LONGI DIA 43
NKUNGA WA 90 Tukasakesa Muntu yo Nkwandi
Aweyi Tulenda Sundila e Fu kia Katikisa?
“Nufimpa mambu mawonso.”—1 TES. 5:21.
DIAMBU DIASINA TULONGOKA
Tulongoka una tulenda sundila lukatikisu lulenda kututwasila mfwilu muna salu kia Yave.
1-2. (a) Nkia maka mambu balenda kadila yo lukatikisu e selo ya Yave? (b) Nkia mambu tulongoka mu longi diadi?
YETO awonso kiakala ambuta yovo aleke, ezak’e ntangwa tukalanga ye lukatikisu. a Kasikil’owu, yindula o nleke una vo nteleki okatikisanga kana vo Yave okumvuanga kikilu o mfunu. Olenda kala yo lukatikisu lwa vubwa. Yindula diaka mpangi mosi ona wabaka e nzengo za sia e salu kia Yave va fulu kiantete muna kileke kiandi vana fulu kiavava mavua mayingi. Wau vo e nsatu za esi nzo andi ziwokele, obakamene kwa ngindu zankaka. Yindula mpangi ankento wa nunu una vo kena diaka ye ngolo zayingi ko. Nanga okendalalanga wau vo ke lendanga diaka vanga mayingi ko. Nga wakiyuvula kala e yuvu eyi: ‘Nga Yave okumvuanga kieleka o mfunu? Nga nzengo zambote yabaka wau yabembola maka mambu muna kuyivana emvimba muna salu kia Yave? Nga yakinu mfunu kuna kwa Yave?’
2 Avo ke tuvangidi ngolo ko muna solola e mvutu za yuvu yayi, dilenda yoyesa lukwikilu lweto muna Yave yo yambula nkutu kunsambila. Mu longi diadi, tulongoka nkanikinu mia Bibila milenda kutusadisa kele vo lukatikisu tuna lwau (1) kana vo Yave okutuvuanga kieleka o mfunu, (2) kana vo nzengo zambote twabaka ye (3) kana vo twakinu o mfunu kuna kwa Yave.
NKI KILENDA KUTUSADISA KELE VO LUKATIKISU TUNA LWAU?
3. Adieyi tulenda vanga avo lukatikisu tuna lwau?
3 Avo lukatikisu tuna lwau, diambote twavavulula e mvutu za yuvu ikututokanesanga muna Bibila. Avo tuvangidi e diadi, tukumama, tuzikuka muna kimwanda ye twakubama tukala muna ‘sikila muna lukwikilu.’—1 Kor. 16:13.
4. Aweyi tulenda ‘fimpila e mambu mawonso’? (1 Tesalonika 5:21)
4 Tanga 1 Tesalonika 5:21. Bibila kikutukasakesanga vo ‘twafimpanga mambu mawonso.’ Aweyi tulenda wo vangila? Muna kala ye ziku vo mana tukwikilanga maludi, tufwete mo tezanesanga ye mana Bibila kivovanga. Muna bonga e nona, yindula e toko dimosi otokananga kana vo mfunu kena vana meso ma Nzambi. Nga kafwete kwikila kaka vo e ngindu zazi za ludi? Ve! Kafwete ‘fimpa mambu mawonso’ muna vava zaya una Yave kebadikilanga e diambu diadi.
5. Aweyi tulenda sololwela e mvutu za Yave muna mambu mekututokanesanga?
5 Ekolo tutanganga e diambu dia Nzambi, dikalanga nze yeto “tuwanga” Yave okutuvovesanga. Kansi, muna bakula e ngindu zandi muna diambu dikututokanesanga, mayingi tufwete vanga ke tanga kaka Bibila ko. Tufwete vava e sono ivovelanga e diambu dikututokanesanga yo toma yo longoka. Muna wo vanga, tufwete vavulula muna nkanda mivaikiswanga muna nkubik’a Yave. (Nga. 2:3-6) Tufwete samba kwa Yave muna kunlomba lusadisu kimana twasolola e mvutu za yuvu yeto. I bosi, tulenda vavulula e nkanikinu mia Bibila ye malongi tulenda sadila muna diambu dikututokanesanga. Tulenda mpe vua e nluta muna longoka e zingu kia wantu beyikwanga muna Bibila ana babwilwa e diambu tunuananga diau.
