1, 2. Aweyi Yave kekutuvaninanga kuna mvevo?

YAVE wa Nzambi nkwa ntim’amvevo. Yawonso tuna yau kwa yandi yatuka. E lekwa yawonso ina ova nza i yandi. Osadilanga yo kimana e vangwa yamoyo yakwamanana zinga. (Nkunga 104:13-15; Kangai 2:8) Muna Nkand’a Nzambi, tulongokanga vo ezak’e ntangwa o Yave wasadilanga e lekwa yayi mu mpil’a sivi muna lunga-lunga nkangu andi.

² Kasikil’owu, Yave wavana mana ye maza kwa nkangu a Isaele vava bazingila muna makanga mu mvu 40. (Luvaiku 16:35) Muna kuma kiaki, Aneyisaele bakala ye lekwa yawonso bavuanga o mfunu. (Nekemiya 9:20, 21) Kuna kwalanda, Yave wavana Elesa wa ngunza o nkuma wa kudikila e mazi ma nkento mosi ansona kimana malembi fokoka. Lukau lwalu lwatuka kwa Nzambi lwansadisa mu futa e mfuka zandi yo kala ye nzimbu zafwana kimana yandi yo mwan’andi balembi fwa ye nzala. (2 Ntinu 4:1-7) Muna nkuma kavewa kwa Yave, Yesu  wavanga masivi mu vana madia kwa wantu ye nzimbu nkutu ezak’e ntangwa.—Matai 15:35-38; 17:27.

3. Nkia yuvu tubakila e mvutu mu longi diadi?

³ Yave olenda sadila konso lekwa kazolele muna sadisa vangwa yandi. Kana una vo i wau, olombanga kwa selo yandi vo bavana konso kina balenda mu yikama e salu kia nkubik’andi. (Luvaiku 36:3-7; tanga Ngana 3:9.) Ekuma Yave kevavilanga vo twamvutulwila ina tuna yau? Aweyi selo ya Yave kuna nz’ankulu bayikamenanga e salu kiandi? Aweyi e nkubik’a Yave isadilanga e nzimbu za tukau o unu? E longi diadi divana e mvutu za yuvu yayi.

4. Adieyi tusonganga kwa Yave vava tuyikamanga e salu kiandi?

⁴ Tuvananga tukau kwa Yave kadi zola tukunzolanga yo kumvutula matondo. Vava tuyindulanga mawonso kevanganga o Yave muna wete dieto, e ntima mieto mikutufilanga mu kumvutula matondo. I diau kavanga Davidi wa ntinu vava kazayisa kwa nkangu e lekwa yavavuanga muna tunga e tempelo. Davidi wavova vo e lekwa yawonso tuna yau kwa Yave itukanga ye yawonso tuvananga kwa Yave muna lekwa ina ketuvananga itukanga.—Tanga 1 Tusansu 29:11-14.

5. Aweyi Nkand’a Nzambi ukutulongelanga o mfunu wa vanina kuna mvevo?

⁵ Tuvananga mpe kwa Yave kadi imosi muna mpila tukunsambidilanga. Muna mona-meso kasongwa, Yoane wa ntumwa wawá selo ya Yave kuna zulu yavovanga vo: “E Yave wa Nzambi eto, ngeye ofwene tambula nkembo yo zitu ye ngolo, e kuma kadi ngeye wasema lekwa yawonso, muna luzolo lwaku inina yo semwa.” (Lusengomono 4:11) Kieleka, Yave ofwene kikilu tambula nkembo yo zitu. Muna kuma kiaki, tuzolele kumvana eyi isundidi o mfunu tuna yau. Muna Mose, Yave wakanikina zula kia Isaele vo bavanganga nkinzi ntatu muna konso mvu. Dimosi diavavuanga kwa yau i vana tukau kwa Yave. O nkangu wavoveswa vo ke bafwete “moneka vana vena Yave e nkatu ko.” (Nsiku 16:16) O unu mpe, dimosi muna mambu mevavuanga muna sambila Nzambi i vana tukau twamvevo. Muna mpila yayi, tusonganga vo tuyangalelanga yo yikama e salu kia nkubik’a Yave.

