1-2. (a) Nkia ntangwa tutoma sungamenanga azolw’eto ana bafwa? (b) Nkia diambu Yesu kalonga kwa alongoki andi muna fuku wa vitila lufwa lwandi?

 AVO TWAFWILWA kala muntu tutoma zolanga, kana nkutu vo se kolo kafwa, twakinu kunsungamena. Tutoma yindulanga azolw’eto musungula muna lumbu kina bafwa.

² Konso mvu, tulungananga kumosi ye mafunda ye mafunda ma wantu omu nz’amvimba mu yindula e lumbu kafwa o muntu ona tutoma zolanga, i sia vo, Yesu Kristu. (1 Pet. 1:8) Tulungananga kumosi mu yindula o muntu ona wavana moyo andi se lukûlu muna kutuvuluza muna sumu ye lufwa. (Mat. 20:28) Yesu ozolele vo alandi andi bayindulanga lufwa lwandi. Muna fuku wa vitila lufwa lwandi, Yesu watukanikina yo toma kiesesa vo: “Nukwamanana wo vanga muna Luyindulu lwame.”—Luka 22:19.

3. Nkia mambu tulongoka mu longi diadi?

³ Akete kaka muna awana belungananga muna Luyindulu lwa lufwa lwa Kristu, bena ye vuvu kia kwenda zingila kuna zulu. Kansi, ndonga muna yau, vuvu kia zingila yakwele mvu ova ntoto bena kiau. Mu longi diadi, tulongoka kuma ikutufilanga mu lungana muna Luyindulu konso mvu, kiakala vo vuvu kia kwenda zingila kuna zulu tuna kiau yovo ova ntoto. Tulongoka mpe, e nluta tuvuanga vava tukalanga muna Luyindulu. Entete, yambula twabadika kuma ifilanga akuswa mu kala muna Luyindulu.

4. Ekuma akuswa bedilanga e mbolo yo nua e vinyu muna Luyindulu?

⁴ Konso mvu, akuswa bekalanga muna Luyindulu mu dia e mbolo yo nua e vinyu. Ekuma bedilanga e mbolo yo nua vinyu? Muna baka e mvutu za kiuvu kiaki, yambula twazaya dina diavangama muna fuku wansuka wa zingu kia Yesu ova ntoto. Yesu ye alongoki andi bakembelela nkinzi wa Ayuda, wayikilwanga vo Nduta. I bosi, Yesu wasikidisa Nlekelo a Mfumu, e lambu diyikilwanga o unu vo, Luyindulu lwa lufwa lwa Kristu. Muna lambu diadi, Yesu wavana mbolo ye vinyu kwa 11 dia ntumwa zandi zakwikizi yo kubavovesa vo, badia mbolo yo nua e vinyu. Vana ntandu, Yesu wabavovesa mu kuma kia makangu mole, i sia vo, kangu diampa ye kangu dia Kintinu. * (Luka 22:19, 20, 28-30) Mu kuma kia makangu mole mama, antumwa kumosi ye buka kiakete kia alandi a Yesu, i sia vo, akuswa, balenda kwenda zingila kuna zulu mu kala se atinu ye anganga. (Lus. 5:10; 14:1) Muna kuma kiaki, nsadisw’akuswa * kaka bedianga e mbolo yo nua e vinyu kadi o Yesu yo yau kaka kakanga makangu mole mama.

5. Nkia vuvu bena kiau akuswa? Adieyi bafwete vanga muna lunganesa e vuvu kiaki?

⁵ Vena ye kuma kiankaka kifilanga akuswa mu lembi kondwa muna Luyindulu: Okala muna Luyindulu, dikubavananga e lau dia yindula e vuvu kiau. Yave vuvu kisundidi o wete kabavana, i sia vo, moyo ulembi fwa yo sala kumosi yo Yesu Kristu ye akuswa akaka. Bekala vana ntadisi a Yave wa Nzambi. Ekwe lau diampwena bekala diau! (1 Kor. 15:51-53; 1 Yoa. 3:2) Akuswa bazeye wo vo muna lunganesa e vuvu kiau, bafwete sikila ye kwikizi kwa Yave yamuna lufwa lwau ekolo bena ova ntoto. (2 Tim. 4:7, 8) Akuswa kiese kiayingi bekalanga kiau muna badika e vuvu bena kiau kia kwenda zingila kuna zulu. (Tito 2:13) Kansi, adieyi tuvova mu kuma kia “mameme mankaka”? (Yoa. 10:16) Ekuma belunganenanga muna Luyindulu?

