1. Ekuma Luyindulu lwinina se lumbu kia mvu kisundidi o mfunu? (Luka 22:19, 20)

 KUNA kwa nkangu a Yave, o Luyindulu lwa lufwa lwa Kristu i lumbu kia mvu kisundidi o mfunu. O Luyindulu i nkinzi umosi kaka una Yesu kakanikina vo alongoki andi bakembelelanga. (Tanga Luka 22:19, 20.) Tuvuidi kuma yayingi mu vingila e lumbu kiaki ye kiese kiawonso. Yambula twabadika yankaka muna kuma yayi.

2. Yika yaka kuma tuvingidilanga Luyindulu ye kiese kiawonso.

² Luyindulu lukutusadisanga mu sungamena o mfunu wa lukûlu. Lukutusonganga mpe una tulenda vutulwila matondo muna kimenga kia Yesu. (2 Kor. 5:14, 15) Lukutuvananga diaka e lau dia ‘kasakesa muntu yo nkwandi.’ (Roma 1:12) Konso mvu ateleki ayingi ana bayoya muna mwanda, bekalanga yeto muna Luyindulu. Akaka nkutu bebakanga e nzengo za vutuka kwa Yave. Wantu ayingi mpe akwa luzolo lwambote, bebakanga e nzengo za yantika kangalela mu nzil’a moyo. Mawonso mama i mekitulanga Luyindulu se lumbu kisundidi o mfunu muna konso mvu.

3. Aweyi Luyindulu lukutuyikakeselanga ye mpangi zeto mu nza yawonso? (Tala mpe e foto.)

³ Tuvingilanga mpe lumbu kiaki ye kiese kiawonso, kadi kikutuyikakesanga ye mpangi zeto mu nz’amvimba. Kuna ndimuk’a ntangwa, Mbangi za Yave mu nza yawonso belungananga muna Luyindulu. Yeto awonso tuwanga e longi disasilanga o mfunu wa kimenga kia lukûlu. Tuyimbilanga nkunga  miole, tusadilanga e mbolo ye vinyu. Kuna mfoko a sambu yá ivangamanga muna Luyindulu tuvovanga ye kiese kiawonso vo “amen.” Muna lumbu kia Luyindulu, e nkutakani zawonso mu nz’amvimba mambu mau mamosi bevanganga. Yindula e kiese kina Yave yo Yesu bemonanga vava betalanga ova ntoto yo mona vo yeto awonso tutoma kubakembelelanga muna lumbu kia Luyindulu!

4. Nkia yuvu tubakila e mvutu mu longi diadi?

⁴ Mu longi diadi, tubaka e mvutu za yuvu eyi: Aweyi tulenda kubikila e ntima mieto mu kuma kia Luyindulu? Aweyi tulenda sadisila akaka bavua e nluta mia Luyindulu? Aweyi tulenda sadisila ampangi bayoya muna mwanda? E mvutu za yuvu yayi zikutusadisa mu kala twakubama mu kuma kia lumbu kiaki kisundidi o mfunu.

AWEYI TULENDA KUBIKILA E NTIMA MIETO MU KUMA KIA LUYINDULU?

5. (a) Ekuma tufwete toma yindulwilanga o mfunu a lukûlu? (Nkunga 49:7, 8) (b) Nkia diambu olongokele muna video, Ekuma Yesu Kafwila?

⁵ E mpila imosi isundidi o mfunu tulenda kubikila e ntima mieto mu kuma kia Luyindulu, i sungamena o mfunu wa kimenga kia Yesu Kristu kia lukûlu. Ke vena diambu ko tulenda vanga muna kuyivuluza muna sumu ye lufwa. (Tanga Nkunga 49:7, 8; tala mpe e video, Ekuma Yesu Kafwila?) a Muna kuma kiaki, Yave wavanga nkubika kimana Yesu kavana moyo andi muna wete dieto. Kieleka, diambu diampwena kikilu bavanga. (Roma 6:23) Vava tutoma yindulanga mana Yave yo Yesu bavanga mu wete dieto, tuwokesanga luyangalalu lweto muna lukûlu. Yambula twabadika mambu makete mesonganga e mpasi zina Yave yo Yesu bamona wau bavanga e diambu diadi. Kansi entete, yambula twabadika kana nki i lukûlu.

