1-2. Ayingi muna nkangu a Yave, nkia mambu mekubabwilanga? Aweyi bemonanga?

TALA e nona tatu ilende: Mpangi a toko ozayisu kwa dotolo vo kimbevo kiangolo kena kiau. Mpangi ayakala una ye kimbuta kia mvu 50 okatwilu mu salu. Kana una vo ovangidi e ngolo za vava salu kiankaka, kansi kasololwele kio ko. Mpangi ankento wa nkwa kwikizi una se nunu, ke lendanga diaka vanga ko mana kavanganga muna salu kia Yave.

² Avo dimosi muna mambu mayikilu mu tini kiantete onuananga mau, nanga okuyimwenanga vo kuna diaka mfunu ko. E mambu mama malenda vidisa e kiese kiaku, malenda mpe kufila mu kuyibadikila vo kuna mfunu ko yo fwasa e ngwizani aku ye wantu ankaka.

3. Satana ye awana bekuntangininanga, aweyi bebadikilanga e zingu kia wantu?

³ O unu, wantu ova nza betangininanga e mpila ina Satana kebadikilanga e zingu kia wantu. Nkumbu miayingi, Satana obadikilanga o wantu vo ke bena kwau mfunu ko. Wavovesa Eva vo avo okolamene Nzambi, mu luvevoko kekala. Kansi, Satana wazaya wo vo ndiona okolamena Nzambi, fwa kefwa. Nkumbu miayingi, Satana ovitanga o ntu muna mambu ma yinkita, tuyalu ye mabundu ma nza yayi. Muna kuma kiaki, ke tusivikanga ko vava tumonanga una akiti, ayadi ye mfumu za mabundu balembi zitisilanga e zingu kia wantu ngatu tokanena e wete diau.

4. Adieyi tuvovela mu longi diadi?

 ⁴ Kansi o Yave waswaswana, ozolele vo twayibadikilanga vo mfunu twina. Okutusadisanga vava tuwanananga ye mambu malenda kutufila mu kuyibadikila vo ke tuna kweto mfunu ko. (Nku. 136:23; Roma 12:3) Mu longi diadi, tuvovela una Yave kekutusadisilanga mu mambu malende: (1) Vava tubakamanga kimbevo, (2) vava tunuananga ye mpasi za kondwa nzimbu ye (3) vava e kinunu kikutufilanga mu yindula vo ke tuna diaka mfunu ko muna salu kia Yave. Entete, yambula twabadika e kuma tulenda kadila ye ziku vo konso muntu mu yeto mfunu kena vana meso ma Yave.

5. Nki kisonganga vo wantu mfunu bena vana meso ma Yave?

⁵ Kana una vo mu mbundukutu a ntoto twavangilwa, kansi vana meso ma Yave mfunu kikilu twina. (Tuku 2:7) Tala e kuma tuzayidi wo vo mfunu twina vana meso ma Yave. Wavanga o wantu ye ngangu za tanginina e fu yandi. (Tuku 1:27) E mpila ina Yave katuvangila ilutidi e mpila kavangila e lekwa yankaka ova ntoto, kadi watuvana e kiyekwa kia lunga-lunga e bulu ye ntoto.—Nku. 8:4-8.

6. Nkia kuma kiankaka tuna kiau mu vova vo Yave ovuanga wantu alembi lunga o mfunu?

⁶ Kana nkutu vava Adami kasumuka, Yave wakwamanana vua wantu o mfunu. Yave okutuvuanga o mfunu ya mu tezo kia vana Yesu wa Mwan’andi anzolwa se kimenga mu kuma kia masumu meto. (1 Yoa. 4:9, 10) Muna vua e nluta mia lukûlu, Yave ofula awana bafwa mu kuma kia sumu dia Adami, i sia vo, “ansongi ye awana bena vo ke ansongi ko.” (Mav. 24:15) E Diambu dia Yave disonganga vo mfunu twina vana meso mandi kiakala vo ke twina ye vimpi wambote ko, tunuananga ye mpasi za kondwa nzimbu yovo kinunu.—​Mav. 10:34, 35.

