1-2. Nkia mambu mampasi malenda bwila selo ya Yave?

 MAMBU mampasi malenda soba emvimba e zingu kieto. Kasikil’owu, mpangi Luis a una vo Nkristu a zikuka wabakama kimbevo kiampasi. Dotolo diandi wamvovesa vo ngonde zakete kaka kekala o moyo. Mpangi Monika yo nkaz’andi bakivananga emvimba muna salu kia Yave. Kansi, Lumbu kimosi mpangi Monika wabakula vo mu mvu miayingi o nkaz’andi zingu kia disu kunsi a lukaya kanatanga. Mpangi Olivia una vo mwan’andumba wampumpa, watina mu nzaki-nzaki yo sisa e nzo andi mu kuma kia tembwa kiangolo kiafinamanga. Vava kavutuka, wamona vo e nzo andi yabanguka muna tembwa. Kuna kinsalukisa, e zingu kia mpangi Luis, Monika yo Olivia kia soba emvimba. Nga ngeye mpe vena ye diambu diabwila edi diasoba emvimba e zingu kiaku?

² Kana una vo tusadilanga Yave ye kwikizi kiawonso, tubwilwanga mambu mampasi yo bakama mayela, wauna uvangamanga kwa wantu awonso. Vana ntandu, tuzizidilanga lubangamu lwa awana bemenganga o nkangu a Nzambi. Yave ke vengomanga mambu mama mampasi ko, osianga kaka nsilu vo okutusadisa muna ntangw’ampasi. (Yes. 41:10) Muna lusadisu lwandi, tulenda tatidila e kiese kieto, baka nzengo zambote yo sikila ye kwikizi kana nkutu muna mambu masundidi e mpasi. Mu longi diadi tulongoka mpila yá zina Yave kekutusadisilanga muna ntangw’ampasi. Tulongoka mpe dina tulenda vanga muna tambula lusadisu lwa Yave.

 YAVE OKUTANINA

3. Nkia mambu malenda kala se mampasi mu vanga vava tubwilwanga diambu diampasi?

³ Diambu diampasi. Avo tubwidilu diambu diampasi, dilenda kala diampasi mu toma yindula yo baka nzengo zambote. Ekuma? Kadi tulenda bakama lukendalalu lwa ntima ye ntokani zasaka. E ngindu zeto zilenda yantika wuyana yo lembi zaya dina tuvanga. Tala mana bavova mpangi zole zamakento tuyikidi kala vava bakala mu mpasi. Mpangi Olivia wavova vo: “Vava tembwa kiangolo kiabangula e nzo ame, kiazaya ko dina yafwana vanga. Yabakama lukendalalu lwasaka.” Mpangi Monika wavova mu kuma kia nkaz’andi ona walembi songa kwikizi muna longo lwau vo: “Yatoma fusuka e nsoni. E mpasi yamona zakosomona emvimba o ntim’ame. Diampasi kikilu diakala mu sala e salu ya lumbu ke lumbu. Kiayindulanga wo ko vo ediadi dilenda kumbwila.” Nkia lusadisu o Yave kekutuvananga vava tukalanga yo lukendalalu lwasaka?

4. Nze una tutangidi muna Filipi 4:6, 7, nkia nsilu Yave kekutusilanga?

⁴ Aweyi Yave kekutusadisilanga? Muna Bibila Yave osianga nsilu vo okutuvana “luvuvamu lwa Nzambi.” (Tanga Filipi 4:6, 7.) O luvuvamu lwalu i luvuvamu lwa ntima tukalanga lwau muna zaya vo tuna ye ngwizani ambote yo yandi. O luvuvamu lwalu “luviokele umbakuzi wawonso” ye lwamfunu kikilu. Nga wamona kala vo kuna nima samba kwa Yave ye nsi a ntima yawonso o ntim’aku wavuvama? E mpila ina o ntim’aku wavuvamena i yau iyikilwanga vo “luvuvamu lwa Nzambi.”

