1-2. Nkia diambu diasivi diavangama muna lumbu kia Pentikosti wa mvu wa 33 wa T.K.?

KIA LUMINGU kiakala muna mene, kuna Yerusaleme. Lumbu kia Pentikosti wa mvu wa 33 wa T.K. Tezo kia 120 m’alongoki balungana kuna seka dia ntandu. (Mav. 1:13-15; 2:1) Ke vavioka lumbu yayingi ko vitila lumbu kia Pentikosti, Yesu wakanikina alongoki andi vo ke bavaiki mu Yerusaleme ko kimana batambula lukau lwamfunu. (Mav. 1:4, 5) Kuna kwalanda, nkia diambu diavangama?

² ‘Vana vau, e mazu matuka kuna zulu nze tembwa kiangolo’ yo zala muna nzo yawonso. I bosi, ‘tubini twakala nze tiya’ twamoneka vana ntandu a ntu mia alongoki, ‘awonso bazala yo mwand’avelela.’ (Mav. 2:2-4) Muna mpil’e sivi, Yave wapongola mwand’andi avelela kwa alongoki awaya. (Mav. 1:8) Yau i wantu antete bakuswa muna mwand’avelela * yo tambula e vuvu kia kwenda yala yo Yesu kuna zulu.

3. Ekuma awana balungana muna lumbu kia Pentikosti bakadila ye ziku vo bakuswa muna mwand’avelela?

³ Kele vo wakala mosi muna alongoki ana balungana kuna seka dia ntandu muna lumbu kiakina, kwadi vilakana ko dina diavangama ngatu kala ye lukatikisu vo okusilu kikilu muna  mwand’avelela. Kadi, vana ntandu a ntu aku vamoneka lekwa nze nlaku a tiya. I bosi wayantika vova mu ndinga za kinzenza. (Mav. 2:5-12) Nga awonso ana bekuswanga muna mwand’avelela, mu mpil’e sivi bekusilwanga? Nga muna kolo kiau kimosi bekuswanga muna zingu kiau? Ve. Aweyi tuzayidi wo?

4. Awana bakuswa muna tandu kiantete, nga muna kolo kiau kimosi bakuswanga? Sasila.

⁴ Yambula twabadika e ntangwa ina muntu kekuswanga. Akristu 120 ke yau kaka ko bakuswa muna mwand’avelela muna lumbu kia Pentikosti wa mvu wa 33 wa T.K. Kuna kwalanda muna lumbu kiakina, tezo kia 3.000 ma wantu batambula mpe mwand’avelela. Bakuswa vava bavubwa. (Mav. 2:37, 38, 41) Kansi, muna mvu mialanda ke Akristu awonso ko bakuswanga muna ntangw’a luvubu. Esi Samaria bakuswa muna mwanda ku nim’a luvubu lwau. (Mav. 8:14-17) O Koneleo ye esi nzo andi bakuswa muna mwanda vitila nkutu bavubwa. Kansi, ediadi diatutu kikilu.—Mav. 10:44-48.

5. Landila e sono kia 2 Korinto 1:21, 22, adieyi divangamanga vava muntu kekuswanga muna mwand’avelela?

⁵ Yambula twabadika mpe dina divangamanga vava muntu kekuswanga muna mwand’avelela. Kuna lubantiku, diampasi dikalanga kwa akaka muna awana bekuswanga mu tambulwila vo Yave ubasolele mu kwenda kuna zulu. Bekukiyuvulanga: ‘Ekuma Nzambi kansolele?’ Kansi akaka ke wau ko bemonanga. Kiakala aweyi muntu kemonanga, Paulu wa ntumwa wasasila dina divangamanga kwawonso bekuswanga vava kavova vo: “Vava nuakwikila, nuasiwa e dimbu * kia mwand’avelela una nuasilwa o nsilu muna yandi, owu wateka vewa se lusikidisu lwa vua dieto.” (Efe. 1:13, 14; mvovo vana yand’a lukaya.) Muna kuma kiaki, Yave osadilanga mwand’andi avelela kimana katoma kiesesa kwa Akristu awaya vo ubasolele mu kwenda kuna zulu. Muna mpila yayi, o mwand’avelela i “lusikidisu” yovo ziku bekalanga  kiau vo kuna zulu besinga vuila moyo a mvu ya mvu, ke va ntoto ko.—Tanga 2 Korinto 1:21, 22.