6. Nki i Lukûlu?

⁶ O Lukûlu i ntalu ifutwanga muna sumbulula e lekwa. Vava Adami wa muntu antete kavangwa, muntu alunga kakala. Vava kasumuka, kavidisa kaka e lau diandi dia zinga yakwele mvu ko, kansi mpe dia wan’andi awonso kadi wuta. Muna sumbulula kina Adami kavidisa, Yesu wavana o moyo andi walunga se kimenga. Vava kakala ova ntoto, Yesu “kasumuka ko, ngatu soloka luvunu muna nu’andi.” (1 Pet. 2:22) Vava Yesu kafwa, muntu alunga kakala nze una wakala Adami vitila kasumuka. Muna diadi, muna vana moyo andi se kimenga, Yesu wasumbulula o moyo alunga una Adami kavidisa.—1 Kor. 15:45; 1 Tim. 2:6.

7. Nkia ntonta Yesu kawanana zau vava kakala ova ntoto?

⁷ Vava kakala ova ntoto, Yesu walemvokela Se diandi mu mpila yalunga kana nkutu vava diakala diampasi. Kana una vo Yesu muntu alunga kakala ye mase mandi asumuki, wakwamanana kubalemvokela. (Luka 2:51) Muna kileke kiandi, diavavanga vo kavenga umpukumuni wa wantu ana bavavanga kumvukumuna mu kolamena mase mandi yo yambula songa kwikizi kwa Yave. Vava kakala se mbuta, Yesu watelamena Satana wa Nkadi ampemba ona wantonta vo kayambula songa e kwikizi kwa Nzambi. (Mat. 4:1-11) Satana wakala ye kani dia sumukisa Yesu kimana kalembi futa lukûlu.

8. Nkia ntonta zankaka Yesu kazizidila?

⁸ Vava kasalanga e salu kiandi ova ntoto, Yesu wazizidila e ntonta, e mbeni zandi bambangika yo vava kumvonda. (Luka 4:28, 29; 13:31) Wazizidila usumuki wa alandi andi. (Maku 9:33, 34) I bosi, wavondwa nze kimpumbulu yo zizidila e mpasi zayingi. (Ayib. 12: 1-3) Wazizidila e mpasi zansuka vana nti a mpasi kondwa kwa lusadisu ye lutaninu lwa Yave. b—Mat. 27:46.

9. Aweyi tumonanga mu kuma kia kimenga kia Yesu? (1 Petelo 1:8)

⁹ Kieleka, Yesu mpasi zayingi kamona muna vana moyo andi se lukûlu. Vava tuyindulanga e mpasi zawonso kamona o Yesu mu kuma kieto, o zola kweto muna yandi kuwokelanga.—Tanga 1 Petelo 1:8.

10. Nkia mpasi Yave kamona wau kavana Mwan’andi se kimenga?

¹⁰ Nkia mpasi kamona Yave wau kavana Mwan’andi se kimenga kia lukûlu? Wau vo Se yo Mwana, Yave yo Yesu ngwizani ambote bakala yau. (Nga. 8:30) Owau, yindula una Yave kamona vava Yesu kazizidila lubangamu lwa mpila mu mpila ova ntoto! Kalukatikisu ko vo, Yave ntantu zayingi kamona vava Yesu kamweswa e mpasi.

11. Yika e nona kisonganga una Yave kamona vava Yesu kavondwa.

¹¹ Konso se wafwila kala mwana, ozeye wo vo ediadi lukendalalu ye ntantu zayingi ditwasanga. Dialudi, kanele vo tuna ye lukwikilu lwasikila muna lufuluku, vava tufwilwanga ntantu zayingi tumonanga muna ntima. E ntantu zazi zikutusadisanga mu bakula una Yave kamona vava Mwan’andi anzolwa kamweswa e mpasi yo vondwa kina kia 14 kia ngonde a Nisani a mvu wa 33 wa tandu kieto. c—Mat. 3:17.

