1-2. (a) Nkia luzayisu bevana ayadi a nza ke kolo ko? (b) Nkia yuvu ifwete vaninua e mvutu?

YINDULA vo ayadi a nza bavene kala o luzayisu lwa “luvuvamu ye ngemba.” Nanga bekuyisana vo balendele kitula e nza se fulu kia luvuvamu. Bevava vo wantu awonso bakwikila vo balendele fokola e mpasi zawonso ova nza. Kansi, ke belenda kakidila ko mana melanda. Ekuma? Kadi o ungunza wa Nkand’a Nzambi uvovanga vo “o lubukumuku lukubaluakila kuna kinsalukisa, . . . ke bekala ye una betinina ko.”—1 Tes. 5:3.

² Vena ye yuvu yamfunu ifwete vaninua e mvutu: Adieyi divangama muna kolo kia “mpasi zayingi”? Adieyi Yave kevava vo twavanga muna kolo kiakina? Aweyi tulenda kubamena owau kimana twasikila ye kwikizi muna kolo kia mpasi zayingi?—Mat. 24:21.

3. Landila Lusengomono 17:5, 15-18, aweyi Nzambi kefwasila “Babele Anene”?

³ Tanga Lusengomono 17:5, 15-18. “Babele Anene” fwaswa ifwaswa. Nze una uyikilu kala, ayadi a nza ke belenda kakidila ko mana mevangama muna kolo kiakina. Ekuma? Kadi o “Nzambi [osia] dio muna ntima miau edi dialunganesa e kani diandi.” Nkia kani? Diafwasa kintwadi kia nsambila zawonso  zaluvunu kumosi ye Kikristu kia Kimpangila. * Nzambi osia kani diandi muna ntima mia “mpaka kumi” za “bulu kiansisi kiambwaki.” E “bulu kiansisi” Nações Unidas kisunzulanga. E mpaka kumi i tuyalu twawonso tuyikamanga Nações Unidas. (Lus. 17:3, 11-13; 18:8) Vava ayadi benuanisa mabundu maluvunu, tuzaya wo vo e mpasi zayingi ziyantikidi. Kolo kiampasi kikilu kikala kadi e mpasi zazi zibwila wantu awonso.

4. (a) Nkia kuma besonga ayadi muna fwasa mabundu maluvunu? (b) Asambidi a mabundu mama, adieyi bevava vanga?

⁴ Ke tuzeye ko dina difila ayadi muna fwasa e Babele Anene. Nanga bevova vo e mabundu mekakidilanga luvuvamu ova nza ye mekuyisianga kwayingi muna mambu ma tuyalu. Nanga bevova mpe vo e mabundu mavuidi kimvuama kiayingi ye nzo zayingi. (Lus. 18:3, 7) Vava ayadi befwasa mabundu mawonso maluvunu, ke disongele ko vo wantu awonso a mabundu befwaswa. Nanga ayadi mabundu kaka befwasa. Vava mabundu mama mefwaswa, asambidi a mabundu mama bebakula vo e mfumu za mabundu mau bafungidi. Nanga bevava kuyivambula muna mabundu momo.

5. Nkia nsilu Yave kasia mu kuma kia mpasi zayingi? Ekuma?

⁵ O Nkand’a Nzambi ke uyikanga ko e kolo kizingila o lufwasu lwa Babele Anene, kansi tuzeye wo vo lufwasu lwalu ke luzingila kolo kiandá ko. (Lus. 18:10, 21) Yave wasia nsilu vo ‘okufika e lumbu’ ya mpasi zayingi kimana “awana basolwa” ye nsambil’aludi yavuluka. (Maku 13:19, 20) Kansi, adieyi Yave kevava vo twavanga tuka kuna lubantiku lwa mpasi zayingi yakuna vita ya Armangedo?

6. Adieyi divavuanga avo tuyambwidi e nsambil’aluvunu?

⁶ Nze una tulongokele muna longi diviokele, Yave ozolele vo asambidi andi bavambana ye Babele Anene. Mayingi mevavuanga  muna wo vanga, ke yambula kaka nsambil’aluvunu ko. Kansi, tufwete sianga e ngolo za kwamanana muna nsambil’aludi, i sia vo, nsambil’avelela a Yave. Yambula twavovela mpila zole tulenda wo vangila.

