1-2. Adieyi mbasi kavovese kwa akento ana bele kuna ziami kia Yesu? Adieyi yandi kibeni Yesu kabakanikini?

YINDULA vo mu mene-mene kia 16 kia ngonde a Nisani ya mvu wa 33 wa T.K. twina. Akaka muna akento bevuminanga Nzambi, bakendalele yo kwenda kuna ziami. Se lumbu yole iviokele kala tuka o Mfumu Yesu Kristu kazikwa. Ekolo bekwendanga kuna ziami ye kani dia kusa lekwa yansunga ye mazi mansunga muna vimbu dia Yesu, basivikidi kikilu wau bamwene vo e ziami kiaziuka kina. O mbasi ovovese akento vo Yesu ofulukidi, okudikidi vo: “Vita kekunuvita kuna Ngalili. Kuna nukumwena.”—Mat. 28:1-7; Luka 23:56; 24:10.

² Ekolo akento besisanga e ziami, Yesu yandi kibeni ubafinamene. Ubakanikini vo: “Nuenda zayisa mpangi zame kimana benda kuna Ngalili, i kuna bekumbwena.” (Mat. 28:10) Yesu tuludiku twamfunu kazolele vana kwa alongoki andi, kadi o lukutakanu lwalu i diambu diantete kakubikidi tuka kafulukidi.

3-4. Ekuma tulenda vovela vo e nkanikinu una muna Matai 28:19, 20, ke wavewa kaka kwa antumwa ko? (Tala e fwaniswa kia fukwa.)

³ Tanga Matai 28:16-20. Muna lukutakanu kakubika o Yesu, wavovesa alongoki andi mu kuma kia salu kisundidi o mfunu kina badi sala muna tandu kiakina. E salu kiaki, i kiau tusalanga o unu. Yesu wavova vo: “Dianu vo, nuenda, nuakitula wantu a zula yawonso se alongoki, . . . nubalonga balunda o mambu mawonso inukanikini.”

⁴ Yesu wazola vo alandi andi awonso basamuna e nsangu zambote. Ke kwa ntumwa 11 za kwikizi kaka ko kavana e nkanikinu  wau. Aweyi tuzayidi wo? Vava Yesu kavana nkanikinu wa kitula wantu se alongoki, nga antumwa kaka bakala vana mongo wowo kuna Ngalili? Sungamena vo mbasi wavovesa akento vo: “Kuna [Ngalili] nukumwena.” Muna kuma kiaki, akento awaya akwa kwikizi bakala mpe muna lukutakanu lwalu. Kansi ke yau kaka ko bakala mo. Paulu wa ntumwa wavova vo Yesu “wamoneka kw’ampangi vioka 500 mu nkumbu mosi.” (1 Kor. 15:6) Akweyi balunganena?

5. Adieyi tulenda longoka muna sono kia 1 Korinto 15:6?

⁵ Tuvuidi kuma yayingi muna kwikila vo muna 1 Korinto 15:6, Paulu lukutakanu lwavangama kuna Ngalili kayika, luna lwasonama muna Matai kapu kia 28. E kuma kiantete, ayingi muna alongoki a Yesu, Mingalili bakala. Muna kuma kiaki, diasazu diakala muna lungalakesa o wantu vana mongo kuna Ngalili ke mu nzo a muntu ko kuna Yerusaleme. Kiazole, o Yesu vava kafuluka wamoneka kwa ntumwa zandi 11 muna nzo a muntu mosi kuna Yerusaleme. Kele vo Yesu kwa antumwa kaka kazola vana luludiku lwa samuna e nsangu zambote yo kitula wantu se alongoki, wadi wo vangila kuna Yerusaleme vana fulu kia lomba kwa antumwa, kwa akento ye kwa wantu ankaka bawananena kuna Ngalili.—Luka 24:33, 36.

6. Aweyi e sono kia Matai 28:20 kisongelanga vo o nkanikinu wa kitula wantu se alongoki kwa yeto mpe wavewa? Aweyi o wantu belemvokelanga o nkanikinu wau o unu?

⁶ Tutala e kuma kiatatu. O nkanikinu wa Yesu wa kitula wantu se alongoki, ke wavewa kaka kwa Akristu ko ana bazingila muna tandu kiantete. Aweyi tuzayidi wo? Yesu wafokolwela o luludiku lwandi muna mvovo emi: “Ngina yeno e lumbu yawonso yakuna mbaninu a tandu.” (Mat. 28:20) Tulenda mona e ndungan’a mvovo mia Yesu, o unu ayingi mu kitula bena wantu se alongoki. Yindul’eti e diambu edi: Konso mvu, tezo kia 300.000 ma wantu bevubwanga se Mbangi za Yave yo kituka alandi a Yesu Kristu.

