1. Aweyi tuzayidi wo vo e salu kia kitula wantu se alongoki mioyo miau kivuluzanga?

E SALU kia kitula wantu se alongoki, mioyo mia wantu kivuluzanga. Aweyi tuzayidi wo? Vava Yesu kavana o nkanikinu wasonama muna Matai 28:19, 20, wavova vo: ‘Nuenda, nuakitula wantu . . .  se alongoki, nubavuba.’ Ekuma o muntu kafwete vubilwa? Kadi muna vuluzwa, divavanga vo muntu kavubwa. O muntu ovubwa kafwete kwikila vo o luvuluzu lwalu lulendakana kaka wau vo Yesu wafwa mu kuma kieto yo fulwa. Kiaki i kuma Petelo wa ntumwa kavovesela akwandi Akristu vo: ‘O luvubu . . . i lukunuvuluzanga owau . . . muna lufuluku lwa Yesu Kristu.’ (1 Pet. 3:21) Muna kuma kiaki, vava o muntu kevubwanga okotanga muna nzila ifilanga kuna luvuluzu.

2. Mun’owu wa sono kia 2 Timoteo 4:1, 2, nkia mpil’alongi tuzolele kala?

² Muna kitula wantu se alongoki, divavanga vo twakala ye “umbangu wa longa.” (Tanga 2 Timoteo 4:1, 2.) Ekuma? Kadi Yesu watukanikina vo: ‘Nuenda, nuakitula wantu . . .  se alongoki, nubalonga.’ Paulu wa ntumwa mpe wavova vo: “Zindalala [muna salu kiaki] kadi muna vanga wo ovuluzwa kumosi ye awana bekuwanga.” Ozevo, Paulu kuma kiasikila kakala kiau muna kudikila vo: “Vanga mawonso kimana wakala se . . . nlongi ambote.” (1 Tim. 4:16) Muna kitula wantu se alongoki divavanga vo twabalonga. Muna kuma kiaki, tuzolele kala alongi ambote.

3. Mu longi diadi, nkia mambu tuvovela mu kuma kia fila e longi dia Bibila kwa wantu?

³ Tufilanga e longi dia Bibila kwa mafunda ye mafunda ma wantu omu nz’amvimba. Kansi, nze una twalongokele muna longi  diaviokele, tuzolele vo ayingi muna awana tulongokanga yau e Bibila bakituka se alongoki a Yesu Kristu yo vubwa. Muna kuma kiaki, mu longi diadi tuvovela diaka mambu tanu konso nlongi kafwete vanga kimana kasadisa o nlongoki kanungunuka yamuna luvubu.

4. Ekuma o nlongi kafwete vengela e fu kia vova kwayingi vava kefilanga e longi dia Bibila? (Tala mpe e mvovo vana yand’a lukaya.)

⁴ Tutoma zolanga mana tulonganga muna Diambu dia Nzambi. Muna kuma kiaki, tulenda bwa mu ntambu wa vovanga kwayingi mu kuma kia malongi tuzolanga. Kansi, o mpangi ona ofilanga e Longi dia Eyingidilu, Longi dia Bibila dia Nkutakani yovo ona olongokanga e Bibila yo muntu kuna nzo andi, kafwete vovanga kwayingi ko. Muna toma sadila e Bibila, o nlongi kafwete venga e fu kia vovanga kwayingi yo vava sasila mambu mawonso kazeye mu kuma kia sono yovo diambu kelonganga. * (Yoa. 16:12) Yindula o zayi wa Bibila wakala wau vava wavubwa yo zayi una wau o unu. Nanga vava wavubwa, malongi masina kaka wabakulanga mu kuma kia Bibila. (Ayib. 6:1) Owau adieyi tuvova? O zayi waku wawokela kikilu. Kansi, mvu miayingi miavioka mu zaya mawonso ozeye o unu. Muna kuma kiaki, kulongi mu nkumbu mosi ko mawonso ozeye kwa nlongoki.

5. (a) Mun’owu wa sono kia 1 Tesalonika 2:13, nkia diambu tuzolele vo nlongoki kabakula? (b) Aweyi tulenda kasakesela o nlongoki kavovanga ekolo kelongokanga?

