Tala una e Bibila kivaninanga e mvutu za yuvu yayi.

E sono kia Mavangu 24:15, kivovanga vo: “Vekala yo lufuluku lwa ansongi ye awana bena vo ke ansongi ko.” Ansongi i awana balemvokela Nzambi vitila bafwa, e nkumbu zau zasonama muna nkand’a moyo. (Mal. 3:16) Awana bena vo ke ansongi ko i awana ke bakala ye lau dia zaya Yave ko vitila bafwa, e nkumbu zau ke zasonama ko muna nkand’a moyo.

E sono kia Yoane 5:28, 29, kivovelanga e buka yole yayi iyikwanga muna Mavangu 24:15. Yesu wavova vo: “Awana bavanga mambu mambote, befulwa mu vua o moyo, awana bavanga mambu mambi, befulwa mu fundiswa.” Ansongi i awana bavanga mambu mambote vitila bafwa. Oyau befuluka mu mvua o moyo kadi e nkumbu zau zasonama kala muna nkand’a moyo. Kansi, awana bena vo ke ansongi ko mambu mambi bavanga vitila bafwa. Befuluka muna fundiswa. Kadi e nkumbu zau kezasonama ntete ko muna nkand’a moyo, muna kuma kiaki befundiswa ntete yovo fimpwa. Muna kolo kiaki, bekala ye lau dialongoka mu kuma kia Yave kimana e nkumbu zau zasonekwa muna nkand’a moyo.

E sono kia Lusengomono 20:12, 13, kisasilanga vo awonso befuluka divava vo balemvokela e “mambu masonama muna nkand’a moyo,” i sia vo, nsiku mia mpa mina Yave kekutuvana muna nz’ampa. Awana ke belemvokela mio ko vondwa bevondwa.—Yes. 65:20.

E sono kia Daniele 12:2, kiasakula vo: Akaka befuluka “muna moyo a mvu ya mvu, ankaka muna luvezo ye lumengo lwa mvu ya mvu.” E sono kiaki kisasilanga dina divangama kuna mfoko a 1.000 dia mvu, akaka bevua “moyo a mvu ya mvu” akaka “lumengo lwa mvu ya mvu.” Ediadi disongele vo akaka bevua moyo a mvu ya mvu avo i akaka bevondwa yakwele mvu.—Lus. 20:15; 21:3, 4.

Yindula e nona eki: E buka yole yayi ifuluka ilenda tezaneswa ye nzenza zizolele kwenda zingila ku nsi yankaka. Ansongi balenda tezaneswa ye nzenza ana bevewanga e visto mu kuma kia salu yovo zingila muna nsi yayina. Muna kuma kiaki, vena ye mambu mana luyalu kekubavaninanga o nswa mu vanga ye bekalanga mu luvevoko. Awana bena vo ke ansongi ko balenda tezaneswa ye nzenza ana betambula e visto mu kolo kiakete. E nzenza zazi avo bazolele kwamanana zingila muna nsi yayina yampa, bafwete vanga mambu mana mesonga vo bafwana bundwa e vuvu kwa luyalu. Diau dimosi mpe kwa awana bena vo ke ansongi ko, vava befuluka divava vo balemvokela e nsiku mia Yave yo vanga e mambu mesonga vo ansongi, avo bazolele kwamanana zingila muna Paradiso. Kiakala nkia mpila visto o nzenza kalenda tambula muna zingila mu nsi yankaka, kuna kulanda akaka balenda vewa e kisi nsi, kansi akaka balenda yingwa. E mpila ina nzenza kenatina e zingu kiandi muna nsi ina kekwenda, i ziku kisonga kana vo okwamanana ko yovo ve. Diau dimosi mpe divangama kwa awana befuluka. Mana bevanga muna nz’ampa, i mau mesonga kana vo bekwamanana zingila mo yovo ve.

O Yave Nzambi azola, kansi mpe Nzambi ansongi. (Nsi. 32:4; Nku. 33:5) O songa o zola kwandi muna fula awana bena vo ansongi ye awana bena vo ke ansongi ko. Kansi, ovingila vo yau awonso balemvokela e nkanikinu miandi miansongi. Ozevo, awana kaka bezola Yave yo lemvokela e nkanikinu miandi i yau bekwamanana zingila muna nz’ampa.