5. O luvuvamu lwa Nzambi mu nkia mpila luyingidilanga ntima ye makani meto?

⁵ E sono kiaki kivovanga mpe vo luvuvamu lwa Nzambi “luyingila” yovo lutanina “ntima mieno ye makani meno.” O mvovo wa Kingerekia wasekolwa vo “yingila” wasadilwanga mu yika makesa bataninanga e mbanza kimana yalembi bakama kwa mbeni. O nkangu a mbanza ina yayingilwanga mu luvuvamu balekelanga, kadi bazaya wo vo mu lutaninu bakala. Diau dimosi mpe, vava luvuvamu lwa Nzambi luyingilanga ntima mieto ye makani meto, twavuvama tukalanga, kadi tuzayanga wo vo mu lutaninu twina. (Nku. 4:8) Nze nona kia mpangi Ana, kana nkutu vo mambu muna zingu kieto ke masobele ko, tulenda kala twavuvama. (1 Sam. 1:16-18) Vava tukalanga twavuvama, nkumbu miayingi diasazu dikalanga mu toma yindula yo baka e nzengo zambote.

6. Adieyi tulenda vanga muna vua nluta mia luvuvamu lwa Nzambi? (Tala mpe foto.)

⁶ Adieyi tufwete vanga? Avo obwidilu diambu diampasi, bokela nyingidi. Mu nkia  mpila? Kwamanana lomba lusadisu muna sambu yavana otambula luvuvamu lwa Nzambi. (Luka 11:9; 1 Tes. 5:17) Mpangi Luis ona tuyikidi kala, wasasila e diambu diabasadisa yo Ana wa nkaz’andi mu zindalala vava bazayiswa vo ngonde zakete kaka kekala o moyo. Wavova vo: “Mu kolo kiaki, diampasi kikilu mu baka e nzengo muna diambu dia mawuku ye mambu mankaka. Sambu kaka kikutusadisanga mu kala mu luvuvamu.” Mpangi Luis yo nkaz’andi bavova vo basambanga yo dodokela ntangwa zawonso, balombanga kwa Yave vo kabavana luvuvamu lwa ntima, ngangu ye lusadisu kimana babaka e nzengo zambote. Kalukatikisu ko vo batambula lusadisu lwa Yave. Avo diambu diampasi onuananga diau, zindalala muna sambu, osinga vua luvuvamu lwa Yave ye luyingila ntima ye makani maku.—Roma 12:12.

YAVE OKUVANA LUVUVAMU

7. Aweyi tulenda mona vava tukalanga muna ntangw’a mpasi?

⁷ Diambu diampasi. Vava tunuananga ye mambu mampasi, nanga e ngindu zeto, makani meto ye mavangu meto ke mekalanga masikila ko. E ngindu zeto zilenda kala nze nzaza itunganiswanga kwa tembwa kiangolo. Mpangi Ana ona tuyikidi kala, wavova vo vava mpangi Luis wa yakala diandi kafwa, e ngindu zandi zayantika tungiana. Wavova vo: “Vava yamonanga nze mono mbwidi muna wulu diakoboka, yakimwenanga e nkenda. Yafunganga mpe makasi mu zaya vo nkaz’ame Luis wafwa.” Ezak’e ntangwa, mpangi Ana kinsona kamonanga yo lembi zaya dina kevanga vava kalwakanga mu ntangwa ya baka e nzengo muna mambu mena vo yakala diandi wabakilanga mo e nzengo. Ezak’e ntangwa, mpangi Ana wakimwenanga nze yandi una vana kati kwa tembwa muna mbu. Aweyi Yave kekutusadisilanga vava tukalanga ye ngindu za mpila yayi?

8. Nze una tutangidi muna Yesaya 33:6, nkia lusikidisu Yave kekutuvananga?

⁸ Aweyi Yave kekutusadisilanga? Yave wasia nsilu vo okutuvana luvuvamu. (Tanga Yesaya 33:6.) Avo nzaza iwanane ye tembwa kiangolo, ilenda yantika tungianeswa oku ye kuna. Nzaza zayingi muna singama, nsingi zitulwanga muna ndambu zawonso za nzaza muna nsi a maza. E nsingi zozo zisadisanga e nzaza yalembi natumunua kwanda. Muna mpila yayi, o wantu muna nzaza bekalanga mu luvuvamu. Kansi, e nsingi zozo muna sala una ufwene, e nzaza ifwete kwamanana kangala kuna ntwala. Diau dimosi mpe, o Yave muna kutuvana luvuvamu, tufwete kwamanana songa e kwikizi muna ntangw’a mpasi.