⁵ Tuzolele vo nlongoki eto kabakula vo mana kelongokanga muna Bibila metukanga. (Tanga 1 Tesalonika 2:13.) Aweyi tulenda wo vangila? Entete, kasakesanga nlongoki kavovanga ekolo kelongokanga. Vana fulu kia sasila kwa nlongoki e sono ya Bibila, unlomba vo kasasila yo kwa ngeye. Diazole, sadisa nlongoki kamona una kalenda sadila e Diambu dia Nzambi muna zingu kiandi. Unyuvula e yuvu ilenda kunsadisa mu vova mana kayindwidi mu kuma kia sono katangidi. (Luka 10:25-28) Kasikil’owu, olenda kunyuvula: “Nkia fu kia Yave omwene muna sono kiaki?” “Aweyi e sono kiaki kilenda kusadisila muna zingu kiaku?” “Aweyi omwene mu kuma kia diambu diadi olongokele?” (Nga. 20:5) Edi disundidi o mfunu, ke ulolo wa mambu kazeye ko, kansi i mpila o nlongoki kezolelanga yo sadila mana kazeye.

6. Ekuma dinina diambote mu kwendanga kumosi ye ateleki azikuka vava ofilanga e longi dia Bibila?

⁶ Vava okwendanga fila e longi dia Bibila, nga olenda kwenda kumosi ye ateleki ana bena vo alongi ambote? Avo ovangidi wo, ubalomba bazayisa dina bamwene ekolo ofididi e  longi yo kuzayisa kana vo watoma sadila e Bibila. Kansi, avo ozolele kituka nlongi ambote, ofwete songa lulembamu. (Tezanesa ye Mavangu 18:24-26.) I bosi, lomba kwa nteleki azikuka kazayisa kana vo ekolo ofididing’e longi, o nlongoki kabakula mana kalongokelenge. Avo mu nkangalu okwenda mu lumingu lumosi yovo vioka, olenda lomba kwa nteleki ndioyo wazikuka kimana kafila e longi diadi. Ediadi disadisa kimana o nlongoki kakwamanana longoka konso lumingu yo zaya o mfunu wa longi diandi. Kuyindula ko vo oyandi nlongoki “aku kaka” ye ke vena mpangi ankaka ko olenda fila e longi diandi. Vana ntandu, wete dia nlongoki otokanenanga kimana kakwamanana nungunuka muna longokanga e ludi.

7. Adieyi disadisa o nlongoki mu toma yangalela mana kelongokanga?

⁷ O nlongoki kafwete bakulanga vo ongeye ozolanga yo kwikila muna ludi kina muna Bibila. (1 Tes. 1:5) Muna mpila yayi, o nlongoki mpe otoma yangalela mana kelongokanga. Avo dilendakana, unzayisa una e nkanikinu mia Bibila mikusadisilanga muna zingu kiaku. Avo ovangidi wo, o nlongoki aku obakula vo e nkanikinu mia Bibila milenda mpe kunsadisa.

8. Nkia diambu diaka olenda vanga muna sadisa o nlongoki a Bibila? Ekuma ofwete wo vangila?

⁸ Ekolo ofilanga e longi, zayisanga kwa nlongoki e nona ya ampangi ana bawanana ye mpasi nze zina kenuananga zau ye una basundila zo. Olenda kwenda kumosi ye mpangi a nkutakani eno una vo e mbandu andi ilenda sadisa o nlongoki. Yovo olenda solola e nona ya ampangi muna malongi mevaikiswanga muna nzil’eto ya jw.org, mena ye ntu a diambu: “Nkand’a Nzambi Zingu kia Wantu Kisobanga.” * E malongi mama kumosi ye video zisadisa o nlongoki mu zaya o mfunu wa lemvokela e nkanikinu mia Bibila muna zingu kiandi.