7. E selo ya Nzambi, nkia kuma yankaka bavuidi mu kwikila vo Yave okubavuanga o mfunu?

⁷ Tuvuidi kuma yankaka mu kwikila vo mfunu twina vana meso ma Yave. Yandi okututuntanga yo mona una tutambulwilanga e nsangu zambote. (Yoa. 6:44) Vava twayantika finama Yave, oyandi mpe watufinama. (Yak. 4:8) Yave ovanganga mawonso muna kutulonga, ediadi disonganga vo mfunu twina vana meso mandi. Ozeye e mpila wantu tuna owau ye mpila tulenda kituka. Yave okutusembanga mu kuma kia zola kwandi muna yeto. (Nga. 3:11, 12) E mambu mama i ziku kisonganga vo Yave okutuvuanga kikilu o mfunu.

8. Aweyi e mvovo mia Nkunga 18:27-29, milenda kutusadisila vava tunuananga ye mpasi?

⁸ Akaka babadikilanga Davidi wa Ntinu vo muntu ambi, kansi Davidi wazaya wo vo Yave watoma kunzolanga yo kunsadisa. O zaya e diambu diadi, diasadisa Davidi mu zizidila e mpasi. (2 Sam. 16:5-7) Vava tukendalalanga yovo vava tunuananga ye mpasi, Yave olenda kutusadisa twabadikilanga e mambu mu mpila yaswaswana yo kutusadisa mu sunda konso mpasi. (Tanga Nkunga 18:27-29.) Avo tuna ye lusadisu lwa Yave, ke vena diambu ko dilenda kutukakidila muna kunsadila ye kiese kiawonso. (Roma 8:31) Owau, yambula twabadika mambu matatu. Avo matubwididi, tufwete sungamena vo Yave okutuzolanga ye okutuvuanga o mfunu.

9. Aweyi tulenda kuyibadikila mu kuma kia kimbevo?

⁹ E kimbevo kilenda kututokanesa yamu tezo kia yindula vo ke tuna diaka mfunu ko. Nanga tulenda kendalala vava akaka bebakula vo ke tulendanga diaka vanga mambu mankaka ko yovo lusadisu lwa akaka tuvuidi o  mfunu. Kana nkutu vo akaka ke bazeye wo ko vo kimbevo tuna kiau, nanga tulenda kendalala wau vo ke tulendanga diaka vanga mambu mayingi ko nze una twavanganga. Muna kolo kiaki kiampasi, Yave okutufiaulwisanga. Mu nkia mpila?

10. Landila e sono kia Ngana 12:25, nki kilenda kutusadisa avo tubakamene kimbevo?

¹⁰ Avo tubakamene kimbevo, “e diambu diambote” dilenda vuvika e ngindu zeto. (Tanga Ngana 12:25.) Muna Diambu diandi, Yave wasonekesa e mvovo miambote mikutusungamesanga vo okutuvuanga o mfunu kana nkutu tubakamene kimbevo. (Nku. 31:19; 41:3) Avo tutangidi yo tangulula e Diambu dia Nzambi, Yave okutusadisa muna venga e ngindu zambi mu kuma kia kimbevo kieto.