7. Adieyi tuvovela mu longi diadi? Ekuma?

⁷ Ayingi muna awana belongokanga yeto e Bibila, benungunukanga yo vubwa. Kansi, akaka muna awana belongokanga yeto, wonga bekalanga wau wa kituka alongoki a Kristu. Bezolanga longoka, kansi ke bazolele nungunuka ko yo vubwa. Avo muntu olongokanga yandi, tuna ye ziku vo ozolele kunsadisa mu sadila mana kelongokanga yo kituka nlongoki a Kristu. Mu longi diadi, tuvovela una tulenda sadisila alongoki bazola Yave yo nungunuka muna mwanda. Ekuma tuvovela e diambu diadi? Kadi vekala ye ntangwa ina tufwete baka e nzengo kana vo tukwamanana longoka e Bibila yo muntu yovo ve.

8. Ekuma dikadilanga diampasi mu sadisa alongoki bazola Yave?

⁸ Yave ozolele vo wantu bansadila mu kuma kia zola bena kwau muna yandi. Muna kuma kiaki, e kani dieto i sadisa alongoki eto babakula vo Yave otokanenanga e wete diau ye otoma kubazolanga. Tuzolele kubasadisa babadikila Yave nze ‘Se dia wan’a nsona ye ntanini akento bafwilw’akala.’ (Nku. 68:5) Vava alongoki aku beyantika mona o zola kwa Nzambi muna yau, ediadi dikubasadisa mu siamisa o zola kwau muna yandi. Diampasi dikalanga kwa alongoki akaka mu badikila Yave nze Se dianzodi, kadi o mase mau ke bekubasonganga o zola ye ngemba ko. (2 Tim. 3:1, 3) Vava ofilanga e longi dia Bibila, toma vovelanga e fu ya Yave una ufwene. Sadisanga alongoki aku babakulanga vo Nzambi eto  anzodi ozolele vo bavua moyo a mvu ya mvu ye ozolele mpe kubasadisa mu lungisa e kani diadi. Adieyi diaka tulenda vanga?

9-10. Nkia nkanda tufwete sadila vava tufilanga malongi ma Bibila? Ekuma tusadilanga e nkanda miami?

⁹ Sadilanga o nkanda “Adieyi Nkand’a Nzambi Ulenda Kutulonga?” ye “Nusikila Muna Zola kwa Nzambi.” E nkanda miami i miau misadilwanga muna sadisa alongoki eto batoma zola Yave. Kasikil’owu, e kapu kiantete kia nkanda Kutulonga, uvananga e mvutu za yuvu eyi: Nga Nzambi okutuvuang’o mfunu yovo nkwa nsoki? Aweyi Nzambi kemonanga mu kuma kia mpasi za wantu? ye Nga olenda kala nkundi a Yave? Adieyi tulenda vova mu kuma kia nkanda Nusikila Muna Zola kwa Nzambi? O nkanda wau usadisanga alongoki mu bakula una e nkanikinu mia Bibila milenda tomesena e zingu kiau yo kala ye ngwizani ambote yo Yave. Kana nkutu vo walongoka kala e nkanda miami ye wantu ankaka, toma kubikanga konso longi yo kwamanana sia e sungididi muna mambu mamfunu, landila e nsatu za nlongoki.

 ¹⁰ Adieyi ovanga kele vo o nlongoki aku ozolele zaya e diambu dina vo ke divovelwanga ko muna nkanda mina muna Salanganu Yeto ya Longela? Nanga olenda kunkasakesa kimana yandi kibeni katanga o nkanda wau, ediadi dikuvana e lau dia kwamanana fila e longi muna nkanda miasikidiswa mu longoka e Bibila yo wantu, nze mina tuyikidi kala.

11. Ekuma tufwete yantikilanga e longi muna sambu yo fokolwela dio mpe muna sambu? Aweyi olenda sadisila nlongoki kabakula o mfunu wa samba?

¹¹ Yantikilanga e longi muna sambu. Avo tuyantikidi longoka e Bibila yo muntu, lembi viokesa tumingu twayingi, diambote twayantikilanga e longi muna sambu yo fokolwela dio mpe muna sambu. Tufwete sadisa nlongoki kazaya vo muna lusadisu lwa mwand’avelela kaka i tulenda bakulwila e Diambu dia Nzambi. Alongi akaka a Bibila besasilanga e kuma besambilanga vitila bayantika fila e longi, muna tanga e sono kia Yakobo 1:5, kivovanga vo: “Dianu vo, avo mosi muna yeno okondelo ngangu, yambula kakwamanana lomba kwa Nzambi.” I bosi, o nlongi oyuvulanga kwa nlongoki vo: “Aweyi tulenda lombela e ngangu kwa Nzambi?” Nanga o nlongoki otambulwilanga vo diamfunu mu samba kwa Nzambi.

