1-2. (a) Adieyi Yave kemonanga vava ulolo wa wantu belungananga muna Nlekelo a Mfumu? (Tala e fwaniswa kia fukwa.) (b) Nkia kiuvu tubakila e mvutu mu longi diadi?

YINDULA una Yave kemonanga vava mafunda ye mafunda ma wantu mu nz’amvimba belungananga muna Nlekelo a Mfumu. Yave ke monanga kaka ulolo wa wantu ko, kansi omonanga mpe konso muntu una muna lukutakanu lwalu. Kasikil’owu, omonanga ana bekwizanga lungana muna Luyindulu konso mvu. Ayingi muna yau bekwizanga lungana kana una vo benuananga ye lubangamu. Akaka ke betoma kwizanga ko muna tukutakanu twankaka, kansi bebadikilanga Luyindulu vo lukutakanu lwamfunu kikilu luna ke bafwete kondwa ko. Yave omonanga mpe awana belungananga muna Luyindulu mu nkumbu antete, nanga mu zaya mana mevangamanga muna lukutakanu lwalu.

² Kieleka, Yave oyangalalanga mu mona ulolo wa wantu belungananga muna Luyindulu. (Luka 22:19) Yave ke yangalelanga kaka lutangu lwa wantu ko belungananga muna tukutakanu. Edi ketoma yangalelanga i kuma kifilanga wantu awaya mu kwiza muna tukutakanu. Mu longi diadi, tubaka e mvutu za kiuvu eki kiamfunu: Ekuma ke tulunganenanga kaka mu Luyindulu ko, kansi ye muna tukutakanu twankaka kekubikanga o Yave muna wete dia awana bekunzolanga?

3-4. (a) Ekuma tukwizilanga mu tukutakanu? (b) Nkia fu kikutufilanga mu lungana muna tukutakanu? (c) Mun’owu wa 1 Korinto 11:23-26, ekuma ke tufwete kondelwanga ko muna Luyindulu?

³ Tulungananga muna tukutakanu tweto kadi dimosi muna mambu mevavuanga muna nsambil’eto. Tulungananga mpe muna tukutakanu kadi i mûna tulongelwanga kwa Yave. Akwa lulendo ke bezolanga longwa ko. (3 Yoa. 9) Nswaswani yo  yau, tuzolele longwa kwa Yave ye kwa nkubika ina kesadilanga.—Yes. 30:20; Yoa. 6:45.

⁴ Vava tulungananga muna tukutakanu, tusonganga vo tu alembami ye tuna ye tima dia longwa. Muna fuku wa Luyindulu lwa lufwa lwa Yesu, tulungananga mu lukutakanu lwalu ke mu kuma kia sia kaka ko vo lukutakanu lwamfunu, kansi mu kuma kia sia mpe vo tuzolele lemvokela dina Yesu katukanikina: “Nuvanganga wo muna luyindulu lwame.” (Tanga 1 Korinto 11:23-26.) O lukutakanu lwalu lukumikanga e vuvu kieto kia kusentu yo kutusungamesa vo Yave otoma kutuzolanga. Kansi, Yave ozeye wo vo ke nkumbu mosi kaka ko muna mvu tuvuanga o mfunu wa lukasakeso ye lufiaulwisu. Muna kuma kiaki, Yave okutukubikilanga tukutakanu konso lumingu yo kutulomba vo twendanga muna tukutakanu twatu. O lulembamu lukutufilanga mu lemvokela Yave. Konso lumingu, ola zayingi tuvaulanga mu kubika malongi yo kwenda muna tukutakanu.

