1-2. (a) Ekuma dikadilanga diasazu mu vanga e lambu kasikidisa o Yesu? (b) Nkia fu ya Yesu tubadika?

NGA olenda yika mana mevangamanga muna Luyindulu lwa lufwa lwa Kristu? Tuna ye ziku vo ayingi mu yeto tusungamenanga mambu mevangamanga muna Lambu dia Nlekelo a Mfumu. Ekuma? E kuma kadi e lambu diadi ke dikalanga ye mambu mayingi ko. Kana una vo i wau, lambu diadi diamfunu kikilu. Tulenda kukiyuvula: ‘Ekuma dikadilanga diasazu muna vanga e lambu diadi?’

² Vava kakala ova ntoto, Yesu wazayakana mu kuma kia mpila kalongelanga e ludi. Walonganga mu mpila yaleboka, yakiá ye yasazu mu bakula. (Mat. 7:28, 29) Diau dimosi mpe, Yesu wasikidisa nkubika yakete ye yamfunu ikutusadisanga mu yindula * lufwa lwandi. Yambula twafimpa Luyindulu lwalu ye mambu mankaka mana Yesu kavova yo vanga. Tulongoka mayingi mu kuma kia lulembamu, unkabu yo zola kasonga Yesu ye una tulenda kuntanginina una ufwene.

3. Mun’owu wa sono kia Matai 26:26-28, adieyi disonganga vo e lambu dia Luyindulu kasikidisa o Yesu diakete diakala? E sinsu yole kasadila nki isunzulanga?

³ Yesu wasikidisa Luyindulu lwa lufwa lwandi vava kakala ye ntumwa zandi 11 zakwikizi. Wasadila e lekwa ina yasala muna lambu dia Nduta yo sikidisa lambu diadi diakete. (Tanga Matai  26:26-28.) Mbolo yalembi funa kaka kasadila ye vinyu bakala yau. Yesu wavovesa alongoki andi vo e sinsu yole yayi isunzulanga e nitu andi yalunga ye menga mandi, ina kadi vana ke kolo ko muna wete diau. Antumwa nanga ke basivika ko e mpila yasazu yavangamena e lambu diadi diamfunu ye diampa. Ekuma?

4. Aweyi e longi dina Yesu kavana Mareta dikutusadisilanga mu bakula e kuma Yesu kavavila mayingi ko vava kasikidisa Luyindulu?

⁴ Badika dina diavangama muna ngonde zavioka, muna mvu wantatu wa salu kia Yesu ova ntoto, vava kayenda kingula akundi andi, i sia vo, Lazaro, Mareta yo Maria. Vava kakala wavuanda, wayantika longa. O Mareta i vana kakala, kansi wafwa e diya kadi wasalanga kwayingi muna kubika madia ma nzenza batambula. Vava Yesu kamona dina diavangamanga, kuna ngemba zawonso wasingika Mareta yo kunsadisa kabakula vo ke diakala kwandi mfunu ko mu lamba madia mayingi. (Luka 10:40-42) Kuna kwalanda, muna ola zavitila o lufwa lwandi, Yesu yandi kibeni wasadila e longi dina kavana Mareta. Kavava mambu mayingi ko vava kasikidisa e lambu dia Luyindulu. Adieyi ditulongele mu kuma kia Yesu?

5. E lambu kasikidisa o Yesu adieyi disonganga mu kuma kiandi? Nkia ngwizani dina ye sono kia Filipi 2:5-8?

⁵ Yesu wasonga vo nlembami kakala muna mawonso kavova yo vanga. Muna kuma kiaki, ke tusivikanga ko mu kuma kia lulembamu kasonga muna fuku wansuka wa zingu kiandi ova ntoto. (Mat. 11:29) Yesu wazaya wo vo ke kolo ko ovana lukau lusundidi tukau twawonso muna lusansu lwa wantu. Wazaya wo mpe vo Yave okumfula kimana kenda yala se ntinu kuna zulu. Kana una vo wazaya mawonso mama, katunta sungididi muna yandi kibeni ko yo vava vo bankubikila lambu diampwena muna yindula o lufwa lwandi. Wavovesa alongoki andi vo bavanganga lambu diakete muna sungamena lufwa lwandi nkumbu mosi muna mvu. (Yoa. 13:15; 1 Kor. 11:23-25) E lambu diadi diakete kansi diamfunu, disonganga vo Yesu kakala nkwa lulendo ko. Tuna ye kiese wau vo lulembamu kimosi muna fu yambote ya Ntinu eto.—Tanga Filipi 2:5-8.

