu Yave kavana kuna nz’ankulu.

Kuna nz’ankulu, Yave walukisanga o wantu mu kuma kia “tembwa yangolo” yovo mfundisa zina kadi twasa kwa awana bakolamenanga e nkanikinu miandi kuna lukanu. (Nga. 10:25; Yer. 30:23) Kansi vitila kavanga diambu, Yave walukisanga wantu awaya ntangwa zawonso yo kubazayisa una badi songela vo banlemvokelanga. (2 Nti. 17:12-15; Nek. 9:29, 30) Muna kubasadisa basoba mavangu mau, Yave wasadilanga e selo yandi yakwikizi ova ntoto muna zayisa e mfundisa zandi. Ediadi diasadisanga wantu awaya mu bakula vo bafwete soba e mavangu mau.—Am. 3:7.

Noa i mosi muna selo yayi yakwikizi. Mu mvu miayingi, Noa kuna unkabu wawonso wasila umbangi kwa wantu a tandu kiandi ana bakala vo yimpumbulu ye akwa nsoki yo kubalukisa vo Kizalu kiampwena kikwiza. (Tuku 6:9-13, 17) Wabazayisa mpe dina bafwete vanga muna vuluka. Muna kuma kiaki, kuna kwalanda wabokelelwa vo “nteleki a unsongi.”—2 Pet. 2:5.

Kana una vo Noa wavanga ngolo zayingi, o wantu a tandu kiandi baveza e nsangu za Nzambi. Basonga vo ke bakala ye lukwikilu ko. Muna kuma kiaki, bafwa vava e Kizalu “kiayiza, kiabakukulwisa yau awonso.” (Mat. 24:39; Ayib. 11:7) Ke vakala muntu ko walenda vova vo Nzambi kabalukisa ko.

Ezak’e ntangwa, Yave walukisanga wantu mu kolo kiandwelo vitila katwasa lufwasu. Kana una vo i wau, Yave wavananga ntangwa yafwana kimana o wantu belwakilwa e “tembwa kiangolo” bavanga diambu. Kasikil’owu, vava katwasa Vuku Kumi muna Engipito, Yave wateka lukisa o nkangu. Muna bonga e nona, Yave watuma Mose yo Arone muna lukisa Faro ye selo yandi vo e vuku kia nsambwadi mu tembwa kia mvul’anene ya matadi kivangamena, ina inoka muna lumbu kilanda yo twasa mfwilu miayingi. Nga lumbu kimosi kiadi fwana muna solola e tininu yo vuluka muna tembwa kiakina kiangolo? O Nkand’a Nzambi uvovanga vo: “Konso selo kia Faro ona wazitisa e mvovo mia Yave, vana vau wakutika e ntaudi zandi ye twelezi yandi muna nzo, kansi, awana ke basia mvovo mia Yave muna ntima ko, bayambula e ntaudi ye twelezi yau muna kiana.” (Luv. 9:18-21) Ediadi disongele vo, Yave wavana ntangwa yafwana kwa selo ya Faro mu kubama. Awana bavanga diambu vana vau, bavuluka muna vuku.

Faro ye selo yandi balukiswa mpe vitila e vuku kia kumi. Kansi, ke batambulwila lulukisu ko. Muna kuma kiaki, bamona lufwa lwa wan’au antete. Ekwe mfwilu! (Luv. 11: 4-10; 12:29) Nga bakala ye ntangwa ya wá o lulukisu? Elo! Mose walukisa Aneyisaele vana vau mu kuma kia vuku kia kumi yo sasila una balenda vulukila kumosi ye esi nzo zau. (Luv. 12:21-28) Wantu kwa balemvokela o lulukisu lwalu? Landila lufimpu luvangamene, mafuku tatu ma Aneyisaele yovo lutila, kumosi ye “ndonga yasangalakana,” i sia vo, nzenza zayingi ye esi Engipito. Yau awonso ke batumbwa ko kwa Nzambi yo vaika muna Engipito.—Luv. 12:38; mvovo vana yand’a lukaya.

E nona yayi isonganga vo Yave wavananga e ntangwa yafwana kwa wantu muna wá o lulukisu lwandi. (Nsi. 32:4) Ekuma kavangilanga wo? Petelo wa ntumwa, wavova vo Yave “kazolele ko vo vafwa kana muntu mosi, kansi awonso balwaka muna luviluku lwa ntima.” (2 Pet. 3:9) Kieleka, Nzambi watokanenanga e wete dia wantu awaya. Wazola vo baviluka e ntima yo soba e kadilu yau vitila o lufwasu lwiza.—Yes. 48:17, 18; Roma 2:4.

O unu, wantu awonso mu wá bena o lulukisu lwamfunu ye awonso bafwete vanga diambu mu nzaki. Vava kakala ova ntoto, Yesu wavova vo e tandu kiaki tuzingilanga kilwakilwa kwa “mpasi zayingi” yo fwaswa. (Mat. 24:21) O ungunza wa Yesu uvovelanga mambu mana alongoki andi bewanana mau vava e kolo kiaki kilwaka. Muna ungunza wau, wavovela mambu mevangama mu nza yawonso.—Mat. 24:3-12; Luka 21:10-13.

Wau vo mu kolo kia ndungan’a ungunza wau tuzingilanga, Yave olukisanga wantu awonso. Yave ozolele vo awonso basola kunsadila ye kunlemvokela kadi awonso bevanga wo bekala ye zingu kiambote owau yo tambula e nsambu zayingi muna nz’ampa. (2 Pet. 3:13) Muna sadisa wantu bakwikila muna nsilu miandi, Yave okubavananga e lau dia wá e “nsangu zambote za Kintinu.” Yesu wavova vo e nsangu zazi zivuluzanga e mioyo mia wantu, “zisamunua mu nza yawonso muna umbangi kwa zula yawonso.” (Mat. 24:14) Nzambi okubikanga e selo yandi yakwikizi muna ‘sila umbangi’ yovo samuna e nsangu zandi vioka 240 ma nsi. Yave ozolele vo wantu ayingi bawá o lulukisu yo vuluka muna “tembwa kiangolo” eki kifinamanga.—Sef. 1:14, 15; 2:2, 3.

E diambu diamfunu ke dia sia kaka ko vo Yave ovananga ntangwa yafwana kwa wantu vo bawá o lulukisu lwandi. Kadi e ziku kisonganga vo Yave ovananga lulukisu ntangwa zawonso. Kansi, e kiuvu i kiaki: Nga wantu bewá o lulukisu lwa Nzambi ekolo bakinu ye ntangwa? Yave okutuvananga e lau dia samuna e nsangu mu kuma kia mfundisa zandi. Muna kuma kiaki, vanga mawonso olenda mu sadisa wantu ayingi kimana bavuluka ku mfoko a tandu kiaki.