LONGI DIA 40
“Befilanga Ayingi Muna Unsongi”
“Awana befilanga ayingi muna unsongi [bekezima] nze ntetembwa, yakwele mvu.”—DAN. 12:3.
NKUNGA WA 151 Osinga Bokela
MANA TULONGOKA *
1. Nkia mambu makiese mekutuvingilanga kuna mfoko a Luyalu lwa Kristu lwa Funda dia mvu?
EKWE lumbu kiakiese kikala vava o wantu beyantika fuluka ova ntoto muna kolo kia Luyalu lwa Kristu lwa Funda dia mvu! Kieleka, tulakukilanga o moyo wa mona diaka azolwa eto awonso ana bafwa. O Yave mpe iwau kemonanga. (Yobi 14:15) Yindula e kiese konso muntu kekala kiau ova ntoto mu tambula azolwa andi ana bafwa. Nze una twalongokele muna longi diaviokele, “ansongi,” i sia vo, awana bena vo e nkumbu zau zasonama muna nkand’a moyo, “befulwa mu vua o moyo.” (Mav. 24:15; Yoa. 5:29) Nanga ndonga muna yitu ye akundi eto befuluka kuna lubantiku vava Armangedo ivioka. * I bosi, “awana bena vo ke ansongi ko,” i awana ke bakala ye lau ko dia zaya Yave ngatu kunsadila ye kwikizi kiawonso vitila bafwa, “befulwa mu fundiswa.”
2-3. (a) Landila e sono kia Yesaya 11:9, 10, ekuma ivangamena e nkubika yampwena ya longa o wantu? (b) Nkia mambu tulongoka mu longi diadi?
2 Awonso ana befuluka divava vo balongwa. (Yes. 26:9; 61:11) Muna kuma kiaki, vevangwa e nkubika ya longa o wantu ina ke isidi vangama ko muna lusansu lwawonso lwa wantu. (Tanga Yesaya 11:9, 10.) Ekuma e nkubika yayi ivangamena? Kadi awana bena vo ke ansongi ko vava befuluka divava vo balongoka mu kuma kia Yesu Kristu, nkubika ya Kintinu, lukûlu ye diambu ditadidi nkumbu a Yave ye kimfumu kiandi. Kana nkutu awana bena vo ansongi ana befulwa divava vo balongwa una Yave kasengomwena e kani diandi malembe-malembe mu kuma kia ntoto. Kadi akaka muna selo yayi yakwikizi bafwa vitila e diambu dia Yave diamanisa sonekwa, o unu diyikilwanga vo Bibila. Ozevo, awana bena vo ke ansongi ko ye awana bena vo ansongi, mambu mayingi belongoka.
3 Mu longi diadi, tubaka e mvutu za yuvu eyi: Aweyi e nkubika yayina yalongela o wantu ivangamena? Adieyi dibwila awana betambulwila mana belongwa ye awana ke betambulwila ko? E mvutu za yuvu yayi mfunu kikilu zina kwa yeto o unu. Nze una tumona, vena ye ungunza wasonama muna nkand’a Daniele ye Lusengomono ukutusadisa mu toma bakula e diambu diadi yo zaya una e nkubika yayi ivangamena vava o wantu befuluka. Entete, yambula twafimpa mambu masakulwa muna ungunza wa Daniele 12:1, 2.
“ANA BAFWA, BESIKAMA”
4-5. E sono kia Daniele 12:1, nkia diambu kivovanga mu kuma kia lumbu yambaninu?
4 Tanga Daniele 12:1. O nkand’a Daniele ukutuvovesanga e ndandani ivangamena o mambu omu lumbu yambaninu. Kasikil’owu, e sono kia Daniele 12:1 kisonganga vo Mikaele una vo i Yesu Kristu ‘otelamene muna wete dia nkangu a [Nzambi].’ O ungunza wau wayantika lungana muna mvu wa 1914 vava Yesu katumbikwa se Ntinu a Kintinu kia Nzambi kuna zulu.
5 Kansi, Daniele wasakula mpe vo Yesu ‘otelama’ muna “ntangw’ampasi eyi ke yateka kala ko tuka kuna lubantiku lwa zula yamuna ntangwa yayina.” E ‘ntangwa yayi yampasi,’ i kolo kia “mpasi zayingi” ziyikwanga muna Matai 24:21. Yesu otelama, i sia vo, ovanga e diambu muna tanina o nkangu a Nzambi kuna mfoko a ntangwa yayi yampasi, i sia vo, muna Armangedo. O nkand’a Lusengomono uyikilanga o nkangu wau vo ‘ndong’ayingi ina itukidi muna mpasi zayingi.’—Lus. 7:9, 14.