12. Adieyi tulenda vanga muna nsungi a Luyindulu?

¹² Tuka owau yamuna lumbu kia Luyindulu, muna longi dia ngeye kibeni yovo muna longi dia esi nzo aku, vanga e ngolo mu longoka mambu matadidi lukûlu. Olenda sadila Nkanda wa Vavulwila wa Mbangi za Yave yovo nkanda mieto miankaka misasilanga e diambu diadi. d Landa mpe e programa ya ntangilu a Bibila ina muna Nkand’a Malongi—Zingu ye Salu Kieto kia Kikristu. Muna lumbu kia Luyindulu landa e sambu kia mene kia esi Betele. Avo tukubikidi e ntima mieto mu kuma kia Luyindulu, tukala twakubama mu sadisa mpe akaka bavua e nluta mia Luyindulu.—Eze. 7:10.

SADISA AKAKA BAVUA E NLUTA MIA LUYINDULU

13. Nkia diambu diaka tulenda vanga muna sadisa akaka kimana bavua nluta mia Luyindulu?

¹³ Aweyi tulenda sadisila akaka bavua e nluta mia Luyindulu? Entete, tufwete bokela  wantu beza mu Luyindulu. Tulenda soneka e nkumbu za wantu tuzolele bokela, nze yitu yeto, akweto a salu, akweto a sikola ye wantu ankaka ana tuzeye. Kana nkutu vo ke tuna ye mboka zayingi ko za nietekwa, tulenda kubatwikila e mboka muna telefone. Avo tuvangidi ediadi, tulenda sivika mu mona lutangu lwa wantu betambulwila e mboka eto.—Kim. 11:6.

14. Yika e nona kisonganga o mfunu wa kaya mboka kwa wantu.

¹⁴ Avo tukayidi e mboka za Luyindulu kwa akaka, dilenda kubakasakesa mu kwiza lungana yeto. Lumbu kimosi, mpangi mosi ankento una vo nkaz’andi ke Mbangi a Yave ko, wasivika kibeni vava yakala diandi kanzayisa vo wakala ye kani dia kwenda muna Luyindulu. Ekuma kasivikila? Kadi muna mvu miavioka, nkumbu miayingi kankasakesanga mu kwenda ku Luyindulu, kansi katambulwilanga ko. O nkumbu wau, nkia diambu diasoba? Yakala diodio wavova vo: “Mboka bampene.” Wasasila vo nkuluntu mosi ona kazaya wamvana e mboka. Muna kuma kiaki, yakala diodio wayenda mu Luyindulu lwa mvu wauna ye mu mvu mialanda.

15. Nkia diambu tufwete sungamenanga vava tukayanga mboka za Luyindulu kwa wantu?

¹⁵ Sungamena wo vo awana tukayilanga mboka balenda yuvula mambu mayingi musungula vo i nkumbu antete bekwenda mu tukutakanu tweto. Muna kuma kiaki, diambote twateka yindula mambu balenda yuvula yo kala twakubama muna kubavana e mvutu. (Kol. 4:6) Muna bonga e nona, balenda yuvula vo: ‘Nkia mambu mevangama muna Luyindulu?’ ‘Ola kwa luzingila?’ ‘Nkia mpila mvuatu mfwete vuata?’ ‘Nga divava vo yafuta nzimbu muna lungana muna Luyindulu?’ ‘Nga nsisani ilombwanga ko?’ Avo tukayidi mboka a Luyindulu kwa muntu, tulenda kunyuvula: “Nga kiuvu una kiau?” I bosi, vana mvutu za konso kiuvu keyuvula. Olenda mpe sadila e video, Luyindulu lwa Lufwa lwa Yesu ye Nkia Mambu Mevangamanga Muna Seka dia Kintinu?, muna sadisa muntu kazaya una ufidilwanga tukutakanu tweto. E longi dia 28 dia  nkanda Zinga ye Kiese Yakwele Mvu, dina ye mambu mayingi mamfunu tulenda zayisa kw’akaka.

