1. Nkia diambu osungamenanga vava oyindulanga Yave?

 NGA wayindula kala una Yave kena? Vava omokenanga yandi muna sambu, adieyi oyindulanga? Kana una vo Yave ke monekanga ko, muna Bibila oyikilwanga mu sinsu yayingi. Yave oyikilwanga vo “ntangwa ye ngubu” ye “tiya twambomoni.” (Nku. 84:11; Ayib. 12:29) Muna mona meso, Yezekele wamona e nkal’a Yave nze tadi dia safire, sengwa kia nkezimi ye ntemo a nkongolo. (Yez. 1:26-28) Yankaka muna sinsu yayi isunzulanga e nkal’a Yave, ilenda wokesa o vumi weto muna yandi yovo ilenda kutumwesa wonga.

2. Ekuma wantu ankaka bemwenanga vo diampasi mu finama Yave?

² Wau vo katulendi mona Yave ko, dilenda kala diampasi kwa yeto mu kwikila vo Yave okutuzolanga. Akaka bemonanga vo Yave kalendi kubazola ko mu kuma kia mambu mambi mababwila muna mvu miavioka. Nanga ke basidi kala yo se ko ona wafwana kubasonga o zola. Yave obakulanga wantu awaya ye kuma dilenda kadila diampasi kwa yau mu kumfinama. Muna kutusadisa twatoma kunzaya, Nzambi osengomonanga e fu yandi yambote muna Bibila.

3. Ekuma tufwete toma zayila o zola kwa Yave?

³ O zola, i mvovo utoma sasilanga e kiwuntu kia Yave. (1 Yoa. 4:8) O zola kufilanga mawonso kevanganga. Mu kuma kia zola kwandi, o Nzambi mvani a mvevo, ke songanga kaka zola ko kwa awana bekunzolanga, kansi osonganga ko mpe kana nkutu kwa awana ke bekunzolanga ko. (Mat. 5:44, 45) Mu longi diadi, tulongoka kiwuntu kia Yave yo zola kwandi. Avo tutomene zaya kiwuntu kia Nzambi o zola kweto mpe muna yandi kuwokela.

YAVE OTOMA KUTUZOLANGA

4. Aweyi omonanga mu kuma kia walakazi wa Yave? (Tala mpe e foto.)

⁴ “Yave nkwa walakazi wayingi.” (Yak. 5:11) Muna Bibila Yave  okuyitezanesanga yo ngudi una vo nkwa walakazi. (Yes. 66:12, 13) Yindula o ngudi olunga-lunganga mwan’andi a nsedia kuna zola kwawonso. Unsidi muna nkata yo kumvovesela kuna ngemba muna nding’a kuluka. Avo odidi yovo omwene mpasi, o ngudi ovanganga mawonso muna lungisa e nsatu zandi. Muna ntangw’a mpasi tukalanga ye vuvu vo Yave okutusonga o zola kwandi. Ntozi a nkunga wasoneka vo: “Vava o ntelamw’a moyo unkosomwene, ngeye umfiaulwisi yo kumvuvika.”—Nku. 94:19.

5. O walakazi wa Yave nkia nsasa una kwa ngeye?

⁵ Yave nkwa kwikizi. (Nku. 103:8) Avo tuvangidi diambu diambi, Yave ke kutubembola ko. Nkangu a Isaele, nkumbu miayingi bakendelekanga Yave, kansi vava bavilukanga o ntima yo yambula o bi wau, Nzambi wabasonganga o zola kwandi kulembi suka. Kasikil’owu, wabavovesa vo: “Okitukidi se wantalu ova meso mame, ongeye ozitisu, omono izolele.” (Yes. 43:4, 5) I mpila yayi mpe Yave kekutusongelanga o zola o unu. Ntangwa zawonso tulenda bunda e vuvu muna yandi, ke singa kutubembola ko. Avo tuvilukidi o ntima yo vutuka kwa Yave, tumona vo wakinu kutuzola. Osianga nsilu vo “ololoka emvimba.” (Yes. 55:7) E Bibila kiyikilanga e fu kiandi kia loloka vo, “nsungi ya vutulwisa moyo ituka kwa Yave.”—Mav. 3:19.

6. Nkia diambu tulongokele mu kuma kia Yave muna Zakariya 2:8?

⁶ Tanga Zakariya 2:8. Wau vo Yave okutuzolanga, obakulanga vana vau una tumonanga ye una ye luzolo lwa kututanina. Okendalalanga vava tukendalalanga. Muna kuma kiaki, tulenda kala ye vuvu vo okutuvana e mvutu avo tusambidi vo: “Undunda nze ngengele a disu diaku.” (Nku. 17:8) O meso i yikwa tutoma taninanga muna nitu eto. Ozevo, vava Yave kekututezanesanga ye ngengele a disu diandi, dina nze yandi ovovanga vo ‘konso ndiona okunuvanga e mbi yeno nkangu ame, ovangidi e mbi muna kikwa kisundidi o mfunu omu mono.’