6. Aweyi tuzayidi wo vo o lufuluku luyikwanga muna Daniel 12:2, muna nz’ampa luvangamena? Sasila. (Mu kuma kia lufuluku luvangama ova ntoto, tala “Yuvu Y’atangi” omu Eyingidilu diadi.)
6 Tanga Daniele 12:2 ye mvovo vana yanda. Adieyi divangama kwa ndong’ayingi ana bevuluka muna ntangw’ampasi? O ungunza wau wa Daniele ke uyikanga lufuluku lwa kimwanda ko lwa selo ya Nzambi ana befulukanga mu lumbu yayi yambaninu, nze una twabakulwilanga e sono kiaki mu mvu miavioka. * Muna vova e ludi, e mvovo mia Daniele miyikanga o lufuluku luna luvangama muna nz’ampa. Ekuma tuvovele wo? Kadi o mvovo “ntoto” wasadilwa muna sono kia Daniele, wau umosi kwandi yo mvovo “Ziami” wasadilwa muna Yobi 17:16. Ediadi disongele vo e mvovo mia Daniele 12:2 miyikanga lufuluku luna luvangama vava e vita ya Armangedo ivioka.
7. (a) Ofuluka muna “moyo a mvu ya mvu,” aweyi disongele? (b) Nki i “lufuluku lusundidi owete”?
7 Kansi adieyi e sono kia Daniele 12:2 kizolele songa vava kiyikanga vo akaka befuluka muna “moyo a mvu ya mvu”? Ediadi disongele vo muna kolo kia 1.000 dia mvu, awana befuluka bafwete toma zaya yovo kwamanana longoka oma ma Yave yo Yesu yo kunlemvokela kimana bavua moyo a mvu ya mvu. Disongele mpe vo kana nkutu ansongi ana befuluka ngolo bevanga kimana bavua moyo a mvu ya mvu. (Yoa. 17:3) O ‘lufuluku lwau lusundidi owete’ ke mu lufuluku ko lwavangama kuna nz’ankulu. (Ayib. 11:35) Ekuma? Kadi awana bafulwa kuna nz’ankulu bafwa diaka.
8. O fuluka “muna luvezo yo lumengo lwa mvu ya mvu” aweyi disongele?
8 Kansi ke awonso ko ana befuluka betambulwila longwa kwa Yave. O ungunza wa Daniele uvovanga vo akaka befuluka “muna luvezo ye lumengo lwa mvu ya mvu.” Mu kuma kia ntim’au ambadi, e nkumbu zau ke zisonama ko muna nkand’a moyo ngatu vua moyo a mvu ya mvu. Ozevo, wantu awaya, “lumengo lwa mvu ya mvu” bevua, i sia vo, befwaswa e mvimba. Ediadi disongele vo e sono kia Daniele 12:2 kivovelanga dina dibwila awana befuluka mun’owu wa kadilu besonga kuna nim’a lufuluku lwau. * (Lus. 20:12) Muna kuma kiaki, vekala ye akaka bevua moyo a mvu ya mvu ye akaka ke bevua moyo a mvu ya mvu ko.
“BEFILANGA AYINGI MUNA UNSONGI”
9-10. Aki nani “bekezima nze ntangwa kuna zulu”? Nkia ntangwa e diambu diadi divangama?
9 Tanga Daniele 12:3. Nkia diambu diaka divangama vava e “ntangw’ampasi” ivioka? Vana ntandu a mana tuyikidi kala Daniele 12:2, e tini kia 3 kiyikanga diambu diankaka divangama kuna nim’a mpasi zayingi.
10 Aki nani “bekezima nze ntangwa kuna zulu”? E mvutu zina muna mvovo mia Yesu mina muna Matai 13:43, mivovanga vo: “Muna ntangwa yayina, ansongi bekezima nze ntangwa muna Kintinu kia Se diau.” Muna mvovo miami, Yesu wavovela o “wan’a Kintinu,” i sia vo, akuswa ana beyala yandi muna Kintinu kia zulu. (Mat. 13:38) Muna kuma kiaki, e sono kia Daniele 12:3 kiyikanga akuswa ye salu besala muna kolo kia Luyalu lwa Funda dia Mvu.