6. O tukutakanu aweyi tulenda kutusadisila mu sunda konso lukatikisu?
6 Vava tukalanga muna tukutakanu, dikalanga mpe nze Yave okutuvovesanga. Avo tuna ye fu kia lembi kondwanga muna tukutakanu, tulenda wá e diambu muna longi yovo muna mvutu za mpangi mosi dikala e betela ye diambu dikututokanesanga. (Nga. 27:17) Owau, yambula twabadika una tulenda sundila konso lukatikisu tuna lwau.
VAVA OKALANGA YO LUKATIKISU KANA VO YAVE MFUNU KEKUVUANGA
7. Nkia kiuvu akaka balenda yuvula?
7 Nga wakiyuvula kala: ‘Nga Yave mfunu kikilu kekumvuanga? Avo ukuyimwenanga vo kuna mfunu ko, e ngindu za kituka nkundi a Mvangi aku, zilenda moneka vo ke za ludi ko. Davidi wa Ntinu nanga wakala mpe ye ngindu zazi. Wasivika vava kazaya vo Yave olenda sia e sungididi kwa mpasi muntu. Wayuvula vo: “E Yave, o muntu nki kimana wantala, yo mwan’a muntu wansia sungididi?” (Nku. 144:3) Akweyi olenda sololwela e mvutu za kiuvu kiaki?
8. Landila 1 Samuele 16:6, 7, 10-12, o Yave nki ketalanga muna wantu?
8 Muna Bibila, tutanganga wantu ana bamonekanga vo ke bakala mfunu ko, kansi Yave wabasia e sungididi. Kasikil’owu, Yave watuma Samuele muna nzo a Yisai kimana kakusa mosi muna wan’andi se ntinu a Isaele. Yisai wabokelesa nsambwadi muna wan’andi nana ye wabasunzula kwa Samuele, kansi kabokelesa Davidi ko wa mwan’andi ona wakala nleke. b Kansi Davidi yandi wasolwa kwa Yave. (Tanga 1 Samuele 16:6, 7, 10-12.) Yave wamona kana Davidi nani kikilu kakala. Wazaya wo vo nleke ndiona zola kikilu kakala kwau muna yandi.
9. Ekuma olenda kadila ye ziku vo Yave mfunu kekuvuanga? (Tala mpe foto.)
9 Yindula mambu mesonganga vo Yave mfunu kekuvuanga. Okuvananga malongi muna mambu masikididi onuananga mau. (Nku. 32:8) Aweyi kadi wo vangila kele vo katomene kuzaya ko? (Nku. 139:1) Avo osadidi malongi ma Yave yo mona una mekusadisila, okala ye ziku vo Yave mfunu kikilu kekuvuanga. (1 Tus. 28:9; Mav. 17:26, 27) Yave omonanga e ngolo ovanganga. Omonanga mpe fu yaku yambote ye ozolele kala nkundi aku. (Yer. 17:10) Yave otoma yangalala kele vo ngeye mpe ozolele kala se nkundi andi.—1 Yoa. 4:19.
“Avo umvavidi [Yave], oyambula vo wansolola.”—1 Tus. 28:9. (Tala e tini kia 9) c
VAVA OKALANGA YO LUKATIKISU KANA VO NZENGO ZAMBOTE WABAKA
10. Vava tuyindulanga e nzengo twabaka muna mvu miavioka, nkia yuvu dilenda vaikisa?
10 Ezak’e ntangwa, akaka balenda yindula e nzengo babaka muna mvu miavioka ye betokananga kana vo nzengo zambote babaka. Nanga muna kuyivana emvimba muna salu kia Yave, akaka babaka e nzengo za yambula e salu kia tunda yovo kinkita kiambote. Owau se mvu miayingi miviokele kala. Balenda yindula muntu bazeye ona wabaka nzengo zaswaswana, owau o muntu ndioyo una ye nzimbu zayingi ye zingu kiambote. Muna kuma kiaki, olenda yuvula: ‘Nga nzengo zambote yabaka vava yakivana emvimba muna salu kia Yave? Yovo nga e nzengo zazi, i zau zamfila mu vidisa malau mankaka?’
