O MVOVO wa Kingerekia wasekolwa vo “kalu” muna Nsekola ya Nz’ampa, ulenda sadilwa mu yika makalu ma mpila zawonso. (Mav. 8:28, 29, 38) Kansi, e kalu kadiatisanga Nzimb’a Ntiopia nanga dianene diakala nswaswani ye makalu makete ma vita yovo mavangila nkula. Tala e kuma tuvovele diambu diadi.

O Nzimba a Ntiopia ona wavanga nkangalu wanda nkwa wisa kakala. “Nkwa wisa muna lûmbu lwa Kandaki wa ntinu ankento a Etiopia, yandi walunga-lunganga lusalu lwandi lwawonso.” (Mav. 8:27) E nsi ya Etiopia yankulu, i ndambu a zunga kia sude ya Engipito ye Sudão. Dilenda kala vo Ntiopia kavangila nkangalu awonso mu kalu dimosi ko, kansi nanga lekwa kakala yau. Makalu mankaka wantu basadilanga muna tandu kiantete, makala ye mapine maya ye fukwa. Nkanda mosi usasilanga nkanda Mavangu wavova vo: “E kalu diadi diakala ye fulu kiafwana natina e nkutu ye lekwa yankaka ye fulu kiambote kina muntu kalenda vuandila mu vanga nkangalu wanda.”

O Ntiopia nkanda katanganga vava Filipo kawanana yandi. Lusansu luvovanga vo: “Filipo wele ntinu, ofinamene vana ndambu, unwidi [mbanda-mbanda a Ntiopia] ekolo ketanganga mu nding’angolo nkand’a Yesaya wa ngunza.” (Mav. 8:30) Makalu mama ke madiatilanga mu nswalu ko. I dianu Ntiopia katangilanga o nkanda ye diasadisa mpe Filipo mu kunlanda kiamalu yo kumbaka.

O Ntiopia “ododokele Filipo kamanta muna kalu, kavuanda yandi.” (Mav. 8:31) Muna makalu ma nkula, o ndiatisi a kalu watelama kakalanga. Kansi muna kalu dia kangalela, mwakala ye fulu kiafwana kina Ntiopia ye Filipo bavuanda.

Muna kuma kia mambu masonama muna Mavangu kapu kia 8 ye mambu ma ziku bevovanga azingudi a lusansu, ke kolo ko muna nkanda mieto mwavaikidi fwaniswa isonganga vo e kalu kakangalelanga Nzimba a Ntiopia dianene diakala, nswaswani ye makalu makete ma vita yovo ma nkula.