6. Aweyi tulenda tanginina lulembamu lwa Yesu vava tunuananga ye mpasi?

⁶ Aweyi tulenda tanginina lulembamu lwa Yesu? Muna sianga e zolela ya wantu ankaka vana fulu kiantete, ke mu zolela ya yeto kibeni ko. (Fili. 2:3, 4) Yindula diaka dina  diavangama muna fuku wansuka wa zingu kia Yesu ova ntoto. Yesu wazaya wo vo ke kolo ko lufwa lwampasi lukunlwakila. Kana una vo i wau, watokana mu kuma kia ntumwa zandi zakwikizi ana bemona e ntantu mu kuma kia lufwa lwandi. Muna kuma kiaki, wasadila o fuku wauna wansuka muna kubalonga, kubakasakesa yo kubafiaulwisa. (Yoa. 14:25-31) Kuna lulembamu lwawonso, Yesu wasonga vo wete dia wantu ankaka katokanenanga, ke mu wete dia yandi kibeni ko. Ekwe mbandu ambote katusisila!

7. Aweyi Yesu kasongela unkabu vava kasikidisa o Nlekelo a Mfumu?

⁷ Ke vavioka kolo ko vava kasikidisa o Nlekelo a Mfumu, Yesu wasonga vo nkwa unkabu. Mu nkia mpila? Yesu watambulwila vanga luzolo lwa Se diandi, kana una vo wazaya vo muna wo vanga divava vo kavondwa nze kimpumbulu. (Mat. 26:65, 66; Luka 22:41, 42) Yesu wasikila ye kwikizi kimana kazitisa e nkumbu a Yave yo yikama kimfumu kiandi yo ziula e nzila kimana o wantu ana beviluka o ntima bavua moyo a mvu ya mvu. Kuna diak’e sambu, Yesu wakubika alandi andi mu kuma kia mambu mampasi mekubabwila.

8. (a) Adieyi Yesu kavovesa ntumwa zandi zakwikizi? (b) Aweyi alongoki a Yesu balandila e mbandu andi ya unkabu ku nim’a lufwa lwandi?

⁸ Yesu wasonga mpe unkabu kadi kasia sungididi muna ntokani zandi ko, kansi muna nsatu za ntumwa zandi zakwikizi. E lambu dina kasikidisa vava kasindika Yuda, diasungamesa awana badi kituka alandi andi akuswa e nsambu bevua mu kuma kia menga ma Yesu ye mu kuma kia kangu diampa dina bakota. (1 Kor. 10:16, 17) Muna kubasadisa basikila ye kwikizi yo kwenda yala yandi kuna zulu, Yesu wavovesa kwa alandi andi  dina yandi yo Se diandi bavingilanga kwa yau. (Yoa. 15:12-15) Yesu wavovesa mpe kwa ntumwa zandi e mpasi badi wanana zau kuna ntwala. I bosi, muna kubakasakesa balanda e mbandu andi, wabavovesa vo: “Nukala yo unkabu!” (Yoa. 16:1-4a, 33) Vioka mvu miayingi, alongoki a Yesu bakwamanana tanginina e mbandu a Yesu ya kuyivana kuna mvevo yo songa unkabu. Kana una vo diampasi diakala kwa yau, basadisanga muntu yo nkw’andi muna ntangw’ampasi.—Ayib. 10:33, 34.