5. Ekuma alembami betambulwilanga e mbok’a Yave?

⁵ Konso mvu, alembami ayingi betambulwilanga e mbok’a Yave kadi bazolele longwa kwa yandi. (Yes. 50:4) Entete, betambulwilanga kwiza lungana muna Luyindulu. I bosi, beyantikanga kwiza muna tukutakanu twankaka. (Zak. 8:20-23) Yeto awonso tuna ye kiese kia longwa yo filwa kwa Yave wa ‘nsadisi eto ye mvuluzi eto.’ (Nku. 40:17) Nga vena ye diambu diankaka ditoma kutuvananga e kiese yovo disundidi o mfunu, avo ke tambulwila mboka ko ya longwa kwa Yave yo Yesu wa Mwan’andi ona ketoma zolanga?—Mat. 17:5; 18:20; 28:20.

6. Aweyi lulembamu lwasadisila yakala dimosi mu kwenda muna Luyindulu?

⁶ Konso mvu, tuvanganga ngolo za bokela wantu ayingi mu kwiza lungana muna Luyindulu lwa lufwa lwa Yesu. Alembami ayingi bevuanga e nluta vava betambulwilanga e mboka tukubavananga. Badika nona kimosi. Se vioka mvu miayingi, yakala dimosi wavewa e mbok’a Luyindulu wavovesa mpangi ona wamvana yo vo ke kwenda ko. Kansi, muna fuku wa Luyindulu, o mpangi wasivika vava kamona o muntu ndioyu muna Seka dia Kintinu. Yakala diadi wasivika kikilu muna mpila ina ampangi bantambulwila ye wayantika kwenda muna tukutakanu tweto konso lumingu. Muna mvu wauna, nkumbu tatu kaka kakondwa muna tukutakanu. Nki kiamfila mu baka e nzengo za yantika kwenda muna tukutakanu? Lulembamu lwamfila mu soba e ngindu zandi. Kuna kwalanda, o mpangi ona wamvana e mboka wavova vo: “O muntu ndioyu nlembami kikilu.” Ka lukatikisu ko vo Yave watunta muntu ndioyu kimana kansambila. Owau se mpangi eto.—2 Sam. 22:28; Yoa. 6:44.

7. Mana tulongokanga muna tukutakanu ye mana tutanganga muna Nkand’a Nzambi, aweyi malenda kutusadisila mu kala alembami?

⁷ O mambu tulongokanga muna tukutakanu ye mana tutanganga muna Nkand’a Nzambi malenda kutusadisa mu kala alembami. Muna tumingu tuvitilanga Luyindulu, muna tukutakanu tweto tutoma vovelanga e mbandu a Yesu yo lulembamu kasonga muna vana moyo andi se lukûlu. Muna lumbu ivitilanga o Luyindulu, diambote twatanganga e sono ya Nkand’a Nzambi ivovelanga mambu mavangama vitila lufwa ye lufuluku lwa Yesu. Mana tulongokanga muna tukutakanu twatu ye muna sono yayi ya Nkand’a Nzambi mewokesanga luyangalalu lweto muna kimenga kia Yesu. Ediadi dikutufilanga mu tanginina lulembamu lwandi yo vanga luzolo lwa Yave kana nkutu vava dikalanga diampasi.—Luka 22:41, 42.

8. Aweyi Yesu kasongela unkabu?

⁸ Tuzolele mpe tanginina Yesu muna diambu ditadidi songa unkabu. Yindula unkabu kasonga muna lumbu yavitila lufwa lwandi. Wazaya wo vo ke kolo ko e mbeni zandi bekumveza, wanda yo kumvonda. (Mat. 20:17-19) Kansi, wakubama kakala mu zizidila yamuna lufwa. Vava e ntangwa yafwana, wavovesa ntumwa zandi zakwikizi ana bakala yandi kuna Ngetesemane vo: “Nutelama, twenda kweto. Ndiona okungiekola ofinamene.” (Mat. 26:36, 46) Vava e makesa bayiza ye nuaninua yau muna kunkanga, watelama kuna ntwala, wayisunzula yo vovesa makesa vo bayambula e ntumwa zandi benda kwau. (Yoa. 18:3-8) Kieleka, Yesu unkabu kikilu kasonga. O unu, Akristu akuswa ye mameme makaka bevanganga e ngolo za tanginina unkabu wa Yesu. Mu nkia mpila?