9. Aweyi olenda kasakesela nlongoki kazayisanga mana kelongokanga kwa yitu ye akundi andi?

⁹ Avo o nlongoki wasompa, nga o nkaz’andi mpe Bibila kelongokanga? Avo ve, umbokela kakala vana ndambu vava ofila e longi kwa nkaz’andi. Kasakesanga o nlongoki aku kazayisanga mana kelongokanga kwa yitu ye akundi andi. (Yoa. 1:40-45) Aweyi olenda wo vangila? Olenda kunyuvula: “Aweyi olenda sasila e ludi kiaki kwa yitu yaku?” yovo “Nkia sono olenda sadila muna songa e ziku kia diambu diadi kwa nkundi aku?” Muna mpila yayi, osadisa o nlongoki aku kakituka nlongi. Ozevo, vava kekuyifwanisa  olenda yantika samuna e nsangu zambote se nteleki walembi vubwa. Olenda yuvula kwa nlongoki avo ozeye muntu ankaka ozolele longoka e Bibila. Avo i wau, mokena yo muntu ndioyo vana vau yo yantika longoka yandi e Bibila. Unsonga e video ina yo ntu a diambu Aweyi Wantu Belongokelanga Bibila? *

10. Nze una wasonama muna 1 Tesalonika 2:7, 8, aweyi o nlongi kalenda tanginina mbandu a Paulu?

¹⁰ Alongi, nufwete zolanga kikilu alongoki eno. Kadi kuna kulanda balenda kituka mpangi zeno muna mwanda. (Tanga 1 Tesalonika 2:7, 8.) Ke diasazu ko kwa yau mu bembola akundi au yo vanga e nsobani muna zingu kiau kimana basadila Yave. Muna kuma kiaki, tufwete kubasadisa basolola akundi akieleka muna nkutakani. Kala nkundi a nlongoki aku. Vaulanga e ntangwa ya kala yandi kumosi ke muna ntangwa ya longoka kaka ko, kansi muna ntangwa zankaka mpe. Muna songa vo zola otoma kunzolanga, umbokelanga muna telefone, untwikilanga e mensagem yovo kunkingula muna lumbu ina vo kulongoka yandi ko.

11. Adieyi tuzolele vo alongoki eto basolola muna nkutakani? Ekuma?

¹¹ Kingana kimosi kivovanga vo: “O mwana ke longwanga kaka kwa muntu mosi ko.” Diau dimosi mpe, tulenda vova vo: “O nlongoki ke wa ngeye mosi kaka ko, kansi nlongoki a mpangi zawonso muna nkutakani.” Muna kuma kiaki, alongi ambote besunzulanga nlongoki au a Bibila kwa mpangi zankaka muna nkutakani, ana balenda kunsadisa mu toma finama Yave. Muna mpila yayi, o nlongoki olenda vanga kikundi ye mpangi ana bekunsadisa muna mwanda ye vava kewanana ye mambu mampasi muna zingu. Tuzolele sadisa o nlongoki kamona vo ampangi muna nkutakani zola bekunzolanga. Tuzolele mpe kasakesa nlongoki kavanga kikundi ye mpangi zeto zazolwa, i sia vo, kintwadi kia wan’angudi. Avo ovangidi wo, diasazu dikala mu bembola e kikundi ye awana ke bekunsadisa ko mu zola Yave. (Nga. 13:20) Avo ana bakala akundi andi bambembwele, o nlongoki okala ye ziku vo osolola akundi akieleka muna nkutakani a Yave.—Maku 10:29, 30; 1 Pet. 4:4.

12. Ekuma tufwete vovelanga kwa nlongoki oma ma kukiyekola kwa Yave yo luvubu?

¹² Ekolo omokenanga yo nlongoki vovelanga o mfunu wa yekola e zingu kiandi kwa Yave yo vubwa. Kadi e kani dieto vava tulongokanga e Bibila yo muntu, i kunsadisa kasadila Yave yo vubwa. Lembi viokesa e ngonde zayingi vava keyantika longoka e Bibila konso lumingu, musungula vava keyantika kwenda mu tukutakanu,  o nlongoki kafwete bakula vo e kani dieto i kunsadisa mu kituka se Mbangi a Yave.

13. Nkia mambu o nlongoki kafwete vanga muna lwaka yamuna luvubu?

¹³ Vena ye mambu mayingi o nlongoki a Bibila kafwete vanga muna lwaka yamuna luvubu. Diantete, o nlongoki kafwete zaya yo zola Yave yo kwikila muna yandi. (Yoa. 3:16; 17:3) Diazole, kafwete kituka nkundi a Yave yo vanga kikundi ye ampangi muna nkutakani. (Ayib. 10:24, 25; Yak. 4:8) Diatatu, o nlongoki kafwete yambula mavangu mambi yo viluka o ntima muna masumu mandi. (Mav. 3:19) Diayá, o lukwikilu lukumfila mu zayisa mana kelongokanga kwa akaka. (2 Kor. 4:13) Diatanu, o nlongoki oyekola e zingu kiandi kwa Yave yo vubwa. (1 Pet. 3:21; 4:2) Ekwe lumbu kiakiese kikala kwa yeto awonso! Muna kuma kiaki, ekolo o nlongoki kelungisanga mana mevavuanga muna vubwa, unsanisinanga yo kunkasakesa kakwamanana vanga mambu mama.

