1-2. Ekuma nkangu a Nzambi bekadilanga ye kiese? (Yakobo 1:22-25)

 YAVE yo Mwan’andi anzolwa, bazolele vo twakala ye kiese. O nsoneki a Nkunga 119:2 wavova vo: “Akwa kiese awana belundanga tuludiku twandi, awana bekumvavanga ye ntima wawonso.” Yesu wavova vo: “Akwa kiese awana bewanga e diambu dia Nzambi yo lunda dio!”—Luka 11:28.

² Yeto asambidi a Yave, tu nkangu a kiese. Ekuma? Kuma yayingi tuna yau, kansi e kuma kiluta kututwasilanga e kiese i tanga e Diambu dia Nzambi lumbu yawonso yo sadila mana tutanganga.—Tanga Yakobo 1:22-25.

3. Nkia nluta tuvuanga vava tusadilanga mana tutanganga muna Diambu dia Nzambi?

³ Nluta miayingi tuvuanga vava ‘tulemvokelanga e diambu.’ Kasikil’owu, vava tusadilanga mana tulongokanga muna Diambu dia Nzambi, tuyangidikanga Yave ye tukalanga ye kiese. (Kim. 12:13) Vava tusadilanga tuludiku tuna muna Diambu dia Nzambi, tukalanga ye ngwizani ambote ye yitu yeto ye ampangi muna nkutakani. Nanga wamona kala e ziku kia diambu diadi muna zingu kiaku. Vana ntandu, tuvenganga mambu mayingi bewanananga mau awana ke belemvokelanga nsiku mia Yave ko. Muna kuma kiaki, tukwikilanga muna mana Davidi wa Ntinu kavova muna nkunga andi una kavovela nsiku, nkanikinu ye mfundisa za Yave. Wafokolwela nkunga wau mu mvovo emi: “Olunda zo, nsendo ayingi ditwasanga.”—Nku. 19:7-11.

4. Ekuma dilenda kadila diampasi mu tanganga e Diambu dia Nzambi yo sadila mana tutanganga?

⁴ Muna vova e ludi, ezak’e ntangwa diampasi dikalanga mu tanga e Diambu dia Nzambi yo sadila mana tutanganga. Kana  una vo mambu mayingi tukalanga mau mu vanga, tufwete vaulanga e ntangwa muna tanga yo longoka e Bibila kimana twabakula mana Yave kazolele vo twavanga. Muna diadi, yambula twafimpa maka mambu malenda kutusadisa mu tanganga Bibila lumbu yawonso. Tufimpa mpe mambu malenda kutusadisa mu badika muna mana tutanganga ye una tulenda mo sadila muna zingu kieto.

VAULANGA E NTANGWA MUNA TANGANGA E DIAMBU DIA NZAMBI

5. Nkia salu ikutudianga ntangwa yayingi?

⁵ Ayingi muna nkangu a Yave salu yayingi bekalanga yau. Ntangwa yayingi tuvaulanga muna sala e salu isundidi o mfunu. Kasikil’owu, ayingi muna yeto tusalanga e salu ya kinitu muna lungisa e nsatu zeto za nitu ye za esi nzo eto. (1 Tim. 5:8) Mpangi zankaka belunga-lunganga yitu yau bena vo se anunu yovo mbevo. Divavanga mpe vo yeto awonso twalunga-lunganga o vimpi weto. E diambu diadi ntangwa yayingi mpe divavanga. Vana ntandu a salu yayi, tuvuidi mpe yiyekwa muna nkutakani. O kuyivana emvimba muna salu kia samuna e nsangu zambote, i kiyekwa kisundidi o mfunu. Wau vo una ye salu yayi yawonso, aweyi olenda sololwela e ntangwa muna tanganga e Bibila lumbu yawonso, badika yo sadila mana otanganga?

6. Adieyi olenda vanga kimana e ntangilu a Bibila yakala va fulu kiantete muna zingu kiaku? (Tala mpe foto.)

⁶ Kuna kwa yeto Akristu, otanganga e Bibila i dimosi muna “mambu masundidi o mfunu.” Muna kuma kiaki, tufwete sianga e diambu diadi va fulu kiantete. (Fili. 1:10) Mu kuma kia muntu una vo nkwa kiese, o nkunga wantete uvovanga ko: “O luyangalalu lwandi luna muna nsiku a Yave, otanganga nsiku andi muna ndinga yakuluka fuku yo mwini.” (Nku. 1:1, 2) Ediadi disongele vo tufwete vaulanga e ntangwa muna tanganga e Bibila. Nkia ola yambote tufwete tanganga e Bibila? E mvutu za kiuvu kiaki zilenda kala zaswaswana kwa konso muntu. Kansi edi disundidi o mfunu i sola ola yambote ilenda kusadisa mu tanganga e Bibila lumbu yawonso. Mpangi Victor  wavova vo: “Izolanga tanga e Bibila muna mene-mene. Kana una vo kizolanga sikama mu mene-mene ko, e yayi i ola yambote ke ikalanga ye mambu mayingi ko malenda kumvuzanesa. Kikalanga ye ntokani zayingi ko ye itoma sianga e sungididi.” Avo ngeye mpe i wau omonanga, ukiyuvula: ‘Nkia ola yambote kwa mono muna tanganga e Bibila?’

