Landila e sono kia 1 Korinto 15:8, Paulu wavova vo: “Wamoneka mpe kwa mono nze muntu wawutuka se nsulu.” Mu mvu miayingi, nkanda mieto miasasilanga mu kuma kia mvovo miami vo, Paulu wavovela dina diavangama vava Yesu kamokena yandi kuna zulu muna mona-meso. Diakala nze yandi wavewa e lau dia wutuka yo fuluka yo kwenda kuna zulu vitila lufuluku lwa awana bekwenda zingila kuna zulu lwayantika. Kansi, wau tutomene fimpa e sono kiaki, tumwene vo diambote twasingika umbakuzi weto.

Dialudi vo mu sono kiaki Paulu wayika dina diavangama vava kakituka Nkristu. Kansi, adieyi kazola vova vava kavova vo ‘yawutuka se nsulu’? Yambula twazaya dina kazola vova.

Paulu ku kinsalukisa ye mu mpila yasivi kakitukila Nkristu. Vava mwana kesulukanga mu kinsalukisa divangamenanga. Diau a dimosi mpe diavangama kwa Saulu (ona wakituka se Paulu). Vava kayendanga kuna Dameseke muna kwenda bangika Akristu, kavingilanga dio ko vo omona Yesu ona wafuluka muna mona-meso. E mpila ina Paulu kakitukila Nkristu ke yansivikisa kaka ko, kansi yasivikisa mpe Akristu awonso ana kazola bangika kuna Damaseke. Vana ntandu, dina diambwila diasivi kikilu. Dianu kafwila o meso mu fikolo.—Mav. 9:1-9, 17-19.

Paulu mu “kolo kiaswaswana” kakituka se Nkristu. O mvovo wa Kingerekia wasekolwa vo ‘wutuka se nsulu,’ ulenda sasilwa mpe vo “wutuka mu kolo kiaswaswana.” E nsekola zankaka za Bibila zisekolanga mvovo miami “nze mwana owutukidi una e ngonde andi ke yifwene ko.” Ozevo, muna kolo kina o Paulu kakituka se Nkristu, o Yesu wakivutukila kala kuna zulu. Nswaswani ye awana Paulu kayika muna tini yivitidi tini kia nana, oyandi kamona lufuluku lwa Yesu ko ngatu vava kavutuka kuna zulu. (1 Kor. 15:4-8) Yesu wamoneka kwa Paulu muna ntangwa ina kavingilanga dio ko, i sia vo, mu “kolo kiaswaswana” kadi wakiyendela kala kuna zulu.

Paulu lulembamu kasonga vava kayika e diambu diadi mu kuma kia yandi kibeni. Akaka muna akwa ngangu besasilanga mvovo mia Bibila, bevovanga vo o mvovo una Paulu kasadila wasonga vo tumba kayitumbanga. Avo i wau, disongele vo Paulu wabakula vo kafwanukina lau diadi ko diakala se ntumwa. Dianu kavovele vo: “Mono ngina se wandwelo vana vena antumwa, kiafwana yikilwa ntumwa ko, wau vo nkutakani a Nzambi yabangikanga. Kansi muna nkenda za Nzambi i nginina owu ngina.”—1 Kor. 15:9, 10.

Muna kuma kiaki, nanga Paulu mambu tatu kazola yika: (1) E mpila yakinsalukisa Yesu kamonekena kwa yandi, (2) e kolo kiaswaswana kakituka se Nkristu ye (3) wakibadikilanga vo kafwana ko mu kala se ntumwa. Ke tuzeye kikilu ko adieyi Paulu kazola vova, kansi edi kaka tuzeye vo e mona-meso kiaki mfunu kikilu kiakala kwa Paulu. Kadi i kiau kiankwikidisa vo Yesu wafuluka kikilu muna mafwa. Nkumbu miayingi e kiaki i kuma kayikilanga e mona-meso kiaki vava kalonganga Ayuda mu kuma kia lufuluku lwa Yesu.—Mav. 22:6-11; 26:13-18.