14. Aweyi nlongi kalenda zayila kana vo nlongoki mu nungunuka kena?

¹⁴ Dialudi vo, luzindalalu tuvuidi o mfunu vava tusadisanga o nlongoki mu nungunuka yamu tezo kia yekola e zingu kiandi kwa Yave yo vubwa. Kansi, tufwete mpe zaya kana vo o nlongoki ozolele kikilu sadila Yave wa Nzambi. Ukiyuvula: ‘Nga imonanga e sinsu isonganga vo o nlongoki mu lemvokela kena e nkanikinu mia Yesu? Nga ozolanga kaka longoka mambu ma Bibila mana mekunyangidikanga?’

15. Nkia mambu mesonga kwa nlongi vo o nlongoki mu nungunuka kena?

¹⁵ Ntangwa ke ntangwa fimpanga kana vo o nlongoki mu nungunuka kena. Muna kuma kiaki ukiyuvula: ‘Nga o nlongoki ame ovovelanga una kemonanga mu kuma kia Yave? Nga osambanga kwa Yave? (Nku. 116:1, 2) Nga oyangalelanga tanga e Bibila? (Nku. 119:97) Nga okwendanga muna tukutakanu konso lumingu? (Nku. 22:22) Nga o nlongoki ame ovanganga e nsobani muna zingu kiandi? (Nku. 119:112) Nga ozayisanga mana kelongokanga kwa yitu ye akundi andi?’ (Nku. 9:1) E kiuvu kisundidi o mfunu i kiaki: ‘Nga o nlongoki ame, ozolele kituka se Mbangi a Yave?’ (Nku. 40:8) Avo nlongoki ke nungunukanga ko muna mambu mama tuyikidi, kuna ndekwa zawonso vava o zaya e kuma. I bosi, kuna ngemba zawonso numokenena e diambu diadi, kansi ye ziku kiawonso. *

16. Nkia mambu malenda kufila mu yambula longoka Bibila yo muntu?

 ¹⁶ Ntangwa ke ntangwa fimpanga kana vo ofwete kwamanana longoka e Bibila yo muntu. Ukiyuvulanga: ‘Nga nlongoki ame okubikanga e longi diandi? Nga ke zolanga kwenda mu tukutakanu ko? Nga wakinu ye fu yambi? Nga wakinu kwenda muna dibundu diandi?’ Avo e mvutu zaku elo, o kwamanana longoka yandi dina nze ngeye olonganga siensa kwa muntu kazolele kwandi siensa ko. Muna kuma kiaki, avo o nlongoki ke songanga luyangalalu ko muna mana kelongokanga ye ke vanganga nsobani ko muna zingu kiandi, nga diambote mu kwamanana longoka yandi?

17. Mun’owu wa sono kia 1 Timoteo 4:16, adieyi alongi awonso a Bibila bafwete vanga?

¹⁷ O kitula wantu se alongoki salu kiamfunu kikilu kwa yeto, muna kuma kiaki tuzolele sadisa nlongoki eto a Bibila kanungunuka yamuna luvubu. Ekiaki i kuma tuzolele toma sadila e Bibila vava tulonganga yo songa vo tuzolanga yo kwikila mana tulonganga. Tuzolele kasakesa nlongoki eto kavanga yikundi muna nkutakani. Tuzolele mpe toma mokenenanga oma ma kukiyekola yo luvubu. Ntangwa ke ntangwa, tuzolele mpe fimpa o lunungunuku lwa nlongoki. (Tala e babu “ Mana Alongi Bafwete Vanga Muna Sadisa Alongoki Banungunuka Yamuna Luvubu.”) Ekwe lau tuna diau dia kuyivana muna salu kivuluzanga e mioyo mia wantu! Muna kuma kiaki, yambula twavanga mawonso tulenda mu sadisa alongoki eto a Bibila banungunuka yamuna luvubu.