7. (a) Aweyi tulenda tatidila nkanikinu miansongi mia Yave kuna unkabu wawonso? (b) Landila Ayibere 10:24, 25, ekuma dinina o mfunu mu lungananga muna tukutakanu owau?

⁷ E mpila yantete i tatidila nkanikinu miansongi mia Yave kuna unkabu wawonso. Ke tufwete tambulwila ko e fu ye ngindu za nza yayi. Kasikil’owu, ke tutondanga mavangu mawonso ma zumba ko, kumosi ye lukazalu lwa yakala yo yakala yovo nkento yo nkento ye mavangu mankaka ma mvukana za yakala yo yakala yovo nkento yo nkento. (Mat. 19:4, 5; Roma 1:26, 27) E mpila yazole i kwamanana sambila Yave kumosi ye mpangi zeto. Tukwamanana wo vanga kiakala muna Maseka ma Kintinu, muna nzo za ampangi yovo kuna sweki. Kana nkutu nkia diambu divangama, ke tuyambula kutakana ko muna sambila Yave. Dialudi, tufwete kutakananga “musungula wau tumwene vo e lumbu mu finama kaka kina.”—Tanga Ayibere 10:24, 25.

8. Nanga e nsangu tusamunanga soba zisoba muna kolo kia mpasi zayingi. Mu nkia mpila?

⁸ Dilenda kala vo e nsangu tusamunanga soba zisoba muna kolo kia mpasi zayingi. O unu tusamunanga e nsangu zambote za Kintinu ye tuvanganga e ngolo za kitula wantu se alongoki. Kansi, e nsangu tusamuna muna kolo kia mpasi zayingi, nanga zikala nze matadi mampwena ma mvula. (Lus. 16:21) Nanga tusamuna vo o lufwasu lwa nza ya Satana lufinamene. Muna kolo kiakina, tuzaya nkia nsangu tusamuna ye mpila tusamunuina zo. Nga tusadila ndekwa nze zina tusadilanga se vioka mvu nkama? Nga ndekwa zampa tusadila? Tufwete vingila mu mona dina tuvanga. Kiakala nkia diambu divangama, nanga tukala ye lau dia samuna e nsangu za mfundis’a Yave kuna unkabu wawonso.—Yez. 2:3-5.

9. Adieyi e zula bevanga mu kuma kia nsangu zeto? Nkia ziku tuna kiau?

⁹ Nanga e nsangu zeto zifungisa e zula makasi yo vava kutusima emvimba. Muna kuma kiaki, divava vo twabunda Yave e vuvu. O unu, okutuvananga lusadisu tuvuidi o mfunu muna samuna e nsangu zambote. Muna kuma kiaki, tuna ye ziku vo kuna ntwala o Nzambi okutuvana nkuma muna vanga luzolo lwandi.—Mika 3:8.

10. Nze una diasakulwa muna Luka 21:25-28, aweyi o wantu ayingi bemona muna kolo kia mpasi zayingi?

¹⁰ Tanga Luka 21:25-28. Muna kolo kia mpasi zayingi, o wantu ke bezaya ko dina bevanga. Mawonso bayindulanga vo mambote mu nza yayi, mesinga vila. ‘Bekangama o ntima,’ bekala ye wonga wavidisa e mioyo miau muna kolo kiakina kisunda e mpasi muna lusansu lwawonso lwa wantu. (Sef. 1:14, 15) Muna kolo kiakina, nanga e zingu kiampasi kikilu kikala, kana nkutu kwa nkangu a Yave. Wau vo ke tukuyisianga mu mambu ma nza ko, tuwanana ye mpasi zayingi. Nanga ke tukala ye lekwa yankaka ko tuvuanga o mfunu lumbu ke lumbu.

11. (a) Ekuma Mbangi za Yave besilwa kitantu yo nuaniswa? (b) Ekuma ke dikadila mfunu ko vo twamona wonga wa mpasi zayingi?

