1, 2. Nkia lukutakanu lukutuyikakesa mu mvu wa 2018? Ekuma? (Tala e fwaniswa ova ntandu.)

KINA kia 31 kia Malusu, 2018, mafunda ye mafunda ma wantu mu nza yawonso bekwenda mu lukutakanu luvangamanga nkumbu mosi kaka muna mvu. Kuna ndimuk’a ntangwa, Mbangi za Yave ye wantu ankaka belungana vamosi mu yindula dina Yesu kavanga muna wete dieto. Konso mvu, o Luyindulu lwa lufwa lwa Kristu luyikakesanga o wantu lutila e nkinzi miawonso mivangamanga ova nza.

² Yave yo Yesu kiese kiayingi bekalanga kiau vava bemonanga mafunda ye mafunda ma wantu bekwendanga mu lukutakanu lwalu lwamfunu omu nza yawonso. Nkand’a Nzambi uyikanga “ndong’ayingi ina ke ilendi tangakana kwa muntu ko, batukidi muna zula yawonso ye makanda ye nkangu ye ndinga,” bekazanga vo: “Luvuluzu lutukidi kwa Nzambi eto ona ovuende ova kunda ye kwa Mwan’a meme.” (Lus 7:9, 10)  Diakiese kikilu mu mona ulolo wa wantu bekutakananga konso mvu muna Luyindulu mu kembelela Yave yo Yesu mu kuma kia dina bavanga muna wete dieto.

3. Nkia yuvu tubakila e mvutu mu longi diadi?

³ Mu longi diadi, tubaka e mvutu za yuvu yá: (1) Aweyi ndenda kubamena mu kuma kia Luyindulu yo vua nluta mia nkinzi wau? (2) Aweyi Luyindulu lusadisilanga nkangu a Nzambi mu kala mu kintwadi? (3) Aweyi ndenda siamisina e kintwadi vana vena nkangu a Nzambi? (4) Nga vesinga kala yo Luyindulu lwansuka? Avo elo, nkia ntangwa?

4. O kwenda lungana muna Luyindulu ekuma dinina o mfunu?

⁴ O kwenda lungana muna Luyindulu ekuma dinina o mfunu? E kuma kiantete i kia sia vo, o kala muna tukutakanu imosi muna mpila tusambidilanga Yave. Tuna ye ziku vo Yave yo Yesu beyangalelanga e ngolo kevanganga konso muntu mu kwenda muna lukutakanu lwalu lusundidi o mfunu. Tuzolele vo Yave yo Yesu batumona muna Luyindulu, nanga vo diambu diampasi kikilu ditubwididi. Vava tusonganga muna mavangu vo tukutakanu mfunu twina kwa yeto, tuvananga Yave kuma kiankaka mu lembi vunzuna e nkumbu zeto muna “nkand’a luyindwilu.” O nkanda wau uyikilwanga mpe vo “nkand’a moyo.” Muna nkanda wau muna ye nkumbu za wantu awonso ana Yave kesinga vana moyo a mvu ya mvu.—Malaki 3:16; Lusengomono 20:15.

5. Aweyi tulenda ‘kuyitontela kana vo mu lukwikilu twina’ muna tumingu tuvitilanga Luyindulu?

⁵ Muna tumingu tuvitilanga Luyindulu, tulenda vaula e ntangwa ya samba yo toma yindula una wina e ngwizani eto yo Yave. (Tanga 2 Korinto 13:5.) Paulu wa ntumwa wavovesa Akristu vo: “Nwiyitontanga kana vo mu lukwikilu nwina.” Aweyi tulenda wo vangila? Tulenda kukiyuvula: ‘Nga ikwikilanga kikilu vo eyayi i nkubika ina Yave kasola mu vanga luzolo lwandi? Nga ivanganga ngolo za samuna yo longa wantu e nsangu zambote? Nga isonganga muna mavangu vo mu lumbu yambaninu tuzingilanga ye ke kolo ko o luyalu lwa Satana lufokoka? Nga e vuvu kiame muna Yave yo Yesu kiakinu kiakumama nze una kiakala vava yayantika sadila Yave?’ (Matai 24:14; 2 Timoteo 3:1; Ayibere 3:14) O badika e mvutu za yuvu yayi dikutusadisa mu kwamanana ‘kuyitonta’ kana vo mu lukwikilu twina.

6. (a) Adieyi divavuanga muna vua moyo a mvu ya mvu? (b) Aweyi nkuluntu mosi kekubamenanga mu kuma kia Luyindulu konso mvu? Adieyi ongeye mpe olenda vanga?