11. Aweyi mpangi mosi katambulwila lusadisu lwa Yave?

¹¹ Badika e nona kia mpangi Jorge. Vava kakala nleke, mpangi Jorge wabakama kimbevo kiangolo yo mona vo kena diaka mfunu ko. Wavova vo: “Kiakala wakubama ko mu kuma kia mpasi za kimbevo kiame ye nsoni za tunta e sungididi kia wantu. Ekolo kimbevo kiame kiawokelanga, yayindula una e zingu kiame kiadi sobela. Yakendalala kikilu yo lomba lusadisu lwa Yave muna sambu.” Aweyi Yave kasadisila mpangi eto? Mpangi Jorge wakudikila vo: “Wau vo e ngindu zame ke zakala zavuvama ko, yakasakeswa vo yatanganga e sono yakete ya nkand’a Nkunga ina ivovelanga una Yave ketokanenanga e wete dia selo yandi. Yatangululanga e sono yayi lumbu ke lumbu yo bakula vo e sono yayi yankasakesanga kikilu. Kuna kwalanda, akaka bayantika mona vo e kiese kiame kiawokela. Bavovanga nkutu vo e kiese kiame kiabakasakesanga mpe. Yabakula vo Yave wavana e mvutu za sambu yame. Yave okunsadisanga mu soba  e mpila ikukibadikilanga. Yayantika sia e sungididi mu dina Bibila kivovanga mu kuma kia una Yave kekumbadikilanga kana una vo i mbevo.”

12. Avo kimbevo onuananga kiau, adieyi olenda vanga muna tambula lusadisu lwa Yave?

¹² Avo kimbevo onuananga kiau, kala ye ziku vo Yave ozeye una omonanga. Lomba lusadisu lwa Yave kimana wazaya una olenda badikila e kimbevo kiaku. I bosi, tanganga e Bibila muna solola e mvovo mia lufiaulwisu mina Yave kasonekesa mu kuma kiaku. Sianga e sungididi muna sono isonganga vo Yave ovuanga selo yandi o mfunu. Avo ovangidi wo, omona vo Yave muntu ambote kwa awana bekunsadilanga ye kwikizi kiawonso.—Nku. 84:11.

13. Aweyi o se kalenda mona avo okatwilu mu salu?

¹³ Mase mawonso bevanganga e ngolo muna lungisa e nsatu za esi nzo zau. Kansi, yindula vo mpangi kana una vo kavangidi kwandi diambu diambi ko, okatwilu mu salu. Ovangidi mawonso mu vava e salu kiankaka, kansi kasolwele ko. Ediadi dilenda fila mpangi eto mu kuyimwena vo kena mfunu ko. O sungamena e nsilu mia Yave, aweyi dilenda kunsadisila?

14. Ekuma Yave kelungisilanga e nsilu miandi?

¹⁴ E nsilu mia Yave ke mifunganga ko. (Yos. 21:45; 23:14) Vena ye kuma yayingi ikumfilanga mu lungisa e nsilu miandi. Entete, Yave otokanenanga una wantu bebadikila e nkumbu andi. Yave osianga o nsilu vo olunga-lunga selo yandi yakwikizi. Omonanga vo kafwete lungisa kikilu o nsilu wau. (Nku. 31:1-3) Vana ntandu, Yave ozeye wo vo kendalala tukendalala avo kalungisi ko e nsatu zeto, wau vo tu wan’andi. Okutusianga nsilu vo olungisa e nsatu zeto za nitu ye za mwanda. Ke vena  diambu ko dikunkakidila mu lungisa o nsilu wau.—Mat. 6:30-33; 24:45.

15. (a) Akristu a tandu kiantete, nkia mpasi bawanana zau? (b) Landila Nkunga 37:18, 19, nkia ziku tulenda kala kiau?

¹⁵ Avo tusungamene e kuma kifilanga Yave mu lungisa e nsilu miandi, dikutusadisa mu zizidila e mpasi za kondwa nzimbu. Badika e nona kia Akristu a tandu kiantete. Vava ampangi muna nkutakani yakala kuna Yerusaleme babangikwa, “katula kaka antumwa, yau awonso bamwanganeswa.” (Mav. 8:1) Yindula una o lubangamu lwalu lwabatwasila e mpasi za kondwa nzimbu. Nanga ampangi bavidisa e nzo zau, salu yau ye yinkita yau. Kana una vo i wau, Yave kababembola ko. Ampangi awaya ke bavidisa e kiese kiau ko. (Mav. 8:4; Ayib. 13:5, 6; Yak. 1:2, 3) Wau vo Yave wasadisa Akristu awaya akwa kwikizi, tuna ye ziku vo okutusadisa mpe.—Tanga Nkunga 37:18, 19.