11. Nkia diambu diatokanesanga o nsoneki a Nkunga 73?
11 Avo e ngindu zazi zilwakidi, yindula una kamona o nsoneki a Nkunga 73. Wamona wantu ankaka ana ke basadilanga Yave ko bakala yo vimpi wambote, kimvuama ye diamonekanga vo ke vakala ye konso diambu ko diabatokanesanga. (Nku. 73:3-5, 12) Vava kamona vo e zingu kiau kiambote kiakala, wayantika yindula vo kabaka nzengo zambote ko vava kayivana emvimba muna salu kia Yave. Wamona e “mpasi e lumbu kiamvimba” mu kuma kia diambu diodio diakendelekanga. (Nku. 73:13, 14) Aweyi kasundila lukendalalu lwandi?
12. Landila Nkunga 73:16-18, o ntozi a nkunga aweyi kasingikila diambu diantokanesanga?
12 Tanga Nkunga 73:16-18. Ntozi a nkunga wayenda vana fulu kiavuvama muna nzo avauk’a Yave. Vava kakala muna nzo avauka, watoma yindula. Kana una vo diamonekanga vo e zingu kia yimpumbulu kiambote kiakala, ntozi a nkunga wabakula vo ke bakala ye vuvu kia kusentu ko. Vava kabakula diambu diadi, wavua luvuvamu lwa ntima. Wazaya wo vo osia e salu kia Yave va fulu kiantete i nzengo zisundidi o mfunu kabaka. Muna kuma kiaki, wakumika e nzengo zandi za kwamanana sadila Yave.—Nku. 73:23-28.
13. Aweyi olenda vuila luvuvamu lwa ntima kele vo lukatikisu okalanga lwau mu kuma kia nzengo zina wabaka? (Tala mpe foto.)
13 Muna lusadisu lwa Diambu dia Nzambi, ngeye mpe olenda vua luvuvamu lwa ntima. Mu nkia mpila? Yindula lekwa yawonso yamfunu una yau, kumosi ye nsambu za Yave. Sungamena wo vo awana ke besadilanga Yave ko ke balendi tambula lusadisu lwandi ko. Okala ye zingu kiambote i diambu disundidi o mfunu kuna kwa yau, kadi ke bena ye vuvu kia kusentu ko. Kansi, ongeye vana ntandu a kala ye lekwa yambote owau, ovuidi mpe e vuvu kia tambula nsambu zakwele mvu zina Yave kasila o nsilu. (Nku. 145:16) Badika mpe diambu edi: Nga ziku una kiau vo e zingu kiaku kiambote kiadi kala kele vo nzengo zankaka wabaka muna mvu miavioka? E ziku kia diambu i kiaki: Awana beyambulanga vo o zola kwau muna Nzambi ye akwau kwabafila muna baka e nzengo, ke balendi vidisa konso lekwa kiambote ko.
Yindulanga e nsambu zina Yave kasila o nsilu (Tala e tini kia 13) d
VAVA OKATIKISANGA KANA VO WAKINU O MFUNU KUNA KWA YAVE
14. Ekuma akaka ke bekadilanga ye vuvu ko? Nkia kiuvu kikubalwakilanga muna ngindu?
14 Mu kuma kia kinunu, mayela yovo uvanguki, akaka muna selo ya Yave ke belendanga diaka vanga mayingi ko muna salu kia Yave. Nanga ediadi dikubafilanga muna kuyimwena vo ke bena diaka mfunu ko vana meso ma Yave. I bosi, bekukiyuvulanga vo: ‘Nga yakinu o mfunu kuna kwa Yave?’
15. Nkia ziku kakala kiau o nsoneki a Nkunga 71?
15 O nsoneki a Nkunga 71 ngindu zazi mpe kakala zau. Wasamba vo: “Avo ngolo zame zisukidi, kumbembola ko.” (Nku. 71:9, 18) Kana una vo i wau, o ntozi a nkunga wakala ye ziku vo avo okwamanene sadila Nzambi andi ye kwikizi, Yave okumfila ye kunsadisa. Nze una kalongoka ntozi a nkunga, Yave oyangalelanga awana bevanganga mawonso balenda muna kunsadila kanele vo bena ye mambu mekubakakidilanga.—Nku. 37:23-25.