9. (a) Ekuma tufwete kadila ye unkabu muna lungana muna tukutakanu konso lumingu? (b) E mbandu eto aweyi ilenda kumikina mpangi zeto bena mu pelezo mu kuma kia lukwikilu lwau?

⁹ Tufwete kalanga ye unkabu muna lembi kondwanga muna tukutakanu vava tuwanananga ye mambu mampasi. Akaka muna mpangi zeto bekwendanga muna tukutakanu kana una vo benuananga ye lukendalalu, lutovoko ye mpasi za mayela. Akaka kuna unkabu wawonso bekwendanga muna tukutakanu kana una vo bebangikwanga kwa yitu yau yovo kwa mfumu za tuyalu. Yindulanga una e mbandu eto ikasakeselanga mpangi zeto bena muna pelezo mu kuma kia lukwikilu lwau. (Ayib. 13:3) Vava bewanga vo twakinu sadila Yave kana nkutu muna ntangw’a mpasi, ediadi dikumikanga lukwikilu, unkabu ye kwikizi kiau. I diau mpe diavangama kwa Paulu wa ntumwa. Vava kakala muna pelezo kuna Roma, wayangalala vava kawá vo mpangi zandi bakinu sadila Nzambi ye kwikizi kiawonso. (Fili. 1:3-5, 12-14) Vitila kavaikiswa muna pelezo yovo fikolo kaka fiavioka, Paulu wasoneka nkand’andi kwa Ayibere. Muna nkanda wau, Paulu wakasakesa Akristu awaya akwa kwikizi kimana ‘bawokesa o zola kwau vana vena ampangi’ yo lembi yambula lungana muna tukutakanu.—Ayib. 10:24, 25; 13:1.

10-11. (a) Aki nani tufwete bokela muna Luyindulu? (b) Mun’owu wa Efeso 1:7, ekuma tufwete wo vangila?

¹⁰ Unkabu tusonganga vava tuvananga e mbok’a Luyindulu kwa yitu yeto, akweto a salu ye mfinangani zeto. Ekuma tukubavaninanga e mboka? Wau vo tuvutulanga kikilu matondo mu mana Yave yo Yesu bavanga muna wete dieto, tuzolele bokela akaka kimana beza muna Luyindulu yo longoka una balenda vuila e “nsambu” za Yave muna nzil’a lukûlu.—Tanga Efeso 1:7; Lus. 22:17.

¹¹ Vava tusonganga unkabu wa kwenda muna tukutakanu tweto, tusonganga mpe fu kiankaka kiamfunu kina Nzambi yo Mwan’andi besonganga mu mpila zayingi.

12. (a) Aweyi tukutakanu tuwokeselanga zola kweto muna Yave yo Yesu? (b) Adieyi e sono kia 2 Korinto 5:14, 15 kikutukasakesanga mu vanga muna tanginina Yesu?

¹² Zola kweto muna Yave yo Yesu kukutufilanga mu lungana muna tukutakanu tweto. Mana tulongokanga muna tukutakanu mewokesanga o zola kweto muna Yave yo Mwan’andi. Vava tukalanga muna tukutakanu, tusungameswanga mana bavanga muna wete dieto. (Roma 5:8) Luyindulu lukutusungamesanga e nzol’ampwena ina Yave yo Mwan’andi basonga kana nkutu kw’awana ke bazeye ntete mfunu a lukûlu ko. Muna songa luyangalalu lweto, tuvanganga e ngolo za tanginina Yesu muna mpila tunatinanga e zingu kieto konso lumbu. (Tanga 2 Korinto 5:14, 15.) Vana ntandu, e ntima mieto mikutufilanga mu kembelela Yave wau katuvana o lukûlu. Imosi muna mpila tulenda kunkembelela i vananga e mvutu muna tukutakanu tweto.