16. Nki kilenda kutufila mu yindula vo ke tulenda diaka vanga mayingi ko muna salu kia Yave?

¹⁶ Ekolo tununanga, tulenda yindula vo ke tulenda diaka vanga mayingi ko muna salu kia Yave. Nanga i diau mpe kamona o Davidi wa ntinu vava kanuna. (Nku. 71:9) Ozevo, aweyi Yave kalenda kutusadisila?

17. Adieyi tulenda longoka muna lusansu lwa mpangi Jheri?

¹⁷ Badika e nona kia mpangi mosi ankento una ye nkumbu a Jheri. O mpangi ankento wabokelwa muna Seka dia Kintinu mu lungana mu lukutakanu mu kuma kia salu kia vangulula e fulu ya nsambil’eto. Kansi kazola kwenda ko. Wavova vo: “Omono i nunu kwame, yafwilwa o yakala, kiafwana ko muna sadilwa kwa Yave muna salu kiaki. Kina kwame mfunu ko.” Muna fuku vitila o lukutakanu lwalu, mpangi Jheri wasamba kwa Yave.  Muna lumbu kialanda, vava kalwaka kuna Seka dia Kintinu, wakiyuvulanga kana vo wafwana kikilu kala mu lukutakanu lolo. Ekolo kiafilwanga o lukutakanu, mosi muna ampovi wasonga vo e diambu diasunda o mfunu i luzolo lwa longwa kwa Yave. Mpangi Jheri osungamenga vo: “Yavova muna ntim’ame vo, ‘omono ngina ye luzolo lwalu.’ Yayantika dila vava yabakula vo Yave wavana e mvutu za sambu kiame. Wankwikidisa vo yafwana sadilwa muna salu kiandi, Yave wakubama muna kundonga.” Vava kayindula mana mavangama, mpangi Jheri wavova vo: “Vava yayenda ku lukutakanu lwaluna, wonga yo lukendalalu yakala lwau yo kuyimwena vo kiafwana ko. Kansi vava yavutuka kuna nzo, kiakala diaka ye wonga ko, yakasakeswa yo bakula vo mfunu kikilu ngina.”

18. Aweyi Bibila kisongelanga vo Yave oyangalelanga mana tuvanganga muna salu kiandi kana nkutu muna kinunu?

¹⁸ Ekolo tununanga, tulenda kala ye ziku vo Yave okwamanana kutusadila muna salu kiandi. (Nku. 92:12-15) Yesu watulonga vo kana nkutu vo ke tulendanga diaka vanga mayingi ko muna salu kiandi, o Yave mfunu kekutuvuanga. (Luka 21:2-4) Muna kuma kiaki, sia sungididi muna mambu olenda vanga. Muna bong’e nona, olenda vovela e nkumbu a Yave kwa akaka, samba muna wete dia mpangi zeto yo kasakesa akaka basikila ye kwikizi. Yave okubadikilanga se nkwandi a salu, ke mu kuma kia mana ovanganga ko, kansi mu kuma kia luzolo lwaku lwakunlemvokela.—1 Kor. 3:5-9.

19. E sono kia Roma 8:38, 39, nkia ziku kikutuvananga?

¹⁹ Tuvutulanga matondo wau vo tusambilanga Yave wa Nzambi eto ona ovuanga selo yandi o mfunu. Yave watusema kimana twavanga o luzolo lwandi. Muna kuma kiaki, e nsambil’aludi iwokesanga e kiese muna zingu kieto. (Lus. 4:11) Kana una vo wantu bekutubadikilanga vo ke tuna mfunu ko, Yave ke kutubadikilanga mu mpila yayi ko. (Ayib. 11:16, 38) Avo tukendalele mu kuma kia kimbevo, mpasi za kondwa nzimbu yovo kinunu, tufwete sungamenanga vo ke vena diambu ko dilenda kutuvambula muna zola kwa Se dieto dia zulu.—Tanga Roma 8:38, 39.