⁶ Imosi muna mpila tulenda kubamena vitila lumbu kia Luyindulu i tanganga yo badika malongi mesonganga e kuma lukutakanu lwalu lwinina lwamfunu kikilu. (Tanga Yoane 3:16; 17:3.) Muna vua o moyo a mvu ya mvu, divavanga vo twazaya  Yave yo kwikila muna Mwan’andi Yesu. Muna toma kubama mu kuma kia Luyindulu, tulenda longoka malongi malenda kutusadisa mu wokesa e ngwizani eto yo yau. I diau kevanganga mpangi mosi una vo nkuluntu se mvu miayingi. Tuka kolo, mpangi ndioyo olundanga malongi mevayikiswanga muna Eyingidilu mevovelanga Luyindulu ye una Yave yo Yesu besongelanga o zola muna yeto. Muna tumingu tuvitilanga Luyindulu, otangululanga malongi mama yo badika o mfunu a lumbu kiaki. Ezak’e ntangwa, okudikilanga malongi mankaka muna lundilu diandi. Otanganga mpe yo badika e sono ya Nkand’a Nzambi mu kuma kia Luyindulu. O nkuluntu ndioyo wavova vo vava kevanganga wo, olongokanga mambu mampa konso mvu. Edi disundidi o mfunu, o zola kwandi muna Yave yo Yesu kuwokelanga. Vava ngeye mpe ovaulanga e ntangwa ya longoka, o zola kwaku muna Yave yo Yesu kuwokela. Ediadi dikufila mu vutula matondo muna mawonso bevanganga muna wete diaku yo vua nluta mia Luyindulu.

7. (a) Adieyi Yesu kalomba muna sambu kavanga muna fuku wa lambu diantete dia Nlekelo a Mfumu? (b) Adieyi disonganga vo Yave wawá e sambu kia Yesu?

⁷ Muna fuku wa lambu diantete dia Nlekelo a Mfumu, Yesu walomba diambu diamfunu muna sambu. Wasamba mu kuma kia kintwadi kena kiau yo Se diandi. Yesu wasamba mpe vo alongoki andi awonso bakala mu kintwadi. (Tanga Yoane 17:20, 21.) Yave wawá e sambu kiaki kia Mwan’andi anzolwa. Lutila tukutakanu twankaka, Luyindulu lusonganga kikilu e ziku vo Mbangi za Yave mu kintwadi bena. Muna lumbu kiaki, mazunda ye mazunda ma wantu a nsi ye makanda ma mpila mu mpila bekutakananga mu nza yawonso yo songa vo bekwikilanga vo Yave watuma Mwan’andi. Muna fulu yankaka, diatutu dikalanga mu mona wantu a makanda maswaswana bakutakana vamosi. Avo bavangidi wo, akaka bebadikilanga dio vo ke diambote ko. Kansi, ke wau ko Yave yo Yesu bebadikilanga e diambu diadi. Kuna kwa yau, e kintwadi kieto muna lumbu kia Luyindulu kiambote kikilu.

8. Adieyi o Yave kavovesa Yezekele kavanga?

⁸ Wau vo tu nkangu a Yave, ke tusivikanga ko vava tumonanga kintwadi tuna kiau. Muna mvovo miandi kwa Yezekele, Yave wasakula e kintwadi kiaki. Wavovesa Yezekele vo kabonga nti miole, umosi mu kuma kia Yuda, wankaka mu kuma kia Yosefe yo yikakesa mio kimana miakituka se nti mosi. (Tanga Yezekele 37:15-17.) E longi dia “Yuvu Y’atangi” diavaikiswa muna Eyingidilu dia Yuli dia mvu wa 2016 diasasila vo: “Muna Yezekele wa ngunz’andi, Yave wasakula vo nkangu andi usinga vutuka kuna Nsi a Nsilu yo kituka diaka se zula kimosi. Ungunza wau wavova mpe vo awana besambila Nzambi mu lumbu yambaninu, bekala bayikakiana nze nkangu mosi.”