16. Nkia yuvu yankaka balenda kala yau awana belungananga muna Luyindulu?

¹⁶ Kuna mfoko a Luyindulu, akwa luzolo lwambote balenda kala ye yuvu yankaka. Balenda yuvula vo e kuma wantu ke badididi mbolo ko ngatu nua vinyu. Yovo e kuma wantu akete kaka badidi e mbolo yo nua e vinyu. Balenda mpe yuvula kana nkumbu nkwa tulungananga muna Luyindulu konso mvu. Yovo nga tukutakanu twawonso twa Mbangi za Yave mpila mosi tuvangamenanga? Kana una vo mawonso mama mesasilwanga muna longi dia Luyindulu, awana bena vo akwa luzolo lwambote balenda vava vo twatoma mo sasila. E longi dina ye ntu a diambu, “E Mpila Mbangi za Yave Bekembelelanga Nlekelo a Mfumu, Ekuma Yaswaswanena ye Mabundu Mankaka?,” muna jw.org dilenda kutusadisa mu vana e mvutu za yuvu yau. Tuzolele vanga mawonso muna nsungi a Luyindulu, vitila Luyindulu ye kuna mfoko mu sadisa awana ‘bena kikilu ye luzolo’ lwa vua nluta mia Luyindulu.—Mav. 13:48.

SADISA AWANA BAYOYA MUNA MWANDA

17. Aweyi akuluntu balenda sadisila ateleki bayoya muna mwanda? (Yezekele 34:12, 16)

¹⁷ Aweyi akuluntu balenda sadisila awana bayoya muna mwanda muna kolo kia Luyindulu? Ubasonga vo mfunu okubavuanga. (Tanga Yezekele 34:12, 16.) Vitila lumbu kia Luyindulu, vanga mawonso mu bokela ayingi muna yau. Ubavovesa vo otokanenanga e wete diau ye ozolele kubasadisa. Ubabokela beza muna Luyindulu. Avo bezidi, ubatambula ye ngemba zawonso. Kuna mfoko a Luyindulu, kwamanana kingula mpangi zazi zanzolwa yo kubavana konso lusadisu bavuidi mfunu muna mwanda kimana bavutuka kwa Yave.—1 Pet. 2:25.

18. Aweyi yeto awonso tulenda sadisila ateleki bayoya muna mwanda? (Roma 12:10)

¹⁸ Awonso muna nkutakani balenda sadisa awana bayoya muna mwanda. Mu nkia  mpila? Muna kubazitisa, kubasonga zola ye ngemba. (Tanga Roma 12:10.) Sungamena wo vo dilenda kala diampasi kwa mpangi zazi mu vutuka lungana muna tukutakanu. Balenda mpe mona nsoni mu kuma kia mana akaka balenda vanga yovo kubavovesa. e Ozevo, venga kubayuvula yuvu ilenda kubamwesa e nsoni yovo kubakendeleka. (1 Tes. 5:11) Ateleki awaya, bakinu se mpangi zeto. Tukala ye kiese mu vutuka lungana yau.—Nku. 119:176; Mav. 20:35.

19. Nkia nluta tulenda baka muna yindula lufwa lwa Yesu?

¹⁹ Kieleka, tuvutulanga matondo wau vo Yesu watukanikina vo konso mvu twasungamenanga lufwa lwandi yo bakula e kuma Luyindulu lwinina o mfunu. Vava tukalanga mu Luyindulu, yeto kibeni tuvuanga e nluta mu mpila zayingi kumosi ye awana tubokelesanga. (Yes. 48:17, 18) O zola kweto muna Yave yo Yesu kuwokelanga. Tuvutulanga matondo muna mana bavanga muna wete dieto. Tukumikanga e ngwizani eto ye mpangi zeto. Vana ntandu, tusadisanga akaka bazaya dina balenda vanga muna vua e nsambu za lukûlu. Muna kuma kiaki, yambula twavanga mawonso tulenda kimana twatoma kubama mu kuma kia Luyindulu lwa mvu wau. Kieleka, e lumbu kia Luyindulu i lumbu kisundidi o mfunu muna mvu.