6. Ekuma mameme mankaka belunganenanga muna Luyindulu?

⁶ Mameme mankaka bekalanga mpe muna Luyindulu, ke bedianga mbolo ko ngatu nua vinyu, kansi viokesa kaka beviokesanga yo. Muna mvu wa 1938, i nkumbu antete awana bena ye vuvu kia zingila ova ntoto babokeleswa mu kwenda lungana muna Luyindulu. Eyingidilu dia 1 dia Malusu, 1938 muna Kingelezo, divovanga vo: “Diamfunu ye diansongi kwa [mameme mankaka] bakalanga muna lukutakanu lwalu muna mona mana mevangamanga mo. . . . Eyayi ifwete kala ntangwa yakiese mpe kwa yau.” Wauna o muntu kekadilanga ye kiese avo obokeleso kuna nkinzi a longo, mameme mankaka mpe kiese kiayingi bekalanga kiau mu lungana muna Luyindulu.

7. Ekuma mameme mankaka bekadilanga ye kiese kia landa e longi dia Luyindulu?

⁷ Mameme mankaka mpe bezolanga badika e vuvu bena kiau. Kiese kiayingi bekalanga kiau muna wá e longi dia Luyindulu. E longi diadi disasilanga dina Kristu ye 144.000 m’akuswa bevanga muna wete dia wantu vava beyala muna Luyalu lwa Funda dia Mvu.  Yesu Kristu wa Ntinu kumosi ye akuswa, bekitula o ntoto se paradiso yo sadisa wantu bakituka se alunga. Mafunda ye mafunda ma wantu bekalanga muna Luyindulu, ana bena ye vuvu kia zingila ova ntoto, kiese kiayingi bekalanga kiau vava bebadikanga una ukala e zingu kiau kuna sentu vava kilungana ungunza wasonama muna Yesaya 35:5, 6; 65:21-23 ye Lusengomono 21:3, 4. Oyindula una ukala e zingu kiau muna nz’ampa kumosi ye yitu ye akundi au i diambu dilenda kumika e vuvu ye kani diau dia kwamanana sadila Yave.—Mat. 24:13; Ngal. 6:9.

8. Nkia kuma kiankaka kifilanga mameme mankaka mu kala muna Luyindulu?

⁸ E kuma kiankaka kifilanga mameme mankaka mu kala muna Luyindulu i songa o zola kwau muna akuswa yo kubayikama. Diambu dia Nzambi diasakula vo, akuswa ye mameme mankaka besala kumosi. Mu nkia mpila? Yambula twafimpa ungunza tatu.

9. Aweyi ungunza wasonama muna Zakariya 8:23, usongelanga una mameme mankaka bemonanga mu kuma kia akuswa?

⁹ Tanga Zakariya 8:23. Ungunza wau utoma songanga una mameme mankaka bemonanga mu kuma kia mpangi zau zakuswa. E mvovo “Nyuda” yo “yeno” buka kimosi miyikanga, i sia vo, nsadisw’akuswa. (Roma 2:28, 29) O “wantu kumi muna ndinga zawonso za zula,” mameme mankaka besunzulanga. ‘Betoma simbininanga,’ i sia vo, ye kwikizi kiawonso besambilanga Yave kumosi ye akuswa. Kiaki i kuma bekadilanga muna fuku wa Luyindulu muna songa o zola kwau muna akuswa.