9. Muna Luyindulu lwa konso mvu, aweyi tumwenanga e kintwadi kiasakulwa muna ungunza wa Yezekele?

⁹ Kuna lubantiku lwa mvu wa 1919, Yave wayantika kubika yo kutakesa diaka akuswa. Bakala nze nti ‘mu kuma kia Yuda.’ I bosi, ndonga ya wantu bena ye vuvu kia zingila yakwele mvu ova ntoto, bayantika  yikama akuswa. Awana bena ye vuvu kia zingila ova ntoto bena nze nti ‘mu kuma kia Yosefe.’ Yave wasia nsilu vo oyikakesa nti miole miami yo “kitula mio se nti mosi” vana koko kwandi. (Yezekele 37:19) Yave wayikakesa akusua ye “mameme mankaka” kimana bakituka se “kambi dimosi.” (Yoane 10:16; Zakariya 8:23) O unu, e buka yole yayi isadilanga Yave entwadi. Ntinu mosi kaka bena yandi, i sia vo, Yesu Kristu, ona oyikilwanga muna ungunza wa Yezekele vo ‘Davidi wa ntaudi’ a Nzambi. (Yezekele 37:24, 25) Vava tukutakananga muna Luyindulu lwa konso mvu, muna yindula lufwa lwa Yesu, tumonanga e kintwadi vana vena e buka yole yayi nze una wasakulwa muna nkand’a Yezekele. Kansi, adieyi konso muntu mu yeto kalenda vanga muna tanina yo siamisa kintwadi kia nkangu a Nzambi?

10. Aweyi tulenda siamisina kintwadi kia nkangu a Nzambi?

¹⁰ Nkia diambu diantete tulenda vanga muna siamisa e kintwadi vana vena nkangu a Nzambi? Tufwete vanganga e ngolo za kala alembami. Vava Yesu kakala ova ntoto, wavovesa alongoki andi vo bafwete kuyikululanga. (Matai 23:12) Mu nza yayi tuzingilanga, wantu bekuyimwenanga vo basundidi akaka. Kansi avo tukedi ye lulembamu, tuzitisa mpangi zeto ana bevitanga o ntu  muna nkutakani yo lemvokela luludiku bekutuvananga. Muna mpila yayi kaka tulenda siamisina kintwadi muna nkutakani. Edi disundidi o mfunu, avo tukala alembami, tuyangidika Nzambi, kadi “osianga akwa lulendo kitantu, kansi ovananga e nsambu kwa alembami.”—1 Petelo 5:5.

11. O badika e nsas’a mbolo ye vinyu isadilwanga muna Luyindulu aweyi dikutusadisilanga mu siamisa kintwadi kieto?

¹¹ Nkia mpila yanzole tulenda siamisina e kintwadi kieto? Muna sungamenanga e nsas’a mbolo ye vinyu. Tufwete wo vanganga vitila lumbu kia Luyindulu ye musungula muna fuku ukala o Luyindulu. (1 Korinto 11:23-25) E mbolo yalembi funa isunzulanga e nitu alunga ya Yesu ina kavana se kimenga. E vinyu ambwaki isunzulanga o menga mandi. Kansi, mayingi diaka tufwete vanga ke zaya kaka e nsas’a mbolo ye vinyu ko. Tufwete sungamenanga vo kimenga kia lukûlu kia Yesu, i ziku kisundidi kia nzol’a Yave yo Yesu. Yave wavana Mwan’andi kimana kafwa mu kuma kieto. O Yesu wavana moyo andi muna wete dieto. Vava tuyindulanga o zola kwa Yave yo Yesu muna yeto, ediadi dikutufilanga mu kubazola. O zola tusonganga muna Yave kusiamisanga kintwadi kieto.

12. Mun’owu wa nona kia ntinu ye ntaudi zandi, aweyi Yesu kasongela vo Yave ozolele vo twalolokanga akaka?

¹² E mpila yantatu tulenda siamisina kintwadi kieto i lolokanga akaka. Avo tuvangidi wo, tusonga vo tuvutulanga kikilu matondo kwa Yave wau kelolokanga masumu meto muna nzil’a kimenga kia Yesu. Muna songa o mfunu wa loloka akaka, Yesu wayika nona kia ntinu ye ntaudi zandi. Tanga muna Matai 18:23-34 yo kukiyuvula: ‘Nga ivanganga dina Yesu kalonga? Nga isonganga luzindalalu ye ngemba kwa mpangi zame? Nga ilolokanga awana bekumpanganga e mbi?’ Dialudi vo e masumu mankaka mampwena. Diampasi dikalanga kwa yeto wantu alembi lunga mu loloka masumu mankaka. Kansi, e nona kia Yesu kikutulonganga dina Yave kazolele vo twavanga. (Tanga Matai 18:35.) Yesu watoma dio kiesesa vo Yave ke kutuloloka ko avo ke tulolokanga mpangi zeto ko vava bevilukanga kielela o ntima. Tufwete toma yindulanga e diambu diadi. Muna tanina yo tatidila kintwadi kieto, tufwete lolokanga akaka nze una Yesu katulonga.