9. Aweyi nkanda mieto miavavulwila milenda kutusadisila mu kala ye tezo? (Tala mpe foto.)

 ⁹ Adieyi tufwete vanga? Vava onuananga ye mambu mampasi, kuyambula samba ko, lungana muna tukutakanu yo sala e salu kia umbangi. Dialudi vo nanga kulenda diaka vanga ko mana wateka vanganga. Kansi, sungamena wo vo Yave ke kutulombanga ko twavanga mambu maviokele e tezo. (Tezanesa ye Luka 21:1-4.) Vana ntandu, vaulanga e ntangwa kimana wakalanga ye longi dia ngeye kibeni yo toma badika mana olongokanga. Ekuma? E kuma kadi muna kimvuka kiandi, Yave okutuvananga malongi mambote ye video ezi zikutusadisanga kimana twakala ye ngindu zasikila muna ntangw’a mpasi. Muna solola mana vuidi o mfunu, olenda sadila salanganu yavavulwila ina muna nding’aku, nze aplicativo JW Library,^®Índice Das Publicações das Testemunhas de Jeová ye Nkanda wa Vavulula wa Mbangi za Yave. Monika ona tuyikidi kala wavova vo vitila mpasi zandi zasaka, wateka fimpa e salanganu yayi. Muna bonga e nona, wavavulula o mvovo “makasi.” Nkumbu miayingi kavavulula o mvovo “yekolwa” yovo “kwikizi.” I bosi, wavanga mawonso muna toma tanga nkanda misasilanga mvovo miami yavana kavuvamanga. Wavova vo: “Vava yatanganga mambu mama, ntim’ame wayangamanga. Kansi, vava yakwamanananga tanga, yamonanga nze Yave umbimbakene. Ekolo yatanganga, yamonanga vo Yave obakulanga e ntokani zame zawonso ye wazola kunsadisa.” Yave olenda kusadisa mu kala ye tezo yavana ntim’aku uvuvama.—Nku. 119:143, 144.

YAVE OKUSADISA

10. Aweyi tulenda mona avo tubwidilu diambu diampasi?

¹⁰ Diambu diampasi. Vava tubwilwanga diambu diampasi, vekalanga ye lumbu ina tumonanga vo tuyoyele kikilu muna ngindu yamuna nitu. Tulenda mona nze nlundumuki muna nsaka za nkula ona otikunanga kwayingi, i bosi ofisukidi yo yantika kwenda sotoka. Dilenda kala diampasi mu sala e salu ina twatoma salanga yovo tulenda vidisa vema muna mambu mana matuvananga e kiese. Nze Eliya, tulenda mona vo diampasi mu sikama. Leka kaka tuzolele. (1 Nti. 19:5-7) Nkia nsilu Yave kesianga vava tukalanga twayoya?

11. Nkia mpila yankaka Yave kekutusadisilanga? (Nkunga 94:18)

¹¹ Aweyi Yave kekutusadisilanga? Yave osianga nsilu vo okutusadisa. (Tanga Nkunga 94:18.) Wauna nlundumuki a nkula  wafisuka kevavilanga lusadisu muna diata, dilenda kala vo yeto mpe lusadisu tuvuidi mfunu muna kwamanana mu salu kia Yave. Muna ntangwa yayi yampasi, Yave okutusianga nsilu vo: “Omono Yave wa Nzambi aku, nsimbinini o koko kwaku kwalunene, mono i Ndiona okuvovesanga vo: ‘Kumoni wonga ko. Ikusadisa.’” (Yes. 41:13) Ntinu Davidi watambula lusadisu lwalu. Vava kakala mu mpasi yo bangikwa kwa mbeni zandi, wavova kwa Yave vo: “Koko kwaku kwalunene kunsadisi.” (Nku. 18:35) Ozevo, aweyi Yave kekutusadisilanga?

12. Aki nani Yave kalenda sadila muna kutusadisa avo tuyoyele?

¹² Ezak’e ntangwa, Yave wantu ankaka kesadilanga muna kutusadisa. Muna bonga e nona, vava Davidi kayoya, nkundi andi Yonatane wayenda kunkingula muna kunkasakesa yo kunkumika. (1 Sam. 23:16, 17) Diau dimosi mpe, Yave wasola Elesa muna vana lusadisu kwa Eliya. (1 Nti. 19:16, 21; 2 Nti. 2:2) O unu, Yave olenda sadila yitu yeto, akundi yovo akuluntu muna kutusadisa. Kansi, vava tukalanga twakendalala, tulenda mona vo tuzolele kala kaka yeto mosi. Ediadi ke diambi kwandi ko. Adieyi tulenda vanga muna tambula lusadisu lwa Yave?