BADIKA MANA OTANGANGA

7-8. Nki kilenda kutukakidila mu lembi vua e nluta muna mana tutanganga? Yika e nona.

⁷ Ezak’e ntangwa, tulenda tanga mambu mayingi, kansi ke tusidi sungididi ko muna diambu diamfunu. Nga watanga kala diambu dimosi, i bosi vioka fikolo kulendele dio sungamena ko? Yeto awonso twabwilwa kala e diambu diadi. Diankenda vo ediadi dilenda vangama muna ntangilu eto a Bibila. Nanga una ye kani dia tanganga kapu yayingi ya Bibila e lumbu yawonso. Ediadi dia lusanisinu kibeni, kadi tufwete kuyisilanga makani yo vanga e ngolo mu lungisa mo. (1 Kor. 9:26) Dialudi vo otanganga e Bibila diambu diambote, kansi lwalu i lubantiku kaka. Kadi muna vua e nluta muna ntangilu a Bibila, mayingi tufwete vanga, ke mpasi tanga kaka ko.

⁸ Yindula e nona eki: E nti muna mena yovo kula, maza mivuanga o mfunu. Kansi, avo e mvula zisakidi noka mu kolo kiakete, o maza muna ntoto mesaka. Muna diadi, e nti milenda wola yovo yuma. Diambote dikalanga vava mvula zinokanga malembe-malembe, kadi disadisanga maza makota muna ntoto mu tezo kiafwana. Muna mpila yayi, e nti ye titi imenanga yo kula. Diau dimosi mpe divavuanga muna tanga e Bibila, ke tufwete kio tangilanga mu nzaki ko. Kadi avo tutangidi kio mu nzaki-nzaki, ke tulenda sungamena mana tutangidi ko ngatu sadila mo.—Yak. 1:24.

9. Adieyi tufwete vanga avo mu nzaki-nzaki tutangilanga e Bibila?

⁹ Nga vakala kala ye lumbu watanganga e Bibila yo bakula vo mu nzaki-nzaki watangilanga kio? Avo ediadi dibwididi, adieyi ofwete vanga? Tangila malembe-malembe. Sia e ngolo za yindula mana otanganga yovo mana  otangidi kala. Ediadi ke diampasi kwandi ko. Avo e ngindu za ningama mu yindula mana otanganga zampasi kwa ngeye, sungamena kaka e diambu edi: Vanga e ngolo mu ningama yo yindula mana otangidi. Nanga olenda vaula ntangwa yayingi ekolo olongokanga kimana wakala ye ntangwa yafwana muna badika mana otangidi. Kuna diak’e sambu, olenda baka nzengo za tanga sono yakete yo sadila ntangwa yayingi mu badika mana otangidi. Mpangi Victor ona tuyikidi kala, wavova vo: “Nkumbu miayingi muna ntangilu ame a Bibila, kapu kimosi kaka itanganga. Wau vo mu mene-mene itanganga e Bibila, e lumbu kiawonso ikwamanananga yindula mana ntangidi.” Kiakala nkia ndekwa osadilanga muna ntangilu aku a Bibila, e diambu disundidi o mfunu i tangilanga kio mu mpila ina olenda vuila e nluta mia mana otanganga.—Nku. 119:97; tala e babu, “ Badika Yuvu Yayi.”

10. Nkia nona kisonganga una olenda sadila mana olongokanga? (1 Tesalonika 5:17, 18)

¹⁰ Vana ntandu a sikidisa e ola ofwete tanganga e Bibila ye kapu ina otanga, yindula una osadila mana otanganga. Avo tangidi yaka tini muna Diambu dia Nzambi, ukiyuvula: ‘Aweyi ndenda sadila mambu mama tuka owau yovo kuna sentu?’ Muna bonga e nona, yindula vo otangidi 1 Tesalonika 5:17, 18. (Tanga.) Vava omene tanga e tini yayi yau yole, olenda ningama mu yindula una wina e sambu yaku ye kana nkumbu nkwa osambanga. Olenda yindula mpe mambu mana ofwete vutulwilanga matondo. Nanga olenda mona vo vena ye mambu tatu masikididi ofwete vutulwila matondo kwa Yave. Kana nkutu miniti miakete osadidi muna badika, dikusadisa mu bakula yo lemvokela Diambu dia Nzambi. Avo konso lumbu osadidi mana otanganga muna Bibila, kalukatikisu ko vo okituka se selo kiambote kia Yave. Adieyi tuvova avo omwene vo vena ye mambu mayingi ofwete singika?