12. Aweyi olenda sadila e sono kia Nkunga 139:2-4, mu sadisa nlongoki katomesa e sambu yandi?

¹² Longa nlongoki aku una kalenda vangila e sambu. Sasila kwa nlongoki vo Yave ozolele wá e sambu yandi ya nsi a ntima. Unsasila mpe vo muna sambu ya yeto kibeni, tulenda ziula e ntima mieto kwa Yave yo kunzayisa e mambu mana ke tuzolele zayisa kwa muntu ankaka ko. Kadi o Yave otomene zaya mana mena muna ntima mieto. (Tanga Nkunga 139:2-4.) Tuzolele mpe kasakesa alongoki eto vo balombanga lusadisu kwa Nzambi kimana basoba e ngindu ye fu yambi. Muna bonga e nona, dilenda kala vo nlongoki eto otoma zolanga kembelela nkinzi mosi una Akristu ke bafwete kembelela ko. Ozeye wo vo nkinzi wau wambi, kansi oyangalelanga maka mambu ma nkinzi wau. Muna kuma kiaki, kasakesa nlongoki kazayisa kwa Yave una kemonanga yo kundodokela vo kansadisa mu zola kaka mana Nzambi kezolanga.—Nku. 97:10.

13. (a) Ekuma tufwete bokelelanga alongoki eto mu lungana mu tukutakanu tweto? (b) Aweyi tulenda sadisila nlongoki eto mu lembi kuyimwena se nzenza muna Seka dia Kintinu?

¹³ Lembi viokesa ntangw’ayingi, bokela nlongoki aku kimana kalungana muna tukutakanu tweto. Mana o nlongoki aku kewanga yo mona muna tukutakanu tweto, malenda simba o ntim’andi yo kunsadisa mu nungunuka. Unsonga e video, Nkia Mambu Mevangamanga Muna Seka dia Kintinu yo kumbokela kimana nuenda kumosi muna seka dia Kintinu. Avo dilendakana, vanga e nkubika ikunsadisa mu kwenda mu tukutakanu. Diambote mpe mu lomba kwa mpangi zaswaswana mu kwenda yaku entwadi muna fila e longi diandi. Muna mpila yayi, o nlongoki aku otoma zaya ampangi muna nkutakani yo lembi kuyimwena se nzenza vava kekwenda muna tukutakanu.

14. Adieyi dilenda fila o nlongoki mu nungunuka muna mwanda?

¹⁴ E kani dieto i sadisa alongoki eto banungunuka muna mwanda. (Efe. 4:13) Vava muntu ketambulwilanga longoka e Bibila, nanga ovavanga zaya una e longi diadi dilenda kuntwasila e nluta. Ekolo o zola kwandi muna Yave kuwokelanga, nanga oyindula una kalenda sadisila akaka, musungula awana bena muna nkutakani. (Mat. 22:37-39)  Kukadi ye lukatikisu ko lwa zayisa kwa nlongoki aku vo lau kena diau dia yikama e salu kia Kintinu muna vananga tukau.

15. Aweyi tulenda sadisila nlongoki eto mu zaya dina kafwete vanga avo diambu dimbwididi?

¹⁵ Longa nlongoki aku dina kalenda vanga avo diambu dimbwididi. Yindula vo nlongoki aku una vo nteleki walembi vubwa, uzayisi vo diambu kabakanene yo mpangi muna nkutakani. Vana fulu kia kala ku sambu dimosi, nga olenda kunsasila dina Bibila kivovanga mu kuma kia diambu diadi? O nlongoki olenda loloka o mpangi yo vilakana e diambu. Avo kalendi wo vanga ko, olenda mokena yo mpangi kuna ngemba ye zola kwawonso ye kani dia ‘baka o mpangi andi.’ (Tezanesa ye Matai 18:15.) Sadisa nlongoki aku kakubika mana kevova. Unsonga una kalenda sadila e JW Library^®, o Nkanda wa Vavulwila wa Mbangi za Yave ye nzil’eto ya jw.org^® muna zaya una kalenda singikila e diambu diadi. Avo otomene longoka una kalenda singikila e mambu ye akaka vitila kavubwa, diasazu dikala mu kala ye ngwizani ambote ye ampangi muna nkutakani vava kevubwa.