7. Ekuma tufwete kumikina e vuvu kieto muna zola kwa Yave?

⁷ Yave ozolele vo twakala ye vuvu vo ozolanga konso muntu mu yeto. Kansi, Yave ozeye wo mpe vo mu kuma kia mpila zingu kina twakala kiau muna mvu miavioka, tulenda kala yo lukatikisu kana vo okutuzolanga kikilu. Yovo dilenda kala mpe vo owau vena ye mambu mampasi tunuananga mau oma metontanga e vuvu kieto muna zola kwa Yave. Nki kilenda  kutusadisa mu siamisa e vuvu kieto? I longoka una Yave kezolelanga Yesu, akuswa ye yeto awonso.

UNA YAVE KESONGELANGA O ZOLA KWANDI

8. Ekuma Yesu kakadila ye vuvu vo Se diandi watoma kunzolanga?

⁸ Muna mafunda ye mafunda ma mvu bazinga kumosi, Yave yo Mwan’andi anzolwa bakumika e ngwizani yo zola kwau muna muntu yo nkwandi. Omu nsema wawonso, eyayi i ngwizani ina vo yankulu-nkulu. Muna Matai 17:5, tutanganga vo Yave wasia kimbangi kia zola kwandi muna Yesu. Yave wadi vova kaka vo: ‘Ndioyo i yandi iyangalelanga.’ Kansi, wau kazola vo twazaya wo vo otoma zolanga Yesu, wanyikila vo: “Mwan’ame anzolwa.” Yave watoma yangalela mpila muntu o Yesu kakala, musungula vava katambika o moyo andi kuna mvevo muna wete dieto. (Efe. 1:7) Yesu mpe kakala ye lukatikisu ko vo Yave otoma kunzolanga. Yesu wakala ye ziku muna zola kwa Yave. Nkumbu miayingi kavova vo Se diandi otoma kunzolanga.—Yoa. 3:35; 10:17; 17:24.

9. Nkia mvovo usonganga una Yave kezolelanga akuswa? Sasila. (Roma 5:5)

⁹ Yave wasonga mpe vo otoma zolanga akuswa. (Tanga Roma 5:5.) Tala e mvovo, ‘kwazadiswa.’ Nkanda umosi usasilanga oma ma Bibila uvovanga mu kuma kia mvovo wau vo, o zola kuzadiswanga omu yeto nze maza ma nkoko.’ Ekwe nona kiambote kisonganga e mpila ina o Yave kezolelanga akuswa! Akuswa bazeye wo vo “bazolwa kwa Nzambi.” (Yuda 1) Yoane wa ntumwa wasonga una bemonanga vava kasoneka vo: “Nutala e mpila nzola katuzolele o Se, yamu tezo kia kutuyikila vo wan’a Nzambi!” (1 Yoa. 3:1) Nga Yave akuswa kaka kezolanga? Ve. Yave osonganga zola kwandi kwa yeto awonso.

10. Nkia mpila isundidi ina Yave kasongela o zola kwandi muna ngeye?

¹⁰ Nkia mpila isundidi ina Yave kasongela o zola kwandi? I Lukûlu. Muna Lukûlu, Yave wasonga o zola kuna ke kusidi songwa kwa muntu ko. (Yoa. 3:16; Roma 5:8) Yave wavana Mwan’andi a nzolwa kafwa muna wete dia wantu awonso kimana twalolokwa masumu meto yo kala akundi andi. (1 Yoa. 4:10) Konso ntangwa tuyindulanga e ntalu ina Yave yo Yesu bafuta, tutoma bakulanga e mpila bezolelanga konso muntu mu yeto. (Ngal. 2:20) Ke mu kuma kia unsongi wa Nzambi kaka ko kiafutilwa o Lukûlu. I lukau lwa zola. Yave watusonga o zola kwandi muna vana Yesu se kimenga. Yave wayambula vo Mwan’andi kamona e mpasi yo fwa muna wete dieto.