13. Aweyi tulenda songela zola kweto muna Yave yo Mwan’andi? Sasila.

¹³ Tusonganga vo tutoma zolanga Yave yo Mwan’andi vava tuyambulanga vanga maka mambu muna kubayangidika. Nkumbu miayingi, divavanga vo twabembola maka mambu kimana twenda muna tukutakanu. Nkutakani zayingi zivanganga tukutakanu muna masika vava ayingi bekalanga bayoya mu kuma kia salu yau ya lumbu ke lumbu. Tukutakanu twankaka tuvangamanga kuna nsuk’a lumingu vava akaka bevundanga. Nga Yave okutumonanga vava tukwendanga muna tukutakanu kana nkutu vava tukalanga twayoya? Elo! Ka lukatikisu ko vo Yave oyangalelanga e ngolo tuvanganga za kwenda muna tukutakanu mu songa o zola kweto muna yandi.—Maku 12:41-44.

14. Aweyi o Yesu katusisila e mbandu ambote muna diambu ditadidi songa zola kwakieleka?

¹⁴ Yesu watusisila mbandu ambote muna diambu ditadidi songa zola kwakieleka. Muna songa zola kwaku, Yesu watambulwila o fwa mu kuma kia alandi andi. Vana ntandu, wavanganga mawonso mu sia e zolela yau vana fulu kiantete. Kasikil’owu, wavaula e ntangwa ya kala vamosi ye alandi andi kana nkutu vava kiafinama lufwa lwandi. (Luka 22:39-46) Wasianga e sungididi mu mana kalenda vanga muna wete dia wantu ankaka, ke  mu ina kalenda tambula ko. (Mat. 20:28) Avo tutoma zolanga Yave ye mpangi zeto, tuvanga mawonso tulenda kimana twalembi kondwanga muna Nlekelo a Mfumu ye muna tukutakanu twankaka.

15. Aki nani tufwete toma sianga e sungididi?

¹⁵ Mu kintwadi kia wan’angudi twina. Muna kuma kiaki, tufwete vaulanga e ntangwa mu bokela wantu ayingi kimana batuyikama. Kansi, edi tufwete toma silanga e sungididi i sadisa awana “tuna yau entwadi muna lukwikilu” kansi bayambula samuna e nsangu zambote yovo kwiza mu tukutakanu. (Ngal. 6:10) Tusonganga o zola kweto muna yau vava tukubakasakesanga kimana beza lungana yeto muna tukutakanu, musungula muna lumbu kia Luyindulu. Nze Yave yo Yesu, tutoma yangalalanga vava awana bayoya muna mwanda bevutukanga kwa Yave wa Se ye Mvungudi eto anzodi.—Mat. 18:14.

16. (a) Aweyi tulenda kasakesela muntu yo nkwandi? Aweyi tukutakanu tweto tukutusadisanga? (b) Ekuma e kolo kiaki kinina kiambote mu sungamena e mvovo mia Yesu mina muna Yoane 3:16?

¹⁶ Muna tumingu tulanda, tuvanga mawonso muna bokela wantu ayingi kimana beza lungana yeto muna Luyindulu, lukala kina Kiatanu 19 Abidi 2019 kuna ndimuk’a ntangwa. (Tala e babu “ Nga Okubabokela?”) Tuzolele vanga mawonso tulenda muna kasakesa muntu yo kwandi muna lembi kondwanga muna tukutakanu twawonso kekutukubikilanga o Yave. Wau vo e mbaninu a nza yayi mu finama kaka ina, o kala muna tukutakanu dikutusadisa mu kwamanana songa lulembamu, unkabu yo zola. (1 Tes. 5:8-11) Muna kuma kiaki, yambula twasonga muna nsi a ntim’eto wawonso una tumonanga mu kuma kia zola kuna Yave yo Mwan’andi bekutusonganga.—Tanga Yoane 3:16.