6. Adieyi Nkristu akuswa kafwete vanga mu tambula nsendo andi kuna zulu?

⁶ Vava Nkristu kekuswanga muna mwanda, nga disongele vo otambula kikilu o nsendo andi kuna zulu? Ve. O Nkristu una ye ziku vo mboka ya kwenda kuna zulu katambwidi. Kansi, kafwete sungamenanga o lulukisu lwalu: “Ampangi nutoma sia sungididi nuasikila muna mboka ye nsolwa ina nuasolwa, kadi avo nukwamanana vanga mambu mama, ke nufunga nkutu ko.” (2 Pet. 1:10) Kana una vo Nkristu akuswa wasolwa yovo watambula mboka ya kwenda kuna zulu, avo kasikidi ye kwikizi ko, ke tambula nsendo ko.—Fili. 3:12-14; Ayib. 3:1; Lus. 2:10.

7. Aweyi akuswa bezayilanga vo mboka ya kwenda ku zulu batambwidi?

⁷ Kansi, aweyi muntu kezayilanga vo mboka ya kwenda ku zulu katambwidi? E mvutu zina muna mvovo mia Paulu kuna kwa mpangi zakuswa kuna Roma, ana ‘babokelwa mu kala aveledi.’ Wabavovesa vo: “Ke nutambwidi mwand’a ubundu ko una umwesanga diaka o wonga, kansi mwand’a Nzambi kaka nutambwidi una unukitwidi se wan’andi, muna mwanda wau i tukazidi vo: “Aba, e Tata!” O mwanda wau kibeni, usianga umbangi kumosi yo mwanda eto vo, tu wan’a Nzambi.” (Roma 1:7; 8:15, 16) Muna lusadisu lwa mwand’avelela, Nzambi otoma kiesesanga akuswa vo mboka ya kwenda kuna zulu batambwidi.—1 Tes. 2:12.

8. E sono kia 1 Yoane 2:20, 27, aweyi kisongelanga vo Akristu akuswa ke bevavanga ko vo muntu ankaka kabavovesa vo bakusilu muna mwanda?

⁸ Yave ke yambulanga ko vo vakala ye lukatikisu muna ngindu ye muna ntima mia awana batambwidi e mboka ya kwenda kuna zulu. (Tanga 1 Yoane 2:20, 27.) Kana una vo i wau, nze Akristu awonso, divavanga mpe vo Akristu akuswa balongwa kwa Yave muna nkutakani. Kansi, ke bevavanga ko vo muntu ankaka kabavovesa vo bakusilu muna mwanda. Yave osadilanga mwand’andi avelela una vo i nkuma usundidi mu nsema wawonso, mu kubakwikidisa vo akuswa kikilu.

9. Mun’owu wa sono kia Efeso 1:18, nkia nsobani ivangamanga muna zingu kia muntu vava kekuswanga muna mwanda?

⁹ O unu, dilenda kala diampasi kwa selo yayingi ya Nzambi mu bakula una kemonanga o muntu avo Nzambi unkusidi muna mwanda. Ekuma? Kadi oyau ke akuswa ko. Nzambi wavanga wantu kimana bazinga yakwele mvu ova ntoto, ke ku zulu ko. (Tuku 1:28; Nku. 37:29) Kansi, Yave wasola akaka kimana benda zingila kuna zulu. Muna kuma kiaki, vava Nzambi kekubakusanga muna mwanda, e vuvu ye ngindu zau zisobanga kimana bakala ye tima dia kwenda zingila kuna zulu.—Tanga Efeso 1:18.