13. Aweyi tusiamisinanga kintwadi vava tutatidilanga luvuvamu ye akaka?

¹³ Vava tulolokanga akaka, tutatidilanga o luvuvamu ye mpangi zeto. Paulu wa ntumwa wavova vo tufwete kwamanana vanga e ngolo muna tatidila kintwadi kieto yo kadila kuna luvuvamu ye akaka. (Efeso 4:3) Muna nsungi a Luyindulu, musungula muna fuku wa Luyindulu, diambote wayindulanga e mpila okadilanga ye akaka. Ukiyuvula: ‘Nga isonganga kw’awana banzeye vo kilundanga makasi ko avo muntu umpangidi e mbi? Nga wantu bemonanga e ngolo ivanganga za tatidila luvuvamu yo siamisa kintwadi?’ Diamfunu kikilu twabadikanga e yuvu yayi.

14. Aweyi tulenda songela vo ‘tuvezananga mambu muna zola’?

¹⁴ E mpila yayá tulenda siamisina kintwadi kieto i tangininanga e mpila ina Yave kesongelanga o zola. (1 Yoane 4:8) Ke tulendi vova ko vo: “Ndenda zola mpangi zame, kansi ke disongele ko vo mfwete vanga  e kikundi yo yau awonso.” Avo ngindu zazi tukalanga zau, ke tulandanga longi dia Paulu ko divovanga vo ‘twayambuziananga e mambu muna zola.’ (Efeso 4:2) Paulu kavova kaka ko vo ‘twayambuziananga o mambu’ kansi wavova vo twayambuziananga “muna zola.” Nswaswani kikilu ina vo. Muna nkutakani zeto muna ye wantu a mpila mu mpila ana Yave ketuntanga kimana bansadila. (Yoane 6:44) Yave mambu mayingi mambote kamona muna yau i dianu kekubazolelanga. Wau vo Nzambi ozolanga mpangi zeto, aweyi tulenda vovela vo ke bafwanukinu zola kweto ko? Tufwete kubazolanga nze una Yave kazolele vo twavanga.—1 Yoane 4:20, 21.

15. Aweyi tuzayidi wo vo vekala ye Luyindulu lwansuka?

¹⁵ Vekala ye lumbu kina tukwenda muna Luyindulu lwansuka. Aweyi tuzayidi wo? Paulu wavovesa Akristu akuswa vo vava beyindulanga lufwa lwa Yesu konso mvu, ‘besamunanga lufwa lua Mfumu, yavana kekwiza.’ (1 Korinto 11:26) Yesu wavovela mpe ‘ngiz’andi’ muna ungunza wandi wa lumbu yambaninu. Vava kayika e mpasi zayingi ezi zikwiza ke kolo ko, wavova vo: “E sinsu kia Mwan’a muntu kimoneka kuna zulu, makanda mawonso ma nza mebunda e tulu mu kuma kia ntantu, bemona Mwan’a muntu okwizila muna matuti mazulu ye nkuma yo nkembo ayingi. Otuma mbasi zandi ye zú diangolo dia mpungi balungalakesa awana basolwa muna konko yau yá ya nza, tuka kuna nsuk’a zulu ye kuna yaka e nsuka.” (Matai 24:29-31) Yesu ‘olungalakesa awana basolwa’ vava Akristu awonso akuswa ana bakinu ova ntoto betomboka kuna zulu. Ediadi divangama muna kolo kia mpasi zayingi, kansi vitila e mvita ya Armangedo. Muna mvita yayi, Yesu kumosi ye 144.000 benuana ye ntinu mia nza yo kubasunda. (Lusengomono 17:12-14) Luyindulu lwansuka i luna luvangama vitila Yesu keza kutakesa Akristu akuswa.

16. Ekuma ozolele kadila muna Luyindulu lwa mvu wau?

¹⁶ Vanga mawonso kimana wakala muna Luyindulu luvangama kina kia 31 kia Malusu, 2018. Samba kwa Yave kasadisa kimana ngeye mpe wavanga dina olenda mu siamisa kintwadi kia nkangu andi. (Tanga Nkunga 133:1.) Vekala ye lumbu tusinga kwenda muna Luyindulu lwansuka. Ekolo tuvingilanga e lumbu kiaki, yambula twasonga vo tuyangalelanga kintwadi tukalanga kiau konso mvu muna lumbu kia Luyindulu.