¹¹ Vekala ye ntangwa ina asambidi a mabundu mana mafwaswa bemona vo Mbangi za Yave bekwamanana muna nsambil’au. Ediadi dilenda kubafungisa makasi. Tulenda yindula e mavuanga ditwasa ediadi, musungula muna nzila za amwangi nsangu. E zula  kumosi yo Satana wa nyadi au, bekutusia kitantu wau vo nsambil’eto kaka isala ova ntoto. Kadi ke belenda lungisa e kani diau ko dia fukisa e mabundu mawonso ova ntoto. Muna kuma kiaki, bevava kutunuanisa. Ekiaki i kolo e zula betambula e fulu kia Ngonge a Mangonge. * Belungana mu nuanisa o nkangu a Yave. (Yez. 38:2, 14-16) O zaya e mambu mama dilenda kututokanesa, munsungula wau vo ke tutomene zaya ko mawonso mevangama vava bekutunuanisa. Kansi, tulenda kala ye ziku muna diambu edi: Ke dikala mfunu ko vo twamona wonga wa mpasi zayingi. Yave okutuvana tuludiku tuvuluza e mioyo mieto. (Nku. 34:19) Tulenda ‘telama yo vumbula e ntu mieto’ kadi tuzaya wo vo ‘luvuluzu lweto lufinamene.’ *

12. O “ntaudi akwikizi yo lulungalalu,” adieyi kevanganga muna kutukubika mu kuma kia mana mevangama kuna ntwala?

¹² O “ntaudi akwikizi yo lulungalalu” okutukubikanga tuka kolo muna sikila ye kwikizi muna kolo kia mpasi zayingi. (Mat. 24:45) Mu mpila zayingi kekutukubikilanga. Badika e nona kia malongi ma tukutakanu twa mvivu tuka muna mvu wa 2016-2018. Muna konso lukutakanu, twalongoka e fu kimosi tufwete kala kiau ekolo e lumbu kia Yave kifinamanga. Yambula twafimpulula e fu yayi.

13. Adieyi dilenda kutusadisa mu kumika e kwikizi kieto muna Yave? Ekuma tufwete wo vangila owau?

¹³ Kwikizi: O lukutakanu lwa mvivu lwa mvu wa 2016 lwakala ye ntu a diambu vo “Sikila ye Kwikizi Muna Yave!” Muna lukutakanu lwalu twalongoka vo muna sikila ye kwikizi muna Yave, tufwete kala ye ngwizani ambote yo yandi. Twalongoka mpe vo tulenda kumika e kikundi kieto yo Yave muna sambanga ye nsi a ntima yo longokanga Nkand’a Nzambi ye fululu kiawonso. E sambu ye longi dia yeto kibeni dikutuvana o nkuma tuvuidi o mfunu muna sunda konso mpasi. Ekolo e nza ya Satana ifinamanga ku mfoko, tulenda wanana ye mambu mayingi metonta e kwikizi kieto muna Nzambi ye Kintinu kiandi. Nanga o wantu bekwamanana kutuveza. (2 Pet. 3:3, 4) Ediadi divangama kadi ke tukuyisianga mu mambu ma nza ya Satana ko. Avo tuzolele sikila ye kwikizi muna Yave muna kolo kia mpasi zayingi, tufwete kumika e kwikizi kieto owau.

14. (a) Nkia nsobani ivangama vana vena ampangi bevitanga o ntu muna nkubik’a Yave ova ntoto? (b) Ekuma divavila vo twasikila ye kwikizi muna kolo kiakina?

¹⁴ Muna kolo kia mpasi zayingi, nsobani ivangama vana vena ampangi bevitanga o ntu muna nkubik’a Yave ova ntoto. Vekala ye ntangwa akuswa awonso ana bekala ova ntoto belungalakeswa kuna zulu mu nuana e vita ya Armangedo. (Mat. 24:31; Lus. 2:26, 27) Ediadi disongele vo Buka kia Selo Yambuta ke tukala yau diaka ko ova ntoto. Kansi, e ndong’ayingi ikwamanana lungwa-lungwa. Mpangi zazikuka muna buka kia mameme mankaka yau bevita o ntu. Muna kolo kiokio, divava vo twasikila ye kwikizi yo yikama mpangi zazi muna landa tuludiku bevewa kwa Nzambi. Avo tuvanga wo, tuvuluka.

15. Adieyi dilenda kutusadisa mu siamisa luzindalalu lweto? Ekuma tufwete wo vangila owau?

¹⁵ Luzindalalu: O lukutakanu lwa mvivu lwa mvu wa 2017 lwakala ye ntu a diambu vo  “Kuyoyi Ko!” O lukutakanu lwalu lwatusadisa mu zaya una tulenda zizidila e ntonta. Twalongoka vo ke tufwete songa kaka o luzindalalu ko mu ntangwa kiese, kansi mpe muna ntangwa mpasi. Tulenda siamisa luzindalalu lweto muna bundanga e vuvu kwa Yave. (Roma 12:12) Ke tufwete vilakananga ko o nsilu una Yesu kasia: “Ndiona ozindalala yakuna mbaninu, yandi ovuluzwa.” (Mat. 24:13) O nsilu wau usongele vo tufwete sikila ye kwikizi kana nkutu nkia mpasi tuwanana zau. Avo tuzizidila konso mpasi owau, tukala ye nkuma, ke tuyoya ko muna kolo kia mpasi zayingi.