10. O mvovo ‘wutuluka’ aweyi usongele? (Tala mpe mvovo mina vana yand’a lukaya.)

¹⁰ Vava Akristu bekuswanga muna mwand’avelela, ‘bewutulukanga’ yovo ‘bewutukanga kuna ntandu.’ * Yesu wasonga vo diampasi mu sasila kwa muntu una vo ke kuswa ko una muntu ‘owutulukidi’ yovo ‘wawutuka  kwa mwanda’ kemonanga.’—Yoa. 3:3-8; mvovo vana yand’a lukaya.

11. Sasila e nsobani ivangamanga vava muntu kekuswanga.

¹¹ Vava Akristu bekuswanga muna mwanda, nkia nsobani ivangamanga? Vitila Yave kakusa Akristu awaya, vuvu kia zingila yakwele mvu ova ntoto bakala kiau. Bavingilanga e ntangwa ina Yave kesukisa umpumbulu wawonso yo kitula ntoto se paradiso. Nanga bayindulanga e kolo badi tambula yitu yovo akundi au ana bafwa. Kansi, vava bekuswanga, besobanga e ngindu zau. Nga beyindulanga vo e zingu ova ntoto ke kina diaka mfunu ko kwa yau? Nga besobanga e ngindu mu kuma kia lukendalalu yovo mpasi zasaka? Nga beyindulanga vo e zingu ova ntoto ke kikala kiakiese ko wau vo mambu mau mamosi kaka bekala vanga? Ve, Yave osadilanga mwand’andi avelela muna soba e ngindu ye vuvu kina balakukilanga o moyo.

12. Landila e sono kia 1 Petelo 1:3, 4, aweyi Akristu akuswa bemonanga mu kuma kia vuvu kiau?

¹² O Nkristu okusilu muna mwanda olenda kuyimwena vo kafwana ko mu tambula e lau diadi. Kana una vo i wau, ke kalanga ye lukatikisu ko vo Yave unsolele. Kiese kiayingi kekalanga kiau yo tonda Nzambi mu kuma kia vuvu kia kwenda zingila kuna zulu.—Tanga 1 Petelo 1:3, 4.

13. Aweyi Akristu akuswa bebadikilanga e zingu kiau ova ntoto?

¹³ Nga diadi disongele vo Akristu akuswa luzolo lwa fwa bekalanga lwau? Paulu wa ntumwa wavan’e mvutu za kiuvu kiaki. Watezanesa e nitu au ya kimuntu ye saba yo vova vo: “Ozevo, oyeto tuna mu saba kiaki tubumanga ye zitu, e kuma kadi ke tuzolele kio vula ko, kansi tuzolele vuata kiankaka, kimana kina kifwanga kiavingiswa eki kia moyo.” (2 Kor. 5:4) Ke disongele ko vo Akristu awaya ke beyangalelanga diaka zingu ova ntoto ko yo vava vo bafwa kwau mu nzaki. Kansi, beyangalelanga e zingu ova ntoto ye bazolele sadila Yave lumbu ke lumbu kumosi ye yitu ye akundi au. Kieleka, kiakala nkia salu besalanga, besungamenanga o nsendo una Nzambi kabasila o nsilu.—1 Kor. 15:53; 2 Pet. 1:4; 1 Yoa. 3:2, 3; Lus. 20:6.