9. Aweyi tulenda tanginina Yesu muna diambu ditadidi songa unkabu?

⁹ O unu mpe, tutangininanga o unkabu wa Yesu. Kasikil’owu, unkabu divavanga muna sadisa mpangi zeto ana bebangikwanga mu kuma kia lukwikilu lwau. Ezak’e ntangwa, e mpangi zeto balenda siwa mu pelezo kondwa kuma. Avo ediadi divangamene, tufwete vanga mawonso tulenda muna kubasadisa, nze vanga diambu mu kubatanina. (Fili. 1:14; Ayib. 13:19) E mpila yankaka tulenda songela unkabu i kwamanana samuna e nsangu zambote “kuna unkabu.” (Mav. 14:3) Nze Yesu, tuzolele kwamanana samuna e nsangu za Kintinu kana nkutu vo wantu batusidi e kitantu yovo kutubangika. Ezak’e ntangwa, tulenda mona vo unkabu tuvuidi o mfunu. Adieyi tulenda vanga?

10. Muna tumingu tuvitilanga Luyindulu, adieyi tufwete vanganga? Ekuma?

¹⁰ Tulenda wokesa unkabu weto muna yindulanga e vuvu tuna kiau mu kuma kia kimenga kia Kristu kia lukûlu. (Yoa. 3:16; Ef. 1:7) Muna tumingu tuvitilanga Luyindulu, tulenda wokesa luyangalalu lweto muna kimenga kia lukûlu. Muna kolo kiaki, tufwete tanganga e sono ya Nkand’a Nzambi mu kuma kia Luyindulu yo badika mana mavangama vitila lufwa lwa Yesu. I bosi, vava tulungana muna Nlekelo a Mfumu, tutoma bakula e  nsas’a sinsu isadilwanga muna Luyindulu ye una isunzulwilanga lukau lwantalu kavana o Yesu. Avo tutomene bakula dina Yesu yo Yave bavanga muna wete dieto ye nluta tuvuanga kumosi ye azolw’eto, e vuvu kieto kia kusentu kikumama. Ediadi dikutuvana o unkabu wa kwamanana zindalala yakuna mbaninu.—Ayib. 12:3.

11-12. Adieyi tulongokele yamu wau mu kuma kia Nlekelo a Mfumu?

¹¹ Tulongokele vo Nlekelo a Mfumu ke ukutusungamesanga kaka mfunu wa lukûlu ko, kansi ukutusungamesanga mpe e fu yambote ya Yesu, i sia vo, lulembamu ye unkabu. Tuvutulanga kikilu matondo wau Yesu wakinu songa e fu yayi nze Ngang’ambuta kuna zulu, ona ododokelanga muna wete dieto. (Ayib. 7:24, 25) Muna songa luyangalalu lweto, tufwete yindulanga o lufwa lwa Yesu nze una kakanikina. (Luka 22:19, 20) Tuvanganga wo muna lumbu kikwendanga e betela ye lumbu kia 14 kia ngonde a Nisani, kina vo i lumbu kisundidi o mfunu muna mvu.

¹² E mpila yasazu ivangamenanga Nlekelo a Mfumu ikutusadisanga mu bakula fu kiankaka kiafila Yesu mu fwa muna wete dieto. Vava kakala ova ntoto, watoma zayakana mu kuma kia fu kiaki. Nkia fu?

13. Aweyi e sono kia Yoane 15:9 ye 1 Yoa. 4:8-10 isongelanga o zola kuna Yave yo Yesu batusonga? Aki nani bevuanga nluta muna zola kwau?

¹³ Muna mawonso kavanga, Yesu watanginina o zola kwa Yave muna yeto una ufwene. (Tanga Yoane 15:9; 1 Yoane 4:8-10.) Edi disundidi o mfunu, Yesu muna zola kwawonso wavana moyo andi muna wete dieto. Kiakala vo tu akuswa yovo “mameme mankaka,” tuvuanga e nluta muna zola kuna Yave yo Mwan’andi batusonga muna nzil’a kimenga kia lukûlu. (Yoa. 10:16; 1 Yoa. 2:2) Yindula mpe lekwa isadilwanga muna Nlekelo a Mfumu. Ediadi disonganga mpe vo Yesu watoma zolanga alongoki andi. Mu nkia mpila?

14. Aweyi Yesu kasongela zola muna alongoki andi?

¹⁴ Yesu wasonga o zola kwandi muna alongoki andi akuswa kadi kasikidisa nkinzi wanene ko, kansi lambu diakete kwandi. Ekolo e ntangwa yaviokanga, diavavanga vo alongoki awaya akuswa bayindulanga lufwa lwa Yesu konso mvu, kana nkutu muna pelezo. (Lus. 2:10) Nga balemvokela Yesu? Elo!

