E sono kiaki kivovanga vo: “Avo omwene lubangamu lwa nsukami ye mbendomonu’a unsongi ye ziku muna mvivu aku, kusivika dio ko. Kadi ndiona wina ye wisa otalwanga kwa ndiona unsundidi e wisa, vena mpe ye akaka ana babasundidi e wisa.”—Kim. 5:8.

Muna ngindu za wantu e sono kiaki ayadi a nza kiyikanga. Kansi avo tutomene fimpa, tumona vo e sono kiaki kivovanga mpe e ludi mu kuma kia Yave, kina kikutufiaulwisanga yo kutukasakesa.

E sono kia Kimpovi 5:8 kiyikanga o ntinu ona obangikanga asukami yo lembi kadila yau kuna unsongi. Kansi, o ntinu ndioyo kafwete sungamena vo nanga otalwanga kwa muntu ona unsundidi e wisa. Kieleka, vena kikilu ye akaka ana bansundidi e wisa. Diankenda vo muna luyalu lwa wantu, ayadi awaya awonso akwa loko. Ekiaki i kuma o nkangu umwenanga e mpasi.

Kana nkutu vava tudimbulanga e vuvu mu kuma kia mambu mampasi, tulenda fiaulwiswa mu zaya vo Yave ‘otalanga nkutu ayadi akwa wisa.’ Tulenda lomba lusadisu kwa Nzambi yo yekeka e zitu dieto kwa yandi. (Nku. 55:22; Fili. 4:6, 7) Tuzeye wo vo “meso ma Yave mekwendanga muna nza yawonso muna songa nkum’andi muna wete dia awana bena yo ntim’asikila muna yandi.”—2 Tus. 16:9.

Muna kuma kiaki, e sono kia Kimpovi 5:8, kikutusungamesanga vo muna luyalu lwa wantu, vekalanga kaka yo muntu osundidi e wisa. Edi disundidi o mfunu, e sono kiaki kikutusungamesanga mpe vo Yave i ndiona osundidi e wisa, i sia vo, Mpungu-ngolo. Owau, osadilanga Yesu Kristu wa Mwan’andi mu yala se Ntinu a Kintinu kiandi. O Mpungu-ngolo, ona otalanga mawonso mevangamanga, nkwa unsongi muna mawonso. O Mwan’andi mpe nkwa unsongi.