14. Nkia mambu ke mesonganga ko vo muntu okusilu muna mwand’avelela?

¹⁴ Nga oyindulanga vo wakuswa muna mwand’avelela? Avo i wau oyindulanga, badika yuvu eyi yamfunu: Nga okalanga ye tima dia vanga luzolo lwa Yave? Nga vema kwayingi okalanga kwau muna salu kia umbangi? Nga oyangalelanga longoka Bibila yo fimpa “mambu masina ma Nzambi”? (1 Kor. 2:10) Nga omonanga vo Yave otoma kusambulanga muna salu kia umbangi? Nga omonanga vo mbebe ampwena una yau ya sadisa akaka bazaya Yave? Nga omonanga una Yave kekusadisilanga mu mambu mayingi ma zingu kiaku? Avo e mvutu zaku muna yuvu yayi elo, nga disongele vo mboka watambula ya kwenda kuna zulu? Ve, ke wau ko. Ekuma? E kuma kadi e selo yawonso ya Yave i wau mpe bemonanga, kiakala vo Akristu akuswa yovo ve. Vana ntandu, Yave olenda sadila mwand’andi avelela mu vana nkuma kwa konso selo kiandi, kiakala nkia vuvu kena kiau. Muna kuma kiaki, avo lukatikisu una lwau kana vo ku zulu okwenda, disongele vo kwakuswa ko. Awana bakuswa kwa Yave, ke bekalanga ye lukatikisu ko. Batomene wo zaya!

15. Aweyi tuzayidi wo vo ke awonso ko batambula mwand’avelela basolwa kimana benda kuna zulu?

 ¹⁵ Muna Bibila, muna ye nona yayingi ya selo yakwikizi ya Yave ana batambula mwand’avelela; kansi ke bakala ye vuvu kia kwenda kuna zulu ko. Davidi wafilwanga kwa mwand’avelela. (1 Sam. 16:13) O mwand’avelela wansadisa mu bakula mambu masina mu kuma kia Yave. O mwanda wau wansadisa mpe mu soneka nkanda miankaka mia Bibila. (Maku 12:36) Kana una vo i wau, Petelo wa ntumwa wavova vo Davidi “katomboka ku zulu ko.” (Mav. 2:34) Yoane wa Mvubi mpe ‘wazala kakala yo mwand’avelela.’ (Luka 1:13-16) Yesu wavova vo ke vakala muntu ko wasunda Yoane o nene, kansi wakudikila vo Yoane ke kwenda ku zulu ko mu yala se ntinu. (Mat. 11:10, 11) Yave wasadila mwand’andi avelela mu vana wantu awaya o nkuma wa vanga mambu mayingi masivi, kansi kasadila mwanda wau ko mu kubasola kimana benda kuna zulu. Nga disongele vo ke bakala ye lukwikilu lwafwana ko mu kwenda yala kuna zulu? Ve. Ediadi disongele vo Yave osinga kubafula kimana bazingila muna Paradiso ova ntoto.—Yoa. 5:28, 29; Mav. 24:15.

16. Nkia vuvu bena kiau ayingi muna selo ya Nzambi o unu?

¹⁶ Ayingi muna selo ya Nzambi omu lumbu yeto ke bekwenda ku zulu ko. Nze Abarayama, Sara, Davidi, Yoane wa Mvubi ye akaka kuna nz’ankulu, e selo yayi bena ye vuvu kia zingila ova ntoto vava beyalwa kwa Kintinu kia Nzambi.—Ayib. 11:10.

17. Nkia yuvu tubakila e mvutu muna longi dilanda?

¹⁷ Wau vo akaka muna akuswa bakinu ova ntoto kumosi yo nkangu a Nzambi, tulenda kukiyuvula yuvu yayingi. (Lus. 12:17) Kasikil’owu, aweyi akuswa bafwete kuyibadikilanga? Avo mpangi muna nkutakani eno oyantikidi dia e mbolo yo nua e vinyu muna Luyindulu, aweyi ofwete kadila yandi? Adieyi tuvova wau vo lutangu lw’awana bekuyibadikilanga vo Akristu akuswa mu wokela kaka lwina? Nga ediadi difwete kutokanesa? Tubaka e mvutu za yuvu yayi muna longi dilanda.