11. Nkia diambu tulongokele muna Yeremiya 31:3?

¹¹ Nze una tulongokele kala, Yave ke kutuzolanga kaka ko, kansi ovovanga mpe vo otoma kutuzolanga. (Tanga Yeremiya 31:3.) Wau vo Yave okutuzolanga, okututuntanga kwa yandi. (Tezanesa ye Nsiku 7:7, 8.) Ke vena lekwa ko ngatu muntu olenda kutuvambula muna zola kwa Nzambi. (Roma 8:38, 39) Aweyi omonanga mu kuma kia zola kwaku? Tanga Nkunga 23 yo bakula una Davidi kamona mu kuma kia zola kwa Yave ye nluta tulenda baka yeto awonso mu kuma kia zola kwa Yave.

AWEYI OMONANGA MU KUMA KIA ZOLA KWA YAVE?

12. Aweyi olenda sasila mu mvovo miankufi o Nkunga 23?

¹² Tanga Nkunga 23:1-6. O Nkunga 23 uwokesanga e vuvu kieto muna zola kwa Yave yo walakazi wandi. Davidi ona wasoneka o nkunga wau wasasila e kangu kakanga yo Yave wa mvungudi andi. Vava Davidi kayambula vo Yave kamfila, wamona vo mu lutaninu kakala ye wambundanga e vuvu. Davidi wazaya wo vo Yave okunsonga o zola e lumbu yawonso ya zingu kiandi. Nki kiasadisa Davidi mu kala ye vuvu kiaki?

13. Ekuma Davidi kakadila ye ziku vo Yave okunlunga-lunga?

 ¹³ “Kikondwa lekwa ko.” Davidi zingu kiambote kakala kiau, kadi Yave wamvananga yawonso kavuanga o mfunu. Davidi wakala mpe ye ngwizani ambote yo Yave yo vua e dienga diandi. Ekiaki i kuma kakadila ye ziku vo kiakala nkia diambu dibwa muna zingu kiandi, Yave okwamanana lungisa e nsatu zandi zawonso. Ekolo Davidi kabundanga e vuvu muna zola kwa Yave yo lusadisu lwandi, diansadisanga mu lembi tokana yo yangalela ina kakala yau.—Nku. 16:11.

14. Aweyi Yave kalenda kutulunga-lungila kuna zola?

¹⁴ Yave okutulunga-lunganga kuna zola kwawonso, musungula vava tulwakilwanga mambu mampasi muna zingu. Mpangi ankento Claire, a ona wasadila kuna Betele mu mvu 20, kazaya ko una kalenda sadisila e yitu yandi ana banuananga ye mambu mayingi mampasi. Se diandi wabakama kimbevo kia trombose, mpangi andi ankento wavaikiswa mu nkutakani, e kinkita kia kanda diau kiabwa, e nzo au yakutumunua kwa banco mu kuma kia mfuka. Aweyi Yave kabalunga-lungila? Mpangi Claire wavova vo: “Yave wavananga kwa yitu yame ina bavuanga o mfunu muna konso lumbu. Nkumbu miayingi o Yave watuvananga lutila ina twavuanga o mfunu. Ezak’e ntangwa iyindulanga una Yave katusongela o zola. Kilendi vilakana o zola kwandi ko. Ediadi dikunsadisanga mu kwamanana kunsadila ye kiese kana nkutu muna ntangw’a mpasi.”

15. Ekuma Davidi kavuvamena? (Tala mpe e fwaniswa.)

¹⁵ “Okumvuvikanga.” Ezak’e ntangwa, Davidi wakendalalanga mu kuma kia mpasi zawonso ye ntonta kawanananga zau. (Nku. 18:4-6)  Kansi, o zola kwa Yave ye mpila kanlunga-lungilanga, yamvuvikanga. Yave wafila nkundi andi ona wayoya muna “madilu ma titi ya nkunzu” ye “muna fulu ya vundila ina yo maza.” Muna diadi, Davidi wakumama yo kwamanana sadila Yave ye kiese kiawonso.—Nku. 18:28-32.

16. O zola kwa Yave aweyi kukuvuvikilanga?

¹⁶ Diau dimosi mpe o unu, “muna kuma kia walakazi wa Yave i tulembele fukisilwa” muna mambu mawonso mampasi tuwanananga mau. (Man. 3:22; Kol. 1:11) Yindula nona kia mpangi Rachel. Wakendalala kibeni vava nkaz’andi kambembola yo bembola mpe Yave muna kolo kia vuku kia COVID-19. Aweyi Yave kasadisila mpangi Rachel? Wavova vo: “Yave wavanga mawonso muna kunsonga vo watoma kunzolanga. Wampana ulolo wa akundi ana bakala yame yo kuntwasila madia, kuntwikila mensage za lukasakeso, sono ya Bibila, basevanga yame yo kunsungamesa vo Yave wakinu kundunga-ndunga. Ntangwa zawonso ivutulanga matondo mu kuma kia kanda diadi diambote kampana Yave.”