16. Akweyi kutukanga unkabu wakieleka? Aweyi tulenda kumikina o unkabu weto owau?

¹⁶ Unkabu: O lukutakanu lwa mvivu lwa mvu wa 2018 lwakala ye ntu a diambu vo “Kala yo Unkabu!” O lukutakanu lwalu lwatusungamesa vo o unkabu ke utukanga mu ngangu zeto ko. Nze luzindalalu, o unkabu wakieleka utukanga muna bunda e vuvu kwa Yave. Aweyi tulenda kumikina e vuvu kieto muna Yave? Muna tanganga e Diambu diandi lumbu yawonso yo badika una Yave kavuluzila o nkangu andi kuna nz’ankulu. (Nku. 68:20; 2 Pet. 2:9) Vava e zula bekutunuanisa muna kolo kia mpasi zayingi, divava vo twawokesa songa unkabu yo bunda e vuvu kwa Yave. (Nku. 112:7, 8; Ayib. 13:6) Avo tubundidi e vuvu kwa Yave owau, tukala yo unkabu tuvua o mfunu vava e Ngonge kekutunuanisa. *

17. Ekuma ke tufwete mwena wonga ko mu kuma kia vita ya Armangedo? (Tala e fwaniswa kia fukwa.)

¹⁷ Nze una uyikilu muna longi diviokele, ayingi muna yeto mu lumbu yambaninu tuzingilanga tuka twawutukila. Kansi, tuna mpe ye lau dia vuluka muna kolo kia mpasi zayingi. E vita ya Armangedo i mfoko a tandu kiaki. Kansi, ke tufwete mona wonga ko. Ekuma? Kadi e vita yayi ya Nzambi. (Nga. 1:33; Yez. 38:18-20; Zak. 14:3) Vava Yave kevana e sinsu, Yesu Kristu ovita o ntu muna vu kia makesa ma Nzambi. Yesu okala kumosi ye akuswa ana befuluka ye mafunda ye mafunda ma mbasi. Yau awonso benuanisa Satana,  nkuya miandi ye vu kia makesa mandi ova ntoto.—Dan. 12:1; Lus. 6:2; 17:14.

18. (a) Adieyi Yave kasila o nsilu? (b) Lusengomono 7:9, 13-17, aweyi kikutusadisilanga mu kala ye vuvu mu kuma kia mana mevangama kuna ntwala?

¹⁸ Yave wasia o nsilu vo: “Ke vena nuaninua ko kiavangwa mu kuma kiaku kisikila.” (Yes. 54:17) E “ndong’ayingi” ya asambidi akwikizi a Yave ‘bevuluka muna mpasi zayingi.’ Yau awonso bekwamanana sadila Nzambi e salu kiavauka. (Tanga Lusengomono 7:9, 13-17.) Nkand’a Nzambi ukutuvananga kuma yayingi mu kala ye vuvu vo tusinga vuluka kuna ntwala. Tuzeye wo vo “Yave olunga-lunganga akwa kwikizi.” (Nku. 31:23) Awonso ana bezolanga Yave yo kunkembelela bekala ye kiese vava e nkumbu andi iveleleswa.—Yez. 38:23.

19. Nkia mambu mambote tuvingilanga kuna ntwala?

¹⁹ Yindula una wadi kala e mvovo mia 2 Timoteo 3:2-5, kele vo e sono kiaki kiavovela e nz’ampa vava wantu ke bevukumunua diaka ko kwa Satana. (Tala e babu “ E Kadilu ya Wantu Kuna Nz’ampa.”) Mpangi George Gangas, * ona wakala muna Buka kia Selo Yambuta, wavova vo: “E nza yambote kikilu ikala vava wantu awonso besambila kaka Yave. Ke kolo ko, okala ye lau dia zingila mu nz’ampa. Okwamanana zinga ekolo Yave kezinga. Tuzinga yakwele mvu.” Kalukatikisu ko vo ekiaki i vuvu kiambote kikilu!