15-16. Aweyi akaka belendelanga vanga o Nlekelo a Mfumu kana nkutu muna ntangw’a mpasi?

¹⁵ Tuka muna tandu kiantete yamu wau, Akristu akieleka bevanganga mawonso muna yindula lufwa lwa Yesu. Belandanga mana mavangama muna Nlekelo a Mfumu. Ezak’e ntangwa, bavanganga wo kana nkutu muna ntangw’a mpasi. Badika e nona ilende. Vava kakala muna pelezo kuna China, mpangi Harold King wayindula dina kalenda vanga muna yindula lufwa lwa Yesu kana una vo yandi mosi kakala. Wakubika kuna sweki e lekwa isadilwanga muna Luyindulu, wasadila e lekwa ina kakala yau. Watoma fimpa mu vava zaya e lumbu kivangama o Luyindilu. Vava e lumbu kia luyindulu kiafwana, wayimbila, samba yo fila e longi dia Nkand’a Nzambi yandi mosi muna pelezo.

¹⁶ Vena ye nona kiankaka. E buka kia mpangi z’akento bakala muna pelezo kuna fulu kiasadisilwanga e salu yangolo muna kolo kia Vita Yanzole ya Nz’amvimba basia zingu kiau mu vonza kimana bayindula o Nlekelo a Mfumu. Kansi, wau vo e lambu diadi ke divavanga mambu mayingi ko, balenda vanga o Luyindulu kuna sweki. Bavova vo: “Twafinama muntu yo nkwandi e kinzieta, twasia fimeza mayalwa nlele ampembe vana kati mana twatula  e vinyu ye mbolo. Twakwika e vela mu sia fintemo muna suku, kadi kele vo twasadila e minda mia kura, o wantu badi kutumona. . . . Twavutukila e nsilu twasia kwa Se dieto vo tusadila ngolo zeto zawonso muna tundidika e nkumbu andi avauka.” Ekwe lukwikilu basonga! Kieleka, Yesu zola kikilu kasonga wau kasikidisa lambu diakete mu kutusadisa twayindulanga lufwa lwandi kana nkutu muna ntangw’a mpasi.

17. Nkia yuvu tulenda kukiyuvula?

¹⁷ Ekolo kifinamanga e lumbu kia Luyindulu, diambote twakiyuvula e yuvu eyi: ‘Aweyi ndenda tanginina Yesu una ufwene muna songanga o zola? Nga isianga e nsatu za mpangi zame vana fulu kiantete? Nga ivavanga vo mpangi zame bavanga lutila mana balenda, yovo izayanga e tezo kiau?’ Yambula twatangininanga Yesu ntangwa zawonso yo songa vo ‘tukalanga e ntwadi muna mpasi ye kiese.’—1 Pet. 3:8.

18-19. (a) Nkia ziku tulenda kala kiau? (b) Nkia kani tufwete kala diau?

¹⁸ O nkanikinu wa lungana muna Luyindulu lwa lufwa lwa Kristu ke ukwamanana yakwele mvu ko. Vava Yesu “kekwiza” muna kolo kia mpasi zayingi yo kutakesa “awana basolwa” mu kwenda kuna zulu, o Luyindulu ke luvangama diaka ko.—1 Kor. 11:26; Mat. 24:31.

¹⁹ Kana nkutu vava o Luyindulu ke luvangama diaka ko, tuna ye ziku vo nkangu a Yave ukwamanana sungamena e lambu diadi diakete nze sinsu kia lulembamu, unkabu yo zola kuna ke kusidi songwa kwa muntu ankaka ko. Muna kolo kiakina, awana balungananga muna Luyindulu besinga mokena oma ma lambu diadi muna wete dia wantu awonso bezingila ova ntoto. Kansi, muna vua e nluta mia lambu diadi owau, tufwete kala ye kani dia tanginina lulembamu, unkabu yo zola kwa Yesu. Avo tuvangidi wo, tulenda kala ye ziku vo Yave okutusenda.—2 Pet. 1:10, 11.