16. Mu nkia mpila anunu benena o mfunu kuna kwa Yave? (Nkunga 92:12-15)
16 Avo u mpangi a nunu, ukimwenanga nze una Yave kekumwenanga. Olenda kusadisa mu sikila ye kwikizi kanele vo vena ye mambu mekukakidilanga. (Tanga Nkunga 92:12-15.) Vana fulu kia sia e sungididi mu mana kulendanga vanga ko, sia sungididi mu mana olendanga vanga. Kasikil’owu, e mbandu aku ya kwikizi ye mpila otokanenanga e wete dia akaka, ilenda kumika akaka. Olenda zayisa kw’akaka una Yave kekusadisilanga mu mvu miami miawonso ye vuvu kiasikila una kiau muna ndungan’a nsilu miandi. Kuvilakani ko vo e sambu yaku olombanga muna wete dia akaka, ivuidi o nkuma. (1 Pet. 3:12) Kiakala nkia mpila zingu tuna kiau, yeto awonso tuna ye lekwa tulenda vana kwa Yave ye kw’akaka.
17. Ekuma tufwete vengela e fu kia kuyitezanesa ye akaka?
17 Avo lukendalalu okalanga lwau wau vo kulendanga vanga diaka mayingi ko muna salu kia Yave, kala ye ziku vo Nzambi otoma yangalelanga mana olendanga vanga. Venga fu kia tezanesa mana ovanganga ye mana akaka bevanganga. Ekuma? E kuma kadi Yave kekututezanesanga ye akaka ko. (Ngal. 6:4) Kasikil’owu, Maria wavana lukau lwa mazi mansunga mantalu kwa Yesu. (Yoa. 12:3-5) Nswaswani yo Maria, o nkento wafwila yakala, wa nsukami, wavana nkayilu wa mbiya zole muna tempelo. (Luka 21:1-4) Kansi, vana fulu kia tezanesa akento awaya yau wole, Yesu wamona lukwikilu lwau basonga. Yesu watanginina Se diandi mu mpila yalunga. Muna kuma kia zola kwaku ye lukwikilu lwaku muna Yave, vana meso mandi konso dina ovanganga muna salu kiandi, diantalu kikilu, kiakala vo diandwelo kuna kwa ngeye.
18. Nki kilenda kutusadisa mu sunda e fu kia lukatikisu? (Tala mpe babu, “ Diambu dia Yave Dilenda Kusadisa mu Sunda e Fu kia Lukatikisu.”)
18 Ezak’e ntangwa yeto awonso tukalanga yo lukatikisu. Kansi nze una tumwene, e Bibila kina vo i Diambu dia Nzambi, kilenda kutusadisa mu sunda e fu kia lukatikisu. Ozevo, vanga mawonso olenda muna solola e mvutu za mambu mana okatikisanga. I bosi, vingisa e vuvu vana fulu kia lukatikisu. Yave otomene kuzaya. Yave oyangalelanga e ngolo ovanganga ye osianga nsilu vo okusambula. Kala ye ziku vo Yave ozolanga yo lunga-lunga konso selo kiandi kia kwikizi.
NKUNGA WA 111 Kuma kia Luyangalalu Lweto
a MVOVO MISASILU: O lukatikisu tuvovela mu longi diadi, i lukatikisu tukalanga lwau kana vo mfunu twina kuna kwa Yave yovo kana vo e nzengo zina twabaka zambote. Ke katikisa ko mana Bibila kilonganga. Kadi o lukatikisu lwalu lulenda songa kondwa kwa lukwikilu muna Yave ye nsilu miandi.
b Kana una vo e Bibila ke kikutuzayisanga ko e kimbuta kia mvu o Davidi kakala miau vava Yave kansola, nanga nleke kikilu kakala.—Tala Eyingidilu dia Okutoba-Desemba, 2011 luk. 21 tini kia 2.