10. Aweyi Yave kelungisilanga ungunza wasonama muna Yezekele 37:15-19, 24, 25?

¹⁰ Tanga Yezekele 37:15-19, 24, 25. Yave olungisanga ungunza wau muna yambula vo akuswa ye mameme mankaka basalanga kumosi kuna ungudi. Ungunza wau nti miole uyikanga. Awana bena ye vuvu kia kwenda zingila kuna zulu bena nze “nti a Yuda,” (i sia vo, kanda dina Yave kasolelanga atinu) ye awana bena ye vuvu kia zingila ova ntoto bena nze “nti a Eferaime.” * Yave wabundakesa buka yole yayi yo kituka se “nti mosi.” Ediadi disongele vo buka yole yayi besalanga kumosi yo lemvokela Yesu Kristu wa Ntinu au. Konso mvu, akuswa ye mameme mankaka bekalanga muna Luyindulu ke nze buka yole ko, kansi nze “kambi dimosi,” kuna nsi a “mvungudi mosi.”—Yoa. 10:16.

11. Landila e sono Matai 25:31-36, 40, nkia mpila yantete “mameme” meyikamenanga mpangi za Kristu?

¹¹ Tanga Matai 25:31-36, 40. O “mameme” meyikwanga muna ungunza wau, aki nani mesunzulanga? Wantu ansongi mesunzulanga, ana bezingilanga mu kolo kia mbaninu, bena ye vuvu kia zingila ova ntoto, i sia vo, mameme mankaka. E mpila yantete beyikamenanga mpangi za Kristu i muna kubasadisa muna kiyekwa kiampwena bena kiau kia samuna e nsangu zambote mu nza yawonso yo kitula o wantu se alongoki.—Mat. 24:14; 28:19, 20.

12-13. Nkia mpila zankaka mameme mankaka meyikamenanga mpangi za Kristu?

¹² Konso mvu, vitila e lumbu kia Luyindulu, diambu diamfunu divangamanga: Mameme mankaka meyikamanga mpangi za Kristu muna kuyivana muna campanha ya bokelesa akwa luzolo lwambote beza lungana muna Luyindulu. (Tala e babu “ Nga mu Kubama Wina mu Kuma kia Luyindulu?”) Mameme  mankaka mpe mevanganga mawonso mu kubika o Luyindulu muna nkutakani zau, kana nkutu vo muna nkutakani ke muna kuswa ko. Kuna kwa yau, osadisa mpangi za Kristu muna mpila zazi, lau diampwena kikilu. Mameme mankaka bazeye wo vo kuna kwa Yesu, konso lusadisu bevananga kwa akuswa kwa yandi bevananga lo.—Mat. 25:37-40.

¹³ Ozevo, nkia kuma yankaka ifilanga yeto awonso mu kala muna Luyindulu, kiakala vo vuvu kia kwenda zingila kuna zulu tuna kiau yovo ova ntoto?

14. Aweyi Yave yo Yesu basongela vo zola bekutuzolanga?

¹⁴ Okala muna Luyindulu i mpila tuvutulwilanga matondo kwa Yave yo Yesu muna zola batusonga. Yave watusonga o zola mu mpila zayingi, kansi vena ye mpila imosi isundidi kavangila wo. Mu kuma kia zola kwandi, Yave watuma Mwan’andi anzolwa kamona e mpasi yo fwa mu kuma kieto. (Yoa. 3:16) Tuvutulanga mpe matondo kwa Yesu wau katusonga o zola kwandi yo tambulwila vana o moyo andi mu kuma kieto. (Yoa. 15:13) Ke tuna ye lekwa ko tulenda futa kwa Yave yo Yesu muna zola batusonga. Kansi, tulenda kubavutula matondo muna mpila tunatinanga e zingu kieto konso lumbu. (Kol. 3:15) Ekiaki i kuma tukadilanga muna Luyindulu muna badika o zola Yave yo Yesu batusonga yo songa mpe o zola kweto muna yau.