Akuswa, 144.000 besala kumosi yo Yesu Kristu muna fila e nkubika yalonga o wantu ivangama muna kolo kia 1.000 dia mvu (Tala e tini kia 11)
11-12. Nkia salu akuswa besala muna kolo kia 1.000 dia mvu?
11 Aweyi akuswa befidila “ayingi muna unsongi”? Akuswa besala kumosi yo Yesu Kristu muna fila e nkubika yalonga o wantu ivangama ova ntoto muna kolo kia 1.000 dia mvu. Akuswa, i sia vo, 144.000 ke beyala kaka se atinu ko kansi besala mpe se anganga. (Lus. 1:6; 5:10; 20:6) Nze anganga, ‘bewuka e zula,’ i sia vo, malembe-malembe besadisa o wantu mu kituka se wantu alunga. (Lus. 22:1, 2; Yez. 47:12) Ekwe kiese bekala kiau akuswa awaya!
12 Aki nani bekala muna buka kia “ayingi” ana befilwa muna unsongi? Awana befuluka, awana bevuluka muna vita ya Armangedo kumosi yo wan’akete ana bewutuka muna nz’ampa. Kuna mfoko a 1.000 dia mvu, awonso bezingila ova ntoto bekituka se wantu alunga. Ozevo, nkia ntangwa e nkumbu zau zisonama muna lapiseira muna nkand’a moyo yo lembi vunzunua diaka?
LUTONTO LWANSUKA
13-14. Adieyi wantu awonso alunga ova ntoto bafwete vanga vitila bavua moyo a mvu ya mvu?
13 E diambu tufwete sungamena vo okala muntu alunga ke disongele ko vo vana vau ovua moyo a mvu ya mvu. Yindula dina diavangama kwa Adami yo Eva. Muna vua moyo a mvu ya mvu, diavava vo balemvokela Yave wa Nzambi. Diankenda mu zaya wo vo ke balemvokela Nzambi ko.—Roma 5:12.
14 Kuna mfoko a 1.000 dia mvu, o wantu awonso ova ntoto alunga bekala. Nga ediadi disongele vo wantu awonso alunga beyikama luyalu lwa Yave? Yovo bekala nze Adami yo Eva, kana una vo wantu alunga bakala, kansi ke basonga kwikizi ko muna Yave? E yuvu yayi ifwete vaninua e mvutu. Kansi, aweyi ivaninua e mvutu?
15-16. (a) Nkia ntangwa wantu awonso bekala ye lau diasonga e kwikizi kiau muna Yave? (b) Adieyi divangama kuna mfoko a lutonto lwalu?
15 Muna kolo kia 1.000 dia mvu, Satana mu pelezo kekala. Muna kolo kiokio, Satana kelenda vukumuna wantu ko. Kansi, kuna mfoko a 1.000 dia mvu, Satana ovaikiswa muna pelezo kimana katonta o wantu. Muna kolo kiokio, Satana ovava vukumuna o wantu bekala vo balunga. Muna lutonto lwalu, wantu awonso alunga ova ntoto bekala ye lau dia songa vo nkumbu a Nzambi bezitisanga ye kimfumu kiandi beyikamanga. (Lus. 20:7-10) E nzengo konso muntu kebaka zisonga kana vo e nkumbu andi i sonekwa yo kwamanana muna nkand’a moyo.
16 Bibila kivovanga vo vena yo wantu bekala nze Adami yo Eva. Kanele vo o lutangu lwau ke luzayakene ko, o wantu awaya ke beyikama kimfumu kia Nzambi ko. Adieyi dikubabwila? E sono kia Lusengomono 20:15 kikutuvovesanga vo: “Konso ona walembi sonama e nkumbu muna nkand’a moyo, otubilu vana yanga dia tiya.” Elo, akolami awaya befwaswa yakwele mvu. Kansi, ayingi muna wantu alunga, bevioka muna lutonto lwansuka. E nkumbu zau zisonama muna lapiseira yakwele mvu.
MU “LUMBU YAMBANINU”
17. Adieyi Daniele kasakula divangama omu lumbu yeto? (Daniele 12:4, 8-10)
17 Diakiese mu yindula o mambu mevangama kuna sentu. Kana una vo iwau, tulenda yangalala kadi vena ye mambu mambote mevangamanga omu lumbu yeto. Kadi Daniele wavoveswa kwa mbasi mambu mamfunu mevangama omu “lumbu yambaninu.” (Tanga Daniele 12:4, 8-10; 2 Tim. 3:1-5) O mbasi wavovesa Daniele vo: “Zayi wakieleka uwokela.” Elo, e mvovo mia ungunza wau mitoma bakulwanga kwa nkangu a Nzambi o unu. O mbasi wakudikila diaka vo muna kolo kiaki, “yimpumbulu bevanga umpumbulu, kavena kimpumbulu ko osinga bakula.”