6. O vana tukau ekuma dinina diambote kwa yeto? (Tala e fwaniswa kuna lubantiku lwa longi.)

⁶ Diambote kikilu vava tuvananga kuna mvevo, ke tambula kaka ko. (Tanga Mavangu 20:35.) Yindula mwana oveno finzimbu kwa mase mandi, i bosi osadidi ndambu a nzimbu zazi mu sumbila mase mandi lukau. Aweyi mase bemona mu kuma kia lukau lwalu? Yindula mpe nleke una vo mviti a nzila ozingilanga muna nzo a mase mandi ubavene nzimbu kimana basumbila madia mu kuma kia esi nzo awonso. Kana una vo mase mandi ke bekunlombanga nzimbu ko, batambwidi lukau kavene. Ekuma? Kadi i mpila ina mwana kalenda songela vo oyangalelanga mawonso mana mase mandi  bevanganga muna wete diandi. Diau dimosi mpe, Yave ozeye wo vo diambote kikilu kwa yeto vava tukumvananga tukau muna lekwa tuna yau.

7, 8. Aweyi nkangu a Yave kuna nz’ankulu basongela mbandu ambote vava bavananga tukau (a) muna yikama nkubika zasikidiswa? (b) muna yikama salu kiandi?

⁷ Muna Nkand’a Nzambi, tulongokanga vo nkangu a Nzambi bavananga tukau muna yikama nkubika zasikidiswa. Ezak’e ntangwa, bazayiswanga vo bavana tukau muna yikama salu kimosi. Kasikil’owu, Mose wakasakesa Aneyisaele mu vana tukau muna tunga e saba. Kuna kwalanda, Davidi wa ntinu walomba kwa nkangu mu vana tukau mu tunga e tempelo. (Luvaiku 35:5; 1 Tusansu 29:5-9) Vava Yoase wa ntinu kayalanga, anganga basadila e nzimbu zina nkanga bavananga muna tungulula e tempelo. (2 Ntinu 12:4, 5) Muna tandu kiantete, Akristu bawá e nsangu vo mpangi zau kuna Yuda lusadisu bavuanga o mfunu mu kuma kia mvengele wangolo wakala ko. Muna kuma kiaki, konso Nkristu wavana konso kina kalenda mu sadisa mpangi zandi.—Mavangu 11:27-30.

⁸ Nkangu a Yave wavananga mpe e nzimbu muna sadisa awana bavitang’o ntu muna salu kiandi. Muna bonga e nona, nswaswani ye makanda mankaka, o Nsiku a Mose wasikidisa vo Anelevi ke bafwete tambula vua ko muna nsi. Muna kuma kiaki, Aneyisaele akaka bavananga Anelevi e tini kiakumi muna lekwa yau. Ediadi diasadisanga Anelevi mu sia e sungididi muna salu kiau muna saba. (Ntalu 18:21) Diau dimosi mpe, akento akwa ntima mia mvevo basadilanga mavua mau muna sadisa Yesu ye ntumwa zandi.—Luka 8:1-3.

9. Akweyi kwatukanga tukau kuna nz’ankulu?

⁹ Tukau twatu mu fulu yayingi twatukanga. Aneyisaele ana bavana tukau mu kuma kia salu kia tunga e saba nanga bavana e lekwa yantalu ina batuka yau kuna Engipito. (Luvaiku 3:21, 22; 35:22-24) Muna tandu kiantete, Akristu akaka bateka e lekwa yau nze mpatu yovo nzo yo twasa e nzimbu kwa antumwa. I bosi, antumwa basadila nzimbu zazi mu sadisa ampangi ana bakala muna mpasi. (Mavangu 4:34, 35) Akristu akaka balundanga e nzimbu zina bavananga tukau muna yikama e salu. (1 Korinto 16:2) Muna mpila yayi, kiakala amvuama yovo usukami bavananga tukau.—Luka 21:1-4.

10, 11. (a) Aweyi tulenda tanginina ntim’amvevo wa selo ya Yave kuna nz’ankulu? (b) Aweyi omonanga mu kuma kia lau una diau dia yikama salu kia Kintinu?

¹⁰ O unu, yeto mpe tulenda lombwa vo twavana tukau mu kuma kia diambu kingandi. Dilenda kala vo e nkutakani eno izolele vangulula yovo tunga Seka dia Kintinu. Yovo e vula dia nsi eno tungululwa divava. Tulenda mpe vana tukau muna sumba e lekwa ivavuanga muna tukutakanu tweto twa mvivu. Dilenda kala vo mpangi  zeto za zunga yankaka lusadisu lweto bavuidi o mfunu mu kuma kia sumbula kibabwididi.O tukau tweto tusadilwanga mpe muna sadisa ampangi bena muna salu kia kimisionario, aviti a nzila a espesiale, akengi a zunga ye awana besadilanga kuna vula dieto diasina ye muna mavula mankaka mu nza yawonso. E nkutakani eno nanga itwikanga tukau konso ngonde mu yikama e salu kia tunga Maseka ma Tukutakanu twampwena yovo Maseka ma Kintinu mu kuma kia mpangi zeto za nsi zankaka.