17. Ekuma Davidi ‘kamwena wonga wa mbi ko’?

¹⁷ “Kimona wonga wa mbi ko, kadi ongeye una yame.” E zingu kia Davidi nkumbu miayingi kiakalanga mu vonza. Wakala mpe ye mbeni zayingi za nkuma. Kansi, mu kuma kia zola Yave kansonganga, wakimwenanga vo mu lutaninu kakala. Muna mambu mawonso kawanananga mau, Davidi wamonanga vo Yave wakala yandi, ediadi diamvana e vuvu kiasikila. Ekiaki i kuma kayimbidila vo: “[Yave] umpevuele muna wonga wame wawonso.” (Nku. 34:4) Kana una vo ezak’e ntangwa Davidi wonga wayingi kamonanga; walendanga o sunda wonga, kadi wazaya wo vo Yave wanzolanga.

18. Okala ye vuvu vo Yave okuzolanga aweyi dilenda kukumikina avo obakamene wonga?

¹⁸ Ozaya vo Yave okutuzolanga aweyi dilenda kutukumikina vava tubwilwanga mambu malenda kutuvumisa? Mpangi ankento Susi una vo mviti a nzila wasasila una kamona yo nkaz’andi vava mwan’au ayakala kayivonda: “Avo sumbula kibwididi kuna kinsalukisa, mpasi kikilu dikuvanga yo yantika kuyimwene vo kuna ye lutaninu ko. Kansi, muna kuma kia walakazi wa Yave twamona vo mu lutaninu twakala.” Mpangi Rachel ona tuyikidi kala wavova vo: “Lumbu kimosi muna fuku vava yamona ntantu zayingi yo bakama kwa ntelamw’a moyo yo wonga, yasamba kwa Yave muna nding’a ngolo. Vana vau yamona vo Yave wavuvika o ntim’ame nze una ngudi kevuvikilanga mwan’andi ansedia, i bosi yabakama o tulu. Kisinga vilakana  diambu diadi ko.” Mpangi Tasos una vo nkuluntu, mu kuma kia lembi tambulwila kota mu kisoladi, mvu yá kaviokesa muna pelezo. Aweyi kamwena o zola ye lusadisu lwa Yave? Wavova vo: “Yave wansadisa muna mawonso yavuanga o mfunu, wampana nkutu lutila ina yavuanga o mfunu. Ediadi diakumika kikilu e vuvu kiame muna yandi. Kana una vo okala muna pelezo nkenda kaka ditwasanga, muna lusadisu lwa mwanda andi, Yave wampana e kiese. Ediadi diansadisa mu bakula vo avo mbundidi emvimba e vuvu muna Yave, nluta miayingi itambula muna wete wandi. Muna diadi yayantika sala se mviti a nzil’a ngonde ke ngonde ekolo yakala muna pelezo.”

FINAMA NZAMBI AKU UNA VO NKWA WALAKAZI

19. (a) Ozaya wo vo Nzambi okutuzolanga, aweyi dilenda vanga muna sambu yeto? (b) Nkia mambu ma zola kwa Yave matomene simba o ntim’aku? (Tala e babu “ Mvovo Milenda kutusadisa mu Mona o Zola kwa Yave.”)

¹⁹ E nona yayi tuyikidi yawonso isonganga vo Yave wa “Nzambi a zola” una yeto. (2 Kor. 13:11) Ovuanga konso muntu omu yeto o mfunu. Tuna ye ziku vo “o walakazi wandi utuzietele.’ (Nku. 32:10) Avo tutomene badika e mpila ina Yave kekutusongelanga o zola kwandi, tutoma bakula una kekutusadisilanga ye tutoma kumfinama. Tulenda samba kwa yandi kondwa kwa wonga yo kunzayisa vo tutoma yangalalanga o zola kwandi. Tulenda kunzayisa ntokani zeto zawonso, kadi tuna ye ziku vo okutubakula ye una ye tima dia kutusadisa.—Nku. 145:18, 19.

20. O zola kwa Yave aweyi kukutusadisilanga mu toma kumfinama?

²⁰ Wauna e mbangazi a tiya ikutuyandulwilanga muna nsungi a kiozi, o zola kwa Yave kukutufiaulwisanga vava tukalanga mu mpasi yo bangikwa. Kana una vo o zola kwa Yave kwa nkuma, kuzele mpe yo walakazi. Muna kuma kiaki, kala ye kiese wau vo Yave okuzolanga. Yambula yeto awonso twatambulwila o zola kwandi mu mvovo emi: “Izolanga Yave.”—Nku. 116:1.