SIKIDISA MAKANI MANA OLENDA LUNGISA

11. Ekuma olenda yoyela ezak’e ntangwa muna ntangilu aku a Bibila? Yika e nona.

¹¹ Vava otanganga e Bibila yo yindula una olenda sadila malongi mandi, ezak’e ntangwa olenda yoya. Yindula nona eki: O unu muna ntangilu aku a Bibila, otangidi e fu kia lembi sianga e mpambula. (Yak. 2:1-8) Omwene vo diambu ofwete singika muna mpila okadilanga ye akaka, muna diadi ovangidi e nsobani. Ediadi diambote kikilu. I bosi, o mbazi otangidi e tini kisonganga o mfunu wa lunga-lunga lubini lwaku. (Yak. 3:1-12) Omwene vo ezak’e ntangwa mu mpila yambi osadilanga lubini lwaku. Muna diadi obakidi e nzengo  za toma sadilanga lubini lwaku muna kasakesanga akaka. Muna lumbu kilanda, muna ntangilu aku a Bibila omwene lulukisu lwa lembi vanga kikundi ye nza. (Yak. 4:4-12) Obakwidi vo ofwete toma solanga e nsaka. Muna lumbu kia yá obakwidi vo diampasi kikilu mu vanga e nsobani zazi zawonso.

12. Ekuma kufwete yoyela ko kele vo muna ntangilu aku a Bibila osolwele diambu dina ofwete singika? (Tala mpe mvovo vana yand’a lukaya.)

¹² Avo dimonekene vo ofwete vanga nsobani yovo singika maka mambu, kuyoyi ko. Ekiaki i ziku kisonganga vo ntim’ambote una wau. O muntu una vo nlembami ye nkwa ziku vava ketanganga e Bibila, okalanga ye kani dia solola konso diambu dina kafwete singika muna zingu kiandi. a Sungamena mpe vo o vuata “kiwuntu kiampa” i diambu tufwete vanganga e ntangwa zawonso. (Kol. 3:10) Nki kilenda kusadisa mu kwamanana lemvokela e Diambu dia Nzambi?

13. Aweyi olenda sikidisila makani mana olenda lungisa? (Tala mpe mafoto.)

¹³ Vana fulu kiavava sadila mawonso mana otangidi mu nkumbu mosi, sikidisa makani mana olenda lungisa. (Nga. 11:2) Olenda teza ndekwa ezi: Soneka mambu mana ofwete singika. I bosi, sola diambu dimosi yovo mamole mana ozolele singika ntete. Yambula mankaka muna lumbu ilanda. Nkia mambu ofwete yantikila?

14. Nkia mambu ofwete yantika singika?

¹⁴ Nanga olenda yantikila muna diambu dina vo diasazu kwa ngeye. Yovo olenda sola singika e diambu dina omwene vo diamfunu kikilu. Avo omwene mambu mana ofwete singika, vavulula muna nkanda mieto, nze muna Índice das Publicações da Torre de Vigia  yovo Nkanda wa Vavulwila wa Mbangi za Yave. Samba kwa Yave kimana walenda lungisa makani maku yo kuvana “luzolo yo nkuma wa sala.” (Fili. 2:13) I bosi, sadila mana olongokele. Avo olendele lungisa e kani diaku diantete, dikukasakesa mu lungisa makani mankaka. Muna vova e ludi, avo olendele singika diambu dimosi muna zingu kiaku kia Kikristu yovo olendele yima fu kimosi kia Kikristu, omona vo ke diampasi ko mu nungunuka muna mambu mankaka.

NUYAMBULA VO E DIAMBU DIA NZAMBI ‘DIASALA OMU YENO’

15. Mbangi za Yave aweyi baswaswanena ye wantu ankaka ana betanganga e Bibila? (1 Tesalonika 2:13)

¹⁵ Wantu ankaka bevovanga vo se kolo betanganga e Bibila. Kansi, nga bekwikilanga mana Bibila kivovanga? Nga besadilanga mana kivovanga ngatu yambula vo kiasoba e mpila zingu kiau? Diankenda kikilu vo wantu ayingi ke belemvokelanga malongi ma Bibila ko. Kansi Mbangi za Yave ngindu zaswaswana bekalanga zau mu kuma kia malongi ma Bibila. Nze Akristu a tandu kiantete, tukwikilanga vo e Bibila ‘wauna kina kieleka, diambu dia Nzambi.’ Vana ntandu, tuvanganga e ngolo kimana twasonga vo e Diambu dia Nzambi disalanga mu zingu kieto.—Tanga 1 Tesalonika 2:13.

16. Nki kilenda kutusadisa mu sadila e Diambu dia Nzambi?

¹⁶ Ezak’e ntangwa, diampasi dikalanga muna tanga yo sadila e Diambu dia Nzambi. Tulenda mona vo diampasi muna solola e ntangwa ya tanga. Yovo tulenda kala ye fu kia tanganga e Bibila mu nzaki-nzaki yo lembi yindula mana tutanganga. Tulenda yoya mpe avo tumwene mambu mawonso mana tufwete singika. Kiakala nkia nkakalakani onuananga zau, zaya wo vo olenda zo kwaku sunda muna lusadisu lwa Yave. Vanganga mawonso muna tambulwila lusadisu lwandi yo lembi kala nze awe ana bevilakananga, kansi awana belemvokelanga e Diambu dia Nzambi. Kalukatikisu ko vo, avo tutoma tanganga e Diambu dia Nzambi yo sadila dio muna zingu kieto, tukala akwa kiese.—Yak. 1:25.