¹¹ Yeto awonso tulenda vana lukau muna yikama e salu kisalanga e nkubik’a Yave mu lumbu yayi yambaninu. Tukau twayingi tuvananga ke tuzayakananga kwa wantu ko. Vava tusianga e nzimbu muna nkela za tukau muna Seka dia Kintinu yovo vava tuvananga tukau muna nzil’eto ya jw.org, ke tuzayisanga kwa wantu ankaka ko e ntalu tuvene. Kansi, adieyi tuvova avo lukau ozolele vana lwakete kikilu? E ziku kia diambu i kiaki: Twayingi muna tukau tutambulanga e nkubik’a Yave mu tukau twakeke-kete tutukanga, ke mu tukau twampwena ko tuvewanga kwa wantu akete. Kana nkutu ampangi zeto ana ke bena ye nzimbu zayingi ko betangininanga Akristu kuna Makedonia. Kana una vo “usukami wau wayingi,” badodokela kimana yau mpe bavewa e lau dia vana tukau twamvevo.—2 Korinto 8:1-4.

12. Aweyi e nkubik’a Yave isadilanga tukau mu mpila yambote?

¹² E Buka kia Selo Yambuta besonganga e kwikizi yo lulungalalu muna mpila isadilwanga tukau. (Matai 24:45) Ampangi za buka kiaki besambanga kimana babaka nzengo zambote yo toma yindula una besadila e nzimbu za tukau. (Luka 14:28) Kuna nz’ankulu, akwa kwikizi ana balunga-lunganga e nzimbu za tukau bavanganga mawonso muna sadila kaka e nzimbu zazi muna salu kia Yave. Kasikil’owu, vava Ezera kavutuka kuna Yerusaleme, wanata tukau kavewa kwa ntinu a Parasa, kumosi ye wolo, palata ye lekwa yankaka ya ntalu. O unu, e lekwa yayi ilenda tekelwa tezo kia milhões 100 za nzimbu za dolare. Ezera wabadikilanga tukau twatu vo twa Yave. Muna kuma kiaki, wasikidisa una bafwete lunga-lungila tukau twau ekolo baviokelanga mu fulu ya vonza. (Ezera 8:24-34) Vioka mvu miayingi, Paulu wakubisa e nzimbu muna sadisa ampangi bakala mu mpasi kuna Yuda. Wasikidisa kwa awana bakayanesa e nzimbu zazi kimana ‘balunga-lunga mawonso muna unsongi, ke vana ndose a Yave kaka ko, kansi vana ndose a wantu mpe.’ (Tanga 2 Korinto 8:18-21.) O unu mpe, e nkubik’a Yave itangininanga e mbandu a Ezera yo Paulu muna sadilanga o tukau mu mpila yambote.

13. Ekuma e nkubik’a Yave yavangidi nsobani mu mambu mankaka?

¹³ Esi nzo balenda vanga nsobani muna mpila besadilanga e nzimbu muna lembi fwasa nzimbu zayingi lutila zina befutwanga. Balenda mpe baka e nzengo za vevola e zingu kiau kimana bayivana muna salu kia Yave. I diau mpe divangamanga muna nkubik’a Yave. Mu mvu miviokele, salu yayingi yasadilu, kansi ezak’e ntangwa e nzimbu twasadila zilutidi zina twatambula. Nze una uvanganga esi nzo, e nkubik’a Yave ivavanga e mpila yambote ya sadila e nzimbu kimana e nzimbu za tukau nuvananga zasadilwa mu mambu mayingi.

14-16. (a) Aweyi tukau ovananga tusadilwanga? (b) E salu yayi nkia nluta ikutwasilanga?

¹⁴ Ayingi bena muna ludi se mvu miayingi bevovanga vo owau tukau twayingi tutambulanga muna nkubik’a Yave lutila mvu mivioka. Owau tuna ye nzil’eto jw.org ye JW Broadcasting. Tuna mpe ye Nsekola ya Nz’ampa ya Nkand’a Nzambi muna ndinga zayingi. Muna mvu wa 2014 ye 2015, o Lukutakanu lwa Mvivu lwa Nsi Zayingi lwakala yo ntu a diambu “Vavanga Ntete Kintinu kia Nzambi!” lwavangamena mu yanzala isundidi o nene muna mbanza 14 mu nza yawonso. Awonso bakala muna lukutakanu lwalu bayangalala kikilu.