15. Ekuma lukûlu lwinina o mfunu kwa akuswa ye kwa mameme mankaka?

¹⁵ O lukûlu i lukau lwamfunu kikilu kwa yeto. (Mat. 20:28) Kuna kwa akuswa, o lukûlu i lukau lwamfunu kikilu kadi lwabavana e vuvu kia kwenda zingila kuna zulu. Mu kuma kia lukwikilu lwau muna kimenga kia Kristu, Yave obadikilanga akuswa vo ansongi yo kubakitula se wan’andi. (Roma 5:1; 8:15-17, 23) Kuna kwa mameme mankaka mpe, o lukûlu i lukau lwamfunu kikilu. Kadi mu kuma kia lukwikilu lwau muna kimenga kia Kristu, balenda kala bavelela vana ndose a Nzambi, kunsadila e salu kiavauka yo kala ye vuvu kia vuluka “muna mpasi zayingi.” (Lus. 7:13-15) Muna kuma kiaki, imosi muna mpila akuswa ye mameme mankaka balenda songela luyangalalu lwalu muna lukûlu, ikalanga muna Luyindulu konso mvu.

16. Nkia kuma kiankaka kikutufilanga mu kala muna Luyindulu?

¹⁶ E kuma kiankaka kikutufilanga mu kala muna Luyindulu i luzolo lwa lemvokela Yesu. Yeto awonso, kiakala vo vuvu kia kwenda zingila kuna zulu tuna kiau yovo ova ntoto, tuzolele lemvokela nkanikinu a Yesu. Muna fuku wavitila lufwa lwandi, Yesu wavova vo: “Nukwamanana wo vanga muna luyindulu lwame.”—1 Kor. 11:23, 24.

17. Aweyi Luyindulu lukutusadisilanga mu toma finama Yave?

¹⁷ Tutoma finamanga Yave. (Yak. 4:8) Nze una tumwene kala, o Luyindulu lukutuvananga e lau dia badika e vuvu kina Yave katuvana yo zola katusonga. (Yer. 29:11; 1 Yoa. 4:8-10) Vava tubadikanga e vuvu kieto yo zola katusonga, o zola kweto muna Yave kuwokelanga yo toma kumfinama.—Roma 8:38, 39.

18. Obadika muna mbandu a Yesu kulenda kutufila mu vanga nkia diambu?

¹⁸ Tukalanga ye kani diatoma tanginina  mbandu a Yesu. (1 Pet. 2:21) Muna kubika ntima mieto vitila lumbu kia Luyindulu, tutanganga tusansu tuvovelanga e lumbu yansuka ya zingu kia Yesu ova ntoto. I bosi, muna fuku wa lumbu kia Luyindulu, e longi difilwanga dikutusungamesanga o zola Yesu katusonga. (Efe. 5:2; 1 Yoa. 3:16) Vava tutanganga yo badika e zingu kia Yesu, tukalanga ye kani dia “kwamanana kangalela wauna muntu ndioyo kakangalela.”—1 Yoa. 2:6.

19. Aweyi tulenda kwamanena kala akundi a Nzambi?

¹⁹ Tukalanga ye kani dia kwamanana kala akundi a Nzambi. (Yuda 20, 21) E kikundi kieto yo Nzambi kikwamanana kaka avo tuvangidi mawonso muna kunlemvokela, velelesa nkumbu andi yo mwesa ntim’andi e kiese. (Nga. 27:11; Mat. 6:9; 1 Yoa. 5:3) Okala muna Luyindulu dikutusadisanga mu kwamanana zingila mu mpila iyangidikanga Yave, nze yeto tuvovanga vo: ‘Nzolele kwamanana kusadila yakwele mvu!’

20. Nkia kuma ikutufilanga mu kala muna Luyindulu?

²⁰ Kiakala vo vuvu kia kwenda zingila kuna zulu tuna kiau yovo ova ntoto, yeto awonso tuna ye kuma ikutufilanga mu kala muna Luyindulu. Kiaki i lumbu tuyindulanga o muntu tutoma zolanga, i sia vo, Yesu Kristu. Vana ntandu, tusungamenanga o zola kwampwena katusonga o Yave muna fila Mwan’andi se lukûlu. Mu mvu wau, o Luyindulu luvangama kina Kiatanu, kia 15 kia Abidi, 2022, kuna nim’a ndimuk’a ntangwa. Tutoma zolanga Yave yo Mwan’andi. Muna kuma kiaki, ke vena diambu disundidi o mfunu ko kwa yeto avo ke kala muna Luyindulu lwa lufwa lwa Kristu ko.