13. Adieyi tufwete vanga muna tambula lusadisu lwa Yave? (Tala mpe foto.)

¹³ Adieyi tufwete vanga? Vanga mawonso muna lembi vavuka akaka. Avo tuvavukidi akaka, tulenda yantika sia kaka sungididi muna yeto kibeni ye mpasi zeto. Ediadi dilenda kutufila mu baka nzengo zambi. (Nga. 18:1) Dialudi vo, ezak’e ntangwa tuzolanga kala va fulu kia yeto kaka, musungula vava tubwilwanga mambu mampasi. Kansi, avo tuvavukidi akaka mu kolo kiayingi, tubembola wantu ana Yave kalenda sadila muna kutusadisa. Muna kuma kiaki, kana una vo diampasi dikalanga mu kala ye akaka muna ntangw’a mpasi, tambulwila lusadisu lwa yitu yaku, akundi ye akuluntu. Ubabadikila vo Yave ubatumini muna kusadisa.—Nga. 17:17; Yes. 32:1, 2.

YAVE OKUFIAULWISA

14. Nkia mambu mampasi malenda kutumwesa wonga?

¹⁴ Diambu diampasi. Tulenda bwilwa mambu mampasi mana mekutumwesa wonga. Muna Bibila tutanganga tusansu twa selo ya Nzambi bavovela e ntangwa ina bamona wonga yo zakama mu kuma kia mbeni zau yovo mu kuma kia mambu mankaka mampasi. (Nku. 18:4; 55:1, 5) Diau dimosi mpe, tulenda bangikwa kuna sikola, kwa yitu yeto yovo kwa ayadi.  Tulenda mpe mona wonga wafwa mu kuma kia kimbevo kiangolo. Muna ntangwa zazi zampasi, tulenda kuyimwena nze kingiana-ngiana okondelo nsadisi. Aweyi Yave kekutusadisilanga mu ntangwa yayi?

15. Landila Nkunga 94:19, nkia lusadisu Yave kekutuvana?

¹⁵ Aweyi Yave kekutusadisilanga? Yave okutufiaulwisanga yo kutuvuvika. (Tanga Nkunga 94:19.) O nkunga wau ukutusungamesanga kingiana-ngiana omwene wonga yo lembi leka mu kuma kia miandazi miangolo. Tulenda yindula se diandi ekolo kekwizanga, i bosi, umbakidi yo kunsia muna nkata yavana keleka. Kana nkutu vo miandazi ke mifokokele ko, e kingiana-ngiana wavuvama kekala muna nkata a se diandi. Vava tumonanga wonga mu kuma kia mambu mampasi, tuvavanga vo Se dieto dia zulu katusia muna nkata yavana tuvuvama. Aweyi tulenda tambulwila lufiaulwisu lwa Yave?

16. Adieyi tufwete vanga muna tambula lufiaulwisu lwa Yave? (Tala mpe foto.)

¹⁶ Adieyi tufwete vanga? Vaulanga e ntangwa muna samba kwa Yave yo tanga Diambu diandi. (Nku. 77:1, 12-14) Avo okedi ye fu kiaki, vava okala mu mpasi nanga e diambu diantete ovanga i lomba lusadisu kwa Yave. Unzayisa mambu mekumwesanga wonga ye ntokani zaku. Winikina Yave muna tanganga e Diambu diandi, i bosi omona una kekufiaulwisila. (Nku. 119:28) Olenda mona vo otanga e sono yankaka yasikididi ya Bibila dikufiaulwisa. Kasikil’owu, olenda vua lukasakeso muna nkand’a Yobi, nkand’a Nkunga ye nkand’a Ngana ye mvovo mia Yesu miasonama muna Matai kapu kia 6. Avo osambidi kwa Yave yo tanga Diambu diandi, otambula lufiaulwisu lwandi.

17. Nkia vuvu tulenda kala kiau?

¹⁷ Tulenda kala ye vuvu vo Yave okutusadisa vava tubwilanga mambu mampasi. Tufwete kalanga ye ziku vo ke tuna yeto mosi ko. (Nku. 23:4; 94:14) Yave osianga nsilu vo okututanina, okutuvuvika, okutusadisa yo kutufiaulwisa. Muna Yesaya 26:3 tutanganga mu kuma kia Yave vo: “Otanina awana bebundanga kikilu e vuvu muna ngeye; ongeye okubavana luvuvamu lwa ntangwa ke ntangwa, kadi kwa ngeye bebundanga e vuvu.” Muna kuma kiaki, bunda e vuvu muna Yave, vanga mawonso olenda muna tambula nluta mia lusadisu lwandi. Avo ovangidi wo, ovua diaka o nkuma kana nkutu muna ntangw’a mpasi.