¹⁵ Ayingi basonga luyangalalu lwau muna lukau lwalu lwa nkubik’a Yave. Kasikil’owu, akazi mosi besadilanga kuna Ásia basoneka vo: “E mbanza tusadilanga yakete kikilu. Ezak’e ntangwa kinsona tumonanga. Diasazu mu vilakana lunungunuku lwa salu kia Yave. Kansi, vava tutalanga e programa za JW Broadcasting, tusungamenanga vo tuna muna kintwadi kia wan’a ngudi mu nza yawonso. Ampangi za nkutakani betoma yangalelanga tala e JW Broadcasting. Nkumbu miayingi tukubawanga bevovanga vo avo batadidi e programa ya konso ngonde, tutoma zayananga ye mpangi za Buka kia Selo Yambuta. Owau, kiese kiayingi bemonanga kia kala muna nkubik’a Nzambi.”

¹⁶ Mu nza yawonso, tezo kia 2.500 za Maseka ma Kintinu metungwanga yovo tungululwa. Mpangi za nkutakani kuna Honduras bavova vo entete ndozi balotanga ya kala ye Seka dia Kintinu dia yau kibeni, kansi owau e ndozi au yalunganene. Basoneka vo: “Kiese kiayingi tuna kiau kia kala muna kanda dia Yave ye muna kintwadi kia wan’a ngudi mu nza yawonso.” Ayingi mpe besonganga luyangalalu lwau vava betambulanga e Bibila ye nkanda miankaka muna nding’au ya kingutukila, vava mpangi  zau bekubasadisanga muna ntangw’a sumbula yovo vava bemonanga e nluta mia sila umbangi mu fulu ya ndonga muna zunga kiau.

17. Aweyi tuzayidi wo vo Yave osadisanga e nkubik’andi o unu?

¹⁷ Ayingi mun’awana bena vo ke Mbangi za Yave ko ke bebakulanga ko vo e salu yawonso tusalanga mu tukau twa mvevo kaka tusadilanga yo. Mfumu a kompani dimosi wayenda kingula masini tunietekenanga nkanda mieto. Wasivika kikilu vava kazaya vo awana besalanga e salu kiaki kiawonso ke befutwanga ko, mu tukau twamvevo kisadilwanga ye ke tuvanganga nsisani ko muna vua e nzimbu. Wavova vo mawonso tuvanganga ke madi lendakana ko. Ediadi dialudi! Kadi tuzeye wo vo mu lusadisu lwa Yave kaka tulendelanga sala e salu kiaki.—Yobi 42:2.

18. (a) Nkia nsambu tuvuanga vava tuyikamanga e salu kia Kintinu? (b) Aweyi tulenda longela wan’eto yo wantu ampa muna ludi mu vanga diau dimosi?

¹⁸ Yave okutuvananga e lau diampwena dia yikama e salu kia Kintinu. Wasia nsilu vo okutusambula avo tuvangidi wo. (Malaki 3:10) Yave wavova vo avo tukala yo ntim’a mvevo, nsambu zayingi tuvua muna zingu. (Tanga Ngana 11:24, 25.) Okutuvovesanga mpe vo avo tuvanina kuna mvevo, kiese kiayingi tukala kiau kadi “edi disundidi e kiese dia vana, ke mu tambula ko.” (Mavangu 20:35) Muna mvovo ye mavangu, tulenda longa wan’eto yo wantu ampa muna ludi una yau mpe balenda yikamena e salu kiaki yo vua nsambu zayingi.

19. E longi diadi nkia lukasakeso divene?

¹⁹ Yawonso tuna yau kwa Yave itukanga. Vava tukumvutulwilanga ina kekutuvananga, tusonganga vo tukunzolanga yo yangalela mawonso kevanganga muna wete dieto. (1 Tusansu 29:17) Vava Aneyisaele bavana tukau muna tunga e tempelo, “o nkangu wamona kiese wau bavanina kuna mvevo, kadi muna ntim’asikila i bavanina kuna mvevo kwa Yave.” (1 Tusansu 29:9) Yambula yeto mpe twakwamanana mona e kiese kia vana kwa Yave ina kekutuvananga.