18. Ke kolo ko, nkia diambu dibwila wantu ambi?
18 O unu dilenda moneka vo o wantu ambi bevanganga mambu mayingi mambi, kansi ke betumbwanga ko. (Mal. 3:14, 15) Ke kolo ko Yesu otumba e nkombo yo kubavambula vana vena mameme. (Mat. 25:31-33) O wantu awaya ambi ke bevuluka ko muna mpasi zayingi ngatu fulwa kimana bazingila muna nz’ampa. E nkumbu zau mpe ke zisonama ko muna “nkand’a luyindulu” uyikwanga muna nkand’a Malaki 3:16.
19. Nkia diambu tufwete vanga owau? Ekuma? (Malaki 3:16-18)
19 Eyayi i ntangwa tufwete songa muna mavangu meto vo ke tu wantu ambi ko. (Tanga Malaki 3:16-18.) Kadi owau Yave oyikakesanga o wantu ana kebadikilanga vo ‘lusalu lwandi lwa kuyivuila’ yovo wantu bena vo bantalu kikilu kwa yandi. Kieleka, oyeto tuzolele kala muna buka kia wantu awaya.
Ekwe ntangwa a kiese ikala muna mona Daniele, yitu yeto, akundi eto yo wantu ankaka ana “betelama” yo vua e kunku kiau muna nz’ampa! (Tala e tini kia 20)
20. Nkia nsilu wansuka o Nzambi kasia kwa Daniele? Ekuma olakukilanga e ndungana nsilu wau o moyo?
20 Kieleka, mu ntangwa a kiese kikilu tuzingilanga. Tuvingilanga mpe mambu mayingi makiese mevangama kuna ntwala. Ke kolo ko, tumona o lufwasu lwa wantu awonso ambi. I bosi, tumona e ndungana a nsilu una Yave kasia kwa Daniele vo: “Kuna mbaninu a lumbu, otelama, watambula e kunku kiaku.” (Dan. 12:13) Kieleka, olakukilanga o moyo e lumbu kina Daniele, yitu yaku ye akundi aku “betelama” diaka, i sia vo, befuluka. Ozevo, vanga mawonso owau kimana wakala selo kia kwikizi kia Yave, muna mpila yayi okala ye ziku vo e nkumbu aku ikwamanana kala yasonama muna lapiseira muna nkand’a moyo.
NKUNGA WA 80 “Nuteza, Nwamona wo vo Yave Wambote”
^ E longi diadi disingika umbakuzi weto mu kuma kia nkubika yampwena yalonga o wantu muna nz’ampa iyikwanga muna Daniele 12:2, 3. Tuzaya nkia ntangwa e nkubika yayi iyantika ye aki nani bekala muna nkubika yayi. I bosi, tufimpa una e salu kiaki kikubikila o wantu muna lutonto lwansuka luvangama kuna mfoko a Luyalu lwa Kristu lwa Funda dia mvu.
^ Nanga o wantu antete befuluka i awana befwanga ye kwikizi omu lumbu yayi yambaninu. I bosi, befuluka awana bafwa vitila e lumbu yayi yambaninu. Nanga o lufuluku luvangamena landila konso mbandu, avo iwau kikilu divangamena disongele vo konso muntu muna mbandu kawutukila otambula awana kazaya. Kansi, e Bibila kivovanga vo o lufuluku lwa awana bekwendanga kuna zulu, luvangamenanga konso muntu muna “ntangw’andi.” Tulenda vova vo, i diau mpe divangama mu kuma kia awana befuluka ova ntoto, konso muntu mpe muna ntangw’andi.—1 Kor. 14:33; 15:23.
^ Ediadi disingikidi umbakuzi weto mu dina diasasilwa muna nkanda Preste Atenção à Profecia de Daniel! kapu kia 17 ye muna Eyingidilu dia 1 Yuli, 1987 lukaya lwa 21-25.
^ Ozevo, e mvovo “ansongi ye awana bena vo ke ansongi ko” miasonama muna Mavangu 24:15 ye mvovo “awana bavanga mambu mambote ye awana bavanga mambu mambi” miasonama muna Yoane 5:29, miyikanga e kadilu basonga awana befuluka vitila bafwa.