16. Ekuma dinina diambote mu bokelanga mpangi zankaka mu kwenda yaku mu fila e longi?

¹⁶ Bokelanga mpangi zankaka muna nkutakani yo nkengi a zunga vava kekingulanga e nkutakani eno kimana nuenda kumosi mu fila e longi diadi. Ekuma? Katula e kuma yankaka tuyikidi kala, ateleki akaka balenda sadisa o nlongoki muna mpila ina ngeye kibeni kulenda wo vangila ko. Kasikil’owu, nanga o nlongoki ozolele yambula nua mfomo, kansi nkumbu miayingi ovutukilanga e fu kia nua mfomo. Olenda vaika yo mpangi ona wavutukilanga nua mfomo mu nkumbu miayingi kansi wasunda e fu kiaki. O mpangi ndioyo wakubama kena mu vana luludiku luna o nlongoki kavuidi o mfunu. Avo kulenda fila e longi ko vana ndambu a mpangi wazikuka, olenda kunlomba vo kafila e longi muna lumbu kiakina. Vava olombanga kwa mpangi zankaka benda yaku entwadi mu fila e longi, ediadi nluta miayingi ditwasa kwa nlongoki aku. Sungamena vo e kani dieto i sadisa nlongoki kanungunuka muna mwanda.

17-18. Adieyi ofwete vanga vitila wabaka e nzengo za yambula longoka yo nlongoki aku?

¹⁷ Avo nlongoki aku a Bibila ke nungunukanga ko, nanga olenda kukiyuvula: ‘Nga mfwete kwamanana longoka yandi?’ Vitila wabaka e nzengo zazi, ofwete yindula mu kuma kia umbakuzi wa nlongoki. Vena ye wantu akaka benungunukanga mu nzaki, kansi kuna kwa akaka ntangwa yayingi divavanga. Muna kuma kiaki, ukiyuvula: ‘Nga nlongoki ame mu nungunuka kena mun’owu wa tezo kiandi?’ ‘Nga mu ‘lunda’ kena yovo osadilanga mana kelongokanga?’ (Mat. 28:20) Valenda vioka ntangwa yayingi kimana nlongoki kakituka se nlandi a Kristu. Kansi, kafwete kwamanana vanga e nsobani muna zingu kiandi.

 ¹⁸ Adieyi tufwete vanga avo muntu tulongokanga yandi ke songanga ko vo e longi mfunu dina kwa yandi? Yambula twafimpa e diambu edi: O nlongoki aku ofokwele longoka o nkanda Kutulonga, nanga oyantikidi mpe longoka o nkanda Nusikila Muna Zola Kwa Nzambi. Kansi, ke kwendanga mu tukutakanu ko ngatu muna Luyindulu. Nkumbu miayingi ovavanga vakuba mu lembi longoka e Bibila. Avo nlongoki aku i diau kevanganga, ofwete toma mokena yandi. *

19. Adieyi olenda vova kwa nlongoki una vo ke nungunukanga ko? Nkia mambu ofwete fimpa?

¹⁹ Olenda yuvula kwa nlongoki vo: ‘Nkia diambu disundidi e mpasi kwa ngeye mu kituka Mbangi a Yave?’ O nlongoki olenda vutula vo: ‘Izolanga longoka e Bibila, kansi kisinga kituka Mbangi a Yave ko!’ Avo i wau keyindulanga kana una vo se kolo kelongokanga e Bibila, nga diambote mu kwamanana longoka yandi? Kuna diaka e sambu, dilenda kala vo o nlongoki wazayisa kala e kuma kenungunukinanga ko. Kasikil’owu, nanga oyindulanga vo ke lenda sila umbangi mu nzo ye nzo ko. Avo otomene bakula una kemonanga, ozaya una olenda kunsadisila muna nungunuka.

20. E sono kia Mavangu 13:48, aweyi kilenda kutusadisila mu baka e nzengo za kwamanana fila e longi yovo ve?

²⁰ Diankenda mu vova vo akaka muna alongoki eto bena nze Aneyisaele muna lumbu ya Yezekele wa ngunza. Tala dina Yave kavova mu kuma kiau kwa Yezekele: “Kuna kwa yau, ongeye wina nze nkung’anzola, wayimbilwa mu ndinga yambote-mbote, watoma sikwa muna nsambi. Bewá e mvovo miaku, kansi ke mosi ko olemvokela mio.” (Yez. 33:32) Dilenda kala diampasi kwa yeto mu vovesa kwa nlongoki vo tuyambula longoka yandi e Bibila. Kansi, “e ntangwa isidi yankufi.” (1 Kor. 7:29) Vana fulu kia viokesa e ntangwa mu fila e longi kwa muntu ke nungunukanga ko, tufwete sia e sungididi kieto mu vava ndiona una kikilu ye “luzolo lwa vua moyo a mvu ya mvu.”—Tanga Mavangu 13:48.

21. Akieyi i sono kia mvu wa 2020? Ekuma kifwanukinu?

²¹ E sono kia mvu wa 2020, kikutusadisa mu sia e sungididi kieto muna mpila tulenda tomesena e salu kieto kia kitula wantu se alongoki. E sono kia mvu wau kiyikanga e mvovo mina Yesu kasadila muna lukutakanu lwavangama vana mongo, kuna Ngalili. Wavova vo: ‘Dianu vo, nuenda, nuakitula wantu . . .  se alongoki, nubavuba.’—Mat. 28:19.